1. Yehova amona ngachilihi vatu vakulinyisa? Lumbununenu.

YEHOVA azanga vatu vakulinyisa. Vatu vakulinyisa vakiko kaha veji kupwanga nausoko wakukola naYehova. Oloze “eji kutalilanga vaka-kulivwimba hahasuku.” (Samu 138:6) Tuvosena twasaka kwivwisa Yehova kuwaha, kaha nawa twasaka ikiye apandame kuli etu. Ngocho, twatela kufwila kupwa vakulinyisa.

2. Vihula muka natushimutwila muchihande chino?

² Muchihande chino natukumbulula vihula vino vitatu. (1) Uno kulinyisa chapwa chika? (2) Mwomwo ika twatela kupwila vakulinyisa? (3) Vyuma muka vinahase kutulingisa tuchiwane kupwa chachikalu kupwa vakulinyisa? Kachi nge natupwa vakulinyisa, kaha natwivwisa Yehova kuwaha nakutukafwa tupwenga vakuwahilila.—Vishi. 27:11; Isa. 48:17.

3. Uno kulinyisa chalumbununa ika?

³ Kulinyisa chalumbununa kupwa namuchima wakulikehesa nakuhona kushinganyeka ngwetu twapwa tuvavalemu chikuma kuhambakana vakwetu. Mbimbiliya yasolola ngwayo, mutu wakulinyisa atwama nausoko wamwaza naYehova Kalunga navakwavo vatu. Mutu kana atachikiza nawa ngwenyi, vakwavo vamuhambakana muvyuma vimwe.—Fwili. 2:3, 4.

4-5. Mwomwo ika natwambila ngwetu kulinyisa kachapendamina hasolokeso yamutuko?

⁴ Vatu vamwe veji kusolokanga nge vapwa vakulinyisa. Vasoloka ngocho mwomwo pamo vapwa vakuhola chipwe vasonyi. Vanahase kusoloka nawa kupwa vakalemesa mwomwo yachisemwa chavo chipwe jila vavalelelelemo. Oloze mumuchima vanahase kupwa  vakulivwimba chikuma. Mukuhita chalwola, kulivwimba chavo chinahase kukasoloka jino hatoma.—Luka 6:45.

⁵ Kaha nawa kakavulu, vatu vaze veji kuhanjikanga nakukasunuka chipwe kuhanjika chakuzeneka kuhita mutenga kachalumbununa nge vapwa vakulivwimbako. (Yowa. 1:46, 47) Chipwe ngocho, vatu vaze veji kuhanjikanga nakukasunuka kavatela kupendaminanga hachinyingi chavoko kuchina navalivwimba. Chamokomoko nomwo twapwa, tuvosena twatela kufwila kupwa vakulinyisa.

6. Kweseka namazu atwama hali Wavaka-Kolinde 1, 15:10, vyuma muka natulinangula kuli kaposetolo Paulu?

⁶ Tuchitalenu hachakutalilaho chakaposetolo Paulu. Yehova amuhanyine mulimo waunene wakutunga vikungulwilo mujinganda jajivulu. Kaha nawa chasoloka nge Paulu ikiye azachile chikuma mulimo wakwambulula kuhambakana vakwavo vaposetolo. Oloze Paulu kalimwene kupwa wamulemu kuhambakana vakwavoko. Asolwele kulinyisa chenyi hakwamba ngwenyi: “Ami yami wamundende hali vaposetolo vosena, kaha kangwatelemo kunguvuluka ngwavo kaposetoloko, mwomwo ngwayanjishilenga chikungulwilo chaKalunga.” (Koli. 1, 15:9) Kufumaho, ambile ngwenyi alivwishile kuwaha usoko wamwaza naYehova mwomwo yalikoji lyalinene lyaKalunga, keshi mwomwo yauhashi wenyi chipwe milimo ateselemoko. (Tangenu Wavaka-Kolinde 1, 15:10.) Paulu ahanyine chakutalilaho chamwaza chakupwa vakulinyisa mumukanda wenyi asonekelele chikungulwilo chavaka-Kolinde. Kasonekele mazu akulivwimbako numba tuhu malunga vamwe muchikungulwilo kana valimwene kupwa vavalemu chikuma kuhambakana ikiye.—Koli. 2, 10:10.

7. Uno ndumbwetu uze azachile mulimo wakulipwila asolwele ngachilihi muchima wakulinyisa? Hanenu chakutalilaho.

⁷ Mujimbu wandumbu Karl F. Klein uze azachilenga muLizavu Lyakutwaminyina weji  kukolezezanga vangamba jaYehova vavavulu. Mumujimbu wakuyoya chenyi asolwele muchima wakulinyisa hakuvuluka ukalu amwene mukuyoya chenyi chosena. Chakutalilaho, muji 1920 ayile nakwambulula kuzuvo hizuvo, oloze achiwanyine kupwa chachikalu, ngocho atwamine myaka yivali chakuzeneka kuzata mulimo wakwambulwila kuzuvo hizuvo. Kutwala muze, omu ayile nakuzachila haMbetele, ndumbwetu umwe amuhuhumwine, ngocho alaminyinyine koko uze amuhuhumwine. Lwola lumwe nawa apwile naukalu uze wamuhombeselenga chikuma, oloze kutwala muze ukalu kana wakumine. Chipwe ngocho, alivwishilenga kuwaha kuzata milimo yayivulu muliuka. Chikupu vene, ou ndumbwetu azachile mulimo wakulipwila, apwile wakulinyisa chikuma numba ahanjike hatoma vyuma vyosenevi vyamusolokelele. Vandumbwetu vavavulu veji kwivwanga kuwaha kutanga mujimbu wandumbu Klein. *

8. Mukanda WaPetulu 1, 5:6, watukafwa ngachilihi tutachikize ngwetu kulinyisa cheji kwivwisanga Yehova kuwaha?

⁸ Chuma chachinene chatulingisa tufwile kupwa vakulinyisa shina mwomwo cheji kwivwisanga Yehova kuwaha. Kaposetolo Petulu ashindakanyine hachishina kanechi. (Tangenu WaPetulu 1, 5:6.) Mumukanda “[wa]Twaya Ungukavangizenga” wahanjika hamazu akaposetolo Petulu ngwawo: “Muchima wakulitunda wapwa ngana mwausungu. Unahase kutwingisa muukalu waunene chikuma. Mutu uze akwechi muchima kana nahase kupwa wamokomoko kumeso aKalunga numba tuhu akwechi uhashi wakulinga vyuma vimwe. Yehova eji kumonanga mutu wakulinyisa kupwa wamulemu chikuma chamokomoko numba vatu navamulelesa. . . . Nge . . . namulinyisa, kaha Kalunga ketu mwasuuluka nakumikisula.” * Chikupu vene, chuma chamwaza twatela kulinga shina kwivwisa Yehova kuwaha.—Vishi. 23:15.

9. Vatu vanahase kupandama ngachilihi kuli etu?

⁹ Kaha nawa tweji kunganyalanga mwamunene kachi nge natupwa vakulinyisa keshi nge kwivwisa kaha Yehova kuwahako. Vatu vanahase kupandama kuli etu kachi nge natupwa vakulinyisa. Mwomwo ika tunahanjikila ngocho? Achishinganyekenu vatu vaze mwasaka kulikata navo. (Mateu 7:12) Etu vamwe katwasaka kulikata navatu vaze vasaka kutakilika kaha munayi vishinganyeka vyavoko. Oloze tweji kwivwanga kuwaha chikuma kulikata navandumbwetu vaze vakwechi muchima ‘wakulizakama, nakupwa nazangi  yakuzanga vandumbwavo, nakulivwila keke navakwavo, nakulinyisa.’ (Petu. 1, 3:8) Nge vatu kana navapwa vakulinyisa kaha natuhasa kupandama kuli vakiko, kaha navakiko nawa vanahase kupandama kuli etu nge natupwa vakulinyisa.

10. Uno kupwa vakulinyisa chinahase kutukafwa ngachilihi?

¹⁰ Kupwa vakulinyisa cheji kutulingisanga tupwenga vakuwahilila mukuyoya. Shimbu jimwe tuhase kumona ngwetu vyuma kavyeshi nakutambuka kanawako. Mwangana wamangana Solomone ambile ngwenyi: “Ngunamononga vangamba vali nakutambukila hatuvalu, oloze vilolo vali nakutambuka hamavu kwijiva nge vangamba.” (Kwambu. 10:7) Vatu vaze vakwechi uhashi chikuma kaveshi kuvahana kavumbi shimbu yosenako. Kaha nawa vaze kavatwama nauhashiko shimbu jimwe veji kuvavumbikanga. Chipwe ngocho, Mwangana Solomone atachikijile ngwenyi chapwa chakutamo kwitavila ukalu unatusolokela kuhambakana kupihilila naukalu kana. (Kwambu. 6:9) Nge natupwa vakulinyisa, kaha tunahase kwitavila vyuma kweseka nomu vili kuhambakana kushinganyeka kaha omu twasakako.

11. Vyuma muka twatela kulinga nge vanatuhuhumuna?

¹¹ Hakumbi hakumbi tweji kumonanga ukalu uze unahase kutulingisa tuchiwane kupwa chachikalu kulinyisa. Tuchitalenu havyakutalilaho vimwe. Nge vanatuhuhumuna. Twatela kwanuka ngwetu kachi nge mutu mweza nakutweulula kaha twatela kutachikiza ngwetu tunalimbenje chikupu. Shimbu jimwe tunahase kukana kwitavila vyuma vanatukafwe, nakuhanjika vyuma vyavipi hali mutu uze natuhuhumuna chipwe kukana jila natuhuhumwinamo. Oloze nge twapwa vakulinyisa, kaha natwitavila vyuma tunalimbenje.

12. Kweseka namazu ahali Vishimo 27:5, 6, mwomwo ika twatela kusakwilila mutu uze natuhuhumuna? Lumbununenu.

¹² Mutu wakulinyisa eji kusakwililanga nge vanamuhuhumuna. Chakutalilaho, achishinganyekenu muli kukukunguluka. Nge munashimutwila lyehi navatu vavavulu kaha ndumbwenu umwe mwaminyachila nakumiyevetela ngwenyi muli navyakulya hamazo. Tunafwelela ngwetu namwivwa sonyi. Oloze namusakwilila uze nahamuka nakumilweza. Kaha munahase kushinganyeka ngwenu kachi kwapwanga mutu amilwezanga lyehi. Chochimwe nayetu nawa, twatela kusakwilila ndumbwetu uze mwahamuka nakutuhuhumuna nge tunalimbenje. Mutu kana tweji kumumonanga kupwa sepa lyetu keshi muka-koleko.—Tangenu Vishimo 27:5, 6; Ngale. 4:16.

13. Uno tunahase kusolola ngachilihi kulinyisa nge vandumbwetu vanavahane milimo yimwe muliuka?

 ¹³ Kachi nge vandumbwetu vamwe vanavahane milimo muliuka. Jason uze apwa kalama ambile ngwenyi: “Nge ngunamono vakwetu vanavahane milimo yimwe muliuka, kaha ngweji kwambanga ngwami mwomwo ika vahonanga kusakula yami nguyizate?” Uno nayenu mukiko mweji kwivwanga tahi? Kachapwa chakuhenga kufwila kuzata milimo yayivulu muliukako. (Chimo. 1, 3:1) Chipwe ngocho, twatela kuzangama navyuma tweji kushinganyekanga, nge chiku kaha tunahase kuputuka kulivwimba. Chakutalilaho, ndumbwetu umwe nahase kushinganyeka ngwenyi ikiye kaha atamo kuzata milimo yimwe. Kaha nawa ndumbwetu wapwevo nahase kushinganyeka ngwenyi, ‘Lunga lyami ikiye kaha nahase kuzata mulimo kana kuhambaka kala ndumbwetu.’ Oloze nge twapwa vakulinyisa, kaha katweshi kushinganyeka ngochoko.

14. Vyuma muka natulinangula kuli Mose omu vahanyine milimo yimwe yize azachilenga kuli vakwavo?

¹⁴ Tunahase kulondezeza Mose hamuchima asolwele omu vahanyineko vakwavo milimo yimwe. Mose azangile mulimo wenyi vamuhanyine wakutwaminyina vaIsalele. Uno Mose alingile ngachilihi omu vamutambwileko milimo yimwe yize azachilenga nakuyihana kuli veka? Kutala evwile lwiso tahi? Nduma, kevwile lwisoko. (Kula. 11:24-29) Kaha nawa alinyishile nakwitavila vakwavo vamukafwe mulimo wakuyula vatu. (Kulo. 18:13-24) Echi chakafwile vaIsalele, mwomwo kwapwile vatu vavavulu vakuvayula kuhambakana kuvandamina Mose avayule. Kulinga chuma kana chasolwele nge Mose ahakile kulutwe vyuma vasaka vakwavo muchishishisa chakufwila ulemu apwile nawo. Chikupu vene, Mose atuhana chakutalilaho chamwaza. Twatela kwanuka ngwetu, nge natusaka Yehova atuzachise kaha twatela kulinyisa kuhambakana kufwila ulemu. “Numba tuhu Yehova azezuka helu, [oloze] eji kunyingililanga vatu vakulinyisa.”—Samu 138:6.

15. Vyuma muka vinalumukanga kuli vandumbwetu vamwe?

 ¹⁵ Kachi nge vyuma vinalumuka. Vandumbwetu vaze vanazachilanga Yehova hamyaka yayivulu vanavahanenga milimo yeka. Chakutalilaho, mu 2014 tulama vangalila namapwevo javo vavalwezele ngwavo kaveshi kutwalililaho namulimo wavoko, oloze navavahana milimo yeka. Mumwaka vene uze tulama vakujinguluka vavalwezele ngwavo, kachi nge vanahetesa myaka yakusemuka 70 kaha kaveshi kutwalaho kuzata mulimo kanako. Kaha vandumbwetu vaze veji kuzatanga mwamuka-kuwanyisa lizavu lyavakulwane vavalwezele ngwavo, nge vanahetesa myaka yakusemuka 80 kaveshi kutwalaho kuzata mulimo kanako. Kaha nawa vandumbwetu vavavulu vaze vazachilililenga haMbetele vavalwezele vayenga nakuzata upayiniya. Vandumbwetu veka nawa vanahono kutwalililaho kuzata mulimo wakulipwila washimbu yosena mwomwo yamisongo chipwe mangana vakazakame visemi javo chipwe mwomwo yaukalu weka wamukuyoya.

16. Uno vandumbwetu vanasololanga ngachilihi kulinyisa omu vyuma vinalumukanga mukuyoya chavo?

¹⁶ Vandumbwetu vavavulu vachiwanyine kupwa chachikalu kwitavila kwalumuka kanechi. Vandumbwetu vavavulu vaze vahanyine milimo yeka vashinganyekelenga lika hamilimo yavo yize vazachilenga hakavanga hamyaka yayivulu. Vandumbwetu vamwe “valishonene chikuma” hakwalumuka kanechi. Oloze mukuhita chalwola, vetavilile kwalumuka chavyuma. Vyuma muka vyavakafwile? Chuma chachinene chavakafwile shina kuzanga chikuma Yehova. Vatachikijile ngwavo valihanyine kuli Kalunga keshi kumulimo uze vazachilenga chipwe ulemu wamilimo kanako. (Kolo. 3:23) Makumbi ano, vapwa vakuwahilila kutwalaho lika kuzachila Yehova. Vambilile “kulizakamina [chavo] chosena hali ikiye,” mwomwo vatachikiza ngwavo eji kuvazakamanga.—Petu. 1, 5:6, 7.

17. Mwomwo ika twatela kuwahilila hakupwa naMazu aKalunga aze eji kutukolezezanga tupwenga vakulinyisa?

¹⁷ Twawahilila chikuma hakutuhana Mazu aKalunga aze eji kutukolezezanga tupwenga vakulinyisa. Kachi nge natupwa vakulinyisa kaha natunganyala etu vavene nakunganyalisa nawa vakwetu vamichima yakulinyisa. Kulinyisa cheji kutukafwanga tumike halwola tuli nakuhita muukalu. Kaha nawa cheji kutukafwanga tupandame chikuma kuli Setu wamwilu. Numba tuhu Yehova apwa “Wakulitulaho,” kaha nawa “Azezuka Helu,” oloze azanga vangamba jenyi vakulinyisa, kaha avamona kupwa vavalemu.—Isa. 57:15.