Echi chisoneka chamba ngwacho: “Kachi nge naumona chilolo mwayanjisa muka-kuhutwa mungalila yove, chipwe mwazeneka kulinga mwachiyulo, mwakwoloka, kaha kanda naulikomokela hachuma kanako. Mwomwo chilolo kana vali nakumumona kuli uze namuhambakana ngolo. Kaha kuli veka nawa vanahambakana vakwavo ngolo.”—Kwambu. 5:8.

Nge katweshi kukekesa vishinganyeka vyaYehovako, kaha tunahase kushinganyeka ngwetu chisoneka kana chahanjika kaha hali vaka-kuyula vahano hamavu. Oloze echi chisoneka chahanjika nawa hali Yehova, ngocho chuma kana chatela kutuvendejeka.

Chisoneka chaMuka-kwambulula 5:8 chavuluka muka-kuyula uze ali nakuyanjisa vaka-kuhutwa nakuhona kuvalinga mwachiyulo. Ou muka-kuyula atela kwanuka ngwenyi vali nakumumona kuli uze amuhambakana ngolo. Kaha nawa kunahase kupwa vatu veka vaze vanavahambakana ngolo vosena. Chaluvinda, vaka-kuyula vosena mujifulumende jahano hamavu vanahase kupwa vavapi michima, ngocho vatu vanahase kuyanda mwomwo yavilinga vyavo vyavipi.

Chipwe ngocho, numba tupwa muukalu wakufwana ngachilihi, tunahase kufwelela ngwetu Yehova ali nakuvamona ava ‘vilolo’ vafulumende yavatu. Shikaho tunahase kumbila viteli vyetu hali ikiye hakumulomba atukafwe. (Samu 55:22; Fwili. 4:6, 7) Twatachikiza ngwetu “eji kutalatalanga hamavu hosena mangana asolole ngolo jenyi jakukafwa vaze veji kumuzachilanga namuchima wavo wosena.”—Miji. 2, 16:9.

Chisoneka chaMuka-kwambulula 5:8 chatukafwa tutachikize ngwetu mutu himutu uze ali nachihela mufulumende kuli namutu weka namuhambakana. Chachinenenyi, vesi kana yatukafwa tutachikize ngwetu Yehova ikiye ahambakana vaka-kuyula vosena, mwomwo ikiye atwama nangolo josena. Oholyapwa ali nakuyula kuhichila muli Mwanenyi Yesu Kulishitu, uze apwa Mwangana waWangana wenyi. Kalunga Wangolo Josena eji kumonanga vatu vosena kaha atwama nachiyulo chamwenemwene. Omu mukiko apwa naMwanenyi.