1. Uno mutu wakushishika natumutachikiza ngachilihi?

 MUTU wakushishika eji kufwilanga kutesamo jishiko jenyi, nakuhanjikanga muchano. (Samu 15:4) Vatu vatachikiza ngwavo vanahase kupendamina hali ikiye. Omu mukiko chatela kupwa nakuli yetu, vandumbwetu vatela kupendamina hali yetu. Vyuma muka twatela kulinga numba vandumbwetu vatufwelele?

2. Vyuma muka twatela kulinga numba vakwetu vatufwelele?

² Katweshi kuhasa kushinjila vakwetu vatufweleleko. Vilinga vyetu vikiko vyatela kuvalingisa vatufwelele. Vatu veji kwambanga ngwavo, kufwelela mutu chapwa nge kupwa najimbongo. Chapwa chachikalu kufwelela mutu, oloze chachashi kulitwamina kumufwelela. Kuli vyuma vyavivulu vyatulingisa tufwelele Yehova. Natumufwelelanga lika mwomwo “vyeshovyo eji kulinganga vyapwa vyamwenemwene.” (Samu 33:4) Kaha asaka tumulondezeze. (Efwe. 5:1) Tutalenu havyakutalilaho vimwe vyavangamba jaYehova vaze vamulondezezelenga nakupwa vakushishika. Kaha natumona nawa mihako yitanu yize twatela kusolola mangana vakwetu vatufwelele.

3-4. Uno Ndanyele alingile ika numba vamufwelele, kaha chuma kana chatela kutulingisa tulihulise vihula muka?

³ Kapolofweto Ndanyele apwile mutu wakushishika. Numba tuhu apwile muufunge muMbavilone, oloze atungile puho yamwaza yakutela kumufwelela. Puho kana yatohwele chikuma omu alumbunwine vilota vyaMwangana waMbavilone Nevukataneza hakumukafwa kuli Yehova. Likumbi limwe, Ndanyele alwezele mwangana mujimbu waupi uze kasakile kwivwako, ngwenyi Yehova apihililile naikiye. Kulinga chuma kana chasakiwile kupwa wakumika, mwomwo Nevukataneza apwilenga namatoto chikuma. (Ndanye. 2:12; 4:20-22, 25) Omu  mwahichile myaka, Ndanyele alingishile cheka vatu vamufwelele hakulumbununa kanawa mujimbu wasolokele hambango mujila yakukomwesa munganda yamwangana muMbavilone. (Ndanye. 5:5, 25-29) Kaha halwola lukwavo nawa, Ndaliu kaMete navilolo jenyi navakiko vamwene ngwavo Ndanyele “apwile nashipilitu yakulipwila.” Vetavilile ngwavo Ndanyele “apwile wakushishika. Kapwile nakanengauli chipwe navilinga vyakuhengako.” (Ndanye. 6:3, 4) Chikupu vene, navaka-kuyula vaze kavalemeselenga Kalungako vatachikijile ngwavo ou muka-kulemesa Yehova apwile wakushishika, kaha vatelelele kumufwelela.

⁴ Hakushinganyeka hachakutalilaho chaNdanyele, twatela kulihulisa ngwetu: ‘Uno ngwatwama napuho muka kuvatu vaze kavapwa Vinjiho jaYehovako? Uno vangutachikiza kupwa ngumutu uze eji kutesangamo milimo yenyi, uze nawa vatela kufwelela tahi?’ Mwomwo ika twatela kulihulishila vihula kanevi? Mwomwo kupwa vakushishika cheji kulingisanga vatu valise Yehova.

5. Mwomwo ika Hananyiya vamutachikijilile kupwa mutu wakushishika?

⁵ Mumwaka wa 455 B.C.E., omu Nguvulu Nehemiya akumishile kutungulula nganda yaYelusalema, atondele malunga vakushishika mangana valame kanawa nganda. Ngocho atongwele malunga vamwe kuhakilako naHananyiya uze apwile mukulwane waZuvo Yakukola. Mbimbiliya yavuluka ngwayo, Hananyiya “apwile lunga wakushishika, kaha evwilenga woma Kalunga wamuchano kuhambakana vakwavo.” (Nehe. 7:2) Hananyiya azachilenga nangolo kala mulimo vamuhanyine mwomwo azangile Yehova nakumwivwa woma kuchina mwamwivwisa kupihya. Nayetu nawa nge natupwa navilinga  kana, kaha vakwetu navatufwelela hakuzata mulimo waKalunga.

6. Uno Tukiku apwile ngachilihi wakushishika kuli sepa lyenyi kaposetolo Paulu?

⁶ Talenu nawa hachakutalilaho chikwavo chaTukiku. Apwile sepa lyakaposetolo Paulu uze afwelelele chikuma. Omu Paulu apwile mukamenga muzuvo, apendaminyine hali Tukiku, kaha ambile ngwenyi Tukiku apwile “muka-kuzata wakushishika.” (Efwe. 6:21, 22) Paulu amufwelelelele hakumuhana mulimo wakumutwalilangako mikanda kuli vandumbwenyi kuEfwesu nakuKolose, nakuvakolezeza nakuvavendejeka. Tukiku eji kutwanukisanga tushinganyeke hali vandumbwetu vamalunga vakushishika vaze vali nakutuzakama kushipilitu makumbi ano.—Kolo. 4:7-9.

7. Vyuma muka namulinangula kuli vakulwane navaka-kuzachila vamuchikungulwilo chenu?

⁷ Makumbi ano, tweji kusakwililanga chikuma Yehova hakupwa navakulwane navaka-kuzachila vakushishika. Ava vandumbwetu vahaka mangana kumilimo yavo, ngana mwaNdanyele, naHananyiya naTukiku. Chakutalilaho, omwo tweji kupwanga kukukunguluka chamukachi kachalumingo tweji kutachikizanga ngwetu vihanda vyosena vyahakukunguluka vili navatu vakuvihanjika. Kaha vakulwane nawa veji kwivwanga kuwaha nge vandumbwetu vaze vali navihande navawahisa vihande vyavo nakuvihanjika hakukunguluka. Kaha nawa tweji kupwanga vakukasunuka kusanyika vilongesa vyetu vyaMbimbiliya kukukunguluka chakusongo yachalumingo, hakufwelela ngwetu nakupwa mutu wakuhanjika chihande. Tweji kufwelelanga nawa ngwetu mikanda yakuzachisa muwande kuyili. Ava vandumbwetu vakushishika veji kutuzakamanga kanawa, kaha tweji kusakwililanga Yehova hakutuhanavo. Jino yetu natusolola ngachilihi ngwetu vatela kutufwelela?

8. Tunahase kusolola ngachilihi ngwetu twavumbika vakwetu? (Vishimo 11:13)

⁸ Twazanga vandumbwetu vosena, kaha nawa twavazakama hakusaka kutachikiza omwo vali. Oloze twatela nawa kuvavumbika hakuhona kulitaka muvihande vyavo vize kavyatupanjileko. Vatu vamwe muchikungulwilo chavaka-Kulishitu chamulikulukaji lyamyaka lyakulivanga vapwilenga “vaka-kuyongola vakwavo, vaka-kulingisa muvyuma vyambala, nakuhanjejeka vyuma vize kavatela kuhanjikako.” (Chimo. 1, 5:13) Chikupu vene, katweshi nakusaka kupwa ngana mwavakikoko. Oloze natulinga ngachilihi nge mutu mwatulwezako mujimbu wenyi wakusweka nakutulweza ngwenyi kanda natulwezako mutu wekako? Chakutalilaho, ndumbwetu wapwevo nahase kutulwezako musongo ali nawo chipwe kala ukalu ali nakuhitamo, nakutulweza ngwenyi katwatela kulwezako vatu vekako. Twatela kulinga ngana muze natulweze. * (Tangenu Vishimo 11:13.) Tushimutwilenu jino ovyo chapwila chachilemu kupwa vakushishika muvyuma vimwe.

9. Uno vatu mutanga vanahase kusolola ngachilihi nge vapwa vakushishika?

⁹ Mutanga. Mutu himutu mutanga akwechi mulimo wakuhona kwambulula mijimbu yakusweka yamutanga. Chakutalilaho, ndumbwetu wapwevo nahase kupwa nachijililo chakuseseka nakusehesanga lunga lyenyi. Uno lunga lyenyi nahase kusaula pwevo lyenyi hakulweza vatu veka chijililo kana tahi? Keshi kulinga ngochoko kachi nge azanga puwenyi, mwomwo chuma kana nachivwisa puwenyi kupihya kumuchima. (Efwe. 5:33) Vakweze navakiko vasaka  kuvahana kalemesa muvyuma vimwe. Visemi vatela kutachikiza chishina kanechi chachilemu. Kavatela kwivwisa sonyi vana vavo hakulweza vatu veka tutenga twavoko. (Kolo. 3:21) Vana nawa vatela kupwa vakuvanguluka nakuhona kuhanjikanga vyuma vize navivwisa sonyi vakwavo mutanga. (Lushi. 5:16) Kachi nge mutu himutu mutanga mwalama mijimbu yamutanga yakusweka, kaha tanga yavo yinahase kupwa yakulinunga.

10. Uno sepa wamwenemwene apwa ngachilihi? (Vishimo 17:17)

¹⁰ Masepa. Shimbu jimwe, etu vavavulu twasakiwa kupwa nasepa uze tunahase kulweza vyuma vimwe vyakusweka. Oloze lwola lumwe chinahase kupwa chachikalu. Pamo katwasaka kulweza mutu vyuma vili mumuchima wetuko, mwomwo tunahase kwivwa kupihya hakutachikiza ngwetu mutu twalwezanga chihande chakusweka nalwezeko vatu veka. Oloze tunahase kwivwa kuwaha nge natupwa nasepa wakushishika uze keshi kulweza vatu mijimbu yakusweka tunamulwezeko. Mutu kana napu “sepa wamwenemwene.”—Tangenu Vishimo 17:17.

11. (a) Uno vakulwane muchikungulwilo namapwevo javo veji kusololanga ngachilihi nge twatela kuvafwelela? (b) Chuma muka natulinangula kuli mukulwane uze apwanga nakutala hachihande chakusweka muchikungulwilo, kaha kufumaho mwapwa hamwe natanga yenyi? (Talenu muvwimbimbi.)

¹¹ Muchikungulwilo. Vakulwane vaze vapwa vakushishika vapwa “nge chihela chakuswama peho yanyamanganda, nge uswamo” wakuswamamo vandumbwavo. (Isa. 32:2) Twatachikiza ngwetu tunahase kuhanjika vyuma vimwe kuli ava malunga namuchima wakusuuluka, mwomwo twafwelela ngwetu navalama mijimbu yakusweka tunavalweze. Katwatela kuvashinyinyika mangana vatulweze mijimbu yakuswekako. Kaha nawa tweji kusakwililanga mapwevo javakulwane muchikungulwilo mwomwo kavashinyinyika malunga javo vavalweze mijimbu yakuswekako. Chikupu vene, chinapu hikutokwa kutachikiza ngwetu pwevo lyamukulwane kavamulweza mijimbu yakusweka yavandumbwetuko. Chakutalilaho, pwevo lyamukulwane umwe ambile ngwenyi: “Lunga lyami kangulweza mijimbu yimwe kutalisa  kuvatu vaze vali nakusakiwa kuvakafwa kushipilitu chipwe kungulweza majina avoko. Ngwasakwilila hachuma kana, mwomwo cheji kungukafwanga nguhone kulizakamina havyuma vize kangweshi nangolo jakulingaho vyuma vimweko. Ngocho ngwapwa wakukasunuka kuhanjika nakala mutu muchikungulwilo. Kaha nawa ngwafwelela ngwami nge nangulweza lunga lyami omu nguli nakwivwa chipwe ukalu nguli nawo, ngunatachikiza ngwami keshi kulweza vatu veka chihande kanako.” Chipwe ngocho, tuvosena twatela kupwa napuho yamwaza yakupwa vakushishika. Uno mihako muka twatela kusolola mangana yitukafwe tupwenga napuho kaneyi? Tushimutwilenu hamihako yitanu.

12. Mwomwo ika namwambila ngwenu zangi yikiko yatulingisa tufwelele vakwetu? Hanenu chakutalilaho.

¹² Zangi yikiko yatulingisa tufwelele vakwetu. Yesu ambile ngwenyi, jishimbi jivali jajilemu japwa kuzanga Yehova nakuzanga vakwetu. (Mateu 22:37-39) Zangi yakuzanga Yehova yatulingisa tumulondezeze hakushishika chenyi chakukupuka. Chakutalilaho kuzanga vandumbwetu cheji kutulingisanga tulame mijimbu yavo yakusweka. Katwasaka kwambulula mijimbu yavo yakusweka mangana tuvevwise kupihya, chipwe kuvasaula, chipwe kuvevwisa kukola kumuchimako.—Yowa. 15:12.

13. Uno kulinyisa cheji kutukafwanga ngachilihi tupwenga vakushishika?

¹³ Kulinyisa nachitukafwa tupwenga vakushishika. Ndumbwetu uze apwa wakulinyisa kafwila kulivangilila kwambulula mujimbu mangana akunyule vakwavoko. (Fwili. 2:3) Kasaka kulingisa vakwavo vamumone kupwa wamulemu nakushinganyeka ngwavo ikiye atachikiza mijimbu yakuswekako. Kulinyisa nawa nachitukafwa tulihende kukutandakanyisa mijimbu yize kavahanjika muMbimbiliya chipwe mumikanda yahanjika haMbimbiliyako.

14. Uno kunangakana cheji kutukafwanga ngachilihi tupwenga vakushishika?

¹⁴ Kunangakana nachikafwa vaka-Kulishitu vatachikize “lwola lwakuhola kulu nalwola lwakuhanjika.” (Kwambu. 3:7) Muvisemwa vyavivulu veji kuhanjikanga ngwavo: “Kuhanjika chapwa chamwaza nge palata, oloze kuhola kulu chapwa chachilemu chikuma nge ulu.” Echi chalumbununa nge lwola lumwe chapwa chamwaza kuhola kulu kuhambakana kuhanjika. Shikaho, chisoneka chaVishimo 11:12 chatuhuhumuna ngwacho: “Uze ali nauhashi wakukekesa vyuma [kulumbununa kunangakana] eji kuholanga kulu.” Talenu hachakutalilaho. Mukulwane umwe wakuhya veji kumulombanga kakavulu akafweko vikungulwilo vyeka haukalu veji kumonanga. Mukulwane weka ahanjikile hali ou mukulwane wakuhya ngwenyi: “Apwa lika wakuvanguluka mangana ahone kwambulula mijimbu yakusweka yamuvikungulwilo vyeka.” Kunangakana chayou mukulwane wakuhya chinalingisa vakwavo vakulwane vamuchikungulwilo chenyi vamuhane kavumbi. Vafwelela ngwavo ou ndumbwetu keshi kukambulula mijimbu yavo yakusweka kuvatu vekako.

15. Hanenu chakutalilaho chize chasolola omwo kupwa vakashishi nachilingisa vakwetu vatufwelele.

¹⁵ Kashishi hichuma chikwavo twasakiwa numba vakwetu vatufwelele. Tweji kufwelelanga mutu uze apwa wakashishi mwomwo eji kuhanjikanga lika muchano. (Efwe. 4:25; Hepe. 13:18) Chakutalilaho, pamo muli nakufwila kupwa muka-kunangula wakwipangweji. Hakusaka kulinga ngocho, mwatela kulweza mutu umwe evwilile kuchihande chenu hakukunguluka, nakumilweza vyuma vimwe vize namusakiwa kuzachilaho. Uno iya namufwelela ngwenu mwamilweza muchano? Kutala namufwelela mutu uze mwamileleveka nyi uze mwamilweza  muchano? Chikupu vene, namufwelela uze mwamilweza muchano. Mbimbiliya ngwayo: “Kuhanjikila mutu hatoma chinawahe kuhambakana kupwa nazangi yamumuchima kaha. Jimbandu navakutwa kuli sepa lyove jinawahe.” (Vishi. 27:5, 6) Numba tuhu hakavanga chapwa chachikalu kwitavila vyuma mwatulweza sepa lyetu wakashishi, oloze vyuma kana navikatunganyalisa mukuhita chalwola.

16. Uno chisoneka chaVishimo 10:19 chasolola ngachilihi nge twatela kupwa namuchima wakulikanyisa?

¹⁶ Chapwa nawa chachilemu kupwa namuchima wakulikanyisa nge tuli nakusaka vakwetu vatufwelele. Muchima kana nautukafwa tuhole kulu kachi nge tuli mucheseko chakusaka kuhanjika vyuma vyakusweka. (Tangenu Vishimo 10:19.) Lwola lumwe muchima wetu wakulikanyisa vanahase kuweseka nge tuli nakuzachisa Internet. Kachi nge katwazangamineko, tunahase kwambulula mijimbu yimwe yakusweka kuvatu vavavulu. Kaha nge tunatandakanyisa lyehi mujimbu kuzachisa makina, katweshi kuhasa kwijiva omwo vatu navazachisa mujimbu kana chipwe ukalu naufumamoko. Kupwa namuchima wakulikanyisa nawa chinahase kutukafwa tuhole kulu kachi nge vaka-kole navatushinyinyika tuvalweze mijimbu yimwe yize yinahase kuhaka vandumbwetu muukalu. Echi chinahase kusoloka kachi nge navatwihwojola kutupokola mungalila muze vemika mulimo wetu chipwe kuukanyisa. Halwola lwakufwana ngana nahalwola lweka, tunahase kuzachisa lundongi lwakwamba ngwavo, “nangukasa kukanwa kami.” (Samu 39:1) Twatela kupwa vakushishika kuli vatu vosena, numba vapwa vamutanga, chipwe masepa, chipwe vandumbwetu, chipwe kala mutu. Hakusaka kupwa vakushishika, twatela kupwa namuchima wakulikanyisa.

17. Vyuma muka mwatela kulinga mangana vandumbwetu muchikungulwilo valifwelele navakwavo?

¹⁷ Tweji kusakwililanga Yehova hakutupandamisa kuli vandumbwetu vaze vatwama nazangi kaha nawa vakushishika. Tuvosena tukwechi mulimo wakulinga vyuma vize navilingisa vandumbwetu vatufwelele. Omu natutwalaho lika kulisolwelanga zangi, nakupwa vakulinyisa, nakunangakana, nakashishi namuchima wakulikanyisa, natulingisa vatu muchikungulwilo valifwelelenga navakwavo. Twatela kutwalaho lika kuzata nangolo mangana vakwetu vatufwelele. Shikaho, tutwalenuho lika kulondezeza Yehova Kalunga ketu nakusolola ngwetu twapwa tuvakushishika.