OMU YAHANJIKA MBIMBILIYA
Kufumisa Lijimo
Mwaka himwaka vatu vali nakujiha vakemba vakuzomboka hajimiliyoni 50 hakufumisa majimo, kaha jimiliyoni kana jinazomboka kuvula chavatu vali mumafuchi amavulu.
Uno mutu atela kulisakwila vyakulinga tahi?
VYUMA VEJI KUHANJIKANGA VATU
Mapwevo vavavulu veji kufumisanga majimo mwomwo yavyuma vyavivulu vyakufwana nge kukaluhwa chajimbongo, naukalu wamutanga, nakusaka kupwa vakulihehwa mangana vayenga kumashikola ahelu, nakulinga vyuma vyeka vafwila, chipwe kaveshi nakusaka kulela mwana ukawavoko. Veka nawa vamona kufumisa majimo kupwa chakuhenga chikuma, kaha cheji kulingisanga jino pwevo uze mwalinga chuma kana vahone kumufwelela.
VYUMA YAHANJIKA MBIMBILIYA
Kalunga amona kuyoya chikumanyi chavatu kupwa chajila. (Kuputuka 9:6; Samu 36:9) Lushimbi kana lwatalisa nakulikemba uze ali mujimo, chihela chize Kalunga awahisa mangana mwana akolelemo. Muka-kusoneka Mbimbiliya umwe ambile ngwenyi: “Wanguswekele mujimo lyamama.” Atwalileho ngwenyi: “Meso ove angumwene shimbu ngwapwile ngumuvisu, vihanda vyami vyosena wavisonekele mumukanda wove wasonekelemo namakumbi vyapwile nakulitunga.”—Samu 139:13, 16.
Lushimbi ahanyine Kalunga kuli vaIsalele hamwe kaha nachivezu chize atuhana, vyasolola omu amona kuyoya chamwana ali mujimo. Jishimbi jaKalunga jambile ngwajo, kachi nge mutu mwakuka muka-lijimo nakujiha mwana alimo, kaha mutu kana vatela kumujiha nakufweta mwono wenyi mwomwo yamwono uze najihi. (Kulovoka 21:22, 23) Vaka-kuyula nawa vatelelele kutachikiza kanawa vyuma vyalingishile mutu alinge chuma kana.—Kulava 35:22-24, 31.
Vatu vavahana chivezu. Kachi nge pwevo mwevwilila vyuma nachimuhuhumuna chivezu chenyi mangana ahone kujiha mwana ali mujimo, kaha mwanganyala. * Oloze nge mwakana kwivwilila chivezu chenyi, kaha chinahase kumuyanjisa chipwe kumuhana mulonga. (Wavaka-Loma 2:14, 15) Vaka-kuhehwojola vawana nge mapwevo vaze veji kufumisanga majimo, veji kulizakaminanga chikuma nakupwa vakuhomba.
Ngachilihi nge chisemi namono ngwenyi mulimo wakulela mwana naumukaluhwila chikumanyi nge kajinyine kupwa nalijimoko? Achitalenu havyuma vize Kalunga afwelelesa vatu vaze veji kukavangizanga jishimbi jenyi mukuyoya chavo: “Kuli mutu wakushishika weji kupwanga uwakushishika; kaha kuli mutu wakulonga weji kulinganga mwakulonga.” (Samu 18:25) Tweji kutanganga nawa ngwavo: “Mwomwo Yehova azanga chiyulo, kaha keshi kusuvilila vatu jenyi vakushishikako.”—Samu 37:28.
“Vivezu vyavo vili nakuhana unjiho hali vakiko, kaha vishinganyeka vyavo, navivahana milonga, chipwe kuvahakwila.”—Wavaka-Loma 2:15.
Nyi ngachilihi nge mwafumisaho lyehi lijimo?
VYUMA VEJI KUHANJIKANGA VATU
Chisemi umwe wamujike walijina lyaRuth, ambile ngwenyi: “Ngwapwile lyehi navana vatatu ngocho ngwashinganyekele nge kangweshi kuhasa kuzakama vana vawanako. Kahomu ngwafumishile lijimo ngwashinganyekele ngwami ngwalingile chuma chachipi chikuma.” * Uno avulumwine mulonga uze Kalunga katelele kumukonekelako tahi?
VYUMA YAHANJIKA MBIMBILIYA
Yesu Kulishitu asolwele vishinganyeka vyaKalunga hakwamba ngwenyi: “Ami kangwejile nakusanyika vaka-kwolokako, oloze shina vaka-shili mangana vapihilile nakwalumuka.” (Luka 5:32) Kachi nge natwivwa kukola kumuchima mwomwo yashili tunalingi, nakutulingisa tupihilile nakwalumuka, nakulomba Kalunga atukonekele, kaha eji kutukonekelanga numba tuhu tunavulumuna shili yayinene chikuma. (Isaya 1:18) Mukanda waSamu 51:17 wamba ngwawo: “Ove Kalunga, kaweshi kukana muchima wakuhokoka, wakuchikikako.”
Nge mutu mwatomesa chivezu chenyi, kaha Kalunga nahase kukafwa mutu ali namuchima wakuhokoka apwenga wakuunda nge mwalomba kuli ikiye. Mukanda Wavaka-Fwilipi 4:6, 7 wamba ngwawo: “Hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu.” * Kulinangula Mbimbiliya nakulomba kuli Kalunga chakafwile Ruth apwenga namuchima wakuunda. Alinangwile ngwenyi Kalunga ‘apwa muka-kukonekela.’—Samu 130:4.
“[Kalunga] katulingile kweseka najishili jetuko, katushishishililemo kweseka nakuhenga chetuko.”—Samu 103:10.
^ par. 10 Nge kafumbakaji chipwe mwanenyi ali mujimo mwapwa muukalu waunene, kaha kufumisa lijimo keshi hichuma chakwolokako. Kachi nge hakusapuluka nakupwa ukalu waunene, kaha kafumbakaji nalunga lyenyi vatela kulisakwila vavene iya atela kuyoya, mwana nyi naye. Kaha vatu vamba ngwavo, mwomwo yakuzovoloka chavipatela mumafuchi aluheto ukalu kanou kawavula kusolojoka chikumako.
^ par. 15 Lijina vanalyalumuna.
^ par. 18 Kushinganyeka halutalililo lwakusanguka nachikafwa mutu apwenga namuchima wakuunda. Talenu “Vihula Vyakufuma Kuli Vaka-Kutanga” muKaposhi Kakutalila kaApril 15, 2009, uze ahanjika hajindongi jamuMbimbiliya kutalisa kukusanguka chamwana uze nafwila mujimo.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Vyuma Muka Yahanjika Mbimbiliya Kutalisa Kukufumisa Lijimo?
Uno kuyoya chamutu cheji kuputukanga lwola muka? Uno Kalunga nahase kukonekela mutu uze alifumishile lijimo tahi?
