Kweseka nachisoneka chaWavaka-Kolinde 1, 15:8, Paulu ambile ngwenyi: “Kukuminyinako asolokele kuli ami nawa, ami ngunafwane nge mutu wakusemuka uvisu.” Hakavanga twalumbunwinenga ngwetu, Paulu hakuhanjika mazu kana apwile nakutalisa kuvyuma ahichilemo omu amwene chakumwenesa chize chasolwele Yesu muupahu wamwilu. Echi chapwile kwijiva nge nalivange kusemuka, chipwe kusanguka nakuyoyela kushipilitu shimbu kanda lwola luvene lwakusanguka kana. Oloze hanyima yakuhunanana chikuma hali eyi vesi, tunawane nge chinapu chakutamo kwalumunako ulumbunwiso wavesi kana.

Chamuchano vene, Paulu hano apwile nakutalisa kuvyuma vyasolokele halwola alumukile. Uno atalikishile mulihi hakwamba ngwenyi afwanyine “nge mutu wakusemuka uvisu”? Mazu ahanjikile Paulu anahase kutalisa mwamuvulu.

Kwalumuka kana chejile mukukasumuna kaha nawa chapwile chakukomwesa. Kakavulu kusemuka uvisu cheji kwizanga mukukasumuna. Omu Saulu (uze vaputukile jino kuvuluka ngwavo Paulu) apwile nakuya kuNdamashiku mangana akayanjise vaka-Kulishitu, kashinganyekele ngwenyi mwamona chakumwenesa chaYesu uze asangukile nakuya mwiluko. Kwalumuka chenyi chamukomwesele nakukomwesa nawa vaka-Kulishitu vaze asakile kuya nakuyanjisa. Kaha nawa vyuma ahichilemo vyamwivwishile woma nakumulingisa ahone kumona vyuma hamakumbi amandende.—Vili. 9:1-9, 17-19.

Vamwalumwine “halwola lwakuhenga.” Mazu akulivanga amuchiHelase valumuna ngwavo “mutu wakusemuka uvisu” vanahase kuwalumuna nawa ngwavo “mutu wakusemuka halwola lwakuhenga.” Kaha nawa Mbimbiliya yaThe Jerusalem Bible yalumuna mazu kana ngwayo: “Chapwile kwijiva nge ngwasemukile halwola luze vatu kavashinganyekeleko.” Halwola Paulu alumukile, Yesu hanayi lyehi mwilu. Paulu alihandunwineko kuvatu vaze avulukile mujivesi jakulivanga, mwomwo shimbu kanda Yesu ayenga mwilu, kasolokele kuli ikiyeko. (Koli. 1, 15:4-8) Shikaho, kusoloka chaYesu kuli Paulu chize vatu kavashinganyekeleko, chakafwile Paulu amumone, numba tuhu chapwile “halwola lwakuhenga.”

Hanjikiso yenyi yasolwele muchima wakulikehesa. Vatu vamwe vaze valinangula chikuma vahanjika ngwavo, mazu azachishile Paulu anahase kusolola nge apwile nakulisaula. Kachi nge omu mukiko chapwile, kaha apwile nakulumbununa nge katelemo kupwa kaposetoloko. Ngocho atwalilileho nakwamba ngwenyi: “Ami yami wamundende hali vaposetolo vosena, kaha kangwatelemo kunguvuluka ngwavo kaposetoloko, mwomwo ngwayanjishilenga chikungulwilo chaKalunga. Oloze halikoji lyalinene lyaKalunga hakiko ngunapwila nge omu nguli.”—Koli. 1, 15:9, 10.

Shikaho Paulu hakuhanjika mazu kana, asolwele nge apwile nakutalisa kulwola luze Yesu asolokele kuli ikiye mujila yakukasumuna, chipwe kukwalumuka chenyi chize chejile mukukasumuna, chipwe pamo apwile nakulumbununa ngwenyi katelemo kumona chakumwenesa kanako. Kala mweshomwo chapwile, oloze tachikizenu ngwenu Paulu amwene vyuma kanevi ahichilemo kupwa vyavilemu. Atachikijile jino ngwenyi, chikupu vene Yesu vanamusangula kufuma kuvafu. Echi chikiko chamulingishile ahanjikenga kakavulu hachakumwenesa amwene mukukasumuna hakunangula vakwavo vyakusanguka chaYesu.—Vili. 22:6-11; 26:13-18.