1. Kweseka nachisoneka chaMalaki 3:16, mukanda muka uze Yehova nasonekanga, kaha vasonekamo veya?

 HAMYAKA yayivulu, Yehova nasonekanga mukanda umwe wakulipwila. Mumukanda kana mwatwama majina avatu, kaha mutu watete vasoneka mumukanda kana shina Avele. * (Luka 11:50, 51) Kufuma vene haze, Yehova nasonekanga majina mumukanda kana, kaha makumbi ano muli majina amavulu chikuma. MuMbimbiliya, mukanda kana vauvuluka ngwavo “mukanda wakwanukilaho,” “mukanda wakuyoya,” kaha nawa ngwavo “mukanda wakuvunga wakuyoya.” Muchihande chino, natuvuluka ou mukanda ngwetu “mukanda wakuyoya.”—Tangenu Malaki 3:16; Kuso. 3:5; 17:8.

2. Uno majina muka atwama mumukanda wakuyoya, kaha vyuma muka twatela kulinga numba majina etu vawasoneke mumukanda kana?

² Ou mukanda wakulipwila watwama namajina avaze veji kwivwanga woma Yehova nakumuzachila, vaze nawa vazanga lijina lyenyi. Kaha vanahase kukayoya haya myaka. Makumbi ano, majina etu vanahase kuwasoneka mumukanda kana nge natutunga usepa wakukola naYehova kuhichila mundando yakusokola yaYesu Kulishitu. (Yowa. 3:16, 36) Tuvosena tuli nakusaka majina etu apwenga mumukanda kana ou, numba nge twatalilila kukayoyela mwilu chipwe hano hamavu.

3-4. (a) Uno natukayoya haya myaka kachi nge majina etu ali mumukanda wakuyoya oholyapwa tahi? Lumbununenu. (b) Vyuma muka natushimutwila muchihande chino nachechi nachikavangizaho?

³ Uno echi chalumbununa nge vosena vaze vakwechi majina  avo vasoneka mukanda kana navakayoya haya myaka tahi? Kukumbulula tunahase kuchiwana hamazu aze vasoneka hali Kulovoka 32:33. Yehova ahanjikile kuli Mose ngwenyi: “Weshowo nalingi shili kuli ami nangumujima mumukanda wami.” Shikaho, majina ali mumukanda kana vanahase kuwajima, chipwe kuwajimbangana, kwijiva nge Yehova nasoneka majina kana nasonekeso yalikala. (Kuso. 3:5) Ngocho, twatela kuzata nangolo mangana majina etu apwenganga lika mumukanda kana, kwijiva nge vanawasoneka nasonekeso yaulombo.

⁴ Echi chinahase kutulingisa tulihulise vihula vimwe. Chakutalilaho, tunahase kulihulisa ngwetu, uno Mbimbiliya yahanjika vyuma muka kutalisa kuvatu vaze majina avo vasoneka mumukanda wakuyoya navaze kavasoneka mumukanda kanako? Lwola muka vatu vaze vakwechi majina avo vasoneka mumukanda kana navakatambula kuyoya chahaya myaka? Nyi ngachilihi vatu vaze vafwile chakuzeneka kutachikiza Yehova? Uno majina avo anahase kupwa mumukanda kana tahi? Evi vihula navavikumbulula muli chino chihande nachechi nachikavangizaho.

UNO MAJINA AVEYA VASONEKA MUMUKANDA WAKUYOYA?

5-6. (a) Kweseka nachisoneka chaWavaka-Fwilipi 4:3, majina aveya aze vasoneka mumukanda wakuyoya? (b) Kaha majina kana nawakapwangamo lika chakuzeneka kuwajima halwola muka?

⁵ Uno majina aveya vasoneka muli ou mukanda wachifwanyisa? Hakukumbulula chihula kana, natushimutwilenu hamazavu avatu atanu. Hamazavu kana, amwe akwechi majina avo mumukanda wakuyoya, oloze akwavo chiku.

⁶ Lizavu lyatete lyapwa lyavatu vaze vatongola mangana vakayule hamwe naKulishitu mwilu. Uno majina avo atwama mumukanda wakuyoya tahi? Eyo. Kweseka namazu ahanjikile kaposetolo Paulu kuli ‘vakwavo  muvazachililile’ muFwilipi, majina avaze vawavisa vaze vatongola kukayula hamwe naYesu mwilu, atwama mumukanda wakuyoya. (Tangenu Wavaka-Fwilipi 4:3.) Oloze hakusaka majina avo apwenganga lika mumukanda kana, vatela kutwalaho lika kupwa vakushishika. Majina avo nawakapwangamo lika chakuzeneka kuwajima omu navakavalamika tutachikijilo twamakumishilo shimbu kanda vafwenga chipwe shimbu kanda luyando lwalunene luputuke.—Kuso. 7:3.

7. Uno chisoneka chaKusoloka 7:16, 17 chatukafwa ngachilihi tutachikize lwola luze majina avaze vamuliyongomena lyalinene nawakapwa lika mumukanda wakuyoya chakuzeneka kuwajima?

⁷ Lizavu lyamuchivali lyapwa lyavatu vamuliyongomena lyalinene lyamikoko veka. Uno majina avo atwama mumukanda wakuyoya tahi? Eyo. Uno majina avo nawakapwa lika mumukanda kana nahalwola navakayovoka jita yaAlamangetone tahi? Eyo. (Kuso. 7:14) Yesu ambile ngwenyi ava mikoko “navakatambula kuyoya chahaya myaka yosena.” (Mateu 25:46) Chipwe ngocho, vaze navakayovoka kujita yaAlamangetone kaveshi kukatambula kuyoya chahaya myaka hahaze veneko. Halwola kana, nachikapwa kwijiva nge majina avo vanawasoneka nasonekeso yalikala. MuChiyulo chaMyaka 1,000, Yesu “mwakavafunganga, kaha mwakavatwaminyinanga kutuselwoke vameya akuyoya.” Vaze navakononoka kuli Kulishitu nakuvawana kupwa vakushishika kuli Yehova hanyima yakuvasopesa, majina avo nawakapwanga lika mumukanda wakuyoya chakuzeneka kuwajima.—Tangenu Kusoloka 7:16, 17.

8. Uno majina muka aze kavasoneka mumukanda wakuyoyako, kaha vyuma muka navikasoloka kuli vakiko?

⁸ Mulizavu lyamuchitatu mwatwama vapembe vaze navakanongesa haAlamangetone. Majina avo kawatwama mumukanda wakuyoyako. Yesu ambile ngwenyi “navakavatetako haya myaka yosena.” (Mateu 25:46) Paulu vamuhwiminyinyine asoneke ngwenyi, “vatu kana ava navakavazangamisa nakunongesa chahaya myaka yosena.” (Teso. 2, 1:9; Petu. 2, 2:9) Omu mukiko nachikapwa nakuli vatu vaze vanalinginga shili kushipilitu yajila. Vanalinginga ngocho hakulinga shili chakuchisakula kumichima yavo. Vatu kana navakavanongesa, kaveshi kukayoya haya myakako. Chikupu vene, kaveshi kukavasangulako. (Mateu 12:32; Mako 3:28, 29; Hepe. 6:4-6) Tushimutwilenu jino hamazu avali avaze navakasanguka nakuyoyela hano hamavu.

VAZE NAVAKASANGUKA

9. Kweseka nachisoneka chaVilinga 24:15, uno mazavu muka avali aze nawakasanguka nakutwama hano hamavu, kaha chihandwa muka chatwama hamazavu kana?

⁹ Mbimbiliya yasolola hatoma mazavu avali avatu vaze navakasanguka nakukatwama hano hamavu haya myaka. Mazavu kana shina “vaka-kwoloka navaka-kuhenga.” (Tangenu Vilinga 24:15.) “Vaka-kwoloka” vapwa vaze vazachililenga Yehova nakashishi shimbu kanda vafwenga. Oloze “vaka-kuhenga” shina vaze kavatachikijile Yehovako. Kaha vatu vavavulu hali ava vaka-kuhenga vapwilenga navilinga vyavipi. Hakuwana nge awa mazavu avali nawakasanguka, uno echi chalumbununa nge majina avo vawasoneka mumukanda wakuyoya tahi? Hakusaka tukumbulule chihula kana, tuvangilenu kushimutwila halizavu hilizavu.

10. Mwomwo ika “vaka-kwoloka” navakavasangwila, kaha vamwe navakazata mulimo muka? (Talenu nawa chihande chakwamba ngwavo “Vihula Vyakufuma Kuli Vaka-Kutanga,” chili mumangazini yino chinakuhanjika hakusanguka nakuyoyela hano hamavu.)

¹⁰ “Vaka-kwoloka” vatwama mulizavu lyamuchiwana. Shimbu kanda vafwenga, majina avo vawasonekele mumukanda wakuyoya. Uno majina avo vawajiminemo omu vafwile tahi? Chiku, mwomwo vachili “vavatonyi” muvishinganyeka vyaYehova. Mbimbiliya ngwayo  Yehova “kapwa Kalunga kavafuko, oloze wavava vavatonyi, mwomwo kuli ikiye vosena vavatonyi.” (Luka 20:38) Echi chalumbununa nge halwola navakasanguka, majina avo nawakapwa mumukanda wakuyoya, oloze nachikapwa kwijiva nge vanawasoneka nasonekeso yalikala. (Luka 14:14) Vatu vamwe havatu kana ava navakasanguka navakavatongola kupwa “vilolo hamavu hosena.”—Samu 45:16.

11. Uno “vaka-kuhenga” navakasakiwa kuvanangula vyuma muka shimbu kanda majina avo vawasoneke mumukanda wakuyoya?

¹¹ Tushimutwilenu jino halizavu lyamuchitanu, “vaka-kuhenga.” Hakuwana nge kavatachikijile jishimbi Yehovako, pamo vapwilenga navilinga vyavipi shimbu kanda vafwenga. Ngocho majina avo kavawasonekele mumukanda wakuyoyako. Oloze Kalunga mwakavasangula mangana vakahase kulingako vyuma vimwe vize navikalingisa majina avo vakawasoneke mumukanda wakuyoya. Ava “vaka-kuhenga” navakasakiwa kuvakafwa. Vamwe vapwilenga navilinga vyavipi chikuma shimbu kanda vafwenga. Shikaho, navakasakiwa kuvanangula mwakuyoyela kweseka namwaya jishimbi jaYehova jakwoloka. Ngocho Wangana waKalunga naukalongesa vyuma mangana kukapwe mulimo waunene wakunangula vatu kana, uze kanda upwengangaho lyehi hamavu.

12. (a) Uno veya navakanangula vaka-kuhenga? (b) Vyuma muka navikasoloka kuli vaze navakakana kukavangiza vyuma navakavanangula?

¹² Uno iya mwakanangula ava vaka-kuhenga? Vatu vamuliyongomena lyalinene navaka-kwoloka vaze navakasanguka. Hakusaka majina avava vaka-kuhenga vakawasoneke mumukanda wakuyoya, vatela kukatunga usoko wakukola naYehova nakulihana kuli ikiye. Yesu Kulishitu navawavisa navakafwila kutachikiza omwo ava vaka-kuhenga navakakula kuvyuma navakalinangula. (Kuso. 20:4) Vosena vaze navakakana kukavangiza vyuma navakavanangula navakavanongesa, numba tuhu halwola kana vali namyaka 100. (Isa. 65:20) Yehova naYesu veji kutachikizanga vili mumuchima wamutu, shikaho kaveshi kukecha mutu  akanehe liwayanga mukaye kakahyako.—Isa. 11:9; 60:18; 65:25; Yowa. 2:25.

KUSANGUKILA KUKUYOYA NAKUKUSOPESA

13-14. (a) Uno kunyima twalinangwile nge mazu ahanjikile Yesu hali Yowano 5:29 alumbununa ika? (b) Oloze vyuma muka twatela kutachikiza hamazu kana?

¹³ Yesu ahanjikile nawa nahali vaze navakasanguka nakuyoyela hano hamavu. Chakutalilaho, ambile ngwenyi: “Ola yili nakwiza omu vosena vaze vali muvimbumbe navakevwa lizu lyenyi nakulovokamo, vaze valingile vyuma vyamwaza navakasangukila kukuyoya, kaha vaze valingile vyuma vyaunyengwe navakasangukila kukuvasopesa.” (Yowa. 5:28, 29) Uno Yesu atalikishile mulihi?

¹⁴ Kunyima twalinangwile nge awa mazu aYesu atalisa kuvyuma vize navakalinga hanyima yakuvasangula, kulumbununa nge vamwe navakavasangula nakulinga vyuma vyamwaza kaha veka navakavasangula nakulinga vyuma vyaunyengwe. Yesu kahanjikile ngwenyi vaze navakafuma muvimbumbe navakalinga vyuma vyamwaza chipwe ngwenyi navakalinga vyuma vyaunyengweko. Oloze ahanjikile ngwenyi “valingile vyuma vyamwaza,” kaha nawa ngwenyi “valingile vyuma vyaunyengwe.” Echi chasolola nge vatu kana valingilenga vyuma kanevi shimbu kanda vafwenga. Chuma kana chinalumbunuka jino, nyi mweka? Mukiko vene, mwomwo mutu wavilinga vyaunyengwe kaveshi kukamwitavisa kukatwama mukaye kakahyako. Shikaho ava vaka-kuhenga, valingilenga vyuma vyaunyengwe shimbu kanda vafwenga. Uno mazu ahanjikile Yesu akuvuluka ‘kusangukila kukuyoya’ ‘nakusangukila kukusopesa’ alumbununa ika?

15. Uno veya “navakasangukila kukuyoya,” kaha mwomwo ika?

¹⁵ Vaka-kwoloka vaze valingilenga vyuma vyamwaza shimbu kanda vafwenga “navakasangukila kukuyoya,” mwomwo majina avo atwama lyehi mumukanda wakuyoya. Echi chalumbununa nge kusanguka “[cha]vaze valingile vyuma vyamwaza” vavuluka hali Yowano 5:29, chikiko kusanguka “chavaka-kwoloka” vavuluka hali Vilinga 24:15. Ulumbunwiso kana unalitombola namazu atwama hali Wavaka-Loma 6:7 akwamba ngwavo: “Ou nafu lyehi, nasambe lyehi kushili yenyi.” Omu vaka-kwoloka vafwile, Yehova avakonekelele hajishili javo valingile shimbu kanda vafwenga, oloze mwakanukanga lika kushishika chavo. (Hepe. 6:10) Chipwe ngocho, ava vaka-kwoloka navakasakiwa kupwa lika vakushishika mangana majina avo akapwenga lika mumukanda wakuyoya.

16. Uno ‘kusangukila kukusopesa’ chalumbununa ika?

¹⁶ Nyi ngachilihi vaze valingilenga vyuma vyaunyengwe shimbu kanda vafwenga? Numba tuhu jishili javo vajijimbanganyine hakufwa, oloze kavazachililenga Yehovako. Majina avo kavawasoneka mumukanda wakuyoyako. Shikaho, kusanguka “[cha]vaze valingile vyuma vyaunyengwe” chikiko kusanguka “[cha]vaka-kuhenga” chize vavuluka hali Vilinga 24:15. Vatu kana vakiko “navakasangukila kukuvasopesa.” * Ava vaka-kuhenga navakavasopesa, kulumbununa nge navakavakekesa. (Luka 22:30) Echi nachikambata lwola numba Yesu akamone numba nge vanatemo kuvasoneka mumukanda wakuyoya nyi chiku. Ava vaka-kuhenga kuvanga vakeche vilinga vyavo vyakuhenga vize valingilenga hakavanga nakulihana jino kuli Yehova, numba majina avo vakawasoneke mumukanda wakuyoya.

17-18. Uno vaze navakasanguka nakuyoyela hano hamavu navakasakiwa kulinga ika, kaha lizu “vilinga” vavuluka hali Kusoloka 20:12, 13 lyatalisa kuvilinga muka?

 ¹⁷ Vosena vaze navakasanguka, numba vapwa vaka-kwoloka chipwe vaka-kuhenga, navakasakiwa kukavangiza jishimbi jize najikapwa mumikanda yakuvunga yayihya yize navakavungulula mumyaka 1,000. Kaposetolo Yowano alumbunwine vyuma amwene muchakumwenesa ngwenyi: “Ngwamwene vafu, vamokomoko navava vavalemu, vanemana kulutwe lwalitanda, kaha kwapwile mikanda yize yapwile yakuvungulula. Oloze kwapwile nawa mukanda weka uze wapwile wakuvungulula, ukiko mukanda wakuyoya. Vafu vavasopesele havyuma vize vasonekele mumikanda kweseka navilinga vyavo.”—Kuso. 20:12, 13.

¹⁸ Uno vaze navakasanguka navakavasopesela “[ha]vilinga” muka? Uno navakavasopesela havilinga vyavo vize vapwilenga navyo shimbu kanda vafwenga tahi? Chiku. Anukenu ngwenu, vavakonekelele jishili kana halwola vafwile. Shikaho “vilinga vyavo” vavuluka hali echi chisoneka kavyeshi nakutalisa kuvilinga vize valingilenga shimbu kanda vafwengako. Oloze vilinga kana vyatalisa kuvilinga vize navikasolola omwo navakakula kuvyuma navakavanangula mukaye kakahya. Namalunga vakufwana nge Nowa, naSamwele, naNdavichi naNdanyele vatela kukatachikiza Yesu Kulishitu nakufwelela mundando yenyi yakusokola. Kachi nge ava malunga navakalinangula vyavivulu, kahanyi vaka-kuhenga vakiko vatela kukalinangula vyavivulu chikuma.

19. Vyuma muka navikasoloka kuli vaze navakakana kukavangiza vyuma navakavanangula?

¹⁹ Vyuma muka navikasoloka kuli vaze navakakana kukavangiza vyuma navakavanangula? Chisoneka chaKusoloka 20:15 chatulweza ngwacho: “Weshowo mutu vazenekele kusoneka mumukanda wakuyoya, vamumbilile muze muchijiva chakakahya.” Chikupu vene, vatu kana navakavanongesa. Shikaho, chapwa chachilemu kuzata nangolo mangana majina etu vawasoneke mumukanda wakuyoya nakukapwangamo lika.

20. Mulimo muka naukapwako mu Chiyulo chaMyaka 1,000? (Talenu muvwimbimbi wahalipapilo lyahelu.)

²⁰ Lwola lwaChiyulo chaMyaka 1,000 nalukapwa lwamwaza chikuma. Halwola kana, vatu jaKalunga navakazata mulimo waunene wakunangula vatu, uze kanda vazatengaho lyehi hamavu. Nalukapwa nawa lwola lwakukekesa vilinga vyavaka-kwoloka navaka-kuhenga. (Isa. 26:9; Vili. 17:31) Uno ou mulimo wakunangula vatu navakauzata ngachilihi? Chihande chinakavangizaho nachitukafwa twivwishise omu walema mulimo kana.