1. Uno vatu vakushishika vanahase kuvuluka Yehova ngwavo iya?

YESU uze apwa “twatwa kuvyuma vyakutenga vyosena” navangelo, vosena vatwama mutanga yaYehova. (Kolo. 1:15; Samu 103:20) Omu Yesu apwile hano hamavu, akafwile vatu vakushishika vatachikize ngwavo vanahase kuvuluka Yehova ngwavo Sevo. Kaha nawa omu apwile nakuhanjika kuli tumbaji twenyi, asolwele ngwenyi Yehova apwa ‘Ise, uze nawa apwa Sevo.’ (Yowa. 20:17) Omu tweji kulihananga kuli Yehova nakutumbapachisa, tweji kupwanga jino mutanga yaYehova.—Mako. 10:29, 30.

2. Vyuma muka natushimutwila muchihande chino?

² Vatu vamwe cheji kuvakaluhwilanga kumona Yehova kupwa chisemi wazangi. Vandumbwetu vamwe cheji kuvakaluhwilanga kuzanga vandumbwavo. Muchihande chino, natushimutwila omwo Yesu eji kutukafwanga tumone Yehova kupwa chisemi wazangi nakupandama kuli ikiye. Natulinangula nawa omwo tunahase kulondezeza Yehova mangana tuzange vandumbwetu.

3. Uno kulomba chakutalilaho chinahase kutupandamisa ngachilihi kuli Yehova?

³ Yehova apwa chisemi wazangi. Yesu asaka tumonenga Yehova nganomu amumona ikiye, kupwa chisemi wazangi, walikoji uze tunahase kuhanjika nenyi kala lwola, keshi ngana mwachisemi uze mwatulweza kaha vyakulingako. Asolwele chuma kana omu apwile nakunangula tumbaji twenyi mwakulombela. Aputukile kulomba chakutalilaho namazu akwamba ngwavo: “Ove Setu.” (Mateu 6:9) Yesu nge azangile, kachi atulwezele tuvulukenga Yehova ngwetu “Wangolo Josena,” ‘Tengi,’ chipwe “Mwangana wahaya myaka namyaka” mwomwo jivulukiso kana jatwama namuVisoneka. (Kupu. 49:25; Isa. 44:2; Chimo. 1, 1:17) Oloze Yesu atulweza tuzachisenga lizu “Setu.”

4. Twatachikiza ngachilihi ngwetu Yehova asaka tupandame kuli ikiye?

⁴ Uno mweji kuchiwananga kupwa chachikalu kumona Yehova  kupwa chisemi wazangi tahi? Etu vamwe cheji kutukaluhwilanga. Chinahase kutukaluhwila kumona Yehova kupwa chisemi wazangi mwomwo yajila vatulelelemo. Chinahase kutuvendejeka hakutachikiza ngwetu Yehova atachikiza omu tweji kwivwanga. Asaka kupandama kuli etu. Echi chikiko Mbimbiliya yatulwezela ngwayo: “Pandamenu kuli Kalunga, kaha mwapandama kuli enu.” (Yako. 4:8) Yehova atuzanga kaha atufwelelesa ngwenyi mwapwa Setu wamwenemwene.

5. Kweseka naLuka 10:22, uno Yesu nahase kutukafwa ngachilihi tupandame kuli Yehova?

⁵ Yesu nahase kutukafwa tupandame kuli Yehova. Yesu atachikiza kanawa Yehova, kaha nawa eji kulondezezanga kanawa vilinga vyaYehova. Shikaho ahanjikile ngwenyi: “Weshowo nangumono ami namono naTata nawa.” (Yowa. 14:9) Yesu eji kutunangulanga omu tunahase kuvumbika Setu nakumwononoka, nomwo tunahase kulihenda kuvyuma vize vinahase kumwivwisa kupihya, novyo twatela kulinga mangana atwivwile uselewa. Chikumanyi Yesu eji kutunangulanga tutachikize ngwetu Yehova apwa Kalunga walikoji nazangi. (Tangenu Luka 10:22.) Tutalenu havyakutalilaho vimwe.

6. Hanenu vyakutalilaho vize vyasolola nge Yehova evwililile kukulomba chaYesu.

⁶ Yehova eji kwivwililanga vana venyi. Achitalenu omu Yehova evwililile kukulomba chaMwanenyi watwatwa. Twatachikiza ngwetu evwililile kukulomba chachivulu chize alombelenga mwanenyi Yesu omu apwile hano hamavu. (Luka 5:16) Evwililile kukulomba chenyi omu apwile nakusakula vaposetolo 12. (Luka 6:12, 13) Yehova evwililile nawa kukulomba chaYesu omu apwile muukalu. Shimbu kanda vamusolole, Yesu alembelele Ise amukafwe omike mucheseko chize chapwile nakwiza kulutwe. Yehova evwililile kukulomba chaYesu, kaha nawa atumine kangelo ayenga nakumukolezeza.—Luka 22:41-44.

7. Tweji kwivwanga ngachilihi hakutachikiza ngwetu Yehova eji kwivwililanga kukulomba chetu?

⁷ Namakumbi ano, Yehova eji kwivwililanga kukulomba chavangamba jenyi nakuchikumbulula halwola lwakutamo, kaha nawa mujila yize evwila kuwaha. (Samu 116:1, 2) Tutalenu hachakutalilaho chandumbwetu wapwevo  wamuIndia uze amwene omu Yehova akumbulwile kulomba chenyi. Alizakaminyinenga chikuma ngocho alombele Yehova amukafwe. Asonekele ngwenyi: “Broadcasting^® yaMay 2019 yize yapwile nakuhanjika mwakuhonesela kulizakamina yejile halwola lwakutamo. Kaha ngwamwene ngwami kulomba chami vanachikumbulula.”

8. Uno Yehova asolwele ngachilihi ngwenyi azanga Yesu?

⁸ Yehova atuzanga nakutuzakama ngana muze azangile Yesu nakumuzakama omu apwile nakuzata mulimo waulemu hano hamavu. (Yowa. 5:20) Azakaminenga Yesu kushipilitu, namuvishinganyeka, nakumujimba. Yehova asolwele ngwenyi azanga Mwanenyi kaha nawa amwivwila kuwaha. (Mateu 3:16, 17) Hakuwana nge Yesu apendaminyinenga hali Ise wamwilu, ngocho kamwene ngwenyi ali ukawenyiko.—Yowa. 8:16.

9. Vyuma muka vize vyasolola nge Yehova atuzanga?

⁹ Ngana muze chapwile kuli Yesu, tuvosena tuli nakumona omwo Yehova ali nakutusolwela zanga mujijila jakulisezaseza. Chakutalilaho, Yehova atukoka tupandame kuli ikiye nakutuhana vandumbwetu vaze vatuzanga, vaze veji kutukafwanga tupwenga vakuwahilila nakutukafwa nawa nge tuli muukalu. (Yowa. 6:44) Kaha nawa eji kutuhananga kulya chakushipilitu chachivulu. Eji kutuhananga nawa vyuma vyasakiwa mukuyoya. (Mateu 6:31, 32) Kushinganyeka omwo Yehova eji kutusolwelanga zangi, nachitulingisa tumuzange chikuma.

10. Tunahase kulondezeza ngachilihi Yehova uze azanga vandumbwetu vosena?

¹⁰ Yehova azanga vandumbwetu vosena. Oloze shimbu jimwe chinahase kupwa chachikalu kusolola ngwetu twazanga vandumbwetu, mwomwo yakulihandununa chavisemwa najila vatulelelamo. Kaha nawa tuvosena tweji kulinganga vyuma vize vinahase kwivwisa vakwetu kupihya. Chamokomoko navyuma kanevi, tunahase kuzanga vandumbwetu. Tunahase kulinga ngachilihi ngocho? Hakulondezeza Setu uze azanga vandumbwetu vosena. (Efwe. 5:1, 2; Yowa. 1, 4:19) Tutalenu vyuma natulinangula kuli Yehova.

11. Uno Yesu alondezezele ngachilihi muchima waYehova ‘wakeke’?

¹¹ Yehova apwa Kalunga ‘wakeke.’ (Luka 1:78) Mutu uze atwama nakeke eji kwivwanga kupihya kachi nge mwamona vakwavo vali nakuyanda, ngocho eji kutondangako jijila jikuvakafwilamo nakuvavendejeka. Jila yize Yesu azakaminyinyinengamo vatu yasolwele hatoma nge Yehova atwama nakeke. (Yowa. 5:19) Lwola lumwe omu Yesu amwene liyongomena lyavatu, “avevwililile keke, mwomwo vayanjile nakulimwanga nge mikoko vakuzeneka kafunga.” (Mateu 9:36) Yesu kevwililile vatu keke kahako oloze avakafwile nawa. Okilenga vaveji nakuhizumuna vatu vaze vapwile “nakufulyangila nakulemuwa naviteli.”—Mateu 11:28-30; 14:14.

12. Hanenu chakutalilaho chize nachisolola nge twatwama namuchima wakeke.

¹² Kachi nge natutachikiza ukalu vali nakuhitamo vandumbwetu, kaha nachitulingisa tuvevwile keke. Chakutalilaho, ndumbwetu wapwevo nahase kuviza musongo waunene, oloze kayayavala haukalu wenyiko. Chipwe ngocho, nahase kwivwa kuwaha kachi nge natumukafwako vyuma vimwe. Tunahase kulihulisa ngwetu, Uno anakuhasa kuzakama tanga yenyi kumujimba tahi? Kutala nahase kuwahilila nge natumuwahishilako vyakulya chipwe kumuwahishila hembo lyenyi tahi? Tutalenu hachakutalilaho chikwavo nawa. Ndumbwetu walunga vanahase kumufumisa hamilimo. Ngocho tunahase kumuhanako jimbongo chakuzeneka kumulweza ngwetu jinafumu kuli yetu, mangana alikafwe najo shimbu achili nakutondatonda milimo yeka.

13-14. Tunahase kusolola ngachilihi muchima wakuhana ngana mwaYehova?

 ¹³ Yehova apwa muka-kuhana. (Mateu 5:45) Twatela kukafwanga vandumbwetu lwola lwosena keshi kuvandamina kaha vatulombeko. Ngana mwaYehova, twatela kuvalingilako vyuma vimwe numba nge kavatulombeleko. Yehova eji kutunokeselanga vula chakuzeneka kumulombayo. Kaha nawa vula yeji kunganyalisanga vatu vosena kuhakilako navaze kavamulemesako. Hakutuhana vyuma vize twasakiwa mukuyoya cheji kusololanga nge Yehova atuzanga. Chikupu vene twazanga Yehova mwomwo apwa walikoji kaha nawa apwa muka-kuhana.

¹⁴ Vandumbwetu vavavulu veji kulondezezanga Sevo wamwilu hakupwa namuchima wakukafwa vandumbwavo vali muukalu. Chakutalilaho, mu 2013, kwapwile peho yanyamanganda (Super Typhoon Haiyan) yize yenyekele vyuma vyavivulu chikuma mulifuchi lyaPhilippines. Jizuvo javandumbwetu jajivulu jalyenyekele, kaha nawa vajimbalishile vikumba vyavo vyavivulu. Oloze vandumbwavo vakushipilitu mukaye kosena valisuuwile kuvakafwa. Vandumbwetu vavavulu vahanyine jimbongo kaha veka vazanyine mumulimo wakutunga nakutungulula jizuvo kafwe 750 mutukweji vavandende kaha. Omu kwapwile musongo waCOVID-19, Vinjiho jaYehova vazachile nangolo mangana vakafwe vandumbwavo. Kachi nge natwanguhwanga kukafwa vandumbwetu vaze vali muukalu, kaha natusolola ngwetu twavazanga.

15-16. Kweseka namukanda Wavaka-Kolose 3:13, chuma muka twatela kulinga mangana tulondezeze Setu wamwilu?

¹⁵ Yehova apwa muka-kukonekela. (Tangenu Wavaka-Kolose 3:13.) Hakumbi hakumbi Setu wamwilu eji kutukonekelanga. (Samu 103:10-14) Hakuwana nge vaka-kukavangiza Yesu kavapwile vakukupukako, ngocho Yesu avatetelelenga nakuvakonekela. Kaha nawa alisuuwile kuhana mwono wenyi mangana vatukonekele jishili jetu. (Yowa. 1, 2:1, 2) Muchima wakukonekela atwama nawo Yehova naYesu weji kutulingisanga tupandame kuli vakiko.

¹⁶ Nge ‘natukonekelanga’ vandumbwetu “namuchima wakusuuluka” kaha nachitulingisa tuvazange chikuma. (Efwe. 4:32) Chipwe ngocho, shimbu jimwe chinahase kupwa chachikalu kukonekela vandumbwetu, shikaho chasakiwa  kukilikita. Ndumbwetu umwe wapwevo ambile ngwenyi chihande chapwile muKaposhi Kakutalila chapwile namutwe wakwamba ngwavo “Likonekelenunga Namuchima Wakusuuluka” chamukafwile akonekelelenga vandumbwenyi. * Asonekele ngwenyi: “Kulinangula chihande kana changukafwile ngumone ngwami kukonekela vakwetu nachingukafwa. Chihande kana chahanjikile ngwacho kulisuula kukonekelanga vakwetu kachalumbununa nge tunevu kuwaha havyuma vyavipi vanatulingiko, oloze chalumbununa nge katwatela kupihilila halwola lwalusuku havyuma vanatulingiko, twatela kufwila kupwa vakuunda.” Kachi nge natukonekelanga vandumbwetu namuchima wakusuuluka, kaha natusolola ngwetu twavazanga kaha nawa tuli nakulondezeza Setu Yehova.

17. Kweseka naMateu 5:16, tunahase kuvumbika ngachilihi Setu wamwilu?

¹⁷ Chapwa hikutokwa chikuma kupwa navandumbwetu vamukaye kosena vaze vatwama nazangi. Twasaka kukafwa vatu vavavulu mangana navakiko vazachile Kalunga. Shikaho katwatela kulinga kala chuma chize nachilingisa vatu vashinganyeke vyuma vyavipi hali vatu jaYehova chipwe hali Setu wamwiluko. Oloze twatela kupwa navilinga vyamwaza vize navilingisa vatu vetavile mujimbu wamwaza.—Tangenu Mateu 5:16.

18. Chuma muka nachitukafwa twambulule mujimbu chakuzeneka kwivwa woma?

¹⁸ Shimbu jimwe vatu vanahase kututoleka chipwe vene kutuyanjisa mwomwo yakwononoka Setu wamwilu. Chuma muka twatela kulinga kachi nge tunakwivwa woma kulwezako vakwetu vyuma twafwelela? Twatela kupendamina hali Yehova nahali Mwanenyi Yesu mangana vatukafwe. Yesu afwelelesele tumbaji twenyi ngwenyi kavatela kulizakamina mwakuhanjikila chipwe vyuma navahanjikako. Mwomwo ika? Mwomwo ambile ngwenyi: “Vyuma namukahanjika navakamihanavyo haola vene yize, mwomwo keshi yenu namukahanjikako, oloze shipilitu yaSenu yikiko nayikahanjikanga kuhichila muli enu.”—Mateu 10:19, 20.

19. Hanenu chakutalilaho chamutu uze ambulwile mujimbu chakuzeneka kwivwa woma.

 ¹⁹ Tutalenu hachakutalilaho chandumbwetu Robert. Lwola lumwe kunyima omu apwile nakulinangula Mbimbiliya kaha nawa kanda apwenga nachinyingi chachivulu chamuMbimbiliya, vamutwalile kuzango yakusopela muSouth Africa mangana akalumbunune ovyo nakanyina kwingila uswalale. Alumbunwine ngwenyi kasakile kwingila uswalaleko mwomwo azangile vandumbwenyi. Achimwene kupwa hikutokwa chachinene kupwa mutanga yakushipilitu. Muka-kusopesa amuhulishile ngwenyi, “Uno vandumbwove veya?” Ndumbwetu Robert kashinganyekele ngwenyi navamuhulisa chihula kanako, oloze hahaze vene anukile chisoneka chalikumbi kana. Chisoneka kana chapwile chaMateu 12:50. Chambile ngwacho: “Weshowo eji kulinganga mwaya muchima waTata ou ali mwilu, ikiye ndumbwami walunga, ikiye ndumbwami wapwevo, ikiye mama.” Numba tuhu halwola kana Robert apwile nakulinangula Mbimbiliya, oloze shipilitu yaYehova yamukafwile akumbulule chihula kana navihula vyeka vize vamuhulishile. Twafwelela ngwetu Yehova awahililile hakumona Robert nomika. Shikaho, Yehova eji kwivwanga kuwaha kachi nge nayetu natupendamina hali ikiye hakwambulula mujimbu mulwola lwalukalu.

20. Vyuma muka twatela kufwila kulinga? (Yowa. 17:11, 15)

²⁰ Twatela kutachikiza ngwetu chapwa hikutokwa chachinene kupwa mutanga yakushipilitu. Twatwama naSetu wamwilu wamwenemwene navandumbwetu vavavulu vaze vatuzanga. Twatela kusakwilila Yehova hakupwa mutanga kana. Satana navatu jenyi vasaka kutulingisa tuhuhwasane ngwetu Setu wamwilu katuzangako, nakutulingisa nawa tuhone kupwa vakulinunga. Oloze Yesu atulombeleleko kuli Setu wamwilu atulame mangana tanga yetu yitwaleho lika kupwa yakulinunga. (Tangenu Yowano 17:11, 15.) Kaha Yehova ali nakukumbulula kulomba kana. Ngana mwaYesu, tutwalenuho lika kufwelela ngwetu Setu wamwilu atuzanga kaha nawa eji kutukafwanga. Shikaho tutwalenuho lika kupandama kuli Yehova nakuli vandumbwetu.