1. Mwomwo ika katwatela kulikomokelako hakumona vatu mukaye kaveshi nakufwelela vakwavoko?

 MUKAYE kano kaSatana, vatu kavatachikiza mutu uze vatela kufwelelako. Kakavulu veji kuvevwisanga kupihya kuli vaka-kusekasana, navaka-mapolitiki navatwamina vamukwitava. Kaha nawa kavafwelela masepa javo, chipwe vaze vatunga navo, najitanga javoko. Chipwe ngocho, katwatela kulikomokela hachuma kanako. Mbimbiliya yahanjikilile chimweza ngwayo: “Hamakumbi akukuminyina . . . , vatu navakapwa . . . vaka-kuhona kushishika, . . . vaka-kuvangila vakwavo, . . . vaka-kusolola vakwavo.” Echi chalumbununa nge vatu navasololanga vilinga vyaSatana, uze apwa kalunga wakatwamino kamyaka yino, uze katwatela kufwelelako.—Chimo. 2, 3:1-4; Koli. 2, 4:4.

2. (a) Uno twatela kufwelela ika? (b) Vamwe vanahase kuhuhwasana ika?

² Hakupwa tuvaka-Kulishitu, ngocho twatela kufwelela chikuma Yehova. (Yele. 17:7, 8) Twafwelela ngwetu atuzanga, kaha nawa ‘keshi kukaseza’ masepa jenyiko. (Samu 9:10) Tunahase nawa kufwelela Yesu Kulishitu mwomwo alisuwile kutufwila. (Petu. 1, 3:18) Kaha nawa vyuma tunahichimo mukuyoya chetu vinasolola nge Mbimbiliya yinahase kutukafwa. (Chimo. 2, 3:16, 17) Chikupu vene, tunahase kufwelela Yehova, naYesu naMbimbiliya. Chipwe ngocho, vamwe vanahase kuhuhwasana numba nge vanahase kutwalaho lika kufwelela vandumbwavo muchikungulwilo. Jino mwomwo ika twatela kufwelela vandumbwetu?

3. Uno kutokwa muka twatwama nacho? (Mako 10:29, 30)

³ Yehova atusakula kupwa hamukana watanga yenyi yamukaye kosena yize yeji kumulemesanga. Echi chapwa hikutokwa chachinene chize cheji kutunganyalisanga chikuma. (Tangenu Mako 10:29, 30.) Tukwechi vandumbwetu mukaye kosena vaze vazanga Yehova ngana muze twamuzanga yetu, vaze nawa vafwila kukavangiza  jindongi jenyi. Numba tuhu twahanjika malimi akulisezaseza, nakufuma kumiyachi yakulihandununa, navwaliso yakulihandununa, oloze tweji kulisolwelanga zangi numba vene tunaliwane halwola lwatete. Tweji kwivwanga kuwaha kwalishila navo hamwe Setu wamwilu wazangi nakumulemesa.—Samu 133:1.

4. Mwomwo ika twasakiwila vandumbwetu?

⁴ Makumbi ano, tuli nakusakiwa chikuma kulinunga navandumbwetu. Shimbu jimwe, veji kutukafwanga nge tuli muukalu. (Loma 15:1; Ngale. 6:2) Kaha veji kutukolezezanga tutwaleho kuzachila Yehova nakupwa vakuhya kushipilitu. (Teso. 1, 5:11; Hepe. 10:23-25) Achishinganyekenu omwo tunahase kwivwa kachi nge katwapwanga navandumbwetu vakutukafwa tufungulule Satana Liyavolo navatu jenyi vakuhuka, vaze vapwa vaka-kole jetuko. Kalinwomu Satana navaka-kumukundwiza vafumbukile vangamba jaKalunga. Oloze halwola kana, natukawahilila mwomwo vandumbwetu navakatukafwa.

5. Mwomwo ika lwola lumwe chinahase kukaluhwila vamwe kufwelela vandumbwavo?

⁵ Vatu vamwe veji kuchiwananga kupwa chachikalu kufwelela vandumbwavo, pamo mwomwo valwezele ndumbwetu umwe chihande chakusweka kaha ikiye himwachilweza vatu veka. Nyi pamo ndumbwetu umwe muchikungulwilo alingile vyuma vize vyavevwishile kupihya chikuma. Nge vyuma kana vinasoloka, chinahase kutukaluhwila kufwelela vandumbwetu. Uno vyuma muka vinahase kutukafwa tufwelele vandumbwetu?

6. Mujila muka zangi yinahase kutukafwa tufwelele vakwetu? (Wavaka-Kolinde 1, 13:4-8)

⁶ Zangi yikiko nayitulingisa tufwelele vakwetu. Mukanda Wavaka-Kolinde 1, kapetulu 13 watufwelelesa ngwawo, zangi yinahase kutulingisa tufwelele vandumbwetu, nakutwalaho lika kuvafwelela kachi nge vanatwivwisa  kupihya. (Tangenu Wavaka-Kolinde 1, 13:4-8.) Chakutalilaho, vesi 4 yamba ngwayo, “zangi yeji kutalililanga chikoki kaha nawa yeji kutetelanga.” Yehova eji kututalililanga chikoki numba nge tunalingi shili. Shikaho, nayetu nawa twatela kutalilila vandumbwetu chikoki kachi nge vanatwivwisa kupihya havyuma vanahanjika chipwe vize vanalingi. Kaha vesi 5 yamba ngwayo: “[Zangi] kayeshi kukwata washi matotoko. Kayeshi kulama kokoko.” Katweshi nakusaka ‘kulamina vandumbwetu koko’ hakwanukanga vyuma vyavipi vize vatulingileko. Mukanda waMuka-kwambulula 7:9 wamba ngwawo, katwatela ‘kupihilila washiko.’ Shikaho, nachiwaha kukavangiza mazu atwama hali Wavaka-Efwesu 4:26 akwamba ngwavo: “Kanda namutokesa likumbi oku hanga munapihililako.”

7. Uno jindongi jatwama hali Mateu 7:1-5 jinahase kutukafwa ngachilihi tufwelele vakwetu?

⁷ Chuma chikwavo nachitukafwa tufwelele vandumbwetu shina kuvamona nganomu avamona Yehova. Yehova avazanga, kaha nawa kalava jishili javoko. Shikaho nayetu katwatela kulinga ngochoko. (Samu 130:3) Muchishishisa chakutokomenya hatutenga twavo, twatela kushishikanga havilinga vyavo vyamwaza nakufwelela ngwetu navatwalaho kulinga vyuma vyamwaza. (Tangenu Mateu 7:1-5.) Hakuwana nge zangi yeji “kwitavila[nga] vyuma vyosena,” ngocho twatela kufwelela ngwetu ava vandumbwetu vali nakusaka kulinga vyuma vyamwaza keshi kutwivwisa kupihyako. (Koli. 1, 13:7) Mazu kana kawasolola nge Yehova asaka tufwelelenga vakwetu chamufwelelako, oloze asaka tuvafwelele mwomwo yakushishika chavo. *

8. Uno vyuma muka namulinga mangana mufwelele vakwenu?

⁸ Ngana muze chapwa hakuvumbika mutu, nakufwelela vakwenu chasakiwa lwola nakulingako vyuma vimwe. Jino vyuma muka namulinga mangana mufwelele vandumbwenu? Vatachikizenu kanawa. Shimutwilenunga navo hakukungulula chachikungulwilo. Zatenunga navo mumulimo wamuwande. Vatalililenu chikoki nakuvahana lwola vasolole ngwavo tunahase kuvafwelela. Hakavanga, mutu uze muli nakusaka kutachikiza pamo kamweshi kumulweza mijimbu yimwe yakusweka yamukuyoya chenuko. Oloze omu namulitachikiza kanawa, munahase kupwa vakukasunuka kumulweza kala vyuma vili kumichima yenu. (Luka 16:10) Uno munahase kulinga ngachilihi nge ndumbwetu mwalweza vatu vyuma vyakusweka munamulweze? Kanda kukumisa usepa wenu hahaze veneko, oloze hichisenumo lwola. Kaha nawa kanda kulingisa tutenga twavatu vamwe tumihonese kufwelela vandumbwenuko. Shikaho, tushimutwilenu havyakutalilaho vyavangamba jaYehova vamwe vakushishika vaze vatwalileho lika kufwelela vakwavo chamokomoko nakuvevwisa kupihya.

9. (a) Uno Hana atwalileho ngachilihi kufwelela vyuma alongesa Yehova, chamokomoko natutenga twavatu vamwe vaze vamwimanyinyinengako? (b) Uno chakutalilaho chaHana chinaminangula ika kutalisa kukufwelela vyuma alongesa Yehova? (Talenu muvwimbimbi.)

⁹ Uno vamivwisaho lyehi kupihya kuli ndumbwetu uze vatongola tahi? Nge mukiko, kaha kushimutwila havyuma vyasolokele kuli Hana nachimikafwa chikuma. Halwola kana Kapilishitu Wakulitulaho Eli ikiye apwile nakutetekela vatu jaYehova mukulemesa chamuchano muIsalele. Oloze vatu vamutanga yenyi kavahanyinenga chakutalilaho chamwazako. Vana venyi vaze vapwile vapilishitu valingilenga vyuma vyavipi, vyauvumbi, oloze sevo kavahuhumwinengako. Yehova kafumishile Eli hamulimo wenyi waupilishitu  hahaze veneko. Chipwe ngocho, Hana kalitwaminyinyine kukavangiza vyuma alongesa Yehovako, oloze atwalileho lika kuya kutavanaku nakulemesa Yehova, numba tuhu Eli apwilenga lika kapilishitu wakulitulaho. Omu Eli amwene Hana ali nakulomba oku ali nakulyonyinga, ashinganyekele mwakuhenga ngwenyi napende. Muchishishisa chakuvangila kutachikiza kanawa vyuma vili nakusoloka, ikiye avangijikilile ou pwevo uze apwile muukalu waunene chikuma. (Samwe. 1, 1:12-16) Chipwe ngocho, Hana alishikile lushiko ngwenyi nge mwakasema mwana walunga, kaha mwakamuhana kuli Yehova mangana akamuzachilenga hatavanaku, haze apwilenga Eli. (Samwe. 1, 1:11) Uno vana vaEli vatelele kuvazangamisa havilinga vyavo vyavipi tahi? Eyo, Yehova alingile ngocho halwola lwakutamo. (Samwe. 1, 4:17) Kalunga akiswile Hana hakumuhana mwana walunga Samwele.—Samwe. 1, 1:17-20.

10. Uno Mwangana Ndavichi atwalileho ngachilihi kufwelela vakwavo, chamokomoko nakumufumbukila?

¹⁰ Kutala vamivwisaho lyehi kupihya kuli sepa lyenu uze mwazanga chikuma tahi? Nge mukiko, kaha shinganyekenu hachakutalilaho chaMwangana Ndavichi. Sepa lyenyi umwe apwile Ahitofwele. Oloze omu Avasalome mwana Ndavichi asakile kutambula wangana waIse, Ahitofwele akundwijile Avasalome. Echi pamo chevwishile Ndavichi kupihya hakumona mwanenyi nasepa lyenyi navamufumbukila. Chipwe ngocho, kufumbukila kana kachalingishile Ndavichi echenga kufwelela vakwavoko. Atwalileho lika kufwelela sepa lyenyi wakushishika Hushai, uze akanyine kukundwiza Avasalome. Ndavichi atachikijile vyuma vyamulingishile afwelele Hushai. Hushai apwile sepa wamwenemwene, mwomwo ahakile nakuyoya chenyi muponde hakusaka kukafwa Ndavichi.—Samwe. 2, 17:1-16.

11. Mujila muka ngamba yaNavale umwe asolwelelemo ngwenyi afwelelele Avingayile?

¹¹ Talenu chakutalilaho chikwavo changamba yaNavale. Ndavichi navatu jenyi vakingile vangamba jakaIsalele Navale. Mukuhita chalwola, Ndavichi alombele Navale uze apwile naluheto ahaneko kala vyakulya vatu jenyi. Oloze Navale akanyine, kaha Ndavichi apihililile chikuma nakusaka kujiha malunga vosena vakuzuvo yaNavale. Ngamba yaNavale umwe ambulwile mujimbu kana kuli Avingayile pwevo lyaNavale. Hakuwana nge apwile mutanga yaNavale, atachikijile ngwenyi Avingayile nahase kuyovola  mwono wenyi. Muchishishisa chakuchina, oloze afwelelele Avingayile ngwenyi nahase kwolola vyuma. Amufwelelele mwomwo atachikijile ngwenyi apwile pwevo wamangana. Kaha vyuma vyasolokele vyasolwele nge vyuma afwelelele ou ngamba vyapwile vyamuchano. Avingayile omikile hakukunyula Ndavichi ahone kulinga vyuma vyavipi ajinyine. (Samwe. 1, 25:2-35) Afwelelele ngwenyi Ndavichi mwalinga vyuma vyakwoloka.

12. Uno Yesu asolwele ngachilihi ngwenyi afwelelele tumbaji twenyi numba tuhu vapwile natutenga?

¹² Yesu afwelelele tumbaji twenyi chamokomoko natutenga twavo. (Yowa. 15:15, 16) Omu Yakova naYowano valwezele Yesu ngwavo akavahane vihela vyavilemu muWangana, Yesu kashinganyekele ngwenyi vali nakuzachila Yehova hakusaka kunganyalilaho, chipwe kuvatambula mulimo wauposetoloko. (Mako 10:35-40) Kufumaho, halikumbi lize Yesu vamukwachile, tumbaji twenyi vosena vamuchinyine. (Mateu 26:56) Chipwe ngocho, Yesu kalitwaminyinyine kuvafwelelako. Numba tuhu atachikijile kanawa tutenga twavo, oloze “avazangile palanga nakusongo.” (Yowa. 13:1) Omu Yesu asangukile, ahanyine vaposetolo jenyi vakushishika 11 mulimo waulemu wakutwaminyina mulimo wakunangula vatu vapwenga tumbaji, nakuzakama mikoko jenyi azanga. (Mateu 28:19, 20; Yowa. 21:15-17) Yesu atachikijile vyuma vyamulingishile afwelele ava malunga vakuhona kukupuka. Vosena vazachile nakashishi palanga nakukufwa chavo. Chikupu vene, Hana, naNdavichi, nangamba yaNavale, naAvingayile naYesu vatusela chakutalilaho chamwaza chakufwelela vatu vakuhona kukupuka.

13. Chuma muka chinahase kutulingisa tuchiwane kupwa chachikalu kufwelela vakwetu?

¹³ Kutala mwalwezaho lyehi ndumbwetu umwe chihande chakusweka, kufumaho namwivwa ngwavo nalweze vatu veka chihande kana tahi? Chuma kana chinahase kumivwisa kupihya. Chakutalilaho, ndumbwetu umwe wapwevo alwezele mukulwane muchikungulwilo mujimbu umwe wakusweka. Kufumaho uze ndumbwetu walunga alwezele puwenyi chihande kana. Kaha likumbi lyakavangijileho, pwevo lyauze mukulwane asanyikile ou ndumbwetu wapwevo nakumuvendejeka hamujimbu wakusweka uze vamulwezele. Ou ndumbwetu wapwevo achimwene kupwa chachikalu kufwelela ou mukulwane wamuchikungulwilo. Chipwe ngocho, ayile kuli kalama weka amukafwe. Kaha ou kalama amukafwile afwelele cheka vakulwane muchikungulwilo.

14. Vyuma muka vyakafwile ndumbwetu umwe walunga afwelele cheka vakulwane?

¹⁴ Ndumbwetu umwe walunga apihililile navakulwane vavali halwola lwalusuku nakuhona kuvafwelela. Chipwe ngocho, aputukile kushinganyeka havyuma ahanjikile ndumbwetu umwe uze avumbika chikuma. Uze ndumbwetu ahanjikile chishina chachilemu ngwenyi: “Satana ikiye muka-kole wetu, keshi vandumbwetuko.” Ou ndumbwetu walunga ashinganyekele hachishina kanechi navyuma atela kulinga. Kufumaho, alombele kuli Yehova amukafwe, kaha kutwala muze atwaminenga cheka mukuunda navaze vakulwane vavali.

15. Mwomwo ika kufwelela cheka vakwetu chasakiwila lwola? Hanenu chakutalilaho.

¹⁵ Uno vamitambulaho lyehi milimo muchikungulwilo tahi? Chuma kana chinahase kumivwisa kupihya. Chakutalilaho, ndumbwetu wapwevo Grete nanaye vapwile Vinjiho vakushishika chikuma muNazi Germany halwola mulimo wetu vaukanyishile, shimbu kanda Jita yaKaye yamuchivali. Ou ndumbwetu alivwishilenga kuwaha hakupulitila vandumbwetu jimangazini jaKaposhi Kakutalila. Oloze omu vandumbwetu vejivile ngwavo ise emanyinyine muchano nakole, vatambwile Grete mulimo uze azachilenga, mwomwo vevwile woma ngwavo ise pamo mwasolola chikungulwilo kuli vaka-kole. Ou keshi ukiko kaha ukalu amwene Greteko. Halwola lwaJita yaKaye  yamuchivali, vandumbwetu kavahanyinenga Grete nanaye jimangaziniko, kaha nawa kavavahanjikishilengako nge vanaliwane mujila. Chuma kana chevwishile Grete kukola kumuchima, ngocho chambachile lwola kukonekela vaze vandumbwenyi nakuvafwelela. Mukuhita chalwola, atachikijile ngwenyi Yehova avakonekelele, ngocho naikiye atela kuvakonekela. *

16. Mwomwo ika twatela kukilikita mangana tufwelelenga vandumbwetu?

¹⁶ Nge nayenu mwamonaho lyehi ukalu kanou wakumivwisa kukola kumuchima, kaha mwatela kuzachilaho mangana mufwelele cheka vakwenu. Numba tuhu kulinga ngocho nachimbata lwola, oloze kukilikita chenu kacheshi kuya munganaveneko. Chakutalilaho, kachi nge twalyaho lyehi vyakulya vize vyatuvijishile, kaha tunahase kuzangama nakusakula kanawa vyakulya. Oloze kacheshi kutulingisa tulitwamine kulya chosenako. Chochimwe nawa, kutwivwisa kupihya kuli mutu umwe kachatela kutulingisa tulitwamine kufwelela vandumbwetu vosenako, vaze twatachikiza ngwetu kavakupukako. Nge natufwelela cheka vandumbwetu, kaha natupwa vakuwahilila nakuhaka muchima kuvyuma vize tunahase kulinga mangana tulingise vandumbwetu vosena muchikungulwilo valifwelelenga.

17. Mwomwo ika kufwelela vakwetu chapwila chachilemu, kaha vyuma muka natukashimutwila muchihande chinakavangizaho?

¹⁷ Vatu mukaye kano kaSatana kavalifwelelako, oloze yetu tunahase kufwelela vandumbwetu mwomwo twavazanga. Kufwelela vakwetu nachitulingisa tupwenga vakuwahilila nakupwa vakulinunga, kaha nachikatukafwa nawa omu natukamona ukalu kulutwe. Uno namulinga ngachilihi nge ndumbwenu uze mwafwelela mwamivwisa kupihya kaha kamweshi nakusaka cheka kumufwelelako? Monenu vyuma ngana muze avimona Yehova, nakukavangiza jindongi jamuMbimbiliya, nakusolwela vandumbwenu zangi yakwilila, nakulinangula kuvyakutalilaho vyamuMbimbiliya. Tunahase kuhonesa muchima wakutwalaho lika kupihilila, nakufwelela cheka vakwetu. Nge natulinga ngocho, kaha natulivwisa kuwaha kupwa namasepa vavavulu ‘vaze navalipanjika nayetu kuhambakana ndumbwetu.’ (Vishi. 18:24) Chipwe ngocho, vandumbwetu navakiko nawa vatela kutachikiza ngwavo vanahase kutufwelela, keshi yetu kaha twatela kufwelela vakikoko. Muchihande chinakavangizaho natukashimutwila omwo tunahase kusolola ngwetu vandumbwetu vanahase kutufwelela.