VATU vamwe vanahase kwamba ngwavo “ukalu wakumujimba” ukiko wangulingisa nguhone kuwahilila. Oloze kachi ngwapwa wakuwahilila nge . . .

• “ngwapwile najimbongo”

• “ngwalimbachile namutu wamwaza”

• “ngwalikangwile kumujimba”

Kupwa navilinga vyamwaza cheji kulingisanga mutu awahilile numba tuhu atwama naukalu wakumujimba chipwe ukalu aswana. Mwomwo ika tunambila ngocho? Mwomwo mutu nahase kwalumuna vilinga vyenyi, oloze keshi kuhasa kwalumuna ukalu wakumujimba chipwe ukalu weka asemuka nawoko.

Mbimbiliya yamba ngwayo: “Muchima wakuwahilila unapu nge vitumbo vyamwaza, oloze muchima wakuhomba weji kukumisanga ngolo jamutu.” (Vishimo 17:22) Enga, kumona vyuma mujila yamwaza cheji kunehanga kuwahilila. Chinahase kukafwa mutu atwaleho lika kuwahilila chamokomoko naukalu.

Vatu vamwe vanahase kumona vishinganyeka kana kupwa vyamokomoko. Vanahase kuhanjika ngwavo:

• ‘Mwomwo ikaze nangulyongela ami lyavene okunyi ngunakumona ukalu?’

• ‘Numba ngushinganyeka tuhu vyamwaza, kutala chinahase kwalumuna ukalu wami tahi?’

• ‘Nachiwaha kushinganyeka haukalu wami kuhambakana kushinganyeka vyuma vyeka.’

Vishinganyeka kana vinahase kwivwakana nge vyakwoloka, oloze chapwa chakutamo kumona vyuma mujila yamwaza nganomu vanasolola muvyakutalilaho vinakavangizaho.

 Chakutalilaho, Alex naBrian veji kuzata nangolo hakapani yimwe. Likumbi limwe, mukulwane wavo ahitulukile mumilimo vazachile, nakuvalweza vyuma valimbenjele.

• Alex ambile ngwenyi: “Ngweji kuzatanga chikuma nangolo, oloze ngweji kulimbenjanga lika. Milimo kana kangweshi kuyihasako, numba nguzata tuhu ngachilihi nangolo. Ngunakulishina kaha.”

• Brian ambile ngwenyi: “Mukulwane wami nangulweze vyuma ngwazatanga kanawa navize ngwalimbenjanga. Ngunalinangula vyuma ngwatela kukazachilaho likumbi likwavo.”

MUNASHINGANYEKA NGACHILIHI?

• Omu namuhita tukweji 6, umwe uli hali Alex naBrian munashinganyeka ngwenu mwazata kanawa milimo?

• Kachi nge yenu mwapwanga uze mukulwane wamilimo, kachi umwe ulihi namusakula azatenga hakapani yenu?

• Kachi nge munahono kutesamo vyuma vimwe, mweji kushinganyeka ngana mwaAlex nyi Brian?

Chakutalilaho, lwola lumwe Andrea naBrittney veji kukwivwanga uli omu veji kupwanga ukawavo. Andrea eji kumonanga ukalu kana mujila yeka, kaha Brittney nawa eji kuumonanga mujila yeka.

• Andrea eji kushinganyeka kaha haukalu wenyi. Kasaka kukafwa vakwavo nge ali muukalu kanako, oloze asaka vakwavo vavangile kumukafwa numba nayikiye avakafwe. Eji kwambanga ngwenyi, ‘Mwomwo ika nangulishinyina kulingila vyuma vakwetu okunyi vakiko kaveshi kungulingilavyoko?

• Brittney eji kusolwelanga vakwavo likoji, nakuvalingila vyuma numba navasakwilila chipwe chiku. Eji kuzachisanga Lushimbi Lwalulemu lwakuvuluka nge twatela kulingilanga vakwetu vyuma ngana muze twasaka vakwetu vatulingilengavyo. (Luka 6:31) Brittney amona ngwenyi chapwa chachilemu kulingila vakwavo vyuma.

MUNASHINGANYEKA NGACHILIHI?

• Hali ava mapwevo vavali, umwe ulihi namusakula kupwa sepa lyenu?

• Umwe ulihi vanahase kuzanga chikuma kuli masepa jenyi?

• Nge nayenu mweji kwivwanga uli, kutala mweji kulinganga ngana mwaAndrea tahi, nyi ngana mwaBrittney?

Pamo mwatachikiza vatu vamwe veji kulinganga ngana mwaBrian naBrittney. Pamo nayenu mukiko mwapwa, kaha munahase kwitavila ngwenu kumona vyuma mujila yamwaza cheji kulingisanga vyuma vipwenga kanawa. Nyi ngachilihi nge mwapwa ngana mwaAlex naAndrea? Talenu havishina vyamuMbimbiliya vitatu vize vinahase kumikafwa mumonenga vyuma mujila yamwaza.

MBIMBILIYA NGWAYO: “Kachi nge nauhomba halwola lwavihuli, kaha ngolo jove najikeha.”—Vishimo 24:10.

UKALU WATWAMAHO: Kulizakamina cheji kuzeyesanga mutu nakumulingisa ahone kushinganyeka kanawa mwakukumishila ukalu ali nawo.

Ngana muze Juliza vamukafwile kujindongi jamuMbimbiliya, nayenu nawa jinahase kumikafwa muhonese ukalu wenu. Mukanda Wavaka-Efwesu 4:23 wamba ngwawo: “Pwenunga lika muvavahya muvishinganyeka vyamichima yenu.”

Nganomu vanahanjika hamukanda kanou, munahase kwalumuna vishinganyeka vyenu nakumona vyuma mujila yamwaza. Vanatulweze ngwavo munahase kupwa “muvavahya muvishinganyeka.” Shikaho, kwalumuna vishinganyeka vyetu kachapwa chalikumbi limweko, oloze mukuyoya chetu chosena. Evi vikiko vesi kana yavulukila ngwayo “pwenunga lika muvavahya.”

MBIMBILIYA NGWAYO: “Makumbi amuka-kukalikiza osena anapu amapi. Oloze mutu wamuchima wakuwahilila akwechi chiwanyino chakulya shimbu yosena.”—Vishimo 15:15.

UKALU WATWAMAHO:Nge namupwa namuchima wakumonanga vyuma mujila yayipi, kaha namuhombanga lika nge kajila uze nazovo. Oloze nge namumonanga vyuma mujila yamwaza, kaha namupwa vakuwahilila mukuyoya chenu.

Vyuma vyeji kumukafwanga shina kutanganga mijimbu yamuMbimbiliya. Ambile ngwenyi, “Echi cheji kungukafwa ngushinganyekenga vyuma vyamwaza, nakumona ngwami ngunahase kuzata milimo yimwe yize ngwajinyine kuzata mukuyoya chami.” Nge vishinganyeka vyavipi vineza muwongo wami, ngweji kuvifumisangamo washi nakuputuka kushinganyeka vyuma vyamwaza.”

Nayenu nawa munahase kukumisa kulizakamina chenu hakushinganyekanga havyuma vyamwaza. Nge muli nakulipika naukalu wakuhomba chipwe wamisongo ngana mwaYanko, kaha anukenu ngwenu ‘kuli vyuma vyamwaza munahase kulinga. Ukalu kana kaweshi kuhasa kumihonesa kulinga vyuma vyekako.’ Lwola lwosena fwilenu kushinganyekanga havyuma vyamwaza.

MBIMBILIYA NGWAYO: “Kuhana cheji kunehanga kuwahilila chikuma kuhambakana kutambula.”—Vilinga 20:35.

UKALU WATWAMAHO: Mutu uze eji kuhananga vakwavo apwa wakuwahilila. Mwomwo ika? Mwomwo vatutenga namuchima wakulingila vakwetu vyuma. (Wavaka-Fwilipi 2:3, 4; WaYowano 1, 4:11) Kupwa namuchima wakuhana chipwe kulingila vakwetu vyuma, chinahase kutukafwa tushinganyekenga havyuma vyamwaza nakupwa vakuwahilila.

Fwilenunga kulisuula mangana mukafwenga vakwenu vyuma vyakufwana nge, kuwahishilako vyakulya muveji, chipwe kuya nakukafwako milimo kashinakaji.

Ngana muze mutu eji kutukulanga mwila mulitepa lyenyi, nakushikilila vimbuto, nakuhakako wilo mangana vikole kanawa, nayenu nawa mwatela kufumisa vishinganyeka vyavipi mumuchima wenu vyakulimona kupwa muvamokomoko. Mwatela kumonanga vyuma mujila yamwaza nakufwila kuzatanga vyuma vize namuhasa. Echi nachimilingisa muwahilile.