1-2. Uno chisoneka chaMuka-kwambulula 11:6, chinahase kuzata ngachilihi nakumulimo wakwambulula?

MUMAFUCHI amwe, vatu veji kwakulanga kanawa kumujimbu wamwaza mwomwo vasaka kulinangula vyavivulu. Oloze mumafuchi eka, vatu kasaka kulinangula hali Kalunga navyuma yahanjika Mbimbiliyako. Nyi okwo mwatwama vatu veji kwakulanga ngachilihi kumujimbu wamwaza? Chamokomoko najila navakwilamo, Yehova asaka tutwaleho lika kuzata ou mulimo swi noho mwakambila ngwenyi kunahu.

² Mulimo wakwambulula, naukakuma halwola atongola Yehova, “numbanyi kukuma chikeze.” (Mateu 24:14, 36) Jino oholyapwa natusolola ngachilihi ngwetu, tuli nakukavangiza mazu akwamba ngwavo “livoko lyove kanda nalinoka[ko]”? *—Tangenu Muka-kwambulula 11:6.

3. Vyuma muka natushimutwila muchihande chino?

³ Muchihande chinafumuho twashimutwilanga vyuma viwana vize twatela kulinga mangana tuzate kanawa mulimo ‘wakuta vatu.’ (Mateu 4:19) Muchihande chino natushimutwila vyuma vitatu vize navitukafwa tutwaleho lika kwambululanga mujimbu, chamokomoko nakala ukalu natumona. Natushimutwila ovyo chapwila chachilemu (1) kuhaka muchima kumulimo wetu, (2) nakupwa namuchima wakutalilila chikoki, (3) nakupwa nalufwelelo lwakukola.

4. Mwomwo ika twatela kuhaka muchima kumulimo uze atuhana Yehova?

⁴ Yesu ahanjikilile chimweza vyuma vize navikasoloka mumakumbi akukuminyina, vize nawa vinahase kutangula vaka-kumukavangiza  vahone kukumisa mulimo wakwambulula. Alembelelele tumbaji twenyi ‘vatonenga.’ (Mateu 24:42) Mumakumbi aNowa kwapwile vyuma vize vyatangwile vatu vahone kuhaka muchima kumujimbu uze ambulwilenga, kaha vyuma kana vinahase kututangula nayetu nawa. (Mateu 24:37-39; Petu. 2, 2:5) Shikaho, twatela kuhaka muchima kumulimo uze atuhana Yehova.

5. Chisoneka chaVilinga 1:6-8 chasolola ngachilihi kutohwa chamulimo wakwambulula makumbi ano?

⁵ Makumbi ano, twatela kuhaka chikuma muchima kumulimo wakwambulula. Yesu ahanjikilile chimweza ngwenyi vaka-kumukavangiza navakatwalaho lika kuzata mulimo wakwambulula nakuheta kuvihela vyavivulu, kaha nawa hamyaka yayivulu. (Yowa. 14:12) Omu alingile Yesu nafu lyehi, tumbaji twenyi vamwe vakindulukile kumulimo wakuta ishi. Oloze omu asangukile, akafwile tumbaji twenyi vamwe vakwate vaishi mujila yakukomwesa. Asakile kuvakafwa vatachikize ngwavo mulimo avahanyine wakufuta vatu wapwile waulemu kuhambakana kala mulimo. (Yowa. 21:15-17) Kaha nawa shimbu kanda ayenga mwilu, alwezele tumbaji twenyi ngwenyi mulimo wakwambulula uze aputukile ikiye naukaheta kumafuchi amavulu, keshi muIsalele kahako. (Tangenu Vilinga 1:6-8.) Kahomu mwahichile myaka yayivulu, Yesu amwenesele kaposetolo Yowano chakumwenesa chakusolola vyuma navikasoloka mulwola ‘lwalikumbi lyaMwata.’ * Chuma chimwe vamumwenesele shina kangelo uze “apwile namujimbu wamwaza wahaya myaka yosena” wakwambulila “vaka-mafuchi osena, navaka-miyachi yosena, navaka-malimi osena, navatu veka naveka vosena.” (Kuso. 1:10; 14:6) Chikupu vene namakumbi ano Yehova ali akusaka etu tuvosena twazane mumulimo wakwambulula mujimbu wamwaza swi noho mwakambila ngwenyi kunahu.

6. Vyuma muka navitukafwa tuhake muchima kumulimo wakwambulula?

 ⁶ Kushinganyekanga hajila ali nakutukafwilamo Yehova, nachitulingisa tuhake muchima kumulimo wakwambulula. Chakutalilaho, ali nakutuhana kulya chachivulu chakushipilitu kuhichila mumikanda yakupulita neyi yahamakina, namazu akukopa najivindiyo, nakeyala yetu yahaInternet. Hakeyala yetu yahaInternet hatwama kulya chakushipilitu mumalimi akuzomboka 1,000. (Mateu 24:45-47) Vatu mukaye kavapwa vakulinungako mwomwo yakukundwiza mauka akulihandununa amapolitiki nawa akwitava, kaha nawa mwomwo vatu vamwe vali naluheto chikuma oku vakwavo vihutu chikuma. Oloze vangamba jaKalunga vakuzomboka hajimiliyoni 8 vapwa vakulinunga mukaye kosena. Chakutalilaho, lyaChitanu, ha 19 April, 2019, Vinjiho jaYehova mukaye kosena valililile hamwe chisoneka chalikumbi. Kaha kuheta hakulembalemba chalikumbi, vatu 20,919,041 valikungulwile nakulinga chilika chaKwanuka Kufwa chaYesu. Kachi nge natushinganyekanga hakutokwa twatwama nacho chakumona vyuma kanevi nakwazanamo, kaha nachitulingisa tuhake chikuma muchima kumulimo wakwambulula.

7. Uno chakutalilaho chaYesu nachitukafwa ngachilihi tuhake muchima kumulimo wetu?

⁷ Chuma chikwavo nachitukafwa tuhake muchima kumulimo wakwambulula shina kulondezeza Yesu. Kakwapwile chuma chamutangwilenga ahone kwambulula mujimbuko. (Yowa. 18:37) Ketavilile omu Satana amulweze ngwenyi mwamuhana “mawangana osena akaye naupahu wawo,” chipwe kwivwa kuwaha omu vasakile kumulingisa kupwa mwanganako. (Mateu 4:8, 9; Yowa. 6:15) Kaha nawa kafwililile luheto, chipwe kwivwa woma omu vamufumbukililengako. (Luka 9:58; Yowa. 8:59) Nayetu nawa tunahase kutwalaho lika kuhaka muchima kumulimo wakwambulula kachi nge natwanukanga mazu aPaulu aze alwezele vakwavo vaka-Kulishitu ngwenyi vakavangizenga chakutalilaho chaYesu “mangana [vazeneke] kuzeya nakufutuka kumichima.”—Hepe. 12:3.

8. Muchima wakutalilila chikoki weji kutukafwanga ngachilihi, kaha mwomwo ika wapwila waulemu chikumanyi oholyapwa?

⁸ Muchima wakutalilila chikoki weji kutukafwanga tuunde muchima nakuvandamina ngwetu ukalu naukuma. Weji kutukafwanga nawa tufwelele ngwetu vyuma tuli nakuvandamina navikatesamo numba tuhu nahahita lwola lwalusuku. Kapolofweto Hambakuke apwile nakuvandamina kukuma chavilinga vyauhwanga vyapwile muYuta. (Hamba. 1:2) Tumbaji twaYesu nawa vapwile nakushinganyeka ngwavo pamo Wangana ‘nausoloka kalinwomu,’ nakuvasokola kuchiyulo chavaLoma. (Luka 19:11) Tuvosena twatalilila omu Wangana waKalunga naukafumisako vyuma vyavipi vyosena nakukatwingisa mukaye kakahya muze namukapwa kwoloka. (Petu. 2, 3:13) Oloze twatela kupwa namuchima wakutalilila chikoki nakuvandamina lwola atongola Yehova. Tushimutwilenu hajijila jimwe jize Yehova ali nakutunangwilamo kupwa namuchima wakutalilila chikoki.

9. Vyakutalilaho muka vyasolola nge Yehova atwama namuchima wakutalilila chikoki?

⁹ Yehova atwama namuchima wakutalilila chikoki. Chakutalilaho, ahanyine Nowa lwola lwakutamo lwakusonga wato nakumutongola kupwa “muka-kwambulula kwoloka.” (Petu. 2, 2:5; Petu. 1, 3:20) Kaha nawa Yehova evwililile Apalahama omu amuhulishile mapapa kakavulu vyakunongesa vaka-kuhuka vamunganda yaSotome nayaNgomola. (Kupu. 18:20-33) Hamyaka yayivulu nawa, Yehova atalilililenga  chikoki vaIsalele vakuhona kushishika. (Nehe. 9:30, 31) Kaha namakumbi ano tuli nakumona omwo Yehova ali nakusolola muchima wakutalilila chikoki, nakuhana vatu lwola “vapihilile nakwalumuka.” (Petu. 2, 3:9; Yowa. 6:44; Chimo. 1, 2:3, 4) Shikaho, nayetu twatela kulondezeza Yehova hakupwa namuchima wakutalilila chikoki omu tuli nakwambulila vatu nakuvanangula. Yehova eji kutunangulanga nawa muchima wakutalilila chikoki kuhichila muMazu enyi.

10. Kweseka nachisoneka chaWaYakova 5:7, 8, vyuma muka natulinangula kuli njimi?

¹⁰ Tangenu WaYakova 5:7, 8. Chakutalilaho chanjimi cheji kutunangulanga kupwa namuchima wakutalilila chikoki. Mbuto jimwe jeji kukolanga washi, olozenyi jajivulu jakufwana nge jize jakwima mihako, jeji kushimbulanga numba jihyenga. MuIsalele, jimbuto jambachilenga kafwe tukweji 6 numba jihyenga. Njimi atumbilenga jimbuto jenyi kukuputuka chavula, kaha ajahilenga kuchivatuko chavula. (Mako 4:28) Shikaho, tulondezezenunga muchima wanjimi wakutalilila chikoki. Oloze chinahase kupwa chachikalu kulinga ngocho.

11. Uno muchima wakutalilila chikoki nautukafwa ngachilihi mumulimo wakwambulula?

¹¹ Kakavulu etu vatu vakuhona kukupuka tweji kufwilanga kumona nganyo yavyuma tunakuzata hahaze vene. Chipwe ngocho, nge tunalimi litepa lyetu nakutumbamo jimbuto, twatela kushikilila, nakutukumwinanga numbanyi tukahile hahanene. Namulimo wakunangula vatu vapwenga tumbaji wasakiwa kukilikita. Heji kuhitanga lwola numba tuhase kukafwa mutu tuli nakunangula ambile muchima wakumona vakwavo ulumbi nakupwa jino nazangi. Kaha muchima wakutalilila chikoki nautukafwa tuhone kuhomba nge vatu navakana kutwivwilila. Nautukafwa nawa kachi nge vatu vali nakusaka kulinangula, mwomwo katweshi kuhasa kuvashinjila vafwelele vyuma tuli nakuvanangulako. Chakutalilaho, natumbaji twaYesu lwola lumwe chavakaluhwilile  kwivwishisa vyuma apwile nakuvanangula Yesu. (Yowa. 14:9) Shikaho, twatela kwanuka ngwetu, etu tweji kutumbanga kaha nakutukumwina, oloze Kalunga ikiye eji kukolesanga.—Koli. 1, 3:6.

12. Uno natusolola ngachilihi muchima wakutalilila chikoki hakwambulila vausoko wetu?

¹² Chinahase kutukaluhwila kupwa namuchima wakutalilila chikoki kachi nge tunakwambulila vausoko wetu. Oloze lundongi lwatwama hali Muka-kwambulula 3:7 nalutukafwa. Vasonekaho ngwavo: “Kuli lwola lwakuhola kulu, nalwola lwakuhanjika.” Shikaho, tunahase kuhana unjiho chakuhona kuhanjika hakusolola vilinga vyamwaza, kaha twatela kupwa vakulizanga kala lwola kuvambulila vyaYehova. (Petu. 1, 3:1, 2) Ngocho twatela kusolola muchima wakutalilila chikoki omu natwambulila vatu natwima nakuvanangula, kuhakilako vene navausoko wetu.

13-14. Vyakutalilaho muka twatela kulondezeza vyavaze vapwile namuchima wakutalilila chikoki?

¹³ Tunahase kulondezeza vangamba jaKalunga vakushikulu navamakumbi ano vamuchima wakutalilila chikoki. Numba tuhu Hambakuke asakile upi ukume, oloze ambile ngwenyi: “Nangwimana kuchihela chami chakulamina.” (Hamba. 2:1) Kaposetolo Paulu nayikiye afwilililile ‘kukumisa’ mulimo wenyi. Oloze atwalileho “kuhana kanawa unjiho wamujimbu wamwaza.”—Vili. 20:24.

¹⁴ Ndumbwetu umwe napuwenyi vakumishile shikola yaNgileyate, kaha vavatumine kulifuchi kuze kwapwile Vinjiho vavandende, kuze vatu vavavulu vatwama nakwitava cheka keshi chavaka-Kulishituko. Vatu vavavulu kavasakilenga kulinangula Mbimbiliyako. Oloze vakwavo muvapwililile mushikola vaze vatumine kumafuchi eka, vavalwezelenga ngwavo vapwile nakulivwisa kuwaha kunangula vatu vaze vapwile nakuzovoloka. Chipwe ngocho, vakiko vatwalileho kupwa namuchima wakutalilila chikoki hakuzata mulimo wakwambulula. Kahomu mwahichile myaka 8, vevwile kuwaha omu chilongesa chavo umwe vamumbapachishile. Uno evi vyakutalilaho vyakushikulu nevi vyamakumbi ano vili nakutunangula chishina muka? Ava vandumbwetu vakushishika kavalitwaminyinyine kuzata chipwe kunokesa mavoko avoko, ngocho Yehova avafwetele mwamunene hamuchima wavo wakutalilila chikoki. Shikaho, tufwilenu “[kulondezeza] vaze vanaswane vyuma vashika hakupwa nalufwelelo namuchima wakutalilila chikoki.”—Hepe. 6:10-12.

15. Jila yimwe muka yize lufwelelo lweji kutukafwilangamo tutwaleho kwambulula?

¹⁵ Twafwelela vyuma tweji kwambululanga, ngocho cheji kutulingisanga twambulile vatu vavavulu. Chakutalilaho, twafwelela vyuma vatushika muMazu aKalunga. (Samu 119:42; Isa. 40:8) Tuli nakumona omu uli nakutesamo upolofweto wamuMbimbiliya makumbi ano. Tuli nakumona omu vatu vali nakwalumuna chiyoyelo chavo mwomwo yakukavangiza jishimbi jamuMbimbiliya. Kumona vyuma kana cheji kutukafwanga tufwelele ngwetu mujimbu wamwaza waWangana wapwa waulemu kaha vatela kuwambulula kuvatu vosena.

16. Kweseka naSamu 46:1-3, kufwelela Yehova cheji kutukafwanga ngachilihi tutwaleho kwambulula? Nyi kufwelela Yesu nawa nachitukafwa ngachilihi?

¹⁶ Twafwelela nawa Yehova uze apwa Mwenya-mujimbu uze tweji kwambululanga, naYesu uze atongola kupwa Mwangana waWangana wenyi. (Yowa. 14:1) Chamokomoko nakala ukalu natumona, Yehova mwapwanga lika uchinyino wetu kaha nawa ngolo jetu. (Tangenu Samu 46:1-3.) Kaha nawa twafwelela ngwetu numba tuhu Yesu ali mwilu, oloze ikiye ali nakutwaminyina mulimo wakwambulula, kuzachisa ngolo vamuhana kuli Ise Yehova.—Mateu 28:18-20.

17. Hanenu chakutalilaho chasolola nge twatela kutwalaho kwambulula?

 ¹⁷ Lufwelelo lweji kutulingisanga tukunyuke ngwetu Yehova mwatukafwanga, namujila yize katwashinganyekeleko. (Kwambu. 11:6) Chakutalilaho, hakumbi hakumbi vatu veji kutumonanga tunatanjika mikanda hajimesa jajindende jatufumbo nahatumatemba. Uno kwambulula mujila kaneyi chili nakuneha nganyo tahi? Eyo. Chakutalilaho, muMulimo Wetu waWangana waNovember 2014 vasonekelemo mujimbu wamwanapwevo umwe apwile hayunivesiti, uze apwile nakutonda kusoneka mujimbu hali Vinjiho jaYehova. Numba tuhu kahashile kuwana okwo kwapwile Zuvo yaWanganako, oloze amwene mesa vatanjikile mikanda yetu haze vene hashikola yavo, ngocho ayileko, kaha awanyine mikanda yize yapwile namijimbu apwile nakusaka. Kutwala muze alumukile nakupwa Chinjiho chaYehova, oholyapwa apwa payiniya washimbu yosena. Mijimbu yakufwana ngana yeji kutulingisanga tufwile kutwalaho kwambulula mwomwo tweji kumonanga ngwetu kuchili vatu vaze vali nakusaka kwivwa mujimbu waWangana.

18. Twatachikiza ngachilihi ngwetu mulimo wakwambulula naukakuma kweseka nalwola atongola Yehova?

¹⁸ Tunafwelela chikupu ngwetu mulimo wakwambulula Wangana naukakuma halwola lwakutamo. Anukenu chakutalilaho chamumakumbi aNowa. Yehova asolwele ngwenyi apwa Muka-kulama lwola wamwenemwene. Atongwelele chimweza lwola nalikeza Livaji shimbu kwasalile myaka 120. Kahomu mwahichile myaka yayivulu, Yehova alwezele Nowa asonge wato. Nowa azachile nangolo hamyaka kafwe 40 chipwe 50, swi nomu lyejile livaji. Numba tuhu vatu ambulwililenga kavamwivwilililengako, oloze ikiye atwalileho kwambulula mujimbu wakuhuhumuna swi nomu Yehova amulwezele engise tunyama muwato. Kufumaho “Yehova asokele kuchikolo” halwola lwakutamo.—Kupu. 6:3; 7:1, 2, 16.

19. Kuwaha muka nachikafumamo kachi nge mavoko etu kaweshi kunokako?

¹⁹ Kalinwomu Yehova emike mulimo wakwambulula mujimbu waWangana. Kaha mwakanongesa kaye kaSatana, nakukaneha kaye kakahya muze namukapwa vatu vakwoloka. Oloze oholyapwa, tulondezezenu Nowa, naHambakuke naveka vaze kavanokesele mavoko avoko. Tutwalenuho kuhaka muchima kumulimo wetu, nakupwa namuchima wakutalilila chikoki, nakutwalaho lika kufwelela Yehova najishiko jenyi.