Kuhanjika Vyuma naVikasoloka Kulutwe
Uno mwashinganyekaho lyehi hachiyoyelo chenu natanga yenu kulutwe tahi? Uno namukapwa naluheto tahi, nyi chiku? Navakamizanga kuvatu tahi, nyi chiku? Kutala namukayoya myaka yayivulu tahi, nyi yayindende kaha? Vatu vanalihulisanga vihula kana hamyaka yayivulu.
Makumbi ano vatu vaze valinangula chikuma vanahanjikanga havyuma navikasoloka kulutwe. Vyuma vimwe vize vanahanjikanga vinasolokanga, oloze vyeka kavyeshi nakusolokangako, kaha vinalingisa vatu vahone kupwa vakuwahilila. Chakutalilaho mu 1912, Guglielmo Marconi uze atungile telengalamu ambile ngwenyi: “Kuzovoloka chakutunga makina nachikakumisa jita.” Kaha mutu umwe uze azachilenga hakapani yaDecca yakutunga myaso, akanyine jino kuzachisa ngita mu 1962, mwomwo afwelele ngwenyi kulutwe kakweshi kukapwa mazavu avaka-kwimba ngitako.
Vatu vavavulu veji kuyanga kuvatu vaze vatwama nangolo jakulinga vyuma vyakukomwesa mangana vavalweze vyuma navikasoloka kulutwe. Vamwe veji kuhulisanga vaka-kuzachisa vatanganyika, hakuzachisa mivwimbimbi yavyuma vimwe vize veji kusololanga mujimangazini namumapapilo amijimbu. Veka nawa veji kuhulisanga vaka-kwambulula vyakulutwe chipwe vaka-kutahisa mangana vavalweze vyuma navikasoloka kulutwe kuzachisa jikati jakutahisa vavuluka ngwavo tarot cards, najinambala, namihaki yamumavoko.
Vatu vamwe kushikulu vayilenga kuli vapilishitu javo mangana vavalweze mijimbu yize vambile ngwavo yafumine kuli tulunga twavo. Chakutalilaho, vatu vamwe ngwavo Mwangana Croesus wakuLydia atumine wana wandando yayinene kuli kapilishitu uze apwile kuDelphi, muGreece mangana amulweze vyuma navikasoloka nge mwaya nakuzunga jita naKuluse wakuPeleja. Uze kapilishitu alwezele Croesus ngwenyi ayenga tuhu mwakanongesa wangana wosena waKuluse. Oloze omu Croesus ayile, vakanongesele wangana wenyi.
Ngocho vyuma vyakulutwe ahanjikile uze kapilishitu kuli Croesus vyapwile vyamokomoko. Ngocho wana wandando yayinene wamwangana Croesus wayile mumeya, kaha alinehelele ukalu waunene. Uno vaze veji kuyanga kuvatu vaka-kwambulula vyuma navikasoloka kulutwe makumbi ano, kutala kaveshi nakumonanga ukalu tahi?
