Muchihande chinafumuho, twashimutwilanga omu Croesus vamufungulwile kuli mwangana waPeleja mwomwo yakumwonga kuli kapilishitu wakuDelphi. Oloze Mbimbiliya yalumbununa upolofweto uze wahanjika hali mwangana waPeleja uze wateselemo mukapyapya kakandende kaha.

Myaka kafwe 200 kunyima, shimbu kanda mwangana Kuluse asemuke, kapolofweto Isaya uze apwile kaHepeleu avulukile chimweza ngwenyi Kuluse ikiye mwakafungulula nganda yaMbavilone nakulumbununa jila mwakayifungulwilamo.

Mukanda waIsaya 44:24, 27, 28 wamba ngwawo: “Yehova, ou Muka-kukusokola nambe ngwenyi, . . . “Yami ngunambe meya amukalungalwiji ngwami, ‘uma, kaha nangukomisa tulwiji twove vosena.’ Yami ngunahanjika hali Kuluse ngwami, ‘apwa kafunga kami, kaha mwatesamo vyuma vyosena ngunajinyi.’ Yami ngunahanjika hali Yelusalema ngwami, ‘vatu navakatwamangamo,’ yami ngunahanjika hatembele ngwami, ‘chihela chove navakachala.”

Kweseka naHerodotus uze alinangula chikuma vyakushikulu ahanjikile ngwenyi maswalale jaKuluse vakondolwele meya amuKalwiji waYufwalate uze ahichile munganda yaMbavilone. Kukondolola meya chakafwile maswalale jaKuluse vengile munganda hakuhichila kungenge yakalwiji kana. Omu alingile hanalukuka lyehi nganda yaMbavilone, asokwele vaIsalele mangana vayenga kuYelusalema vakatungulule nganda yize vanongesele kuli vaMbavilone kafwe myaka 70 kunyima.

Kaha mukanda waIsaya 45:1 wamba ngwawo: “Ami Yehova ngunambe kuli Kuluse, ou wami vawavisa, ou ngunakwate kulivoko lyachilyo mangana ngufungulule vaka-mafuchi kumeso enyi, ngutambule vitwa vyavamyangana, ngusokolole vikolo vyamapito avali kumeso enyi mangana vikolo vazeneke kuvisoka.”

VaPeleja vengilile munganda kuzachisa vikolo vivali vize vasezele hululu. Kachi nge vaMbavilone vatachikijile vyuma apwile nakushinganyeka Kuluse, kachi vasokele vikolo vyosena vize vyapwile kungenge yakalwiji. Chaluvinda nganda kana kayapwile yakukingiwako.

Ou upolofweto kana watwama hamukana waupolofweto wamuMbimbiliya uze unatesamo. * Vyuma veji kwambululanga vyeji kwalisanga tulunga twavo vamakuli. Oloze upolofweto wamuMbimbiliya wafuma kuli Uze amba ngwenyi: “Kufuma vene kumaputukilo, ngweji kwambululanga vyuma vyakulutwe, Kufuma kushikulu ngweji kwambululanga vyuma vize kanda visoloke.”—Isaya 46:10.

Kalunga wamuchano uze akwechi lijina lyenyi Yehova, ikiye kaha eji kutesangamo upolofweto. Mwomwo lijina lyenyi lyalumbununa nge “Eji kulingisanga vyuma  kupwako.” Ulumbunwiso kana wasolola nge akwechi uhashi wakutachikiza vyuma navikasoloka kulutwe kweseka nakujina chenyi. Watufwelelesa nawa nge mwakatesamo jishiko jenyi josena.

Uno muli nakusaka kutachikiza upolofweto wamuMbimbiliya uze wahanjika kutalisa kumakumbi ano tahi? Myaka 2,000 yinahichi kunyima, Mbimbiliya yahanjikile chimweza ngwayo “hamakumbi akukuminyina nahakapwa lwola lwalukalu.” Makumbi akukuminyina avyuma muka? Keshi makumbi akukuminyina akaye chipwe avatuko, oloze makumbi akukuminyina avikokojola, nakutwama chivwoto, nakuyanda chize chinayanjisanga vatu hamyaka yayivulu chikuma. Tukekesenu jino haupolofweto umwe uze wasolola “makumbi akukuminyina.”

Mukanda WaChimoteu 2, 3:1-5 wamba ngwawo: “Hamakumbi akukuminyina . . , vatu navakapwa vaka-kulizanga vavene, vaka-kuzanga jimbongo, vaka-kulitukwojola, vaka-kulitohwesa, vaka-kusaula, vaka-kulikanga kuli visemi, vaka-kuhona kusakwilila, vaka-kuhona kushishika, vaze kavazanga vakwavoko, vaze kaveshi kwitavila vivwasanoko, vaka-kuvangila vakwavo, vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako, vaka-kusolola vakwavo, vaka-kunjinjavala, vaka-kulivwimba, vaka-kuzanga viseke muchishishisa chakuzanga Kalunga, vaka-kulisolola nge vakwechi vilinga vyakumwivwa Kalunga woma, olozenyi kaveshi kwitavila ngolo jachoko.”

Uno nayenu munetavila ngwenu vatu makumbi ano vali nakusolola vilinga kana tahi? Uno munetavila nawa ngwenu vatujingilika kuvatu vaze valizanga vavene, nakuzanga jimbongo, kaha nawa vakulivwimba nyi? Kutala muli nakumona nawa omu vatu vali nakufwila vyuma vasaka vavene, nakuhona kulivwasana navakwavo tahi? Chikupu vene nayenu munamono ngwenu vaka-kulikanga kuli visemi javo vanavulu chikuma, vamwe nawa vazanga viseke mukutela kuzanga Kalunga. Kaha nawa vyuma vili nakupihilako hakumbi hakumbi.

Chisoneka chaMateu 24:6, 7 chamba ngwacho: “Namukevwa jijita namijimbu yajijita. . . . Lifuchi limwe nalikafumbukila lifuchi likwavo, kaha wangana umwe naukafumbukila wangana ukwavo.”

Kweseka nakulava chimwe, vanawane nge kufuma vene mu 1914 vatu vakuzomboka jimiliyoni 100, vanafunga kujijita nakuvikokojola. Echi kuvula chavatu vanafunga chahambakana kuvula chavatu mumafuchi amwe. Achishinganyekenu hakulishona, namiteto, nakuyanda vanevunga vatu vavavulu. Uno mafuchi anawaneko jila yimwe yakukumishilamo jijita tahi?

Chisoneka chaMateu 24:7 chamba ngwacho: “Nakukapwa zala.”

Liuka lyaWorld Food Programme lyambile ngwalyo: “Numba tuhu mafuchi amwe eji kupwanga nakulya chachivulu chize vanahase kulya kuvatu jimiliyoni 815, oloze vatu vamwe veji kusavalanga nazala hakumbi hakumbi. Kaha vamwe nawa, vanakuvizanga musongo wazala.” Kweseka nakulava chimwe vanawane nge, mwaka himwaka vanyike vakuheta jimiliyoni jitatu vanakufwanga kuzala.

Chisoneka chaLuka 21:11 chamba ngwacho: “Nakukapwa mindenda yayinene.”

Mumyaka yakalinwomu, mindenda yakuheta ku 50,000 yinayanjisanga vatu vavavulu. Kaha mindenda yakuheta ku 100 yinenyeka jizuvo navyuma vyavivulu. Kaha mwaka himwaka kunasolokanga mundenda waunene. Mujimbu umwe wasolola nge, kuputuka mumwaka wa 1975 nakuheta mumwaka wa 2000 mindenda yinajihi vatu vakuheta ku 471,000.

Chisoneka chaMateu 24:14 chamba ngwacho: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”

Vinjiho jaYehova vakuhambakana jimiliyoni 8, vanambululanga nakuhana unjiho wamujimbu wamwaza waWangana waKalunga kumafuchi akuheta 240 mukaye kosena. Veji kutandakanyisanga mujimbu wamwaza kuvatu vatwama mujinganda, namumembo nakuvihela vyajipili. Upolofweto wahanjikilile chimweza ngwawo, omu Kalunga mwakamona ngwenyi ou mulimo unakumu, ‘kaha kukuma nachikeza.’ Uno echi nachikalumbununa ika? Kulumbununa nge viyulo vyavatu navikakuma, kaha Wangana waKalunga naukaputuka jino kuyula hano hamavu. Jishiko muka jize najikatesamo muWangana waKalunga? Tangenu chihande chinakavangizaho.