1-2. Kweseka naWaChimoteu 1, 6:20, chuma muka atelelele kulinga Chimoteu?

KAKAVULU tweji kuhananga vakwetu vyuma vyetu vyavilemu mangana vatulamineko. Chakutalilaho, tunahase kutulikila jimbongo kunyambaulu nakufwelela ngwetu navajitulika kanawa, nakuhona kujijimbalisa. Shikaho tunahase kutachikiza omwo chalumbunukila kusela mutu vyuma vyetu vyavilemu mangana atulaminevyo.

² Tangenu WaChimoteu 1, 6:20. Kaposetolo Paulu alwezele Chimoteu ngwenyi atambwile chuma chachilemu. Chuma kana shina chinyingi chakutachikiza vyuma ajina Kalunga kulingila vatu. Chimoteu vamuhanyine nawa mulimo ‘wakwambulula mazu’ nakuzata mulimo “wamuka-kwambulula mujimbu wamwaza.” (Chimo. 2, 4:2, 5) Ngocho Paulu amulwezele alamenga vyuma vize vamuhanyine. Ngana muze chapwile kuli Chimoteu, nayetu vatuhana vyuma vyavilemu. Vyuma muka venyovyo? Kaha mwomwo ika twatela kukinga vyuma vyavilemu vize atuhana Yehova?

3-4. Mwomwo ika muchano wamuMbimbiliya wapwila waulemu?

³ Yehova atuhana chinyingi chakwoloka chakutachikiza muchano wamuMbimbiliya. Muchano kana wapwa waulemu mwomwo weji kutukafwanga tutunge usoko wamwenemwene naYehova nakutachikiza mwakuwanyina kuwahilila chamwenemwene. Kwitavila muchano kana nakuukavangiza, cheji kutusokolanga kukunangula chamakuli nakuvilinga vyavipi.—Koli. 1, 6:9-11.

⁴ Chuma chikwavo chalingisa muchano wamuMbimbiliya upwenga waulemu shina, mwomwo Yehova eji kuusololanga kuvatu vakulinyisa vaze vatwama “namichima yamwaza.” (Vili.  13:48) Vatu kana vetavila ngwavo Yehova ali nakuzachisa ndungo wakushishika wakuzangama mangana atunangule muchano wamuMbimbiliya. (Mateu 11:25; 24:45) Katweshi kuhasa kwivwishisa muchano kana hauka wetuko, kaha kakweshi chuma chachilemu kuhambakana kuutachikizako.—Vishi. 3:13, 15.

5. Yehova atuhana chuma muka chikwavo?

⁵ Yehova atuhana nawa mulimo wakunangula vatu muchano wenyi navyuma ajina kukalinga. (Mateu 24:14) Mujimbu uze tweji kwambululanga wapwa waulemu chikuma mwomwo weji kukafwanga vatu vezenga mutanga yaYehova nakukapwa nakuyoya chahaya myaka yosena. (Chimo. 1, 4:16) Numba tuzata jiola jajivulu chipwe jajindende, tuli nakuzata mulimo uze wapwa waulemu chikuma oholyapwa. (Chimo. 1, 2:3, 4) Chapwa hikutokwa chachinene chikuma kupwa tuvaka-kuzachila hamwe naKalunga.—Koli. 1, 3:9.

6. Vyuma muka vyalingishile vatu vamwe vechenga kuzanga Yehova?

⁶ Mumakumbi aChimoteu, vaka-Kulishitu vamwe kavamwene kuzachila hamwe naYehova kupwa chachilemuko. Chakutalilaho, Ndemase echele kuzata mulimo wakwambulula hamwe naPaulu, mwomwo azangile kaye. (Chimo. 2, 4:10) Chasoloka nge Fujelu naHelemojene nawa vasezele mulimo mwomwo yakuchina kuvayanjisa ngana muze vayanjishilenga Paulu. (Chimo. 2, 1:15) Humeneu naAlekesande naFwiletu vasezele muchano mwomwo yakwitavila vyuma vanangwilenga vaka-kusosoloka kulufwelelo. (Chimo. 1, 1:19, 20; Chimo. 2, 2:16-18) Hakavanga vatu kanava tunavuluka vazangile Yehova, oloze kutwala muze vechele kumona kulema chavyuma vyavilemu vize avahanyine.

7. Tufuta muka eji kuzachisanga Satana?

⁷ Jijila muka eji kuzachisanga Satana mangana atulingise tuseze vyuma vyavilemu vize atuhana Yehova? Jijila jimwe eji kuzachisanga shina, vyakuhemahema navaka-kwazana mijimbu, mangana akundwize vishinganyeka navilinga vize namono ngwenyi navitulingisa tuseze muchano. Eji kuzachisanga nawa masepa jetu navatu veka mangana vatushinyinyike nakutwivwisa woma twechenga kwambulula. Kaha nawa eji kuzachisanga vaka-kusosoloka kulufwelelo vatunangule vyuma “vize valyonga kuvuluka ngwavo ‘chinyingi’” mangana tuseze muchano.—Chimo. 1, 6:20, 21.

8. Vyuma muka tunahase kulinangula kuli ndumbwetu Daniel?

⁸ Kachi nge katwazangamineko, tunahase kuputuka kuseza muchano chindende chindende. Tushimutwilenu hachakutalilaho chaDaniel * uze azangilenga kuhema chahajivindiyo. Ambile ngwenyi: “Ngwaputukile kuhema chahajivindiyo omu ngwapwile namyaka yakusemuka 10.  Hakavanga kangwazanyinenga mukuhema chachipiko. Oloze kutwala muze ngwaputukile kwazana mukuhema chize chakundwijilenga ulyanyi navandemone.” Mukuhita chalwola, Daniel aputukile kwazana mukuhema kana hajiola 15 hakumbi hakumbi. Ambile cheka ngwenyi: “Mumuchima wami ngwejivile vene ngwami kuhema kana nalwola luze ngwenyekelelengako vyapwile nakungusosolola kuli Yehova. Oloze ngwashinganyekelenga ngwami chakutamo kuhona kukavangiza jindongi jamuMbimbiliya.” Shikaho kachi nge katwazangamineko, kaha vyakuhemahema vinahase kutulingisa tuhone kumona muchano kupwa waulemu. Kutwala muze, natukaseza jino vyuma vyavilemu vize atuhana Yehova.

9. Kweseka naWaChimoteu 1, 1:18, 19, Paulu afwanyishile Chimoteu kumutu muka?

⁹ Tangenu WaChimoteu 1, 1:18, 19. Paulu afwanyishile Chimoteu kuliswalale, nakumukolezeza “[alwenganga] lika jita yamwenemwene.” Jita kana kayapwile jita yiveneko, oloze yakushipilitu. Uno vaka-Kulishitu valifwanyina halihi namaswalale vaze vali nakulwa jita? Vilinga muka twatela kupwa navyo hakupwa tumaswalale jaKulishitu? Tushimutwilenu vishina vitanu vize natulinangula kuchifwanyisa ahanjikile Paulu. Vishina kana vinahase kutukafwa tutwaleho kulama muchano.

10. Mwomwo ika twatela kupwa vakushishika kuli Kalunga?

¹⁰ Pwenunga namuchima wakuzachila Kalunga. Liswalale wamwenemwene apwa wakushishika. Eji kulihakangaho kulwa mangana akinge mutu azanga chipwe chuma chize amona kupwa chachilemu. Paulu akolezezele Chimoteu mangana apwenga wakushishika kuli Kalunga. (Chimo. 1, 4:7) Nge natuzanga chikuma Yehova nakufwila kumuzachila, kaha nachipwa chachashi kulama muchano.—Chimo. 1, 4:8-10; 6:6.

11. Mwomwo ika twatela kupwa namuchima wakulikanyisa?

¹¹ Pwenunga namuchima wakulikanyisa. Hakusaka liswalale atengamo kuzata mulimo wenyi, atela kupwa namuchima wakulikanyisa. Chimoteu atwalileho kupwa wakuzama kushipilitu mwomwo akavangijile mazu amulwezele Paulu ngwenyi alihendenga kukufwila vyuma vyavipi, oloze afwilenga kupwa navilinga vyamwaza, nakulikata nawa navakwavo vaka-kwitava. (Chimo. 2, 2:22) Kutesamo vyuma kana chasakiwile kupwa namuchima wakulikanyisa. Nayetu twatela kupwa namuchima wakulikanyisa numba tulihende kukulinga vyuma yafwila mijimba yetu. (Loma 7:21-25) Kaha nawa twatela kupwa namuchima kana numba tuhase kuzula mutu wamwaka nakuvwala mutu wamuhya. (Efwe. 4:22, 24) Muchima kana unahase kutukafwa tulikake kuya nakukunguluka numba tuhu tunazeye.—Hepe. 10:24, 25.

12. Vyuma muka navitukafwa tuzachise kanawa Mbimbiliya?

¹² Liswalale atela kulijilisa mwakuzachishila vitwa vyenyi. Nge ali nakusaka apwenga kuluwa, kaha atela kuzachisanga vitwa kana lwola lwosena. Nayetu nawa twatela kupwa vakuluwa hakuzachisa Mazu aKalunga. (Chimo. 2, 2:15) Kukukunguluka kukiko tunahase kulinangwila mwakuwazachishila. Oloze nge tuli nakusaka kukafwa vatu vetavile ngwavo muchano wamuMbimbiliya wapwa waulemu, kaha twatela kupwanga nachilongesa chaMbimbiliya chauka. Mazu aKalunga akiko nawatukafwa tuzamise lufwelelo lwetu. Ngocho katwatela kukumina kaha hakutanga Mbimbiliyako. Twatela nawa kushinganyekanga havyuma natutanga nakuhehwojola mumikanda yetu, mangana twivwishise kanawa Visoneka nakuhasa kuvilumbununa kuvatu. (Chimo. 1, 4:13-15) Ngocho tunahase jino kuzachisa kanawa Mazu aKalunga hakunangula vatu. Echi nawa kachasakiwa kaha kuvatangila visonekako. Twatela kuvakafwa vevwishise chisoneka nakumona omu vanahase kukavangijila  chisoneka kana mukuyoya chavo. Shikaho, nge lwola lwosena natupwanga nachilongesa chaMbimbiliya chauka, kaha natupwa nauhashi wakuzachisa kanawa Mazu aKalunga hakunangula vatu.—Chimo. 2, 3:16, 17.

13. Kweseka naWavaHepeleu 5:14, mwomwo ika twatela kutachikijila chimweza vyuma vinahase kusoloka?

¹³ Shinganyekenu haukalu unahase kusoloka. Liswalale atela kumwena chimweza ukalu unahase kusoloka nakulihendako. Nayetu nawa twatela kushinganyekela chimweza vyuma vize vinahase kutuhaka muukalu nakulihendako. (Vishi. 22:3; tangenu WavaHepeleu 5:14.) Chakutalilaho, twatela kusakula kanawa vyakulihizumuna navyakuhemahema. Jipolongalamu jajivulu jahaTV najivindiyo jeji kusololanga vilinga vyauvumbi. Vilinga kana vyeji kwivwisanga Kalunga kupihya, kaha vinahase kutuhaka muponde. Shikaho tweji kulihendanga kuvyuma kana mwomwo vinahase kutulingisa tuhone jino kuzanga Kalunga.—Efwe. 5:5, 6.

14. Kushinganyekela chimweza haukalu unahase kusoloka chakafwile ngachilihi Daniel?

¹⁴ Ndumbu Daniel uze twavulukanga, aputukile jino kumona ngwenyi kuhema chahajivindiyo chaulyanyi nachize chakundwiza vilinga vyavandemone chapwa chachipi chikuma. Ahehwojwele mumikanda yetu awane vihande vyakumukafwa ahonese ukalu wenyi. Vyuma muka vyafuminemo? Echele kuhema jivindiyo kana jajipi. Kaha alijimishile kukeyala kana nakulitwamina kulikata navatu vakuhema jivindiyo kana. Ngocho ambile ngwenyi: “Muchishishisa chakwazana mukuhema chahajivindiyo, ngwaputukile jino kuzata milimo yeka yakulumbunuka chipwe kulikata namasepa vamuchikungulwilo.” Ndumbu Daniel apwa jino payiniya kaha nawa mukulwane muchikungulwilo.

15. Mwomwo ika chapwila ponde kwivwilila kumijimbu yayipi?

¹⁵ Nayetu nawa twatela kushinganyekela chimweza ponde yinahase kufumamo nge natwivwilila kumakuli veji kutandakanyisanga vaka-kulikanga kuli Kalunga. (Chimo. 1, 4:1, 7; Chimo. 2, 2:16) Chakutalilaho, vanahase kutandakanyisa mujimbu wamakuli hali vandumbwetu chipwe haliuka lyaYehova. Mijimbu kana yinahase kuzeyesa lufwelelo lwetu. Twatela kuzangama kuchina kutuhungumwisa kumijimbu kana. Mwomwo ika? Mwomwo mijimbu kana veji kuyitandakanyisanga kuli “vatu vaze valumbuka muvishinganyeka, vaze nawa vahona muchano.” Vatu kana vafwila “kulikokojwesa nakulipikila hamazu.”  (Chimo. 1, 6:4, 5) Vasaka twivwilile kumakuli avo nakuhona kufwelela vandumbwetu.

16. Vyuma muka twatela kulihendako?

¹⁶ Lihendenu kuvyuma vyakumitangula. Chimoteu hakupwa “liswalale wamwenemwene waKulishitu Yesu,” kahungukilile kumilimo yakukaye chipwe kukufwila vikumbako, oloze ahakile muchima kumulimo wenyi wakwambulula. (Chimo. 2, 2:3, 4) Nayetu nawa katwatela kuhungukila kukufwila vikumbako, mwomwo “luheto luze lwatwama nangolo jakutangisa” lunahase kulingisa zangi yetu yakuzanga Yehova yihole, nakutulingisa nawa tuhone kumona Mazu aKalunga namulimo wakunangula vakwetu kupwa vyavilemu. (Mateu 13:22) Shikaho, twatela kwashiwisako chiyoyelo chetu nakuzachisa lwola lwetu nangolo jetu kukutondatonda “lika chatete Wangana” waKalunga.—Mateu 6:22-25, 33.

17-18. Chuma muka twatela kulinga mangana tulihende kuvyuma vyavipi vinahase kutwenyeka kushipilitu?

¹⁷ Liwahisenu chimweza. Liswalale atela kuliwahisa chimweza mwakulingila kachi nge nakusoloka ukalu. Kachi nge tuli nakusaka kulama vyuma vize atuhana Yehova, kaha twatela kulingako vyuma vimwe washiwashi nge tunamono ukalu. Uno vyuma muka vinahase kutukafwa tuhase kulinga ngocho? Twatela kuliwahisa chimweza mwakulingila nge kunasoloka ukalu.

¹⁸ Chakutalilaho, kakavulu nge vatu vanalikungulwila hamwe kuchilika muzuvo yakuhemena, veji kuvalwezanga kwakulovokela shimbu kanda chilika chiputuke. Mwomwo ika? Mwomwo nge kunasoloka ukalu wakukasumuna, kaha vanahase kulovoka washiwashi. Chochimwe nawa, kachi nge tuli nakutala vindiyo chipwe polongalamu ha TV, twatela kutachikijila chimweza mwakulingila nge naheza vyuma vyauvumbi, chipwe ulyanyi, chipwe mijimbu yavaka-kulikanga kuli Kalunga. Kulizangila chimweza havyuma vinahase kusoloka, nachitukafwa tulihendenga washiwashi kuvyuma vyavipi vize vinahase kutwenyeka kushipilitu, nakupwa jino vatoma kumeso aYehova.—Samu 101:3; Chimo. 1, 4:12.

19. Vyuma muka natulivwisa kuwaha kachi nge natulama kanawa vyuma vyavilemu atuhana Yehova?

¹⁹ Twatela kulama kanawa vyuma vyavilemu vize atuhana Yehova. Vyuma kana shina muchano wamuMbimbiliya nakutokwa vatuhana chakunangula vatu muchano kana. Nge natulinga ngocho, kaha natupwa nachivezu chitoma, nachiyoyelo chakusuuluka nakwivwa kuwaha kukafwa vatu vatachikize Yehova. Kaha tunafwelela ngwetu Yehova mwatukafwa tulame kanawa vyuma kanevi atuhana.—Chimo. 1, 6:12, 19.