CHIHANDE CHAKULINANGULA 39
Nge Mutu Twazanga Vanamufumisa muChikungulwilo
“Mapapa kakavulu . . . vamwivwishilenga kumuchima kukola.”—SAMU 78:40.
MWASO 102 “Kafwenunga Vaze Vazeya”
VYUMA NATUSHIMUTWILA *
1. Uno vandumbwetu veji kwivwanga ngachilihi nge kausoko kavo vanamufumisa muchikungulwilo?
KUTALA kausoko kenu umwe vamufumisa muchikungulwilo tahi? Chuma kana chinahase kumivwisa kukola kumuchima. Chakutalilaho, ndumbwetu Hilda ambile ngwenyi: “Omu lunga lyami afwile hanyima yakutwama muulo hamyaka 41, ngwamwene ngwami kangweshi kuhasa kumika muukalu kanako. * Oloze omu mwanami walunga vamufumishile muchikungulwilo nakuseza puwenyi, navana venyi, ukalu kana wangutohwelelele chikuma.”
Yehova eji kwivwanga kupihya kachi nge kausoko kenu vanamufumisa muchikungulwilo (Tangenu palangalafu 2-3) *
2-3. Kweseka naSamu 78:40, 41, uno Yehova eji kwivwanga ngachilihi kachi nge ngamba yenyi vanamufumisa muchikungulwilo?
2 Achishinganyekenu kupihya evwile Yehova omu vangelo valikangile kuli ikiye nakufuma mutanga yenyi. (Yuta 6) Achishinganyekenu nawa kupihya evwile hakumona vaIsalele vaze azangile navalikanga kuli ikiye mapapa kakavulu. (Tangenu Samu 78:40, 41.) Tachikizenu ngwenu Setu wamwilu eji kwivwanga kupihya kachi nge mutu mwazanga vanamufumisa muchikungulwilo. Atachikiza chinyengo mweji kwivwanga. Shikaho mwamivendejeka nakumikafwa.
3 Muchihande chino, natushimutwila havyuma twatela kulinga mangana Yehova atukafwe nge mutu twazanga vanamufumisa muchikungulwilo. Natushimutwila nawa omwo tunahase kukafwa vandumbwetu vaze vali nakausoko kavo uze vanafumisa muchikungulwilo. Oloze chatete, tushimutwilenu havishinganyeka vyakuhenga vize twatela kulihendako.
KANDA KULIHANANGA MILONGA ENU VAVENEKO
4. Uno visemi vavavulu veji kwivwanga ngachilihi nge mwanavo vanamufumisa muchikungulwilo?
4 Kachi nge mwana vanamufumisa muchikungulwilo, kakavulu visemi veji kulihananga mulonga nakushinganyeka ngwavo kavakafwile kanawa mwanako shikaho nasezela Yehova. Ndumbwetu Luka ahanjikile ngwenyi: “Ngwalihanyine mulonga omu mwanami vamufumishile muchikungulwilo. Echi changulingishilenga ngulote vyuma vyavipi. Shimbu jimwe ngwalililenga nakuhomba chikuma.” Ndumbwetu Elizabeth uze ukwechi mwanenyi vafumishile muchikungulwilo naikiye ambile ngwenyi: “Vyuma muka vyavipi ngunalinginga vize vinalingisa mwanami aseze Yehova? Ngwamwene ngwami kangwazachile chikuma nangolo mangana ngukafwe mwanami azange chikuma Yehovako.”
5. Iya twatela kuhana mulonga kachi nge mutu vanamufumisa muchikungulwilo?
5 Twatela kwanuka ngwetu Yehova ahana mutu himutu lisesa lyakulisakwila vyakulinga. Echi chalumbununa nge tunahase kusakula kumwononoka chipwe chiku. Vanyike vamwe vaze vakwechi visemi javo vaze kavavahana chakutalilaho chamwazako, vanasakula kuzachila Yehova nakutwalaho kupwa vakushishika. Oloze vanyike veka vaze vakwechi visemi javo vaze vakilikichile nangolo vavangule muchano, veji kusezanga Yehova nge vanakolo. Shikaho, mutu himutu atela kulisakwila kuzachila Yehova chipwe chiku. (Yoshu. 24:15) Ngocho enu visemi mukwechi vana vaze vanafumisa muchikungulwilo kamwatela kulihana mulonga ngwenu enu yenu munavalingisa vaseze Yehovako.
6. Uno mwana nahase kwivwa ngachilihi kachi nge chisemi chenyi vanamufumisa muchikungulwilo?
6 Shimbu jimwe, chisemi nahase kuseza muchano nakuseza nawa tanga yenyi. (Samu 27:10) Kahechi chinahase kwivwisa vana kupihya kumuchima. Ndumbwetu Esther, uze ukwechi ise vamufumishile muchikungulwilo ambile ngwenyi: “Ngwalililenga mapapa kakavulu mwomwo ngwatachikijile ngwami tata kapwile nakusosoloka kaha kumuchanoko, oloze alisakwililile ivene kuseza Yehova. Ngwazangile chikuma tata, shikaho omu vamufumishile muchikungulwilo, ngwalizakaminyine chikuma hachiyoyelo chenyi. Echi changukolelenga chikuma kumuchima.”
7. Uno Yehova eji kwivwanga ngachilihi hakumona vanyike vaze vakwechi visemi javo vaze vafumisa muchikungulwilo?
7 Enu vanyike, ijivenu ngwenu kachi nge visemi jenu vanavafumisa muchikungulwilo, nayetu vandumbwenu tweji kwivwanga kukola kumuchima. NaYehova nawa eji kwivwanga mwomumwe. Tachikizenu ngwenu amizanga chikuma kaha eji kwivwanga kuwaha hakumona namutwalaho lika kumuzachila nakashishi, kahomu mukiko tweji kwivwanga nayetu vandumbwenu. Anukenu nawa ngwenu visemi jenu vakwechi lisesa lyakulisakwila vyakulinga. Ngana muze twavulukanga hakavanga, Yehova ahana mutu himutu lisesa lyakusakula kumuzachila chipwe chiku. Shikaho mutu himutu uze alihana kuli Kalunga nakumumbapachisa “mwalimbachila vyuma vyenyi ivene.”—Ngale. 6:5.
8. Vyuma muka vatela kulinga vatu mutanga halwola luze vanafumisa kausoko kavo muchikungulwilo? (Talenu nawa lipwata lyakwamba ngwavo “ Kinduluka Kuli Yehova.”)
8 Kachi nge mutu uze mwazanga vanamufumisa muchikungulwilo, chapwa chakutamo kufwelela ngwenu likumbi limwe mwakakinduluka. Vyuma muka mwatela kulinga halwola luze vanamufumisa muchikungulwilo? Mwatela kutwalaho lika kuzamisa lufwelelo lwenu. Echi nachihana chakutalilaho chamwaza kuli vatanga jenu chipwe vene nauze vanafumisa muchikungulwilo. Nachimikafwa nawa mumike omu muli nakuhita muukalu kana. Tushimutwilenu jino havyuma mwatela kulinga mangana muzamise lufwelelo lwenu.
VYUMA MWATELA KULINGA MANGANA MUZAMISE LUFWELELO LWENU
9. Vyuma muka mwatela kulinga mangana muzamise lufwelelo lwenu? (Talenu nawa lipwata lyakwamba ngwavo “ Visoneka Vize Navimivendejeka Nge Kausoko Kenu Naseze Yehova.”)
9 Lingenunga vyuma vyakushipilitu lwola lwosena. Chapwa chachilemu kutwalaho lika kuzamisa lufwelelo lwenu nelu lyavaka-tanga yenu. Munahase kulinga ngocho hakutanganga Mbimbiliya nakushinganyekanga havyuma namutanga, nakupwanga nawa kukukunguluka. Ndumbwetu Joanna, uze ukwechi ise nayayenyi vafumishile muchikungulwilo ambile ngwenyi: “Kutanga mujimbu waAvingayile, naEseta, naYopa, naYosefwe, naYesu cheji kungukafwanga nguunde muchima. Vyakutalilaho vyavo vyeji kungukafwanga ngumone vyuma mujila yamwaza. Kaha nawa myaso yikwavo yamuliuka yeji kungukolezezanga.”
10. Uno mukanda waSamu 32:6-8 unahase kutukafwa ngachilihi nge tuli muukalu?
10 Mulwezenunga Yehova ukalu wenu. Kachi nge kuli vyuma vimwe vize vili nakumihombesa, kanda kulitwamina kulomba kuli Yehovako. Mulombenu amikafwe mumone vyuma ngana muze avimona ikiye, ‘nakumihana kunangakana nakumilweza jila mwatela kutambukamo.’ (Tangenu Samu 32:6-8.) Tunatachikiza ngwetu chinahase kupwa chachikalu kulweza Yehova omu muli nakwivwa. Oloze Yehova natachikiza kanawa ukalu wenu. Amizanga chikuma, kaha asaka mumulwezenga vyuma vyosena vili kumuchima wenu.—Kulo. 34:6; Samu 62:7, 8.
11. Kweseka namukanda WavaHepeleu 12:11, mwomwo ika twatela kwitavila Yehova atuzangamise? (Talenu nawa lipwata lyakwamba ngwavo “ Kufumisa Mutu muChikungulwilo Chasolola Nge Yehova Atuzanga.”)
11 Kundwizenunga jila vanasopelamo vakulwane chihande. Kufumisa mutu muchikungulwilo yapwa jila yize alongesa Yehova mangana olole mutu uze nalingi shili nakunganyalisa vosena muchikungulwilo. (Tangenu WavaHepeleu 12:11.) Vatu vamwe muchikungulwilo vanahase kuhanjika ngwavo tulama kavasopanga kanawa chihande kanako shikaho vanafumishila ou mutu muchikungulwilo. Oloze tachikizenu ngwenu vatu vangana kavasaka kuhanjika vyuma vyavipi nalingi mutu uze vanafumisa muchikungulwiloko. Nge kamweshi namashina namasongoko, kaha nachipwa chamwaza kufwelela tulama vaze vapwanga nakusopa chihande kana mwomwo vakavangizanga jindongi jamuMbimbiliya nakuyulilako “Yehova.”—Miji. 2, 19:6.
12. Vyuma muka vananganyala vandumbwetu vamwe mwomwo yakukundwiza jila yize Yehova eji kuzangamishilangamo vatu jenyi?
12 Kachi nge namukundwiza jila vanasopelamo chihande vakulwane hali kausoko kenu uze vanafumisa muchikungulwilo, kahechi nachimukafwa akinduluke kuli Yehova. Ndumbwetu Elizabeth uze twavulukanga hakavanga ambile ngwenyi: “Twevwile kupihya chikuma omu twechele kulikata namwanetu uze vafumishile muchikungulwilo. Oloze omu vamukindulwishile muchikungulwilo, ambile ngwenyi chapwile chakutamo kumufumisa muchikungulwilo. Kutwala muze, ahanjikile ngwenyi alinangwile vyuma vimwe kuvyuma alimbenjele.” Ngocho ndumbwetu Elizabeth ambile ngwenyi “Chapwa chachilemu kwitavila kuzangamisa chaYehova.” Ndumbwetu Mark, lunga lyou ndumbwetu ambile ngwenyi: “Mwanetu angulwezele ngwenyi asakile kukinduluka kuli Yehova mwomwo yakuhona kulikata nenyi hatando yayisuku. Ngwapwa nguwakuwahilila chikuma mwomwo Yehova atukafwile tukavangize jishimbi jenyi.”
13. Vyuma muka vinahase kumikafwa nge muli muukalu?
13 Lwezenuko masepa jenyi vaze mwafwelela ukalu wenu. Likatenunga navandumbwenu vakuhya kushipilitu vaze vanahase kumikafwa mutwaleho lika kumika. (Vishi. 12:25; 17:17) Ndumbwetu Joanna, uze twavulukanga hakavanga ambile ngwenyi: “Ngwevwilenga nge nguli ukawami. Oloze kuhanjika navandumbwami vaze ngwafwelelele changukafwile ngumike muukalu wami.” Jino namulinga ngachilihi nge vandumbwenu vamwe navahanjika vyuma vyavipi vize naviwezelela kuukalu wenu?
14. Mwomwo ika twatela ‘kwitavilanga lika tutenga twavakwetu, nakulikonekelanga navakwetu namuchima wakusuuluka’?
14 Talililenu vandumbwenu chikoki. Katwatela kushinganyeka ngwetu vandumbwetu navahanjikanga vyuma vyamwaza lwola lwosenako. (Yako. 3:2) Tuvosena katwakupukako, ngocho kamwatela kulikomokelako kachi nge vandumbwenu vamwe navahona mazu akuhanjika chipwe vene kuhanjika mazu aze nawamivwisa kupihya chikuma. Kavangizenu mazu ahanjikile kaposetolo Paulu akwamba ngwavo: “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo.” (Kolo. 3:13) Ndumbwetu umwe wapwevo ukwechi mwanenyi uze vafumishile muchikungulwilo ambile ngwenyi: “Yehova nangukafwe ngukonekele vandumbwami vaze vahanjikile mazu aze angulemekele numba tuhu vafwilile kungukolezeza.” Vyuma muka vatela kulinga vandumbwetu mangana vakafwe vandumbwavo vaze vakwechi vausoko wavo vaze vanafumisa muchikungulwilo?
VANDUMBWENU VANAHASE KUMIKAFWA
15. Tunahase kukafwa ngachilihi vandumbwetu vaze vakwechi kausoko uze vanafumisa muchikungulwilo kalinwomu?
15 Solwelenunga likoji vausoko wavaze vafumisa muchikungulwilo. Ndumbwetu Miriam ambile ngwenyi chamukaluhwilile kuya kukukunguluka omu songo yenyi walunga vamufumishile muchikungulwilo. Ambile ngwenyi: “Kangwejivile vyuma navakahanjika vandumbwamiko. Oloze omu ngwahetele kukukunguluka, vandumbwami vavavulu vahombele omu songo yami vamufumishile muchikungulwilo, kaha nawa kavahanjikile vyuma vyavipi hali ikiyeko. Ngweji kusakwililanga chikuma vandumbwami hakunguvendejeka.” Ndumbwetu mukwavo wapwevo ambile ngwenyi: “Omu mwanetu vamufumishile muchikungulwilo, vandumbwetu vejile nakutuvendejeka. Vandumbwetu vamwe vatulwezele ngwavo kavapwile namazu akuhanjikako. Veka valililenga hamwe nayami kaha vakwavo vasonekele mikanda yakungukolezeza. Vyuma valingile vyangukafwile chikuma.”
16. Uno vandumbwetu vanahase kutwalaho ngachilihi kuvendejeka vaze vakwechi vausoko wavo vafumisa muchikungulwilo?
16 Twalenuho lika kukafwa vandumbwenu vakwechi vausoko vaze vanafumisa muchikungulwilo. Halwola kanelu mwatela kuvazanga nakuvakolezeza chikuma. (Hepe. 10:24, 25) Shimbu jimwe, vandumbwetu vaze vakwechi kausoko vanafumisa muchikungulwilo navakiko veji kwivwanga nge vanavafumisa muchikungulwilo mwomwo yakuhona kuvahanjikisa kuli vandumbwavo vamwe. Shikaho kachatela kupwa ngochoko. Vanyike vaze vakwechi visemi javo vafumisa muchikungulwilo vasakiwa kuvasangejeka nakuvakolezeza chikuma. Ndumbwetu Maria, uze ukwechi lunga lyenyi vafumishile muchikungulwilo nakuseza tanga ambile ngwenyi: “Vandumbwetu vamwe vejilenga kuzuvo yami nakungukafwako kuwahisa vyakulya nakulingila hamwe chilongesa chatanga. Navakiko vevwilenga kupihya ngocho tuvosena twalililenga. Vanguhakwilililenga omu vatu vahanjikilenga vyuma vyamakuli hali yami. Chikupu vene ava vandumbwami vangukolezezele chikuma.”—Loma 12:13, 15.
Vandumbwetu vatela kukafwa vandumbwavo vakwechi kausoko kavo uze vanafumisa muchikungulwilo (Tangenu palangalafu 17) *
17. Uno tulama vanahase kuvendejeka ngachilihi vandumbwavo?
17 Enu tulama, fwilenu kukolezeza vandumbwenu vaze vakwechi vausoko vaze vafumisa muchikungulwilo. Tachikizenu ngwenu mwatwama namulimo waunene wakuvendejeka vandumbwenu kana. (Teso. 1, 5:14) Hakusaka muvakolezeze, mwatela kuhanjikanga navo shimbu kanda kukunguluka nahanyima yakukunguluka. Vatambukilenunga nakuvalombelangako. Zatenunga navo muwande chipwe kuvasanyika mupwenganga navo kuchilongesa chenu chatanga. Tulama vatela kuzakamanga vaze vanahombo, nakuvevwila keke, nakuvazanga.—Teso. 1, 2:7, 8.
PWENU NALUTALILILO NAKUTWALAHO LIKA KUFWELELA YEHOVA
18. Kweseka naWaPetulu 2, 3:9, chuma muka asaka Kalunga kuli vaze vanalingi shili?
18 Yehova “kazanga mutu numba umwe akanongeko, oloze azanga vosena vapihilile nakwalumuka.” (Tangenu WaPetulu 2, 3:9.) Numba tuhu mutu mwalinga shili yayinene, oloze Kalunga eji kumumonanga lika kupwa wamulemu. Tachikizenu ngwenu Yehova ahanyine Mwanenyi uze azanga chikuma kupwa ndando yakusokola vaka-shili. Yehova eji kufwilanga kukafwa vaka-shili vakinduluke kuli ikiye. Atachikiza ngwenyi vanahase kulinga ngocho nganomu ahanjikile Yesu muchifwanyisa chamwana wakujimbala. (Luka 15:11-32) Vandumbwetu vavavulu vaze vasezele muchano vanakukindulukanga kuli Sevo wamwilu wazangi. Kaha vandumbwetu muchikungulwilo veji kuwahililanga chikuma nge vandumbwetu kana vanakinduluka. Ndumbwetu Elizabeth, twavulukanga hakavanga awahililile chikuma omu mwanenyi vamukindulwishile muchikungulwilo. Ambile ngwenyi, “Ngweji kusakwililanga vandumbwami vaze vatwalilileho kutukolezeza nakutukafwa tupwenga nalutalililo ngwetu mwanetu mwakakinduluka.”
19. Mwomwo ika twatela kutwalaho lika kufwelela Yehova?
19 Twatela kutwalaho lika kufwelela Yehova mwomwo katuhana jindongi jize jinahase kutunehela ukaluko. Apwa muka-kuhana kaha nawa Setu wakeke uze azanga vaze vamuzanga nakumulemesa. Shikaho fwelelenu ngwenu Yehova keshi kumisezako namulwola namupwa muukalu. (Hepe. 13:5, 6) Ndumbwetu Mark uze twavulukanga hakavanga ambile ngwenyi: “Yehova katusezeleko, eji kutwalaho lika kutukafwa namulwola lwalukalu.” Shikaho Yehova mwatwalaho lika kumihana “ngolo jakuhambakana jize javatu.” (Koli. 2, 4:7) Chikupu vene, munahase kutwalaho lika kupwa vakushishika nakupwa nalutalililo ngwenu kausoko kenu uze vafumisa muchikungulwilo mwakakinduluka kuli Yehova.
MWASO 44 Kulomba chaMutu Wakukalikiza
^ par. 5 Tweji kwivwanga kupihya chikuma nge mutu twazanga naseze Yehova. Chihande chino nachisolola omu Kalunga eji kwivwanga nge chuma kana chinasoloka. Natushimutwila nawa havyuma vize vatela kulinga vandumbwetu vakwechi kausoko uze vanafumisa muchikungulwilo mangana vahone kwivwa kupihya chikuma nakutwalaho lika kuzama kushipilitu. Natushimutwila nawa omwo vosena muchikungulwilo vanahase kuvendejeka nakukafwa vandumbwetu vakwechi kausoko uze naseze Yehova.
^ par. 1 Majina amwe ali muchihande chino vanawalumuna.
