1-2. (a) Kweseka naVishimo 16:31, twatela kumona ngachilihi vandumbwetu vatushinakaji vakushishika? (b) Vihula muka natukumbulula muchihande chino?

MALOLWA andayamonde nge kanda vachiwawahise kawakejimako, kaha nawa kawasoloka kupwa amwazako. Shikaho nge mutu nawawane halwola luze kanda vawawahise, keshi kumona ngwenyi malwola kana amalemuko, ngocho nahase kuwaseza.

² Ngana mwamalolwa andayamonde, navandumbwetu vatushinakaji vakushishika vapwa vavalemu chikuma. Mazu aKalunga afwanyisa jivwi javava vandumbwetu kumuchama. (Tangenu Vishimo 16:31; 20:29) Oloze chinahase kupwa chachikalu kumona ava vandumbwetu kupwa vavalemu. Vandumbwetu vavakweze vaze veji kumonanga vandumbwetu vatushinakaji kupwa vavalemu veji kunganyalanga chikuma kuli vakiko kuhambakana mutu uze mwapwa naluheto. Muchihande chino natukumbulula vihula vino vitatu: Mwomwo ika Yehova amwena vandumbwetu vatushinakaji vakushishika kupwa vavalemu? Mwomwo ika vandumbwetu vatushinakaji vapwila vavalemu muliuka lyaYehova? Vyuma muka twatela kulinga mangana tunganyale kuchakutalilaho chavo?

3. Kweseka naSamu 92:12-15, mwomwo ika vandumbwetu vatushinakaji vakushishika vapwila vavalemu kuli Yehova?

³ Vandumbwetu vatushinakaji vakushishika vapwa vavalemu kuli Yehova Kalunga. Atachikiza kanawa omu vapwa kaha nawa amona vilinga vyavo kupwa vyavilemu. Eji kwivwanga kuwaha kachi nge tushinakaji navalwezako vakweze vyuma vananganyala hakuzachila Yehova. (Yopa 12:12; Vishi. 1:1-4) Yehova amona nawa vandumbwetu vatushinakaji kupwa vavalemu mwomwo yalukakachila lwavo. (Mala. 3:16) Numba tuhu vanamononga ukalu mukuyoya chavo, oloze vanatwaleho lika kufwelela Yehova. Lutalililo  lwavo lunazame chikuma kuhambakana halwola vaputukile kulinangula muchano. Yehova avazanga mwomwo vanatwaleho lika kuvilika lijina lyenyi “namuushinakaji wavo.”—Tangenu Samu 92:12-15.

4. Mazu muka atela kukolezeza vandumbwetu vatushinakaji?

⁴ Nge munaputuka kushinakajiwa, kaha tachikizenu ngwenu Yehova eji kwanukanga milimo munamuzachilanga. (Hepe. 6:10) Munatwaleho kwambulula mujimbu wamwaza natwima kahechi chinakwivwisanga kuwaha setu wamwilu. Munomikanga muvyeseko, nakuhakwila jishimbi jaYehova jakwoloka, nakuzata milimo yayinene muliuka, nakunangula vakwenu. Munatwaleho lika kutambukila hamwe naliuka lyaYehova lize lili nakutambuka washiwashi. Munakundwizanga nakukolezeza vandumbwenu vaze vanafwilanga kuzata mulimo washimbu yosena. Yehova Kalunga amizanga chikuma mwomwo yakushishika chenu. Ashika ngwenyi “keshi kusuvilila vatu jenyi vakushishikako.” (Samu 37:28) Amifwelelesa ngwenyi: “Nangumivelekanga palanga nomu namukapwa najivwi.” (Isa. 46:4) Shikaho, kamwatela kukukulula ngwenu omu munashinakajiwa, kaha kamweshi muvavalemu muliuka lyaYehovako. Oloze mwapwa lika muvavalemu chikuma.

5. Chuma muka vatela kwanuka vandumbwetu vatushinakaji?

⁵ Vandumbwetu vatushinakaji vanahase kuzata milimo yakulisezaseza muliuka lyaYehova. Numba tuhu oholyapwa pamo kaveshi nangolo ngana jize vapwile najoko, oloze vali nachinyingi chachivulu mwomwo yakuzachila Yehova hamyaka yayivulu. Yehova mwatwalaho lika kuvazachisa mujijila jakulisezaseza ngana muze natumona muvyakutalilaho vyavangamba jenyi vakushikulu nava vamakumbi ano.

6-7. Vulukenu vangamba jaYehova vatushinakaji vavuluka muMbimbiliya vaze vakiswile mwomwo yakuzachila Yehova nakashishi?

⁶ MuMbimbiliya mwatwama vyakutalilaho vyavangamba jaKalunga vakushishika vaze vazachilililenga Yehova natwima namuushinakaji wavo. Chakutalilaho, omu Mose apwile namyaka kafwe 80 hakiko Yehova amutongwele kupwa kapolofweto kenyi, kaha nawa muka-kwimanyinako muyachi waIsalele. Yehova atwalilileho lika kuzachisa Ndanyele kupwa muka-kumuhanjikilako nahalwola apwile namyaka yakuhambakana 90. Pamo nawa kaposetolo Yowano apwile namyaka  yakuhambakana 90 omu vamuhwiminyinyine asoneke mukanda waKusoloka.

⁷ Kaha nawa vangamba jaKalunga vatushinakaji vakushishika vavavulu kavayile fumako, ngocho vatu kavavamwene kupwa vavalemuko. Chipwe ngocho, Yehova avamwene kupwa vavalemu nakuvakisula mwomwo yakushishika chavo. Chakutalilaho, Shimeyone uze apwile ‘mutu wakwoloka, muka-kulemesa Kalunga’ vamuvuluka kaha chindende muMbimbiliya, oloze Yehova amumwene kupwa wamulemu nakumulingisa amone Yesu omu apwile mwana wamundende, nakupolofweta kutalisa kuli ou mwana nanaye. (Luka 2:22, 25-35) Tutalenu nawa hali kapolofweto wapwevo Ana uze apwile tuliwe. Apwile namyaka yakusemuka 84, oloze ‘ayilenga shimbu yosena kutembele.’ Mwomwo yakuyanga shimbu yosena kutembele chalingishile Yehova amukisule nakumulingisa amone Yesu omu apwile mwana wamundende. Shimeyone naAna vosena vapwile vavalemu kuli Yehova.—Luka 2:36-38.

8-9. Chuma muka alingile ndumbwetu wapwevo muliuka lyaYehova omu afwishile lunga?

⁸ Makumbi ano, vandumbwetu vatushinakaji vakushishika vavavulu veji kuhananga chakutalilaho chamwaza kuli vandumbwetu vavakweze. Tutalenu hachakutalilaho chandumbwetu wapwevo Lois Didur. Apwile namyaka yakusemuka 21, omu aputukile kuzata upayiniya wakulipwila muCanada. Asombokele kuli ndumbwetu John, kufumaho vazachile myaka yayivulu mumulimo wakujinguluka. Kutwala muze vazachililile haMbetele yamuCanada hamyaka yakuzomboka 20. Omu ndumbwetu Lois apwile namyaka 58, ikiye nalunga lyenyi John vavalwezele vayenga nakuzachila muUkraine. Valingile ngachilihi? Kutala vashinganyekele ngwavo vanashinakajiwa lyehi, kaha kaveshi kuhasa kuzachila kulifuchi lyekako tahi? Nduma. Vetavilile kuya, kaha ndumbwetu John vamutongwele apwenga muKomiti yaMutango mulifuchi kana. Omu mwahichile myaka 7, ndumbwetu John afwile, kaha puwenyi Lois asakwile kutwalililaho kuzachila mulifuchi kana. Oholyapwa ndumbwetu Lois ali namyaka 81, kaha chatwalaho lika kuzachila Yehova nakashishi haMbetele yamuUkraine. Kaha vandumbwenu vosena vamuzanga chikuma.

⁹ Vatuliwe vakufwana nge Lois kaveshi kuvavumbika ngana muze vavavumbikilenga omu vapwile namalunga javo vaze vazachilenga milimo yayivulu muliukako. Oloze Yehova eji kumonanga ava vandumbwetu vakundwijilenga malunga javo hamyaka yayivulu, kaha nawa vachili lika nakumuzachila nakashishi kupwa vavalemu. (Chimo. 1, 5:3) Vandumbwetu kana veji kukolezezanga chikuma vandumbwavo vavakweze.

10. Chakutalilaho muka chamwaza atuhana ndumbwetu Tony?

¹⁰ Vandumbwetu vatushinakaji vakushishika vavavulu vaze vatwama hamembo akulamina tushinakaji navakiko vapwa vavalemu. Chakutalilaho, ndumbwetu walunga Tony uze apwa kashinakaji naikiye atwama hamembo akulamina tushinakaji. Vamumbapachishile muAugust 1942 muPennsylvania, U.S.A., omu apwile namyaka yakusemuka 20. Kutwala muze omu akanyine kwazana muvihande vyalifuchi nachiyulo vamukashile  mukamenga hamyaka yivali nachimbwa. Ndumbwetu Tony napuwenyi Hilda, vakafwile vana vavo vavali vatachikize muchano. Hamyaka yayivulu, ndumbwetu Tony napunga kalama wakutwaminyina vikungulwilo vitatu (uze tunakuvuluka makumbi ano ngwetu muka-kuwanyisa lizavu lyavakulwane), kaha nawa napunga kalama wakukunguluka chachihanda. Ayilenga mukamenga nakutwaminyina kukunguluka nakutetekela vilongesa vyaMbimbiliya. Oholyapwa ndumbwetu Tony ali namyaka 98, oloze chatwalaho lika kuzachila Yehova. Achili lika nakuzachila Yehova noho hakumina ngolo jenyi nakuzachila hamwe navandumbwenyi muchikungulwilo.

11. Natusolola ngachilihi ngwetu twamona vandumbwetu vatushinakaji vaze vatwama hamembo akulamina tushinakaji kupwa vavalemu?

¹¹ Tunahase kusolola ngachilihi ngwetu twavumbika vandumbwetu vatushinakaji vaze vatwama hamembo akulamina tushinakaji? Tulama vatela kukafwa ava vandumbwetu vayenganga kukukunguluka chipwe kwivwilila kuvihande vyakukunguluka nakuya muwande. Mutu himutu muchikungulwilo nahase kusolola ngwenyi azanga ava vandumbwetu hakuvatambukilanga chipwe kushimutwila navo kuzachisa makina. Twatela kuzakama chikuma vandumbwetu vatushinakaji vaze vali kuvihela vyakulamina tushinakaji vize vili kwakusuku nachikungulwilo. Mwomwo nge katweshi kulinga ngochoko kaha tunahase kuvavulyama. Kakavulu vandumbwetu vatushinakaji kavavula kuhanjika hachiyoyelo chavoko. Shikaho natunganyala chikuma nge natuvahulisanga vihula nakwivwilila kanawa omu navatulweza vyuma vanalivwisanga kuwaha hakuzachila Yehova.

12. Vandumbwetu muka tunahase kupwa navo muchikungulwilo?

¹² Tunahase kulikomokela hakutachikiza ngwetu namuchikungulwilo chetu muli vandumbwetu vatushinakaji vakushishika. Chakutalilaho, ndumbwetu Harriette azachililenga Yehova nakashishi hamyaka yayivulu muchikungulwilo chakwimbo lyavo munganda yaNew Jersey, muU.S.A. Kufumaho ayile kungalila yeka nakutwama namwanenyi wapwevo. Vandumbwetu vamuchikungulwilo chakungalila kuze ayile, vafwililile kumutachikiza kanawa, ngocho valinangwile vyavivulu kuli ikiye. Avakolezezelenga hakuvalweza vyuma aliwanyinenga navyo mumulimo wakwambulula omu alinangwile muchano kafwe mu 1925. Ambachilenga mukumbo shimbu yosena nge mwaya mumulimo wakwambulula mwomwo ashinganyekele ngwenyi kala lwola vanahase kumukasa mukamenga. Kahomu mukiko chapwile. Mu 1933 vamukashile mapapa kavali mukamenga, kaha mapapa osena atwaminemo chalumingo chamuundu. Halwola apwilenga mukamenga, lunga lyenyi uze kapwile Chinjihoko amuzakaminenga, kaha nawa azakaminenga vana vavo vatatu. Chikupu vene, vandumbwetu vakushishika vatushinakaji vakufwana ngana mwandumbwetu Harriette twatela kuvamona kupwa vavalemu.

13. Mwomwo ika natwambila ngwetu vandumbwetu vatushinakaji vapwa vavalemu muliuka lyaYehova?

¹³ Vandumbwetu vatushinakaji vapwa vavalemu muliuka lyaYehova. Vanamono omwo Yehova navakisula nakukisula nawa liuka lyenyi mujijila jakulisezaseza. Vanalinangula vishina vyavilemu kufuma kuvyuma vize vanalimbenjenga. Vamonenunga kupwa “kaselwoke wamangana,” nakulinangula kuli vakiko. (Vishi. 18:4) Kachi nge namuwanangako lwola lwakushimutwila navandumbwetu vatushinakaji, kaha namulinangula vyavivulu kuli vakiko nakuzamisa lufwelelo lwenu.

14. Uno mazu atwama hali Lushimbi lwamuchivali 32:7 akolezeza vakweze valinge ika?

¹⁴ Fwilenu kuwanako jijila jakushimutwilamo navandumbwetu vatushinakaji. (Tangenu Lushimbi lwamuchivali 32:7.) Twatachikiza ngwetu ava vandumbwetu kavamona kanawako,  kavatambuka washi washiko, kaha nawa kavalamuna lilimi hakuhanjikako, oloze veji kufwilanga kuzata natwima, kaha vanatungu “lijina lyamwaza” naYehova. (Kwambu. 7:1) Tachikizenu ovyo Yehova avamwena kupwa vavalemu. Ngocho nayenu twalenuho lika kuvamona kupwa vavalemu. Pwenu ngana mwaElisha uze asakile kutwalaho lika kulipanjika naElija halikumbi lyamakumishilo lize vapwile hamwe. Elisha ahanjikile mapapa katatu ngwenyi: “Kuvanga nanguya nayove.”—Vamya. 2, 2:2, 4, 6.

15. Vihula muka tunahase kuhulisa vandumbwetu vatushinakaji?

¹⁵ Sololenu ngwenu mwazanga vandumbwenu vatushinakaji hakuvahulisanga vihula. (Vishi. 1:5; 20:5; Chimo. 1, 5:1, 2) Munahase kuvahulisa vihula vyakufwana nge vino: “Omu mwapwile muvanyike, chuma muka chamikunywile mumone ngwenu munawane muchano?” “Uno vyuma munamono mukuyoya chenu vinamikafwe ngachilihi mupandame chikuma kuli Yehova?” “Vyuma muka vinamikafwe mutwaleho lika kupwa vakuwahilila hakuzachila Yehova?” (Chimo. 1, 6:6-8) Kaha ivwililenu kanawa omu navamilweza.

16. Uno vandumbwetu vatushinakaji navava vavakweze navanganyala ngachilihi nge navawanangako lwola lwakushimutwila?

¹⁶ Kachi nge vandumbwetu vatushinakaji navava vavakweze navawanangako lwola lwakushimutwilanga, kaha vosena navalikolezeza. (Loma 1:12) Vyuma navamilweza vandumbwetu vatushinakaji navimikafwa mumone ngwenu Yehova azanga vangamba jenyi vakushishika, kaha vakiko nawa navatachikiza ngwavo mwavazanga. Navevwa kuwaha kumilweza vyuma vyamwaza navalingila Yehova.

17. Mwomwo ika natwambila ngwetu vandumbwetu vatushinakaji vakushishika veji kuwahilangako lika mukuhita chamyaka?

¹⁷ Kuwaha chakumujimba cheji kukumanga omu mutu mwaya nakukola, oloze vatu vaze vapwa vakushishika kuli Yehova veji kuwahilangako lika mwaka himwaka. (Teso. 1, 1:2, 3) Mwomwo ika veji kuwahilangako lika? Mwomwo mukuhita chamyaka, Kalunga eji kuvanangulanga nakuvakafwa nashipilitu yenyi yajila mangana vapwenga navilinga vyamwaza. Kachi nge natutachikiza kanawa ava vandumbwetu vatushinakaji, nakuvavumbika, nakulinangula kuli vakiko, kaha natuvamona kupwa vavalemu.

18. Chuma muka natushimutwila muchihande nachikavangizaho?

¹⁸ Chikungulwilo cheji kuzamanga kachi nge vandumbwetu vavakweze navamona vandumbwetu vatushinakaji kupwa vavalemu, kaha nawa kachi nge vandumbwetu vatushinakaji navamona vandumbwetu vavakweze kupwa vavalemu. Muchihande nachikavangizaho, natumona omwo vandumbwetu vatushinakaji vanahase kusolola ngwavo vamona vandumbwavo vavakweze kupwa vavalemu.