1. Yesu alanyine vaze vaka-kuta ishi vawana valinge ika, kaha vakwileko ngachilihi?

KAMBAJI Petulu, naAndelei, naYakova naYowano vapwilenga vaka-kuta ishi. Achishinganyekenu omwo vevwile hakwivwa Yesu mwavalweza ngwenyi: “Ngukavangizenunga, kaha nangumilingisa kupwa muvaka-kuta vatu.” * Uno vakwileko ngachilihi? Mbimbiliya ngwayo: “Hahaze vene vasezele moji avo, vamukavangijile.” (Mateu 4:18-22) Chuma vasakwile chalumwine kuyoya chavo. Muchishishisa chakupwa vaka-kuta ishi vapwile jino ‘vaka-kufuta vatu.’ (Luka 5:10) Namakumbi ano Yesu ali nakulanya vatu vamwaza michima vaze vazanga muchano. (Mateu 28:19, 20) Kutala munaputuka lyehi kuzata ou mulimo atuhana Yesu wakufuta vatu tahi?

2. Mwomwo ika twatela kushinganyekaho chikuma shimbu kanda tusakule kupwa tuvaka-kufuta vatu, kaha chuma muka nachitukafwa tusakule kanawa?

² Pamo munalinangula lyehi Mbimbiliya nakuzovoloka, ngocho munahete jino haseteko yakulikekesa mumone nge muli nakusaka kupwa muvaka-kwambulula mujimbu wamwaza. Kachi nge muchili nakukakasana, kaha kanda namulihana mulongako, mwomwo echi chili nakulumbununa nge munatachikiza ngwenu chuma kana chapwa chachilemu ngocho kachasakiwa kuchilusukilako. Numba tuhu Mbimbiliya yamba ngwayo Petulu navakwavo vasezele moji avo “hahaze vene,” oloze kavalingile ngocho chakuzeneka kushinganyekahoko. Mwahichile  tukweji vakuhambakana 6 kufuma haze vamutachikijile Yesu nakumwitavila kupwa Meshiya. (Yowa. 1:35-42) Chochimwe nawa, nayenu pamo munalinangula vyavivulu hali Yehova naYesu, kaha muli nakusaka kutwalaho lika kuzovoloka kushipilitu. Oloze kamwatela kulusuka kupwa muvaka-kwambululako. Vyuma muka vyakafwile Petulu naAndelei navakwavo mangana vasakule kanawa vyakulinga?

3. Vilinga muka navimikafwa mufwile chikuma kuzata mulimo atuhana Yesu?

³ Tumbaji twaYesu vazangile mulimo wavo, vatachikijile mwakuuzachila, vapwile vakumika kaha nawa vapwile namuchima wakulikanyisa. Vilinga kana vyavakafwile nawa vazate kanawa mulimo wakufuta vatu. Chino chihande nachishimutwila vyuma mwatela kulinga mangana mupwenga navilinga kana nakupwa tumbaji twaKulishitu vamwenemwene.

4. Chuma muka chalingishile Petulu alivwise kuwaha mulimo wakuta ishi?

⁴ Petulu atelenga ishi mangana ayoyese tanga yenyi, kaha nawa mulimo kana auzangile. (Yowa. 21:3, 9-15) Azangile nawa mulimo wakufuta vatu. Yehova amukafwile azate kanawa ou mulimo.—Vili. 2:14, 41.

5. Kweseka namukanda waLuka 5:8-11, mwomwo ika Petulu evwilile woma, kaha vyuma muka navitukafwa nayetu tuhone kwivwa woma?

⁵ Kuzanga Yehova chikiko cheji kutukunyulanga tuzate mulimo wakwambulula. Zangi kana yinahase kutukafwa tuzate mulimo kana numba tuhu natushinganyeka ngwetu katwatelemoko. Omu Yesu alanyine Petulu, amulwezele ngwenyi: “Kanda nawivwa womako.” (Tangenu Luka 5:8-11.) Petulu kevwile woma vyuma vinahase kusoloka nge mwapwa kambajiko, oloze alikomokelele hakumona omu Yesu avakafwile mangana vakwate ishi mujila  yakukomwesa. Kaha nawa alivwile ngwenyi katelemo kuzachila hamwe naYesuko. Nayenu nawa munahase kwivwa woma nakulizakamina havyuma mwatela kulinga hakupwa kambaji kaKulishitu. Nge mukiko, kaha mwatela kuzanga chikuma Yehova, naYesu navakwenu vatu. Echi nachimikafwa mwitavile kuzata mulimo atuhana Yesu wakupwa tuvaka-kufuta vatu.—Mateu 22:37, 39; Yowa. 14:15.

6. Vyuma vyeka muka vyatela kutulingisa tuzate mulimo wakwambulula?

⁶ Achishinganyekenu havyuma vyeka vyatela kutulingisa tuzate mulimo wakwambulula. Tweji kwononokanga lushimbi lwaYesu lwakwamba ngwenyi: “Yenunga mukanangule vatu . . . vakapwe tumbaji.” (Mateu 28:19, 20) Kaha nawa tweji kwambululanga mujimbu mwomwo vatu ‘vanayanjiwa nakulimwanga nge mikoko vakuzeneka kafunga,’ ngocho vali nakufwila kulinangula muchano wakuvuluka Wangana. (Mateu 9:36) Yehova asaka vatu vosena vapwenga nachinyingi chakwoloka chakutachikiza muchano mangana akavalwile.—Chimo. 1, 2:4.

7. Uno mukanda Wavaka-Loma 10:13-15 wasolola ngachilihi nge mulimo wakwambulula wapwa waulemu?

⁷ Kutachikiza ngwetu mulimo kana weji kuyovolanga vatu nachitukafwa tulisuule kuuzata. Etu katwapwa ngana mwavaka-kufuta ishi vaze veji kutanga ishi mangana valanjise chipwe kulyako. Oloze tweji kuzatanga mulimo kana mangana tuyovole myono yavatu.—Tangenu Wavaka-Loma 10:13-15; Chimo. 1, 4:16.

8-9. Vyuma muka atela kutachikiza muka-kuta ishi, kaha mwomwo ika?

⁸ Mumakumbi aYesu, kaIsalele uze apwile muka-kuta ishi atelelele kutachikiza muyachi wavaishi apwile nakusaka kukwata. (Levi 11:9-12) Atelelelenga kutachikiza nawa kuchihela kwakuwana vaishi kana. Kakavulu vaishi vasaka kupwa kuze kuli meya amwaza navyakulya vyavivulu. Shikaho muka-kuta ishi atela kutachikiza lwola lwamwaza atela kuya kulwiji nakukwata vaishi. Ndumbwetu umwe wakuchihela kuze veji kutanga chikuma vaishi alwezele ndumbwetu wakamishonali amutwaleko nakuta ishi. Uze kamishonali ambile ngwenyi, “Nangukeza hamene chimene nalwola lwa 9 koloko.” Oloze uze ndumbwetu amukumbulwile ngwenyi: “Keshi ngochoko ndumbu. Katwatela kuya kala lwola tunasakeko, kuvanga kaha halwola luze veji kutambukanga vaishi.”

⁹ Chochimwe nawa, navaka-kufuta vatu vamulikulukaji lyamyaka lyakulivanga vayilenga kuvihela kuze kwapwilenga vatu nahalwola lwamwaza kuvawana. Chakutalilaho, vaka-kukavangiza Yesu vapwilenga nakwambulwila mutembele namusunangonga nakuzuvo hizuvo nakuvilanjilo. (Vili. 5:42; 17:17; 18:4) Nayetu nawa twatela kutachikiza kanawa lwola veji kupwanga vatu hamembo nakuvihela vyeka kuze tunahase kuvawana. Echi nachitulingisa twalumuneko lwola lwakuya nakuvambulila nakuya kuvihela kuze natuvawana.—Koli. 1, 9:19-23.

10. Vinoma muka lyatuhana liuka lyaYehova?

¹⁰ Muka-kuta ishi atela kupwa navinoma vyakutamo kaha nawa atela kutachikiza mwakuvizachishila. Nayetu nawa twatela kupwa navinoma vyakutamo vize navitukafwa kuzata mulimo wakwambulula, nakutachikiza mwakuvizachishila. Yesu ahanyine jindongi vatelelele kukavangiza tumbaji twenyi mangana vazate kanawa mulimo wakufuta vatu. Avanangwile vyuma vatelelele kuzachisa nokwo vatelelele kuya nakwambulwila navyuma vatelelele kuhanjika. (Mateu 10:5-7; Luka 10:1-11) Makumbi ano, liuka lyaYehova linatuhane Vinoma vyaKuzachisa haKunangula vize vili nakutukafwa chikuma kuzata ou mulimo. * Kaha vali nakutunangula mwakuzachishila vinoma kana. Echi  cheji kutulingisanga twambulile vatu nakukunyuka nakupwa vaka-kunangula vakwipangweji.—Chimo. 2, 2:15.

11. Mwomwo ika vaka-kufuta vatu vatela kupwa vakumika?

¹¹ Vaka-kuta ishi vatela kupwa vakumika, mwomwo hakalungalwiji hanahase kuvasolokela ponde. Kakavulu veji kuzatanga mulimo kana naufuku, ngocho kunahase kupwa makimba. Navaka-kufuta vatu nawa vatela kupwa vakumika. Omu tweji kuputukanga kwambulula nakulijimbula kuvatu ngwetu tuVinjiho jaYehova, tunahase kumona ukalu wakutufumbukila kuli vausoko nakutusekeleka kuli masepa jetu, kaha nawa vatu vamwe veji kukananga kuvambulila. Olozenyi katwalikomokelako kachi nge ukalu kana unasoloka. Yesu alwezelele chimweza vaka-kumukavangiza ngwenyi kuze avatumine kuya nakwambulula navakawana vatu vaze navakavafumbukila.—Mateu 10:16.

12. Kweseka namukanda waYoshuwa 1:7-9, vyuma muka navitukafwa tupwenga vakumika?

¹² Vyuma muka navimikafwa mupwenga vakumika? Chatete, fwelelenu chikupu ngwenu Yesu achili nakutwaminyina mulimo wakwambulula. (Yowa. 16:33; Kuso. 14:14-16) Chamuchivali, fwelelenu ngwenu Yehova mwamizakama nakumihana vyuma vyasakiwa mukuyoya. (Mateu 6:32-34) Nge namupwa lufwelelo lwakukola kaha namupwa vakumika. Lufwelelo lwakukola lwalingishile Petulu navakwavo vaseze mulimo wakuta ishi nakuputuka kukavangiza Yesu. Nayenu nawa mwasolwele  lufwelelo lwakukola omu mwalwezele masepa navausoko jenu ngwenu munaputuka kulinangula Mbimbiliya nakukunguluka naVinjiho jaYehova. Chikupu vene, munazate nangolo hakwalumunako vilinga vyenu nachiyoyelo chenu mangana mukavangize jishimbi jaYehova jakwoloka. Mwalingile ngocho mwomwo yakupwa nalufwelelo, kaha nawa mwomikile. Kahomu namutwalaho lika kupwa vakumika, mwatela kufwelela ngwenu ‘Yehova Kalunga kenu mwapwanga nayenu kweshokwo namuyanga.’—Tangenu Yoshuwa 1:7-9.

13. Uno kulomba nakushinganyeka havyuma alingile Yehova kushikulu navize namilingilanga Yehova nachimikafwa ngachilihi?

¹³ Vyuma muka vikwavo vinahase kumikafwa mupwenga vakumika? Mwatela kulomba Yehova amikafwe. (Vili. 4:29, 31) Kaha Yehova mwakumbulula kulomba chenu nakumikafwanga. Shinganyekenunga nawa hajila Yehova nalwililangamo vatu jenyi kushikulu. Mwatela kushinganyeka nawa omwo namikafwenga muhonese vyeseko nakwalumuna chiyoyelo chenu. Yehova akafwile vatu jenyi haKalungalwiji Uchila, ngocho nahase kumikafwa nayenu mupwenga mutumbaji twaKulishitu. (Kulo. 14:13) Shikaho pwenunga nalufwelelo ngana luze apwile nalwo muka-kwimba jisamu, uze ambile ngwenyi: “Yehova ali nayami, kangweshi kwivwa womako. Mutu mwangulinga ikaze?”—Samu 118:6.

14. Vyuma muka natulinangula kuchakutalilaho chaMasae naTomoyo?

¹⁴ Chuma chikwavo chinahase kumikafwa mupwenga vakumika shina kushinganyeka mujila Yehova nakafwilamo vatu vasonyi vapwenga vakumika. Tushimutwilenu hachakutalilaho chandumbwetu Masae. Ou ndumbwetu apwilenga nasonyi, kaha ashinganyekele ngwenyi keshi kuhasa kulwezako vakwavo vyuma afwelelako. Chamukaluhwililenga kushimutwila navatu vaze katachikizako. Mwomwo yaukalu kana, aputukile jino kukilikita mangana azange chikuma Yehova navakwavo vatu. Kaha nawa ashinganyekele hamulimo wakwambulula nakumona ngwenyi uli nakusakiwa kuuzata mukapachapacha, kaha alombele Yehova amuhane twima yakuuzata. Ngocho, woma wamukumine, kaha azachile naupayiniya washimbu yosena. Yehova nahase nawa kukafwa vaka-kwambulula vavahya vapwenga ‘vakumika.’ Chakutalilaho, omu ndumbwetu wapwevo Tomoyo aputukile kwambulwila kuzuvo hizuvo, mutu watete vawanyine avatenukilile ngwenyi: “Kangweshi nakusaka Vinjiho jaYehova hembo lyamiko.” Kaha asokele nakuchikolo ndwa. Oloze Tomoyo alwezele ndumbwenyi apwile nakuzata nenyi ngwenyi: “Unevu vyuma nahanjika? Numba tuhu katwahanjikileko, oloze ikiye nejiva lyehi ngwenyi tuVinjiho jaYehova. Ngunawahilila chikuma.” Tomoyo apwa jino payiniya washimbu yosena.

15. Uno muchima wakulikanyisa wapwa uka, kaha mwomwo ika vaka-Kulishitu vatela kupwa namuchima kana?

¹⁵ Vaka-kuta ishi vatwama namuchima wakulikanyisa. Muchima wakulikanyisa vaulumbununa ngwavo wapwa “uhashi wakulituma ove yivene kulinga chuma chize chili nakusakiwa.” Shikaho vaka-kuta ishi vatela kulisakwila vavene kuhinduka chimenemene, nakuzata swi noho naukumina mulimo numba tuhu kuli vula chipwe nge kunatutu chikuma. Nayetu nawa twatela kupwa namuchima wakulikanyisa numbanyi tuzate kanawa mulimo wetu nalukakachila nakuukumisa.—Mateu 10:22.

16. Chuma muka nachitukafwa tupwenga namuchima wakulikanyisa?

¹⁶ Etu vatu katwasemuka namuchima wakulikanyisako. Twasaka kuzata mulimo uze tunamono ngwetu wawashi. Oloze shimbu jimwe vyuma vize vyapwa vyavilemu chikuma, kavyapwa vyavyashi kuvizatako. Shikaho kuvanga  tupwenga namuchima wakulikanyisa. Jino chuma muka nachitukafwa tuhasenga kuzata vyuma vize vyapwa vyavikalu? Yehova ikiye eji kutukafwanga kuhichila mushipilitu yenyi yajila.—Ngale. 5:22, 23.

17. Kweseka namukanda Wavaka-Kolinde 1, 9:25-27, kaposetolo Paulu alumbunwine ngwenyi chuma muka chamukafwile apwenga namuchima wakulikanyisa?

¹⁷ Kaposetolo Paulu apwile namuchima wakulikanyisa. Oloze ambile ngwenyi ‘alukwilenga’ mujimba wenyi numba ahase kulinga vyuma vyakwoloka. (Tangenu Wavaka-Kolinde 1, 9:25-27.) Kaha akolezezele vakwavo vapwenga namuchima wakulikanyisa nakulinga vyuma vyosena “mwamwenemwene kaha nawa mukulonga.” (Koli. 1, 14:40) Nayetu nawa twatela kupwa namuchima wakulikanyisa mangana tutwaleho lika kuzata milimo yakushipilitu, yakufwana nge kwambulula mujimbu wamwaza nakunangula vatu.—Vili. 2:46.

18. Chuma muka nachilingisa Yehova amone ngwenyi tuli nakufukila?

¹⁸ Kufukila chamuka-kuta ishi chapendamina hakuvula chavaishi mwakwata. Oloze etu kufukila chetu kachapendamina hakuvula chavatu vaze natuneha muliuka lyaKalungako. (Luka 8:11-15) Kachi nge natupwa nalukakachila hakuzata mulimo wakwambulula, nakunangula vatu, kaha Yehova mwatumona ngwenyi tuli nakufukila. Mwomwo ika? Mwomwo tuli nakumwononoka nakwononoka nawa mwanenyi.—Mako 13:10; Vili. 5:28, 29.

19-20. Chuma muka chachilemu chatela kutulingisa twambulule mujimbu?

¹⁹ Mumafuchi amwe mulimo wakuta ishi veji kuusokanga hatukweji vamwe. Shikaho vaka-kuta ishi vaze vatwama mumafuchi kana veji kuzatanga nangolo nge vanatachikiza ngwavo tukweji kana vanapandama. Hakupwa tuvaka-kufuta vatu twatela kwanuka ngwetu, kukuma chakatwamino kamyaka yino chili hakamwihi. Lwola lunasaleko lwakulwila vatu lunakehe lyehi. Shikaho kanda kulangisa chipwe kuvandamina ngwenu vyuma vipwenga kanawa numba muzate ou mulimoko.—Kwambu. 11:4.

²⁰ Oholyapwa mwatela kutwalaho kuzanga mulimo, nakulinangula Mbimbiliya mangana mwijive mwakuuzachila, nakupwa vakumika, nakupwa namuchima wakulikanyisa. Zachilenu hamwe navatu vakuzomboka hajimiliyoni 8 vaze vali nakufuta vatu, kaha namupwa nakuwahilila chakufuma kuli Yehova. (Nehe. 8:10) Twalenuho kuzata mulimo kana swi noho Yehova mwakamba ngwenyi kunahu. Chihande nachikavangizaho nachishimutwila vyuma vitatu vize navitukafwa tutwaleho kwambulula mujimbu waWangana hakupwa tuvaka-kufuta vatu.