UNO MWATWAMA NALISESA LYAKULISAKWILA CHIYOYELO CHENU CHAKULUTWE TAHI? Vatu vamwe vafwelela ngwavo Kalunga avatongwela lyehi omu nachikapwa chiyoyelo chavo. Nge vanahono kutesamo vyuma vimwe vajinyine kulinga, kaha veji kwambanga ngwavo “Kalunga avatongwelele chimweza ngwenyi chiyoyelo chavo nachikapwa vene ngana.”

Vatu vamwe nawa veji kwivwanga kupihya nge vanahono kuwana mwakukumishila ukalu wavo vali nakumona mukaye kano kavikokojola. Vanazatenga nangolo mangana chiyoyelo chavo chikapwe kanawa kulutwe, oloze vyuma vyakufwana nge jijita, nauhwanga, naukalu wakulijila, namisongo vyeji kuvafutwisanga kumuchima. Kaha veji kulihulisanga ngwavo, ‘mwomwo ika nanguliyanjishila?’

Chikupu vene, ukalu weji kuwananga vatu mukuyoya unahase kuvafutwisa kumuchima nakuhona kulinga vyuma vasaka. (Muka-kwambulula 9:11) Oloze mwatwama nalisesa lyakulisakwila enu vavene nge muli nakusaka kukayoya haya myaka yosena. Mbimbiliya yahanjika hatoma ngwayo, kuyoya chenu chahaya myaka yosena chapendamina hakusakula kanawa vyakulinga oholyapwa. Talenu omu yahanjika Mbimbiliya.

Mose uze apwile twamina wamuyachi waIsalele, alwezele vaIsalele omu vapwile kwakamwihi nakwingila mulifuchi lyalushiko ngwenyi: “[Yehova nahake] kuyoya nakufwa, najikisu navyangu kumeso enu. Sakulenuho kuyoya mangana enu navana venu muyoyenga, muzangenga Yehova Kalunga kenu, nakwivwilila mulizu lyenyi, nakulipanjika nenyi.”—Lushimbi lwamuchivali 30:15, 19, 20.

“Ngunahake kuyoya nakufwa, najikisu navyangu kumeso enu. Sakulenuho kuyoya.”—Lushimbi lwamuchivali 30:19

Pundu vene, Kalunga asokwele vaIsalele muundungo muEjipitu nakuvahana lutalililo lwakukayoya kanawa muLifuchi lyaLushiko. Oloze kachalumbunwine nge vyuma kana navilijila viveneko. Hakusaka kukamona kutokwa kana, vatelelele ‘kusakula kuyoya.’ Kulumbununa ika? ‘Kulumbununa nge vatelelele kuzanga Kalunga, nakumwononoka hakukavangiza vyuma mwavalweza, nakupandama chikuma kuli ikiye.’

Makumbi ano nawa, vatu vakwechi lisesa lyakulisakwila vavene kuyoya chahaya myaka yosena. Tunahase kusakula kuzanga Kalunga, nakumwononoka hakukavangiza vyuma mwatulweza, nakupandama chikuma kuli ikiye, kulinga ngocho nachisolola nge tunasakula kuyoya haya myaka yosena mupalachise hano hamavu. Uno vyuma muka vyasakiwa hakutesamo vyumevi tunavuluka?

Zangi ikiko yapwa yayilemu chikuma kuli Kalunga. Kaposetolo Yowano vamuhwiminyinyine asoneke ngwenyi: “Kalunga ikiye zangi.” (WaYowano 1, 4:8) Omu vatu vahulishile Yesu avalweze lushimbi lwalulemu, ikiye ambile ngwenyi: “Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.” (Mateu 22:37) Usoko wamwaza naYehova wapendamina hakumuzanga keshi hawoma chipwe hakulyononona chamakuliko. Mwomwo ika twatela kumuzangila?

Zangi atwama nayo Yehova hali vatu, yapwa ngana yize atwama nayo chisemi hali vana venyi. Numba tuhu visemi kavakupukako oloze veji kunangulanga, nakukolezezanga, nakukafwa nakuzangamisa vana vavo mangana vakapwe vakuwahilila mukuyoya chavo. Uno vyuma muka visemi vasaka kuli vana vavo? Vasaka vavazangenga kuli vana vavo nakuvononoka hakukavangiza vyuma vize navavalweza. Uno kacheshi kupwa chakutamo kushinganyeka ngwetu Setu  wamwilu asaka etu vana venyi tumwononoke, nakumuzanga, nakumusakwilila havyuma atulingila tahi?

MuMbimbiliya lizu “kwivwilila” lyalumbununa “kwononoka” Kalunga. Omu mukiko tweji kulwezanga namwana ngwetu watela “kwivwililanga visemi jove.” Ngocho, kwivwilila mulizu lyaKalunga chalumbununa kulinangula nakumwononoka hakukavangiza vyuma mwatulweza. Numba tuhu, katweshi kwivwa lizu lyaKalunga iveneko, oloze tweji kwivwililanga lizu lyenyi hakutanga nakuzachisa vyuma vili muMazu enyi, Mbimbiliya.—WaYowano 1, 5:3.

Hakusaka kusolola kulema chatwama hakwivwilila lizu lyaKalunga, lwola lumwe Yesu ahanjikile ngwenyi: “Mutu keshi kuyoyela hambolo kahako, oloze nahamazu akufuma mukanwa kaYehova osena.” (Mateu 4:4) Ngana muze kulya chapwa chachilemu, omu mukiko alema namazu aKalunga mwomwo anahase kulingisa mutu akawane kutokwa chachinene chikuma. Mujila muka? Mwangana Solomone alumbunwine ngwenyi: “Mangana apwa mukingo, nge omu jimbongo japwa mukingo. Oloze eyi yikiko nganyo yachinyingi: Mangana eji kulamanga kuyoya chayauze ali nawo.” (Muka-kwambulula 7:12) Chinyingi namangana vyakufuma kuli Kalunga vinahase kutukinga makumbi ano, nakutukafwa nawa tusakule kanawa vyakulinga mangana tukayoye haya myaka yosena kulutwe.

Anukenu chifwanyisa chaYesu chize twashimutwilanga muchihande chinafumuho, ambile ngwenyi: “Chikolo chachindende najila yakupalakanya vili nakutwala kukuyoya, kaha ava vali nakuyiwana vanapu vavandende kaha.” (Mateu 7:13, 14) Kutambuka mujila kaneyi, chasakiwa kuzanga Kalunga nakupandama kuli ikiye mangana atutwaminyine palanga nakusongo.Shikaho chapwa chachilemu kuli etu kupandama kuli Kalunga. (Samu 16:8) Tunahase kulinga ngachilihi ngocho?

Hakumbi hakumbi tweji kupwanga navyuma vyavivulu twatela kulinga chipwe tweji kusakanga kulinga. Vyuma kana vinahase kutuhonesa chipwe kututangula kulinga vyuma vize asaka Kalunga kuli etu. Ngocho Mbimbiliya yeji kutwanukisanga ngwayo: “Nyingililenu ngwenu kutambuka mweji kutambukanga, kamweshi nakutambuka nge vaka-kuhona manganako, oloze nge vaka-mangana, zachisenunga kanawa lwola lwenu, mwomwo makumbi ano anapu amapi.” (Wavaka-Efwesu 5:15, 16) Tweji kupandamanga kuli Kalunga hakumona usoko wetu naikiye kupwa waulemu mukuyoya chetu.—Mateu 6:33.

Katweshi kuhasa kwalumuna vyuma vyakunyimako oloze tunahase kaha kusakula kulinga vyuma vize navitukafwa tukayoye kanawa kulutwe. Mbimbiliya yasolola hatoma nge Setu wamwilu Yehova Kalunga atuzanga chikuma kaha nawa asaka kumona vyuma vyamwaza vize tunakufwila kulinga mukuyoya chetu. Talenu mazu ahanjikile kapolofweto Mika:

Ambile ngwenyi: “Ove mutu, Kalunga nakulweze vyuma vyamwaza. Vyuma muka ali nakusaka Yehova kuli ove? Ali nakusaka kaha ulinge mwaya chiyulo chakwoloka, nakuzanga kushishika, Nakulinyisa hakutambuka naKalunga kove.”—Mika 6:8.

Kutala namwitavila Yehova ou ali nakumisanyika mutambuke nenyi mangana mukatambule kuyoya chahaya myaka yosena chize atulikila vaze navetavila kutambuka naikiye tahi? Mwatela kulisakwila enu vavene!