Talenu omwo Mbimbiliya yakumbulula vihula kana.

Mukanda waVilinga 24:15 watulweza ngwawo nakukapwa “kusanguka chavaka-kwoloka navaka-kuhenga.” Vaka-kwoloka vapwa vatu vaze vononokelenga Kalunga shimbu kanda vafwenga, kaha majina avo vawasoneka mumukanda wakuyoya. (Mala. 3:16) Vaka-kuhenga vapwa vatu vaze vafwile chakuzeneka kutachikiza Yehova, ngocho majina avo kavawasoneka mumukanda wakuyoyako.

Mukanda waYowano 5:28, 29 wahanjika nawa hali awa mazavu avali vahanjika hali Vilinga 24:15. Yesu ambile ngwenyi: “Vaze valingile vyuma vyamwaza navakasangukila kukuyoya, kaha vaze valingile vyuma vyaunyengwe navakasangukila kukuvasopesa.” Vaka-kwoloka valingile vyuma vyamwaza shimbu kanda vafwenga. Navakasangukila kukuyoya mwomwo majina avo hanga achili mumukanda wakuyoya. Oloze vaka-kuhenga valingilenga vyuma vyaunyengwe shimbu kanda vafwenga. Kaha navakasangukila kukuvasopesa. Majina avo kanda vawasoneke mumukanda wakuyoya, kaha kwatela kukapwa lwola lwakuvasopesa, chipwe ngwetu kuvakekesa. Halwola kanelu, navakalinangula hali Yehova numba jino majina avo vakawasoneke mumukanda wakuyoya.

Mukanda waKusoloka 20:12, 13 walumbununa ngwawo vosena vaze navakasanguka vatela kukakavangiza ‘vyuma navakasoneka mumikanda yakuvunga.’ Vyuma kana navikapwa jishimbi jajihya jize Kalunga mwakatuhana mukaye kakahya. Kaha vatu vaze navakakana kukavangiza jishimbi kana navakavanongesa.—Isa. 65:20.

Mukanda waNdanyele 12:2 wahanjikilile chimweza ngwawo, vaze vanasavala tulo twakufwa navakahindukila “[ku]kuyoya chahaya myaka yosena, veka navakavasaula nakuvalumbilisa haya myaka yosena.” Echi chisoneka chahanjika hakusopesa chamakumishilo chavaze navakasanguka. Ava vatu navakatambula “kuyoya chahaya myaka yosena” chipwe “kuvalumbilisa haya myaka yosena.” Shikaho, kusongo yamyaka 1,000, vamwe navakatambula kuyoya chahaya myaka, kaha veka navakavanongesa haya myaka.—Kuso. 20:15; 21:3, 4.

Achishinganyekenu hachakutalilaho chino. Mazavu avali avatu vaze navakasanguka tunahase kuwafwanyisa kuli vamwiza vaze vaneza nakutunga mulifuchi. Vaka-kwoloka vanapu nge vamwiza vaze navatambula vitupa vyamilimo chipwe vyakuvetavisa vatwame mulifuchi mangana fulumende yivatachikize nakupwa nalisesa lyakulinga kala vyuma. Kaha nawa vaka-kuhenga vanafwane nge vamwiza vaze navatambula chitupa chakashimbu kakandende kaha, chipwe chakwiza kaha nakumeneka. Vamwiza kana vatela kusolola hatoma vilinga vyavo numba vavetavise kutwalaho lika kutwama mulifuchi kana. Chochimwe nawa, navaka-kuhenga vaze navakasanguka vatela kukakavangiza jishimbi jaYehova nakusolola hatoma nge vanapu jino vaka-kwoloka numba vakavetavile kutwama muPalachise. Shikaho, chamokomoko nachitupa mwatambula mwiza hakwingila mulifuchi, oloze tachikizenu ngwenu vamwe vanahase kuvetavila kutwama mulifuchi, kaha veka vanahase kuvahangamo. Vyuma navakasa vaka-fulumende navipendamina havilinga mwasolola uze mwiza mulifuchi muze nengila. Chochimwe nawa, kusopesa chamakumishilo chize navakasopesa vaze navakasanguka nachikapendamina hakushishika chavo nahavilinga vyavo navakasolola mukaye kakahya.

Yehova apwa Kalunga muka-kutetela kaha nawa wachiyulo chakwoloka. (Lushi. 32:4; Samu 33:5) Mwakasolola zangi yenyi hakusangula vaka-kwoloka navaka-kuhenga. Oloze mwakasaka nawa vosena vakamwononoke hakukavangiza jishimbi jenyi jakatwamino katoma. Vosena vaze navakamuzanga vakiko kaha navaketavisa kutwalaho lika kutwama mulifuchi lyalihya.