1-2. (a) Mwomwo ika twatela kutalilila kwiza chajita yaAlamangetone? (b) Vihula muka natushimutwila muchihande chino?

UNO mwevwaho lyehi vatu navahanjika Alamangetone hakuvuluka jita yamatendazungu chipwe ukalu weka wakulijila tahi? Mbimbiliya kayalumbununa kaha vyuma vyavipi kutalisa kujita yaAlamangetoneko. (Kuso. 1:3) Jita yaAlamangetone nayikayovola vatu vakwoloka. Mujila muka?

² Mbimbiliya yasolola ngwayo, jita yaAlamangetone nayikayovola vatu nakufumisako chiyulo chavatu. Jita kana nayikanongesa vaka-kuhuka nakuyovola vaka-kwoloka. Kaha nawa nayikakinga pulaneti yetu yamavu kuchina kuyenyeka. (Kuso. 11:18) Tushimutwilenu havihula viwana vize navishindakanya hachishina kanechi. Alamangetone yapwa ika? Vyuma muka navikasoloka shimbu kanda Alamangetone? Vyuma muka twatela kulinga mangana tukapwe hamukana wavaze navakayovoka? Kaha vyuma muka twatela kulinga mangana tupwenga lika vakushishika omu Alamangetone yili nakupandama?

3. (a) Uno “Alamangetone” yalumbununa ika? (b) Kweseka naKusoloka 16:14, 16, mwomwo ika natwambila ngwetu Alamangetone kayapwa chihela chiveneko?

³ Tangenu Kusoloka 16:14, 16. Lizu “Alamangetone” lyasoloka kaha kamwe muVisoneka. Lizu kana lyafuma kulizu lyachiHepeleu lize lyalumbununa “Pili yaMengito.” (Kuso. 16:16; kwinyikila chamwishi) Mengito yapwilenga nganda muIsalele yakushikulu. (Yoshu. 17:11) Oloze Alamangetone kayapwa lijina lyachihela chimwe chahano hamavuko. Alamangetone yatalisa kukulikungulula “[cha]vamyangana vahamavu hosena” mangana vemanyine Yehova nakole. (Kuso. 16:14) Kaha nawa muchihande chino natuzachisa  lizu “Alamangetone” kutalisa kujita yize nayikapwako omu navakalikungulula vamyangana vosena vahamavu. Uno tunatachikiza ngachilihi ngwetu Alamangetone yatalisa kuchihela chachifwanyisa? Chatete, kakwatwama pili yaMengitoko. Chamuchivali, numba vene nge pili kana kuyatwama, kachi kayeshi kuhasa kupwa nachihela navata “vamyangana vahamavu hosena[ko].” Chamuchitatu, nganomu natulinangula muchihande chino, jita yaAlamangetone nayikaputuka omu “vamyangana vahamavu” navakalukuka vatu jaKalunga vaze vatwama hamavu hosena.

4. Mwomwo ika Yehova esekesela jita yenyi yayinene kuAlamangetone?

⁴ Mwomwo ika Yehova esekesela jita yenyi yayinene kuMengito? Chihela chaMengito naChinema chaYezelele kukiko vazungilililenga jijita jajivulu. Shimbu jimwe, Yehova akafwilenga vatu jenyi mangana vafungulule jijita kana. Chakutalilaho, “kumeya akuMengito” Yehova akafwile Muka-kuyula wavaIsalele Mbalake mangana afungulule maswalale javaKanane vaze vatwaminyinyine kuli kapitau kamaswalale Shisela. Mbalake nakapolofweto wapwevo Ndevola vasakwililile Yehova hakufungulula jita kana. Vembile ngwavo: “Vatanganyika vazungile mwilu, vazungile naShisela oku vali muuhichilo wavo mwilu. Mwanakalwiji Kishone ahungumwine vaka-kole, Mwanakalwiji wakushikulu, ou mwanakalwiji Kishone.”—Kuyu. 5:19-21.

5. Uno jita yaAlamangetone nayikalihandununa ngachilihi najita yize alwile Mbalake?

⁵ Mbalake naNdevola vakukulwile mwaso kana namazu akwamba ngwavo: “Ove Yehova, vaka-kole jove vosena vanonge, oloze vaze vakuzanga vapwenga nge likumbi lize lili nakututuka naupahu walyo.” (Kuyu. 5:31) Hajita yaAlamangetone nawa, vakakole jaKalunga navakavanongesa oloze vaze vazanga Kalunga navakavayovola. Oloze hatwama chihandwa chachinene hali eji jijita jivali. Hajita yaAlamangetone vatu jaKalunga kaveshi kukalwako, kaha nawa kaveshi kukapwa navitwako. Oloze ‘navakakwata ngolo hakuunda nakufwelela’ Yehova namazavu enyi avaka-jita vamwilu.—Isa. 30:15; Kuso. 19:11-15.

6. Vyuma muka vize Yehova nahase kukazachisa hakufungulula vaka-kole jenyi haAlamangetone?

⁶ Vyuma muka vize Yehova nahase kukazachisa hakufungulula vaka-kole jenyi haAlamangetone? Nahase kukazachisa vyuma vyakulisezaseza. Chakutalilaho, nahase kukazachisa mindenda, chipwe peho yanyamanganda chipwe miveso. (Yopa 38:22, 23; Ezeke. 38:19-22) Nahase nawa kukalingisa vaka-kole jenyi vakalifumbukile mwavomwavo. (Miji. 2, 20:17, 22, 23) Kaha nawa nahase kukazachisa vangelo jenyi vakajihe vaka-kuhuka. (Isa. 37:36) Tunejiva ngwetu Kalunga mwakafungulula vaka-kole jenyi chamokomoko navyuma mwakazachisa hakulwa jita. Vaka-kole jenyi vosena mwakavanongesa. Kaha vaka-kwoloka vosena mwakavalwila.—Vishi. 3:25, 26.

7-8. (a) Kweseka naWavaka-Tesolonyika 1, 5:1-6, mutambi muka navakatambakana vaka-kuyula vamukaye? (b) Mwomwo ika mutambi kana naukahakila vatu muponde?

⁷ Mutambi ‘wakuunda namukingo’ naukapwako shimbu kanda “likumbi lyaYehova.” (Tangenu Wavaka-Tesolonyika 1, 5:1-6.) “Likumbi lyaYehova” vavuluka hali Wavaka-Tesolonyika 1, 5:2 lyatalisa ‘kuluyando lwalunene.’ (Kuso. 7:14) Natukejiva ngachilihi ngwetu luyando lwalunene kalinwomu luputuke? Mbimbiliya yahanjika hamutambi uze navakavilika. Mutambi kana naukapwa katachikijilo kakwijivilaho ngwetu luyando lwalunene kalinwomu luputuke.

⁸ Ou mutambi ukiko uze vavulukilile chimweza ngwavo mutambi ‘wakuunda namukingo.’ Mwomwo ika vaka-kuyula vamukaye navakatambakanyina mutambi kana? Uno navatwamina vamukwitava navakazana mukuvilika mutambi kana tahi? Pamo vene. Chipwe ngocho, mutambi kana naukapwa himakuli akufuma kuli vandemone. Oloze makuli kanawa nawakahaka vatu muponde, mwomwo nawakalingisa vatu vakalivwe kupwa vakukingiwa shimbu kanda luyando lwalunene luze kanda lusolokengaho lyehi luputuke. Halwola kana “kunongesa chakuvakasumuna  hinachivawana hahaze vene, nganomu misongo yakusema nayiwana pwevo ali nalijimo.” Jino vyuma muka navikasoloka kuli vangamba jaYehova vakushishika? Vanahase kukalikomokela hakumona omu likumbi lyaYehova nalikaputuka mukukasumuna, oloze kalyeshi kukavakasumunako.

9. Uno Kalunga mwakanongesa kaye kaSatana halwola lumwe tahi?

⁹ Yehova keshi kukanongesa kaye kaSatana halwola lumwe ngana muze alingile mumakumbi aNowako. Oloze mwakavangila kunongesa chihanda chimwe numba jino akanongese kaye kosena. Mwakavangila kunongesa Mbavilone Yayinene, yize yemanyinako kwitava chamakuli chosena. Kaha hajita yaAlamangetone, mwakanongesa kaye kaSatana kosena kuhakilako vene namauka amapolitiki, navaka-kulwa jita vosena namauka avaka-kusekasana. Tutalenu jino hali evi vihanda vivali.

10. Kweseka namukanda waKusoloka 17:1, 6; 18:24, mwomwo ika Yehova mwakanongesela Mbavilone Yayinene?

¹⁰ ‘Kusopesa pwevo muka-kulinga ujila chikuma.’ (Tangenu Kusoloka 17:1, 6; 18:24.) Mbavilone Yayinene yinalingisa vatu vavavulu vasaule lijina lyaKalunga. Kaha nawa yinanangula vatu vyuma vyamakuli hali Kalunga, nakulinga ujila wakushipilitu hakulikata navaka-kuyula vahamavu. Mbavilone Yayinene yize yemanyinako kwitava chamakuli yinazachisanga ngolo jayo hakuyanjisa vatu vaze vatwamamo nakuvalila jimbongo javo. Yinamwangenga manyinga amavulu kuhakilako namanyinga avangamba jaKalunga. (Kuso. 19:2) Uno Yehova mwakanongesa ngachilihi Mbavilone Yayinene?

11. Uno uze “chisuma uchila” apwa iya, kaha Kalunga mwakamuzachisa ngachilihi hakuzangamisa Mbavilone Yayinene?

¹¹ Yehova mwakazachisa “jimbinga 10” jauze “chisuma uchila” hakunongesa “pwevo muka-kulinga ujila chikuma.” Ou chisuma wachifwanyisa emanyinako liuka lyaUnited Nations. Kaha jize jimbinga 10, jemanyinako viyulo vyamapolitiki viliko vize vyeji kukundwizanga liuka lyaUnited Nations. Evi viyulo vyamapolitiki navikafumbukila Mbavilone yachifwanyisa halwola atongola Kalunga. Viyulo kana ‘navikamwenyeka nakumuseza uselesele’ hakupupa luheto lwenyi nakusolola  hatoma vilinga vyenyi vyakuhuka. (Kuso. 17:3, 16) Kunongesa kanechi chakukasumuna nachikasoloka kwijiva nge chinalingiwa mulikumbi lyangongo, nakukalingisa vatu vaze veji kukundwizanga Mbavilone Yayinene vakalikomokele chikuma. Navakalikomokela mwomwo uze pwevo nalivwimbinga hakwamba ngwenyi: “Ami ngwapwa ngumwangana uze eji kuyulanga, keshi ngutuliweko, kaha kangweshi kukevwa ushonako.”—Kuso. 18:7, 8.

12. Chuma muka chize Yehova keshi kuketavisa vaka-mafuchi kukalingako, kaha mwomwo ika?

¹² Kalunga keshi kuketavisa vaka-mafuchi vakanongese vatu jenyiko. Vatu jenyi veji kuvilikanga lijina lyenyi, kaha nawa vakavangiza lushimbi avahana lwakwamba ngwenyi, fumenu muli Mbavilone Yayinene. (Vili. 15:16, 17; Kuso. 18:4) Kaha nawa vanakafwe vatu vavavulu vafume muli Mbavilone Yayinene. Shikaho, vatu jaYehova kaveshi “kukamona vihuli vimwe mwakamona ikiyeko.” Chipwe ngocho, vatela kukapwa nalufwelelo lwakukola numba vakahase kumika muvyeseko vyeka.

13. (a) Uno Ngonge apwa iya? (b) Kweseka namukanda waEzekele 38:2, 8, 9, chuma muka nachikaneha Ngonge kuchihela chachifwanyisa vavuluka ngwavo Alamangetone?

¹³ Kufumbukila chaNgonge. (Tangenu Ezekele 38:2, 8, 9.) Omu mauka akwitava chamakuli navakawanongesa, vatu jaKalunga vakiko kaha navakasalaho kwijiva nge mutondo uze unayovoka kupeho yanyamanganda. Echi nachikalingisa Satana akakwate matoto. Mwakazachisa vandemone vakambembejeke vatu namijimbu yamakuli chipwe ngwetu “mazu vahwima amapi” mangana akalingise vaka-mafuchi vakalifutule nakufumbukila vangamba jaYehova. (Kuso. 16:13, 14) Echi kulifutula chavaka-mafuchi chikiko vavuluka ngwavo “Ngonge, wakulifuchi lyaMangonge.” Omu vaka-mafuchi navakafumbukila vatu jaKalunga nachikasoloka kwijiva nge vaneza kuchihela chachifwanyisa vavuluka ngwavo Alamangetone.—Kuso. 16:16.

14. Chuma muka mwakatachikiza Ngonge?

¹⁴ Ngonge mwakafwelela “hangolo javatu,” chipwe ngwetu hamaswalale jenyi vangolo. (Miji. 2, 32:8) Oloze etu natukafwelela muli Kalunga ketu Yehova, numba tuhu vaka-mafuchi  navakachimona kupwa hiuleya. Navakapwa navishinganyeka kana mwomwo tulunga twaMbavilone Yayinene kavahashile kuyiyovola omu vayinongesele kuli ‘uze chisuma najimbinga jenyi 10.’ (Kuso. 17:16) Shikaho vaka-mafuchi navakashinganyeka ngwavo nayetu navakatunongesa. Navakafumbukila vatu jaYehova “ngana muze mavwi eji kufwikanga lifuchi.” (Ezeke. 38:16) Oloze Ngonge chipwe ngwetu ava vaka-mafuchi hakulinga chuma kana navakalinehela vavene ukalu. Ngana muze chapwile kuli Fwalo haKalungalwiji Uchila, naNgonge mwakamona jino ngwenyi ali nakuzunga naYehova.—Kulo. 14:1-4; Ezeke. 38:3, 4, 18, 21-23.

15. Vyuma muka mwakalinga Kulishitu haAlamangetone?

¹⁵ Kulishitu namazavu avaka-kwasa jita vamwilu navakinga vatu jaKalunga nakunongesa vaka-mafuchi namaswalale javo. (Kuso. 19:11, 14, 15) Jino vyuma muka navikasoloka kuli Satana uze apwa muka-kole wamunene waYehova, uze mwakahanjika makuli nakulingisa vaka-mafuchi vakavanongese haAlamangetone? Yesu mwakambila Satana navandemone jenyi muwina wakuzeneka kukuma, muze mwakavasokelela hamyaka 1,000.—Kuso. 20:1-3.

16. (a) Tunahase kusolola ngachilihi ngwetu ‘twatachikiza Kalunga’? (b) Uno kutachikiza Yehova nachikatunganyalisa ngachilihi haAlamangetone?

¹⁶ Numba tupwa vavahya mumuchano chipwe tunashimbulamo, twatela kusolola hatoma ngwetu ‘twatachikiza Kalunga’ ‘nakwononoka kumujimbu wamwaza wakuvuluka Mwata wetu Yesu’ numba vakatuyovole. (Teso. 2, 1:7-9) Tweji ‘kutachikizanga Kalunga’ hakwijiva jishimbi jenyi navyuma azanga navize ahunga. Kaha nawa tweji kusololanga hatoma ngwetu twamutachikiza hakumuzanga nakumwononoka nakumuzachila namuchima wetu wosena. (Yowa. 1, 2:3-5; 5:3) Kachi nge natusolola ngwetu twazanga Kalunga, kaha natupwa vakutokwa ‘hakututachikiza kuli ikiye.’ Mwomwo kututachikiza kuli Kalunga nachikatulingisa vakatuyovole haAlamangetone. (Koli. 1, 8:3) Mujila muka? ‘Kututachikiza kuli Kalunga’ nachikatulingisa akatwivwile uselewa.

17. Uno “kwononoka kumujimbu wamwaza wakuvuluka Mwata wetu Yesu” chalumbununa ika?

¹⁷ ‘Mumujimbu wamwaza wakuvuluka Mwata wetu Yesu,’ mwaliweza vyuma vyosena anangwilenga  vize vasoneka muMazu aKalunga. Tweji kwononokanga kumujimbu wamwaza hakuzachisa vyuma tweji kulinangulanga, kulumbununa kuhaka vyuma vyaWangana kulutwe mukuyoya chetu, nakukavangiza jindongi jaKalunga jakwoloka nakwambulula mujimbu waWangana waKalunga. (Mateu 6:33; 24:14) Chalumbununa nawa kukundwiza vandumbu jaKulishitu vawavisa omu vali nakuzata mulimo waunene.—Mateu 25:31-40.

18. Uno vaka-Kulishitu vawavisa navakafweta ngachilihi mikoko veka vaze vavakafwile omu vapwile hano hamavu?

¹⁸ Kalinwomu vawavisa vafwete ‘mikoko veka’ mwomwo vavakafwilenga. (Yowa. 10:16) Mujila muka? Shimbu kanda Alamangetone yiputuke, vaze 144,000 vosena navakapwa mwilu nakupwa nakuyoya chakushipilitu chakuzeneka kupola. Navakapwa halizavu lyavaka-kwasa jita vamwilu vaze navakanongesa Ngonge nakukinga “liyongomena lyalinene” lyavatu vaze vafwana nge mikoko. (Kuso. 2:26, 27; 7:9, 10) Chikupu vene, liyongomena lyalinene nalikatokwa chikuma mwomwo yakukundwiza vangamba jaYehova vawavisa omu vapwile hano hamavu.

19-20. Numba tuhu tuli nakumona ukalu, tunahase kupwa ngachilihi vakushishika omu Alamangetone yili nakupandama?

¹⁹ Mumakumbi ano akukuminyina, etu vatu jaYehova tuli nakuhita muvyeseko vyavivulu. Numba tuli nakumona ukalu kana, oloze twapwa vakuwahilila. (Yako. 1:2-4) Chuma chili nakutukafwa shina kulomba nalukakachila. (Luka 21:36) Katwatela kukumina kaha hakulombako, oloze twatela kutanganga Mazu aKalunga nakushinganyekanga havyuma tunatange. Twatela nawa kushinganyeka haupolofweto uze wahanjika havyuma vili nakutesamo makumbi ano. (Samu 77:12) Kulinga vyuma kanevi, nakwazana mumulimo wakwambulula navitukafwa tupwenga nalufwelelo lwakukola nakulingisa lutalililo lwetu luzame.

²⁰ Achishinganyekenu ocho kuwaha namukevwa omu Mbavilone Yayinene navakayifumisako, nomu nawa jita yaAlamangetone nayikakuma! Chachinenenyi, natukawahilila chikuma omu lijina lyaKalunga nawata wenyi navakavijilika. (Ezeke. 38:23) Chikupu vene, tuli nakutalilila kwiza chaAlamangetone mwomwo nayikanganyalisa vatu vaze vatachikiza Kalunga, nakwononoka Mwanenyi nakupwa vakumika palanga nakusongo.—Mateu 24:13.