Uno tunahase kufwelela chikupu ngwetu vyuma vyosena ashika Kalunga navikatesamo tahi? Yesu afwelelele muvyuma kana, kaha vyuma anangwilenga vyakafwile vaka-kumwivwilila vapwenga nalufwelelo. Tuchitalenu hachakutalilaho chize Yesu ahanjikile muChihande chenyi ChahaPili, chize chatwama hali Mateu 5:18: “Chamuchano vene nangwamba kuli enu ngwami, melu namavu vinahase kuhita, oloze kakweshi sona umwe wamundende, chipwe kamukila kasona kamwe nakakahita kuJishimbiko, kuvanga vyuma vyosena vinasoloka.”

Sona wamundende havasona vosena vamuchiHepeleu apwa (yod), ikiye sona watete walizu Tetalangalamatoni, lijina lyajila lyaKalunga, Yehova. * Numba tuhu muJishimbi jaKalunga mwapwilenga mazu avene navasona, oloze vaka-kusoneka navaFwaliseu vamwenenga ‘nasona wamundende, chipwe kamukila kasona kamwe’ kupwa vyavilemu chikuma.

Yesu apwile nakulumbununa ngwenyi, melu namavu vinahase kuhita, oloze mazu amuJishimbi aze asoloka kupwa nge amokomoko kaweshi kukahita chakuzeneka kutesamoko. Chipwe ngocho, Mbimbiliya yatufwelelesa ngwayo, melu avene namavu navipwangako lika haya myaka yosena. (Samu 78:69) Shikaho, mazu amuJishimbi aze asoloka kupwa nge amokomoko nawakatesamo chikupu.

Uno Yehova Kalunga mwakatesamo namazu amuJishimbi aze asoloka kupwa nge amokomoko tahi? Eyo. Achishinganyekenu hachuma chino: VaIsalele kushikulu vavalwezele ngwavo kavatelelele kuhokola kala chifuwa chamwana mukoko waPasekako. (Kulovoka 12:46) Mazu kana asolokele kupwa amokomoko. Kutala vatachikijile ovyo kavatelelele kuhokola kala chifuwako tahi? Nduma. Yehova Kalunga atachikijile ngwenyi upolofweto kana wapwile wamuchano mwomwo Meshiya kavatela kukamuhokola kala chifuwa omu navakamusukika hachitondoko.—Samu 34:20; Yowano 19:31-33, 36.

Vyuma muka natulinangula kumazu ahanjikile Yesu? Tuvosena tunahase kufwelela chikupu ngwetu vyuma vyosena ashika Yehova Kalunga navikatesamo, kuhakilako vene namazu aze asoloka kupwa nge amokomoko. Chikupu vene, Sona wamundende wamuchiHepeleu atuhana lutalililo lwamwenemwene.