1. Lwola muka chinahase kupwa chachikalu kuzachila Yehova?

MWASHINGANYEKA ngwenu lwola muka chinahase kupwa chachikalu kuzachila Yehova? Nge muli nakuhita muukalu, nyi nge vyuma vili kaha kanawa mukuyoya chenu? Chapwa chachashi kupendamina hali Yehova kachi tuli nakuhita muukalu. Oloze tweji kulinganga ngachilihi nge tuli nakutwama mukuunda? Kutala tweji kuvulyamanga kuzachila Yehova tahi? Yehova ahuhumwine vaIsalele ngwenyi chuma kana chinahase kusoloka nakuli vakiko.—Lushi. 6:10-12.

2. Chakutalilaho muka atusela Mwangana Asa?

² Mwangana Asa atusela chakutalilaho chamwaza mwomwo apendaminyinenga chikuma hali Yehova. Azachilile Yehova mulwola lwaukalu namulwola kwapwile kuunda. Kufuma vene kuunyike wenyi, “azachilile Yehova namuchima wenyi wosena.” (Vamya. 1, 15:14) Jila yimwe asolwelelemo ngwenyi azachilile Yehova namuchima wosena shina yakufumisa kwitava chamakuli muYuta mwosena. Mbimbiliya ngwayo, “afumishile majiko akulumbila atulunga veka, navihela vyakulunduka. Apuzwile nawa jipanda jajila jamalolwa, nakuteta jipanda jajila jamitondo.” (Miji. 2, 14:3, 5) Kaha nawa afumishile kaka yenyi Maka hachihela chenyi vamuvulukilenga ngwavo naye yamwangana. Mwomwo ika? Mwomwo akundwijilenga kulemesa makombelo.—Vamya. 1, 15:11-13.

3. Vyuma muka natushimutwila muchihande chino?

³ Asa kakuminyinyine kaha hakufumisako kwitava chamakuliko. Akundwijile nawa kwitava chamuchano, nakukafwa vatu vamuYuta vakinduluke kuli Yehova. Shikaho Yehova akiswile Asa navaIsalele vosena nakuvalingisa vatwame mukuunda. *  Hamyaka 10 yamuchiyulo chaAsa, “mulifuchi lyosena mwapwile kuunda.” (Miji. 2, 14:1, 4, 6) Shikaho muchihande chino, natushimutwila omwo Asa azachishile lwola kanelu lwakuunda. Natushimutwila nawa hali vaka-Kulishitu vamulikulukaji lyamyaka lyakulivanga vaze vazachishile kanawa lwola luze vatwaminenga mukuunda. Kufumaho, natukumbulula jino chihula chino: Kachi nge mwatwama mulifuchi muze vetavisa mulimo waVinjiho jaYehova, kaha munahase kuzachisa ngachilihi kanawa lwola kana?

4. Kweseka naMijimbu 2, 14:2, 6, 7, Asa alingile ika omu vatwaminenga mukuunda?

⁴ Tangenu Mijimbu 2, 14:2, 6, 7. Asa alwezele vatu ngwenyi Yehova yikiye ‘avalingishile vatwame mukuunda.’ Asa kashinganyekele ngwenyi elu lwola lwakuunda lwapwile lwakutwama kaha nakulya nakunwako. Oloze akatwile mulimo wakutunga jinganda najikembwe natuposhi, navikolo. Alwezele vatu vamuYuta ngwenyi: “Lifuchi lyosena lichili lyetu.” Uno alumbunwine ika? Alumbunwine ngwenyi vatu vapwile nalisesa lyakulitambukila mulifuchi lize avahanyine Kalunga nakuzata mulimo wakutunga chakuzeneka mutu wakuvazungisa. Avalwezele vazachise kanawa lwola luze vatwaminenga mukuunda.

5. Mwomwo ika Asa alongeselele maswalale vyajita?

⁵ Asa azachishile nawa lwola vatwaminenga mukuunda hakukafwa maswalale vapwenga vakulizanga vyajita. (Miji. 2, 14:8) Uno echi chasolola nge kafwelelele ngwenyi Yehova mwavakingako tahi? Nduma. Ejivile vene ngwenyi hakupwa mwangana, atelele kukafwa vatu vapwenga vakulizanga haukalu uze unahase kuvasolokela. Asa ejivile nawa ngwenyi  kuunda vapwile nacho muYuta pamo kacheshi kupwangako likako. Kaha chikupu vene chakumine.

6. Uno vaka-Kulishitu vakulivanga valingile ika halwola vatwaminenga mukuunda?

⁶ Numba tuhu vaka-Kulishitu vakulivanga vavayanjishilenga, oloze lwola lumwe vatwaminenga mukuunda. Uno ava vaka-Kulishitu valingilenga vyuma muka halwola kana? Ava vandumbwetu vakushishika vambulwile mujimbu wamwaza natwima. Mukanda waVilinga wamba ngwawo vapwilenga “nakumwivwa Yehova woma.” Vambulwilenga mujimbu wamwaza, ngocho vapwilenga nakuvulilako lika. Yehova akiswile mulimo wavo wakwambulula halwola vatwaminenga mukuunda.—Vili. 9:26-31.

7-8. Vyuma muka alingile Paulu navakwavo vaka-Kulishitu halwola vatwaminenga mukuunda? Lumbununenu.

⁷ Vaka-Kulishitu vakulivanga vambulililenga vatu heshoho vavawanyinenga. Chakutalilaho, omu kaposetolo Paulu atachikijile ngwenyi apwile namilimo yayivulu yakuzata muEfwesu, atwamine munganda kana mangana ambulule mujimbu wamwaza nakunangula vatu vapwenga tumbaji.—Koli. 1, 16:8, 9.

⁸ Paulu navakwavo vaka-Kulishitu vawanyine lwola lukwavo lwakwambulula omu valingile vanavatula lyehi chihande chakujihana mu 49 C.E. (Vili. 15:23-29) Omu vatu muvikungulwilo vavalwezele mujila vavatwililemo chihande kana, vosena vazachile nangolo mangana vavilike “mujimbu wamwaza wamazu aYehova.” (Vili. 15:30-35) Vyuma muka vyafuminemo? Mbimbiliya yatulweza ngwayo, “vikungulwilo vyazaminenga lika mulufwelelo, kaha hakumbi hakumbi vatu vapwile nakuvulilako lika.”—Vili. 16:4, 5.

9. Vyuma vili ngachilihi mumafuchi amavulu makumbi ano, kaha chihula muka twatela kulihulisa?

⁹ Makumbi ano, mumafuchi amavulu vatu vali nakwambulula chakuhona ukalu. Kutala mulifuchi lyenu vetavisa mulimo waVinjiho jaYehova tahi? Nge mukiko, kaha lihulisenu ngwenu, ‘Uno nguli nakuzachisa ngachilihi lwola kana?’ Luno hilwola lwamwaza kuli Vinjiho jaYehova, mwomwo liuka lyaYehova lili nakuzata mulimo wakwambulula haseteko yize kanda vawambululengaho lyehi mukaye kosena. (Mako 13:10) Vatu jaYehova vali namilimo yayivulu.

10. Uno chisoneka chaWaChimoteu 2, 4:2 chatukolezeza tulinge ika?

¹⁰ Munahase kuzachisa ngachilihi kanawa lwola lwakuunda? (Tangenu WaChimoteu 2, 4:2.) Munahase kulikekesa mangana mumone nge enu chipwe mutu weka mutanga yenu nahase kutohwesa mulimo wenyi, pamo hakuzatako upayiniya. Luno keshi hilwola lwakulivulishila luheto navikumbako, mwomwo vyuma kana katweshi kukayovoka navyo haluyando lwaluneneko.—Vishi. 11:4; Mateu 6:31-33; Yowa. 1, 2:15-17.

11. Chuma muka vanalingi vatu vamwe mangana vazate chikuma mulimo wakwambulula?

¹¹ Vaka-kwambulula vavavulu vanalinangula malimi eka mangana vazate chikuma mulimo wakwambulula nakunangula. Liuka lyaKalunga lili nakutukafwa mwomwo lili nakutuhana vinoma vyakuzachisa mumalimi amavulu. Chakutalilaho, mu 2010, mikanda yetu yapwile mumalimi 500. Oloze oholyapwa mikanda yetu yili jino mumalimi 1,000.

12. Uno vatu veji kunganyalanga ngachilihi hakwivwa mujimbu waWangana mulilimi lyavo? Hanenu chakutalilaho.

¹² Uno vatu veji kwivwanga ngachilihi hakuvanangula  muchano wamuMazu aKalunga mulilimi lyavo? Ndumbwetu umwe wapwevo ayile kukukunguluka changalila chize chapwile muMemphis, munganda yaTennessee, mu U.S.A. Kukunguluka kana chapwile mulilimi lyaKinyarwanda, lize veji kuhanjikanga muRwanda, namuCongo (Kinshasa), namuUganda. Hanyima yakukunguluka ou ndumbwetu ambile ngwenyi: “Ngunatwame myaka 17 muno muUnited States. Oloze elu lukiko lwola lwatete kwivwishisa kanawa vihande hakukunguluka changalila.” Chikupu vene, vihande evwililile ou ndumbwetu mulilimi lyenyi hakukunguluka kana vyamukwachile kumuchima. Kutala munahase kulinangulako lilimi lyeka mangana mwambulile vatu vamungalila yenu tahi? Pamo mungalila yenu munahase kupwa mutu uze mwasaka kwivwilila kumujimbu wamwaza kachi nge namumwambulila mulilimi lyenyi. Kulisuula kulinga chuma kana nachimilingisa mupwenga muvakuwahilila chikuma.

13. Chuma muka valingile vandumbwetu vamuRussia halwola luze vatwaminenga mukuunda?

¹³ Vandumbwetu vamwe kavatwama nalisesa lyakuzata mulimo wakwambululako. Mumafuchi amwe vandumbwetu vali nakuhona kuzata kanawa mulimo wakwambulula mwomwo vaka-fulumende kavetavisa mulimo wetuko. Chakutalilaho, vandumbwetu muRussia vavayanjishile hamyaka yayivulu, kaha kuheta muMarch 1991, fulumende yetavishile jino mulimo waVinjiho jaYehova. Halwola kana muRussia mwapwile vaka-kwambulula 16,000. Kahomu mwahichile myaka 20, vahetele jino ku 160,000. Echi chasolola nge vazachishile kanawa lwola luze vapwile nalisesa lyakwambulula. Kuunda vapwile nacho kachatwalilehoko. Chipwe ngocho, kwalumuka chavyuma kachazeyesele twima yavo yakuzata mulimo wakutandakanyisa kulemesa chamuchanoko. Vachili nakuzachila Yehova kweseka noho vanahashila.

14-15. Yehova akafwile ngachilihi Asa?

¹⁴ Kuunda chize chapwile mumakumbi aAsa chakumine. KuEchopa kwafumine maswalale vakuheta kumiliyoni yimwe vaze vavalukukile. Kapitau kavo Zela ashinganyekele ngwenyi mwahasa kufungulula vatu vamuYuta. Oloze Mwangana Asa afwelelele Kalunga kenyi Yehova, numba apwile namaswalale vavandende. Alombele ngwenyi: “Ove Yehova Kalunga ketu, tukafwe mwomwo tunapendamina hali ove, kaha nawa tuneza nakulwa nalizavu eli mulijina lyove.”—Miji. 2, 14:11.

¹⁵ Numba tuhu kuvula chamaswalale jaAsa chengilile kafwe kavali mukuvula chamaswalale javaka-Echopa, oloze Asa ejivile ngwenyi Yehova mwavakafwa. Kaha chikupu vene Yehova avakafwile vafungulule vaka-Echopa.—Miji. 2, 14:8-13.

16. Uno tunejiva ngachilihi ngwetu kuunda tuli nacho nachikakuma?

¹⁶ Numba tuhu katwejivile vyuma navikasoloka kuli etu mutu himutuko, oloze twejiva ngwetu kala kuunda tuli nacho chinapu chakashimbu kakandende kaha. Yesu ahanjikilile chimweza ngwenyi, hamakumbi akukuminyina tumbaji twenyi “[navakavahunga] kuli vaka-mafuchi osena.” (Mateu 24:9) Kaha nawa kaposetolo Paulu ambile ngwenyi “vosena vaze vafwila kuyoya mwaya muchima wakuzachila Kalunga hakulikata naKulishitu Yesu, navakiko navavayanjisanga.” (Chimo. 2, 3:12) Satana nawa ali “namatoto amanene,” shikaho nachipwa chakuhenga kushinganyeka ngwetu keshi kuhasa kutuhungumwisako.—Kuso. 12:12.

17. Vyuma muka vinahase kukalingisa chikakaluhwe kulama kulonga chetu?

¹⁷ Kalinwomu kulonga chetu vacheseke. Vatu mukaye navakamona “luyando lwalunene, luze kanda lusolokengaho lyehi kufuma kukuputuka chakaye palanga nakulelo lino.” (Mateu 24:21) Halwola kana vanahase kukatufumbukila kuvausoko, chipwe vaka-fulumende hakukanyisa mulimo wetu. (Mateu 10:35, 36) Kutala natukahasa kufwelela Yehova mangana akatukafwe nakutukinga, ngana muze alingile Asa tahi?

18. Kweseka naWavaHepeleu 10:38, 39, chuma muka nachitukafwa tulizange havyuma navikasoloka nge kuunda tuli nacho chinakumu?

 ¹⁸ Makumbi ano, Yehova ali nakutukafwa tuzamise lufwelelo lwetu. Ali nakutwaminyina “ndungo wakushishika wakuzangama” mangana atuhane kulya chakushipilitu “halwola lwakutamo” chize nachitukafwa tutwaleho kulemesa Kalunga. (Mateu 24:45) Chipwe ngocho nayetu twatela kukilikita mangana tutwaleho kufwelela Yehova.—Tangenu WavaHepeleu 10:38, 39.

19-20. Kweseka naMijimbu 1, 28:9, vihula muka twatela kulihulisa, kaha mwomwo ika?

¹⁹ Nayetu twatela ‘kutondatonda Yehova’ ngana muze alingile Asa. (Miji. 2, 14:4; 15:1, 2) Tweji kuputukanga kumutondatonda omu tweji kulinangulanga hali yikiye nakutumbapachisa. Tweji kulinganga vyuma vize navitukafwa tutwaleho kuzanga Yehova. Tunahase kulikekesa hakulihulisa ngwetu, ‘Kutala ngweji kukungulukanga lwola lwosena tahi?’ Kupwa kukukunguluka cheji kutukafwanga tutwaleho kuzachila Yehova nakulikolezeza navandumbwetu. (Mateu 11:28) Tunahase kulihulisa nawa ngwetu, ‘Kutala ngwatwama nachilongesa chauka chakulumbunuka tahi?’ Kachi nge mwatwama natanga yenu, kutala mwanoneka lwola lwakulinga chilongesa chakulemesa Kalunga mwatanga chalumingo hichalumingo tahi? Nge mwatwama ukawenu, kutala mwanoneka lwola lwakulinangula ngana muze navalinga vaze vali natanga tahi? Kutala mweji kuzatanga chikuma mulimo wakwambulula nakunangula vatu vapwenga tumbaji tahi?

²⁰ Mwomwo ika twatela kulihulisa vihula kana? Mbimbiliya ngwayo Yehova eji kukekesanga vishinganyeka vyetu navyuma vili mumichima yetu, shikaho nayetu twatela kulinga mwomumwe. (Tangenu Mijimbu 1, 28:9.) Kachi nge natumona ngwetu tuli nakusakiwa kwalumunako vyuma twalitomena, navishinganyeka vyetu, kaha twatela kulomba Yehova atukafwe tulinge vene ngocho. Luno hilwola lwakulizanga havyuma navikasoloka kulutwe. Kakwatela kupwa chuma nachimihonesa kuzachisa kanawa lwola muli nakutwama mukuundako.