1. Milimo muka veji kuzatanga vandumbwetu vamapwevo muliuka lyaYehova, kaha ukalu muka veji kuhitangamo vamwe? (Talenu muvwimbimbi wahalipapilo lyahelu.)

CHAPWA hikutokwa chachinene kupwa navandumbwetu vamapwevo vavavulu muchikungulwilo. Chakutalilaho, veji kwazananga mukukunguluka namumulimo wakwambulula nakunangula vatu. Veka veji kuzatanga mulimo wakuwahisa Zuvo yaWangana nakuzakama nawa vandumbwavo. Chipwe ngocho, veji kuhitanga muukalu. Vamwe veji kulamanga visemi javo vatushinakaji. Kaha veka nawa veji kuvayanjisanga kuli vausoko wavo. Vakwavo nawa vapwa visemi vavajike vaze veji kukilikitanga mangana vazakame vana vavo.

2. Mwomwo ika twatela kukundwiza vandumbwetu vamapwevo?

² Mwomwo ika twatela kukundwiza vandumbwetu vamapwevo? Mwomwo vatu vavavulu mukaye kavamona mapwevo kupwa vavalemuko. Kaha nawa Mbimbiliya yatukolezeza tukundwizenga vandumbwetu vamapwevo. Chakutalilaho, kaposetolo Paulu alwezele vandumbwenyi muchikungulwilo chamuLoma vatambule kanawa ndumbwavo wapwevo Fwivi, “nakumukafwako muvyuma vyosena navisakiwa kumukafwa.” (Loma 16:1, 2) Omu Paulu apwile kaFwaliseu, apwile halizavu lyavatu vaze vapwilenga nakumona mapwevo ulumbi. Jino omu alumukile nakupwa muka-Kulishitu, aputukile kulondezeza chakutalilaho chaYesu hakumona mapwevo kupwa vavalemu nakuvasolwela likoji.—Koli. 1, 11:1.

3. Yesu amwenenga ngachilihi mapwevo vosena, kaha amwenenga ngachilihi vaze vapwile nakulinga mwayile muchima waIse?

³ Yesu amwenenga mapwevo vosena kupwa vavalemu. (Yowa. 4:27) Kapwile nakuvamona ngana muze vavamwenenga vatwamina vamukwitava chavaYuleya vamumakumbi enyiko. Mukanda umwe wahanjika haMbimbiliya wamba ngwawo: “Yesu kahanjikileho mazu aze asolwele nge amwenenga mapwevo kupwa vamokomokoko.” Chipwe ngocho, Yesu avumbikilenga chikuma mapwevo vaze vapwilenga nakulinga mwayile muchima waIse.  Avamwenenga kupwa hivandumbwenyi, kaha nawa avalavililile hamwe namalunga vaze amwenenga kupwa vausoko wenyi vakushipilitu.—Mateu 12:50.

4. Vyuma muka natushimutwila muchihande chino?

⁴ Yesu apwile wakulizanga kukafwa mapwevo vaze vapwilenga nakuzachila Kalunga. Apwilenga nakuvasakwilila nakuvahanjikilako. Tushimutwilenu omwo tunahase kulondezezelamo Yesu hakuzakama vandumbwetu vamapwevo.

5. Mwomwo ika vandumbwetu vamapwevo vanahase kuchiwana kupwa chachikalu kuwana vakulikata navo?

⁵ Tuvosena muchikungulwilo twasaka kupwa navatu vakulikata navo. Chipwe ngocho, vandumbwetu vamapwevo vanahase kuchiwana kupwa chachikalu kuwana vakulikata navo. Mwomwo ika? Ivwenu vyuma vahanjikile vandumbwetu vamwe vamapwevo. Ndumbwetu Jordan * ambile ngwenyi: “Hakuwana nge ngwapwa ngumujike, kakavulu ngweji kwivwanga nge kangwapwa nguwamulemu muchikungulwiloko.” Kaha ndumbwetu Kristen nawa uze ayile nakuzata mulimo wakwambulula kungalila yeka ambile ngwenyi: “Unahase kwivwa uli nge hakiko unalukila kuchikungulwilo cheka.” Navandumbwetu vamwe vamalunga vanahase vene kwivwa ngocho. Vandumbwetu vaze vatwama mutanga yize kayapwa yaVinjihoko chinahase kuvakaluhwila kupandama kutanga yavo, nakuhona nawa kupwa vakukasunuka kuli vandumbwavo muchikungulwilo. Kaha nawa vandumbwetu vaze vatwama muluuta navaze veji kulamanga vatanga javo vakuviza vanahase kwivwa uli. Chakutalilaho, ndumbwetu Annette ambile ngwenyi: “Ngwakanyinenga kuya nakushikama navandumbwami mwomwo yami ngwalaminenga mama.”

6. Kweseka nachisoneka chaLuka 10:38-42, Yesu akafwile ngachilihi Malita naMaliya?

⁶ Yesu awanyinenga lwola lwakupwa hamwe namapwevo vaze vazachililenga Kalunga, kaha nawa apwile sepa lyavo wamwenemwene. Chakutalilaho, apwile sepa lyaMaliya naMalita vaze pamo vapwile vajike. (Tangenu Luka 10:38-42.) Mazu apwile nakuhanjika Yesu navilinga vyenyi vyavalingishile vapwenga vakukasunuka. Chakutalilaho, Maliya apwile wakukasunuka kutwama kumahinji aYesu hakupwa kambaji kenyi. * Kaha Malita nawa apwile wakukasunuka kulweza Yesu vyuma apwile nakushinganyeka omu Maliya ahonene kumukafwako milimo. Halwola kana, Yesu akafwile ava mapwevo vosena vavali valinangule vishina vyavilemu. Kaha asolwele nge azakamine chikuma ava mapwevo hamwe nandumbwavo walunga Lazalu hakuvatambukila cheka halwola lweka. (Yowa. 12:1-3) Echi chikiko chalingishile Maliya naMalita vashinganyeke ngwavo Yesu mwavakafwa omu ndumbwavo Lazalu avijile chikuma.—Yowa. 11:3, 5.

7. Jila yimwe muka tunahase kukolezezelamo vandumbwetu vamapwevo?

⁷ Lwola lwakukunguluka lukiko vandumbwetu vamwe vamapwevo veji kulikatanga chikuma navandumbwavo. Shikaho, halwola kana twatela kutambulanga kanawa ava vandumbwetu, nakuvahanjikisanga nakusolola nge twavazakama. Ndumbwetu Jordan uze twavulukanga, ambile ngwenyi: “Cheji kungukolezezanga chikuma kachi nge vakwetu navangusangejeka hakukumbululaho hakukunguluka, nakuzata nayami muwande, chipwe kusolola ngwavo vanguzakama mujijila jeka.” Vandumbwetu vamapwevo vatela kumona ngwavo twavamona kupwa vavalemu. Ndumbu Kia ambile ngwenyi: “Kachi nge kangwayile nakukungulukako, vandumbwami veji kungutuminanga nakunguhulisa nge nguli kanawa. Kahechi cheji kungulingisanga ngutachikize ngwami vanguzakama.”

8. Jijila muka jikwavo tunahase kulondezezelamo Yesu?

 ⁸ Twatela kuwanangako lwola lwakushimutwilanga navandumbwetu vamapwevo, ngana muze alingilenga Yesu. Tunahase kuvasanyika tulyenga navo vyakulya kuzuvo yetu chipwe kulihizumwina hamwe. Halwola lwangana, twatela kufwila kuhanjika mazu akukolezeza vakwetu. (Loma 1:11, 12) Vakulwane muchikungulwilo vatela kupwa namuchima ngana uze apwile nawo Yesu. Numba tuhu atachikijile ngwenyi ujike unahase kulingisa vatu vamwe vahombe, oloze ahanjikile nawa ngwenyi, kusomboka chipwe kupwa navana kacheshi kulingisa mutu awahilile haya myaka yosenako. (Luka 11:27, 28) Kuwahilila chamwenemwene cheji kwizanga kachi nge natumona kuzachila Yehova kupwa chachilemu mukuyoya chetu.—Mateu 19:12.

9. Vyuma muka vatela kulinga vakulwane muchikungulwilo mangana vakafwe vandumbwavo vamapwevo?

⁹ Vakulwane muchikungulwilo vatela kumonanga mapwevo vaka-Kulishitu kupwa nge hivandumbwavo namanevo. (Chimo. 1, 5:1, 2) Vakulwane vatela kushimutwilanga navandumbwavo vamapwevo shimbu kanda kukunguluka nahanyima yakukunguluka. Ndumbwetu Kristen ambile ngwenyi: “Mukulwane umwe amwene ngwenyi ngwapwilenga navyuma vyavivulu vyakulinga, shikaho asakile kutachikiza omwo ngwazachishilenga lwola lwami. Ngwamusakwililile chikuma hamuchima wenyi wakunguzakama.”  Kachi nge vakulwane muchikungulwilo navawanangako lwola lwakushimutwilanga navandumbwavo vamapwevo, kaha navasolola ngwavo vavazakama chikuma. * Ndumbwetu Annette uze twavulukanga ahanjikile nganyo yimwe yatwama hakushimutwilanga navakulwane muchikungulwilo. Ambile ngwenyi: “Ngwavatachikiza jino kanawa, kaha navakiko vangutachikiza kanawa. Shikaho, nge nguli nakuhita muukalu ngweji kukasunukanga kuhanjika navo mangana vangukafwe.”

10. Chuma muka nachikafwa vandumbwetu vamapwevo vapwenga vakuwahilila?

¹⁰ Tuvosena tweji kwivwanga kuwaha nge vakwetu navatusangejeka hauhashi wetu nahamilimo tweji kuzatanga. Oloze tweji kuhombanga nge vakwetu kaveshi kutusangejekako. Chakutalilaho, Abigail ndumbwetu wamujike amwenenga ngwenyi vandumbwenyi kavamumwenenga kupwa wamulemuko. Ambile ngwenyi: “Shimbu jimwe ngweji kumonanga ngwami nou ali nakungumona vene wauchi. Vatu vangutachikiza kaha ngwavo mwananganji kananga, chipwe songo yanganji kananga.” Oloze ivwenu vyuma ahanjikile ndumbwetu wapwevo Pam. Azachile mulimo waumishonali hamyaka yayivulu. Kufumaho, akindulukile kwimbo nakulama visemi jenyi. Oholyapwa achili lika nakuzata upayiniya numba tuhu ali namyaka yamuji 70. Ambile ngwenyi: “Chuma cheji kungukafwanga chikuma shina kungusangejeka kuli vandumbwami hamilimo ngweji kuzatanga.”

11. Uno Yesu asolwele ngachilihi nge amwenenga vandumbwenyi vamapwevo vaze vatambukilenga nenyi kupwa vavalemu?

¹¹ Yesu amwenenga milimo vazachilenga vandumbwenyi vamapwevo vaze vamukafwilenga kuzachisa “vyuma vyavo” kupwa yayilemu. (Luka 8:1-3) Avetavishile kulikata naikiye nakuvanangula nawa vyuma vyakushipilitu. Chakutalilaho, avalwezele ngwenyi mwafwa nakusanguka cheka. (Luka 24:5-8) Yesu akafwile ava mapwevo hohamwe navaposetolo valizange haukalu uze wapwile nakwiza. (Mako 9:30-32; 10:32-34) Anukenu ngwenu numba tuhu vaposetolo vachinyine omu Yesu vamukwachile kuli vaka-kole, oloze mapwevo vamwe kuvapwile omu afwile hachitondo chakuyanjishila.—Mateu 26:56; Mako 15:40, 41.

12. Yesu ahanyine mapwevo mulimo muka?

¹² Yesu ahanyine mapwevo mulimo waulemu. Chakutalilaho, mapwevo vakwivwa Kalunga woma vakiko vapwile vatete kumumona omu asangukile. Alwezele vaze mapwevo vayenga nakulweza vaposetolo jenyi ngwavo vanamusangula kuvafu. (Mateu 28:5, 9, 10) Chasoloka nge namapwevo kuvapwile haPendekoseta mumwaka wa 33 C.E., omu tumbaji vavahingunwinyine shipilitu yajila. Ngocho ava vandumbwetu vamapwevo navakiko vavawavishile, kaha vapwile nauhashi wakuhanjika malimi eka nakulweza vatu “vyuma vyaukelenga waKalunga.”—Vili. 1:14; 2:2-4, 11.

13. Milimo muka vazata vandumbwetu vamapwevo, kaha natusolola ngachilihi kusakwilila chetu hakukilikita chavo?

¹³ Twatela kusangejekanga vandumbwetu vamapwevo hamilimo vali nakuzachila Yehova. Vamwe vazata mulimo wakutungatunga nakuwahisa jizuvo jakulemesela Kalunga, veka vali nakukafwa mazavu azachisa malimi eka, vakwavo vazachila haMbetele. Veka nawa vazata mulimo wakukafwa vatu vali muukalu wakulijila, vakwavo vapwa vaka-kwalumuna mikanda, veka vazata upayiniya chipwe umishonali. Kaha nawa navakiko vatwama nakutokwa chakuya kushikola yavapayiniya naShikola yaVaka-Kwambulula Wangana naShikola yaNgileyate. Vaze vasomboka nawa veji kukafwanga malunga javo vazate kanawa milimo muchikungulwilo chipwe yamuliuka. Vandumbwetu vamalunga vaze vatongola “kupwa wana” veji kuhasanga kutesamo milimo vavahana mwomwo yakuvakundwiza kuli  mapwevo javo. (Efwe. 4:8) Jijila muka munahase kukafwilamo ava vandumbwetu vamapwevo?

14. Kweseka nachisoneka chaSamu 68:11, chuma muka vatela kulinga vakulwane muchikungulwilo?

¹⁴ Vakulwane muchikungulwilo vejiva ngwavo vandumbwetu vamapwevo vapwa “liyongomena lyalinene” lyavatu vakulisuula vaze nawa veji kwambululanga chikuma mujimbu wamwaza. (Tangenu Samu 68:11.) Shikaho vakulwane vatela kufwila kunganyala kuli ava vandumbwetu. Abigail uze twavulukanga hakavanga, eji kwivwanga kuwaha nge vandumbwetu vamalunga navamuhulisa avalweze jijila eji kuzachisanga hakuputuka kushimutwila navatu muwande. Ambile ngwenyi: “Echi cheji kungukafwanga ngumone ngwami kumana nguwamulemu kuli Yehova naliuka lyenyi.” Vakulwane vatachikiza nawa ngwavo vandumbwetu vamalunga vakulindunuka vakiko vanahase kukafwa kanawa vana vamapwevo vali muchikungulwilo mwakulipikila naukalu vali nakumona. (Chitu. 2:3-5) Chikupu vene twatela kusakwililanga vandumbwetu vamapwevo.

15. Lwola muka vandumbwetu vamapwevo veji kusakiwanga mutu wakuvahanjikilako?

¹⁵ Lwola lumwe vandumbwetu vamapwevo veji kusakiwanga mutu wakuvahanjikilako nge vali muukalu. (Isa. 1:17) Chakutalilaho, ndumbwetu uze afwisa lunga lyenyi chipwe uze alukuluka, nahase kusakiwa mutu wakumuhanjikilako chipwe kumuzachilako milimo yimwe yize azachilenga lunga lyenyi. Ndumbwetu wapwevo wakashinakaji nawa nahase kusakiwa mutu wakumuhanjikilako kuli vandotolo. Kaha nawa payiniya wapwevo uze ali nakuzata mulimo wakutungatunga nahase kusakiwa mutu wakumuhanjikilako nge vakwavo vali nakumutatwokesa ngwavo kavula kuya muwande ngana mwavakwavo vapayiniyako. Jijila muka jikwavo tunahase kukafwilamo vandumbwetu vamapwevo? Tushimutwilenu hachakutalilaho chaYesu.

16. Kweseka nachisoneka chaMako 14:3-9, Yesu akafwile ngachilihi Maliya?

¹⁶ Yesu ahanjikililengako vandumbwenyi vamapwevo. Chakutalilaho, ahakwililileko Maliya omu vamutenukilile kuli Malita. (Luka 10:38-42) Kaha nawa amuhakwililile cheka omu vakwavo vamusehele ngwavo nalingi chuma chakuhenga. (Tangenu Mako 14:3-9.) Yesu atachikijile vyuma apwile nakushinganyeka Maliya ngocho ambile ngwenyi: “Nangulingila chuma chamwenemwene. . . . Nalingi echi nahase.” Ahanjikilile nachimweza ngwenyi chuma alingile Maliya navakachihanjikanga “kweshokwo navakambulwila ou mujimbu wamwaza mukaye kosena,” nganomu tuli nakushimutwila muchihande chino. Chapwa chamwaza chikuma kutachikiza nge Yesu avulukile vyakwambulula mujimbu wamwaza hohamwe nachuma alingile Maliya. Mazu kana akolezezele Maliya.

17. Hanenu chakutalilaho chandumbwetu uze tunahase kuhanjikilako.

¹⁷ Kutala mweji kuhanjikilangako vandumbwenu vamapwevo tahi? Chakutalilaho, vandumbwetu vamwe muchikungulwilo veji kwivwanga kupihya hakumona ndumbwetu uze asomboka kuli lunga uze kapwa Chinjihoko, eji kuchelewanga kwiza kukukunguluka nakuya nawa washi hanyima yakukunguluka. Kaha nawa kakavulu keza hamwe navana venyiko. Ngocho vanahase kushinganyeka ngwavo keshi nakuhakako mangana kulumbunwina lunga lyenyi kulema chakwizanga kukukunguluka hamwe navana venyiko. Olozenyi kavejivile ngwavo ou ndumbwetu ali nakweseka hakumina ngolo jenyiko. Kaha nawa katwama nangolo jakumbata vana nakwiza navo nakukungulukako kachi nge lunga mwavakanyisa. Nge munevu vandumbwetu vali nakuyongola ou ndumbwetu, namulinga ngachilihi? Kachi nge namumuhakwila nakuvalweza vyuma vyamwaza ali nakulinga, kaha kaveshi kutwalaho kumuyongolangako.

18. Mujijila muka jikwavo tunahase kukafwilamo vandumbwetu vamapwevo?

¹⁸ Tunahase kusolola ngwetu twazakama vandumbwetu vamapwevo hakuvalingilako vyuma  vimwe. (Yowa. 1, 3:18) Annette uze apwile nakulama naye uze apwile nakuviza ambile ngwenyi: “Vandumbwami vamwe vapwilenga nakwiza nakungukafwako kulama mama, chipwe kungunehelako vyakulya. Ngocho ngwamwene ngwami vandumbwami vanguzanga nakunguzakama.” Ndumbwetu Jordan uze twavulukanga hakavanga naikiye vamukafwile. Ndumbwetu umwe amunangwile mwakulamina kanawa munyau wenyi. Ngocho ambile ngwenyi: “Ngwawahililile chikuma hakutachikiza ngwami vandumbwami vanguzakama, ngocho vasaka nguhone kupwa muponde.”

19. Jijila muka jikwavo vakulwane vanahase kukafwilamo vandumbwetu vamapwevo?

¹⁹ Vakulwane muvikungulwilo navakiko veji kuzakamanga vandumbwetu vamapwevo. Vatachikiza ngwavo Yehova asaka tuzakame vandumbwetu vamapwevo. (Yako. 1:27) Veji kulondezezanga Yehova hakwashiwisa michima yavo nakuhona kutunga jishimbi jize najikaluhwila vandumbwetu vamapwevo kujikavangiza. (Mateu 15:22-28) Vakulwane vaze veji kuzakamanga vandumbwetu vamapwevo veji kulingisanga vandumbwetu kana vamone ngwavo Yehova avazakama. Omu kalama walizavu lize apwilemo Kia atachikijile ngwenyi Kia ali nakwalukila kweka, awahishile vyuma mangana amukafweko kwaluka. Kia ambile ngwenyi: “Chuma kana changukafwile chikuma. Vyuma vahanjikilenga vakulwane navize valingilenga vyasolwele nge vangumona kupwa nguwamulemu muchikungulwilo. Ngwalivwile nawa ngwami vandumbwami vanahase kungukafwa nge nguli muukalu.”

20-21. Natusolola ngachilihi ngwetu twamona vandumbwetu vamapwevo kupwa vavalemu?

²⁰ Makumbi ano, tuli navandumbwetu vamapwevo vavavulu vaze veji kuzatanga nangolo muvikungulwilo vaze twatela kukafwa. Ngana muze tunalinangula kuchakutalilaho chaYesu, twatela kuvakafwa hakushikamanga navo nakuvatachikiza kanawa. Twatela nawa kuvasakwililanga havyuma vali nakuzata mumulimo waKalunga, nakuvahanjikilangako kachi nge chili nakusakiwa kulinga ngocho.

²¹ Omu kaposetolo Paulu apwile nakukukulula mukanda uze atuminyine vandumbwenyi vamuLoma, avulukilemo vandumbwenyi vamapwevo 9. (Loma 16:1, 3, 6, 12, 13, 15) Chikupu vene ava mapwevo vevwile kuwaha, kaha ou mukanda wakuvasangejeka wavakolezezele chikuma. Shikaho nayetu twatela kukafwanga vandumbwetu vosena vamapwevo muchikungulwilo chetu. Nge natulinganga ngocho, kaha natusolola ngwetu twavamona kupwa hivausoko wetu vakushipilitu.