Chihande Chakulinangula 38
“Twayenu Kuli Ami, . . . Kaha Ami Nangumihizumuna”
“Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna.”—MATEU 11:28.
MWASO 17 “Ngunasake Vene”
VYUMA NATUSHIMUTWILA *
1. Mazu muka Yesu alwezele liyongomena aze vasoneka hamukanda waMateu 11:28-30?
YESU alwezele liyongomena lize lyapwile nakumwivwilila ngwenyi: “Twayenu kuli ami, . . . kaha ami nangumihizumuna.” (Tangenu Mateu 11:28-30.) Awa mazu kawapwile amokomokoko, oloze apwile naulumbunwiso. Chakutalilaho, achishinganyekenu vyuma alingile Yesu kuli pwevo uze ayanjiwile namusongo waupi.
2. Vyuma muka alingile Yesu kuli uze wapwevo apwile nakuviza?
2 Ou pwevo apwile muukalu waunene chikuma, ngocho asakiwile kumukafwa. Ayilenga kuli vimbuke vavavulu hakushinganyeka ngwenyi navamuka. Ayanjile hamyaka 12, oloze kakwapwile chimbuke wakumukako. Kaha kweseka naJishimbi jize Kalunga ahanyine Mose, ou pwevo apihile. (Levi 15:25) Jino evwile ngwavo Yesu apwile nakuka vaze vapwile nakuviza, ngocho ayile nakumutonda. Omu amuwanyine, akwachile kujizombo jauvwalo wenyi wahelu, kaha hahaze vene ayoyele kumusongo wenyi. Yesu amukile nakumuvumbika nakumusolwela likoji. Chakutalilaho, amuvumbikile hakumwamba ngwenyi: “Ove mwanami.” Chikupu vene, mazu kana ahizumwine uze pwevo nakumuhana ngolo.—Luka 8:43-48.
3. Vihula muka natukumbulula?
3 Nyingililenu ngwenu uze pwevo ikiye ayile kuli Yesu. Alikatukilile ivene nakuya kuli Yesu. Nayetu nawa, twatela kulikatukila etu vavene ‘nakuya kuli’ Yesu. Makumbi ano Yesu keshi kuka vatu vaze vali ‘nakuya kuli’ ikiyeko. Chipwe ngocho, ali nakutusanyika ngwenyi: “Twayenu kuli ami, . . . kaha ami nangumihizumuna.” Muchihande chino natukumbulula vihula 5. (1) Uno tunahase ‘kuya’ ngachilihi kuli Yesu? (2) Uno Yesu alumbunwine ika hakwamba ngwenyi: “Mbatenu toka yami”? (3) Vyuma muka natulinangula kuli Yesu? (4) Mwomwo ika mulimo uze atuhana weji kutuhizumunanga? (5) Kaha tunahase kutwalaho ngachilihi kupwa vakuhizumuka hakumbata toka yaYesu?
“TWAYENU KULI AMI”
4-5. Uno tunahase kuya ngachilihi kuli Yesu?
4 Jila yimwe tunahase ‘kuyilamo kuli’ Yesu shina kulinangula tutachikize vyuma vyavivulu vize ahanjikile navize alingilenga. (Luka 1:1-4) Kakweshi mutu nahase kutulingila chuma kanako, oloze twatela kutanga mijimbu kana etu vavene. Tunahase nawa ‘kuya kuli’ Yesu hakulisakwila etu vavene vatumbapachise mangana tupwenga tutumbaji twenyi.
5 Jila yikwavo tunahase kuyilamo kuli Yesu shina hakuyanga kuli vakulwane nakuvalweza ukalu wetu. Yesu eji kuzachisanga “malunga” kana ava mangana vazakame mikoko jenyi. (Efwe. 4:7, 8, 11; Yowa. 21:16; Petu. 1, 5:1-3) Twatela kuvalwezanga ukalu wetu mangana vatukafwe. Twatela kwijiva ngwetu tulama kaveshi kuhasa kutachikiza vyuma tuli nakushinganyeka nakwijiva vyuma tuli nakusakako. Achitalenu vyuma ahanjikile ndumbwetu walunga Julian. Ambile ngwenyi: “Ngwafumine haMbetele mwomwo yamisongo, kaha sepa lyami umwe angulwezele ngwenyi ngulweze vakulwane mangana vangukolezeze. Hakavanga ngwashinganyekele ngwami vakulwane kavatela kungukafwako. Oloze kutwala muze, ngwalwezeleko tulama vavali vangukafwe, kaha mazu vahanjikile angukolezezele chikuma.” Vakulwane vakushishika vakufwana nge vaze vatambukililile Julian, vanahase kutukafwa tutachikize “vishinganyeka vyaKulishitu.” (Koli. 1, 2:16; Petu. 1, 2:21) Ou ukiko wana waulemu veji kutuhananga vakulwane.
“MBATENU TOKA YAMI”
6. Uno Yesu alumbunwine ika hakwamba ngwenyi: “Mbatenu toka yami”?
6 Yesu hakwamba ngwenyi: “Mbatenu toka yami,” pamo alumbunwine ngwenyi “ngwononokenunga.” Kaha nawa pamo alumbunwine ngwenyi ‘twatela kwingila mutoka hamwe naikiye mangana tuvosena tuzachile Yehova.’ Chamokomoko nakala mweshomwo atwalile, twatela kwijiva ngwetu kumbata toka yaYesu chasakiwa kukilikita.
7. Kweseka namukanda waMateu 28:18-20, mulimo muka uze vatuhana, kaha chuma muka twatela kufwelela?
7 Tweji kwitavilanga mazu aYesu hakulihana kuli Yehova nakutumbapachisa. Yesu asanyika vatu vosena, kaha keshi kukana mutu numba umwe uze mwasaka kuzachila Kalungako. (Yowa. 6:37, 38) Vaka-kukavangiza Kulishitu vosena vavahana mulimo uze Yehova ahanyine Yesu. Twafwelela chikupu ngwetu, Yesu mwatwalaho lika kupwa nayetu nakutukafwa kuzata ou mulimo.—Tangenu Mateu 28:18-20.
‘LINANGULENU KULI AMI’
Hizumunenunga vakwenu ngana muze alingile Yesu (Talenu palangalafu 8-11) *
8-9. Mwomwo ika vatu vakulinyisa vayililenga kuli Yesu, kaha vihula muka twatela kulihulisa?
8 Vatu vakulinyisa vejilenga kuli Yesu. (Mateu 19:13, 14; Luka 7:37, 38) Mwomwo ika? Tuchitalenu hachihandwa chapwile hali Yesu navatwamina vavaFwaliseu. Vatwamina kana kavapwilenga nazangiko kaha nawa vapwilenga vakulivwimba. (Mateu 12:9-14) Oloze Yesu apwilenga nazangi kaha nawa wakulinyisa. Vafwaliseu vapwile vakulivwimba kaha nawa valimwenenga kupwa vavalemu. Yesu anangwile tumbaji twenyi vamonenga vakwavo kupwa vavalemu nakuhona kupwa vakulivwimba. (Mateu 23:2, 6-11) VaFwaliseu vevwishilenga vakwavo woma nakuvatwama chivwoto. (Yowa. 9:13, 22) Oloze Yesu ahizumwinenga vatu hakuvalingila vyuma vyamwaza nakuvahanjikisa mujila yalikoji.
9 Vyuma muka munalinangula kuli Yesu? Lihulisenu ngwenu: ‘Uno vatu vangumona kupwa nguwakulinyisa kaha nawa nguwamuvwovu tahi? Uno ngweji kulisuulanga kuzata milimo yize vamona vatu kupwa yamokomoko mangana ngukafwe vakwetu tahi? Uno ngweji kusolwelanga vakwetu likoji tahi?’
10. Uno vatu vevwilenga ngachilihi kuzata naYesu?
10 Yesu apwile navilinga vyamwaza, ngocho vatu vachiwanyinenga kupwa chachashi kupandama kuli ikiye kaha nawa alivwishilenga kuwaha kuvanangula. (Luka 10:1, 19-21) Akolezezele tumbaji twenyi vahulisenga vihula, kaha asakile nawa kwijiva vishinganyeka vyavo havihula vimwe. (Mateu 16:13-16) Echi chalingishile tumbaji vafukile ngana muze jimbuto vatumba kumeya jeji kufukilanga. Valinangwile vyuma vyavivulu kuvyuma vize anangwilenga Yesu, ngocho vafukilile chikuma.
Pwenu vavashi kuhanjikisa
Zatenunga natwima
Pwenunga vakulinyisa nakuzata nangolo *
11. Vihula muka twatela kulihulisa?
11 Uno mwatwama nangolo jakutwaminyina vakwenu tahi? Nge mukiko kaha lihulisenu ngwenu: ‘Uno vakwetu ngweji kuzatanga navo kumilimo chipwe vaze ngwatwama navo, veji kuchiwananga kupwa chachashi kupandama kuli ami tahi? Kutala ngweji kunehanga kuunda kumilimo chipwe kuzuvo yami tahi? Uno ngweji kukolezezanga vakwetu vahulisenga vihula tahi? Kutala ngweji kwivwililanga vyuma navahanjika tahi?’ Katwatela kupwa ngana mwavaFwaliseu vaze vakwachililenga matoto vatu vaze vavahulishilenga, nakuyanjisa nawa vaze vahanjikilenga vyuma vize vyalihandunwine navize valikashilenga vakikoko.—Mako 3:1-6; Yowa. 9:29-34.
“NAMUPWA VAKUHIZUMUKA”
12-14. Mwomwo ika mulimo atuhana Yesu weji kutuhizumwinanga?
12 Mwomwo ika kuzata mulimo uze atuhana Yesu cheji kutuhizumwinanga? Kuli vyuma vyavivulu, oloze tushimutwilenuko vyavindende kaha.
13 Tukwechi tulama vamwenemwene. Yehova uze apwa Kalama Wakulitulaho apwa muka-kusakwilila, kaha nawa wamwaza muchima. Amona mulimo tweji kuzatanga kupwa waulemu. (Hepe. 6:10) Kaha nawa eji kutuhananga ngolo jakuzata milimo yize atuhana. (Koli. 2, 4:7; Ngale. 6:5) Mwangana wetu Yesu atuhana chakutalilaho chamwaza chikuma. (Yowa. 13:15) Kaha nawa tulama vaze veji kututwaminyinanga veji kwesekanga kulondezeza Yesu uze apwa “kafunga kamikoko wamunene.” (Hepe. 13:20; Petu. 1, 5:2) Veji kuzatanga nangolo javo josena mangana vasolole likoji, nakukolezeza vakwavo, nakupwa vakumika hakutulisa kushipilitu nakutukinga.
14 Tukwechi masepa vamwenemwene. Kakweshi vatu veka hano hamavu vakwechi masepa vamwenemwene nakulinunga hakuzata mulimo waulemu nge yetuko. Tweji kuzatanga navandumbwetu vaze vatwama navilinga vyamwaza, vaze kavalimona vavene kupwa vavalemu kuhambakana vakwavoko. Vakwechi uhashi wakulinga vyuma oloze kavalivwimbako, kaha nawa vamona vakwavo kupwa vavalemu kuhambakana vakiko. Vatumona kupwa tuvakwavo mutwazachila milimo kaha nawa tumasepa javo. Kaha usepa kana wapwa wakukola chikuma, kaha vanahase nakulisuula kutufwila.
15. Tweji kwivwanga ngachilihi hamulimo tweji kuzatanga?
15 Tukwechi mulimo wamwenemwene. Tweji kunangulanga vatu muchano waYehova, nakusolola hatoma makuli aze ahanjikile Liyavolo. (Yowa. 8:44) Makuli aze eji kuhanjikanga Satana eji kuhombesanga vatu. Chakutalilaho, Satana asaka tufwelele ngwetu, Yehova keshi kutukonekela milonga yashili tweji kuvulumunangako, kaha nawa katuzangako. Awa himakuli amapi aze eji kuhombesanga vatu. Oloze etu twatachikiza ngwetu kachi nge ‘natuya kuli’ Kulishitu, kaha jishili jetu navatukonekelajo. Kaha nawa Yehova atuzanga tuvosena namuchima wenyi wosena. (Loma 8:32, 38, 39) Shikaho, tweji kwivwa kuwaha chikuma kukafwa vatu vapendamine hali Yehova nakupwa nachiyoyelo chamwaza.
TWALENUHO LIKA KUHIZUMUKA HAKUPWA MUTOKA YAYESU
16. Viteli atulweza Yesu kumbata vyalihandununa ngachilihi naviteli vize tweji kulimbachilanga etu vavene?
16 Viteli vize Yesu atulweza kumbata vyalihandununa naviteli vize tweji kulimbachilanga etu vavene. Chakutalilaho, omu tweji kukotokanga kumilimo yetu tweji kuzeyanga nakuhomba. Oloze omu tweji kuzachilanga Yehova naKulishitu, tweji kuwahililanga nakusuuluka. Numba tuhu tweji kuzeyanga hakufuma kumilimo, oloze tweji kulikokanga nakuya kukukunguluka nachingoloshi, kaha hakufumako tweji kuwahililanga. Omu mukiko cheji kupwanga nahakuya muwande nakwambulula, nahakulinga chilongesa chauka. Numba tuhu cheji kutukaluhwilanga kulinga vyuma kana, oloze nge tunavilingi lyehi cheji kutuhizumunanga chikuma.
17. Chuma muka twatela kutachikiza tuvosena, kaha vyuma muka twatela kulinga?
17 Twatela kutachikiza ngwetu mutu himutu akwechi noho hakumina ngolo jenyi. Shikaho, twatela kuzangama navyuma natusakula kulinga. Chakutalilaho, tunahase kwenyekela ngolo jetu hakukilikita tupwenga naluheto. Achishinganyekenu hamazu ahanjikile Yesu kuli mukweze walunga waluheto uze amuhulishile ngwenyi: “Vyuma muka ngwatela kulinga mangana ngukaswane kuyoya chahaya myaka yosena?” Halwola kanelu ou mukweze walunga akavangijilenga Jishimbi jize Kalunga ahanyine Mose, pamo apwile mutu wamwenemwene, mwomwo mukanda waMujimbu Wamwaza asonekele Mako wahanjikile hatoma ngwawo Yesu “amuzangile.” Ngocho amulwezele ngwenyi: “Yako ukalanjise vyuma vyove nakuhana jimbongo kuli vaka-kuhutwa, kaha naukapwa naluheto mwilu. Kufumaho twaya upwenga umuka-kungukavangiza.” Oloze omu evwile mazu vamukumbulwile, ahombele, kaha ayile nakunyengetela, mwomwo apwile naluheto lwaluvulu.” (Mako 10:17-22) Shikaho, ou mukweze akanyine toka yaYesu nakutwalaho kupwa ndungo ‘kuluheto.’ (Mateu 6:24) Kachi nge mwapwile yenu, kachi mwalingile ngachilihi?
18. Chuma muka twatela kulinganga shimbu yosena, kaha mwomwo ika?
18 Twatela kulikekesanga shimbu yosena mangana tumone vyumovyo twamona kupwa vyavilemu mukuyoya chetu. Mwomwo ika? Mwomwo nachitukafwa tumone nge tuli nakuzachisa ngolo jetu mujila yamwaza. Achishinganyekenu hamazu ahanjikile mukweze walunga Mark, ambile ngwenyi: “Hamyaka yayivulu ngwashinganyekele ngwami ngwashiwishilengako chiyoyelo chami. Ngwazachilenga upayiniya, oloze shimbu yosena ngwashinganyekelenga hajimbongo namwakulingishila chiyoyelo chami chipwenga chauhando. Kaha kangwasuulukile mukuyoya chamiko. Ngwawanyine jino nge ngwazachishilenga lwola lwaluvulu hakutondatonda vyuma vyamukuyoya nakuhana Yehova lwola lwalundende kaha.” Mark alumwine vishinganyeka nachiyoyelo chenyi mangana azachile chikuma Yehova. Ambile nawa ngwenyi: “Shimbu jimwe ngweji kulizakaminanga, oloze Yehova naYesu vanangukafwe nguhake vyuma vyakushipilitu kulutwe.”
19. Mwomwo ika chapwila chachilemu kumona vyuma mujila yamwaza?
19 Kachi nge natulinga vyuma vino vitatu, kaha nachitukafwa tupwenga lika vakuhizumuka hakumbata toka yaYesu. Chatete, twatela kumona vyuma mujila yamwaza. Mulimo tweji kuzatanga wapwa waYehova, shikaho twatela kuuzata mujila yize asaka. Etu twapwa tuvaka-kuzata, kaha Yehova ikiye Mwata wetu. (Luka 17:10) Nge natumuzachila mujila yize tunasake etu vavene, kaha natusolola nge tuli nakulwa natoka yaYesu. Numba ngombe wangolo chikuma uze vanakase mutoka, nge mwasaka kuya mweshomwo nasake nakuhona kukavangiza muze nasake mutu namukase mutoka kana, kaha nahase kulilemeka. Nayetu nawa kachi nge natwitavila vyuma mwatulweza Yehova, kaha tunahase kuzata milimo yayinene nakuhonesa ukalu. Twatela kwijiva ngwetu kakweshi mutu mwahasa kuhonesa Kalunga kutesamo vyuma ajinako.—Loma 8:31; Yowa. 1, 4:4.
20. Vishinganyeka muka twatela kupwa navyo hakumbata toka yaYesu?
20 Chamuchivali, zatenu navishinganyeka vyakwoloka. Twafwila kulinga vyuma vize navyalisa Setu wamwilu Yehova. Vaka-kulishitu vamulikulukaji lyamyaka lyakulivanga vaze vazachililenga Kalunga mangana vanganyalileho vahonene kupwa vakushishika nakulitwamina kumbata toka yaYesu. (Yowa. 6:25-27, 51, 60, 66; Fwili. 3:18, 19) Oloze vatu vaze vazachile milimo mwomwo yakuzanga Kalunga navakwavo vatu, vatwalileho lika kumbata toka yaYesu nakupwa nalutalililo lwakukazachila hamwe naKulishitu mwilu. Ngocho, nayetu nawa nge natupwa navishinganyeka vyakwoloka hakumbata toka yaYesu, kaha natupwa vakuwahilila.
21. Kweseka namazu ahali Mateu 6:31-33, twatachikiza ngwetu Yehova mwatuhana vyuma muka?
21 Chamuchitatu, fwelelenu ngwenu Yehova mwapwa nayenu. Twasakula kuzachila Yehova mukuyoya chetu chosena nakuzata milimo yayilemu chikuma. Yesu atulwezele ngwenyi navatuyanjisanga hakuzata milimo kana. Oloze twatachikiza chikupu ngwetu Yehova mwatuhana ngolo jakutukafwa tumike muukalu kana. Shikaho kachi nge natutwalaho kumika, kaha natukwata ngolo. (Yako. 1:2-4) Twatachikiza nawa ngwetu Yehova mwatuhana vyuma twasaka, kaha Yesu mwatufunganga kaha nawa vandumbwetu navatukolezezanga. (Tangenu Mateu 6:31-33; Yowa. 10:14; Teso. 1, 5:11) Chikupu vene tuli navyuma vyavivulu vyakutukafwa tumike mukala vyeseko natumona.
22. Kutokwa muka twatwama nacho?
22 Uze pwevo vokile kuli Yesu ahizumukile halikumbi vene lize. Kachi nge ejile nakupwa kambaji kaYesu wakushishika, kaha chikupu vene mwakahizumuka mukuyoya chenyi chosena. Uno mwashinganyeka ngwenu alingile ngachilihi? Kachi nge asakwile kumbata toka yaYesu, kaha twafwelela ngwetu mwakapwa nakutokwa chakuzachila hamwe naYesu mwilu. Kala vyoshovyo vyuma asezele mangana akavangize Kulishitu mwakawanyinaho fweto yayinene chikuma. Numba nge tukwechi lutalililo lwakukayoyela mwilu chipwe hano hamavu, oloze twatokwa chikuma hakwitavila mazu aYesu aze ambile ngwenyi: “Twayenu kuli ami.”
MWASO 13 Kulishitu Ikiye Chakutalilaho Chetu
^ par. 5 Yesu ali nakutusanyika tuyenga kuli ikiye. Vyuma muka twatela kulinga mangana twitavile mutambi kana? Chihula kana navachikumbulula muchihande chino, kaha nawa natulinangula omu kuzachila hamwe naKulishitu chinahase kutuhizumuna.
