Elias Hutter najiMbimbiliya Jenyi jaKulipwila jachiHepeleu
KUTALA munahase kutanga Mbimbiliya yamuchiHepeleu tahi? Kamweshi kuhasako. Pamo kanda muchimonengaho lyehi Mbimbiliya yamuchiHepeleu. Chipwe ngocho, munahase kusakwilila chikuma hachinyingi chatwama muMbimbiliya muli nayo yaVisoneka Vyajila hakulinangula vyuma alingile mutu alinangula chikuma Elias Hutter wamulikulukaji lyamyaka lyakusokesa 16 najiMbimbiliya jivali jamuchiHepeleu jize asonekele.
Elias Hutter asemukile mumwaka wa 1553 mumbaka yayindende yize yatwama kwakamwihi namuseto waGermany nalifuchi lyaPoland naCzech Republic. Omu Hutter apwile hayunivesiti yaLutheran mulifuchi lyaJena aputukile kulinangula malimi amavulu akumututuko. Omu apwile namyaka yakusemuka 24 vamutongwele kupwa mutu alinangula chikuma chiHepeleu muLeipzig. Hakuwana nge Hutter alinangwile chikuma, ngocho atungile shikola mulifuchi lyaNuremberg muze asakile vatu valinangule lilimi lyachiHepeleu, nachiHelase, nachilatinyi, naGerman hamyaka yiwana kaha. Chuma kanechi chapwile chachikalu chikuma hakala shikola chipwe vene hayunivesiti.
“KUWAHA CHAMBIMBILIYA YENYI”
Mazu ahalipapilo lyahelu muMbimbiliya yaHutter yachiHepeleu yize asonekele mu 1587
Kuheta mumwaka wa 1587, Hutter alowele Mbimbiliya yachiHepeleu yize vali nakuvuluka makumbi ano ngwavo Old Testament. Mbimbiliya kana vayivulukilenga ngwavo Derekh ha-Kodesh, mazu kana afuma hamukanda waIsaya 35:8 aze alumbununa “Jila yaKujila.” Jila vayisonekelelemo yasolwele kuwaha chaMbimbiliya kana. Chuma chachilemu chalingishile eyi Mbimbiliya kupwa yakulipwila shina jila yamwaza yakafwilililemo vaze vapwile nakulinangula lilimi lyachiHepeleu.
Hakusaka mangana twivwishise ovyo Mbimbiliya yaHutter yachiHepeleu yapwilile yanganyo chikuma, tuhunananenu haukalu uvali uze vamwenenga vaka-kulinangula hakutanga Mbimbiliya yachiHepeleu. Chatete vasona kana vapwile vakulihandununa kaha kavavatachikijileko, chamuchivali mujila vasonekelelemo mazu kana apwile amakalu kutachikiza. Chakutalilaho, talenu lizu lyachiHepeleu נפשׁ lize (valumuna ngwavo ne’phesh) kulumbununa “mwono.” Hali Ezekele 18:4 lizu kana lyaputuka nasona ה (ha), mangana litunge lizu הנפשׁ, kulumbununa (han·ne’phesh) chipwe “mwono.” Kumutu uze kalinangula lilimi kanako lizu הנפשׁ lize lyalumbununa (han·ne’phesh) linahase kusoloka kupwa lyakulihandununa nalizu נפשׁ chipwe (ne’phesh).
Hakusaka mangana akafwe vaze apwile nakunangula azachishile jila yakulipwila yakusonekelamo vasona vamuchiHepeleu. Apulitile sona wakulivanga kulizu hilizu muvasona vavanene, oloze mazu osena awasonekele mwomumwe. Jila kaneyi asonekelelemo yakafwile * Kaha mazu avene vawasoneka muulombo wakutamuka, akwavo kawatamukako. Chakutalilaho, muvwimbimbi wamanyusikilipiti uli muulombo wakutamuka unasolola jila vasonekelelemo mazu ahali Ezekele 18:4 muMbimbiliya yaHutter yachiHepeleu, jila kana yikiko vazachisa mukwinyikila chamwishi muReference Bible havesi yoyimwe.
vaka-kulinangula vatachikize mazu achiHepeleu omu valinangwilenga lilimi kana. Mbimbiliya yaNew World Translation of the Holy Scriptures—With References yazachisa jila kaneyi mukwinyikila chamwishi.MBIMBILIYA YACHIHEPELEU “YATESETAMENDE YAYIHYA”
Hutter asonekele nawa Mbimbiliya yize vali nakuvuluka makumbi ano ngwavo New Testament mumalimi 12. Eyi Mbimbiliya vayisonekele mulifuchi lyaNuremberg mu 1599, kaha kakavulu veji kuyivulukanga ngwavo Nuremberg Polyglot. Hutter asakile kwalumuna naMbimbiliya yaVisoneka VyachiHelase vyaVaka-Kulishitu mulilimi lyachiHepeleu. Oloze ashinganyekele ngwenyi numba vene nge mwayalumuna mwalishina kaha. * Ngocho asakile kwalumuna Mbimbiliya yaNew Testament kufuma muchiHelase nakutwala muchiHepeleu ivene. Hutter alongesele kanawa vyuma, ngocho akumishile kuyalumuna mumwaka wamuundu.
Mbimbiliya yaHutter yaVisoneka VyachiHelase vyaVaka-Kulishitu yachiHepeleu yapwile yamwaza chikuma, mujila muka? Muka-kulinangula lilimi lyachiHepeleu Franz Delitzsch wamulikulukaji lyamyaka lyakusokesa 19, asonekele ngwenyi: “Mbimbiliya yaHutter yachiHepeleu yasolola nge azachishile lilimi vevwishishile vatu lize kavazachishilenga vaka-Kulishitu kakavuluko. Lilimi azachishile lyapwa lyalilemu noholyapwa, chakutalilaho hamyaka yayivulu vatu vanazachisanga Mbimbiliya yenyi mwomwo yamazu akulumbununa kanawa aze azachishile.”
MBIMBILIYA YENYI YINAKUKAFWA CHIKUMA
Hutter kapwile naluheto mwomwo yamulimo wenyi azachile kaha nawa chasoloka nge jiMbimbiliya jenyi kavajilanjishile kanawako, Chipwe ngocho mulimo wenyi unakafwe chikuma vatu. Chakutalilaho, Mbimbiliya yenyi yaNew Testament yachiHepeleu vayisononwene cheka nakuyipulita mu 1661 kuli William Robertson, kaha kuheta 1798 vayisononwene cheka kuli Richard Caddick. Hakwalumuna Mbimbiliya muchiHelase chakushikulu, Hutter azachishile mazu akufwana nge Kyʹri·os (Mwata), kaha The·osʹ (Kalunga) kulumbununa “Yehova” (יהוה, JHVH), mazu kana awanungulwile kufuma muVisoneka vyachiHepeleu chipwe haze amwene ngwenyi mazu kana ali nakutalisa kuli Yehova. Numba tuhu jiMbimbiliya jajivulu kajavuluka lijina lyaKalungako, oloze Mbimbiliya yaHutter yasolola lijina kana muvihela muze lyatelele kupwa muVisoneka VyachiHelase vyaVaka-Kulishitu.
Omu namukamona lijina lyaKalunga, Yehova muVisoneka VyachiHelase vyaVaka-Kulishitu namukwinyikila chamwishi muReference Bible, mwatela kukanuka mulimo azachile Elias Hutter najiMbimbiliya jenyi jamulilimi lyachiHepeleu.
^ par. 7 Talenu kwinyikila chamwishi chamuchivali hali Ezekele 18:4 naVihande Vyakuhakilako 3B muReference Bible.
^ par. 9 Unjiho wasolola nge kunyima vaka-kulinangula vanalovolanga jiMbimbiliya jachiHepeleu jaNew Testament. Muka-kulinangula umwe shina Simon Atoumanos uze alowele Mbimbiliya mumwaka wa 1360. Mukwavo nawa ikiye Oswald Schreckenfuchs muka-kulinangula chikuma wakuGermany alowele Mbimbiliya mumwaka 1565. JiMbimbiliya joseneji kavajipulitileko, kaha nawa jajimbala.