NGE mutu mwamwesa kukanwa hakumimona mweji kulinganga ngachilihi? Ngwamono nayenu nawa mweji kumwesanga kukanwa. Pamo nayenu mweji kwivwanga kuwaha. Chikupu vene, mweji kwivwanga kuwaha nge masepa jenu chipwe vatu vaze kamwatachikizako navamwesa kukanwa hakumimona. Pwevo umwe walijina lyaMagdalena ambile ngwenyi: “Georg lunga lyami uze afwa, angwivwishilenga kuwaha omu amweselenga kukanwa. Omu twalitalilenga meso nameso ngwalivwilenga kupwa wakukingiwa kaha nawa wakusuuluka.”

Kumwesa kukanwa cheji kusolonga nge mutu nasuuluka, nawahilila kaha nawa wachisambo. Chihande chimwe chamumukanda vavuluka ngwavo Association for Psychological Science chahanjikile ngwacho: “Kumwesa kukanwa. . . chapwa hichisemwa chetu.” Chambile nawa ngwacho, navakemba vaze veji kusemukanga, veji “kutachikizanga kanawa omu ali nakwivwa mutu kweseka nomu ali nakusoloka hameso.” Chihande kana chatwalileho lika ngwacho: “Kumwesa kukanwa cheji kulingisanga vatu vakukulule vyuma ali nakushinganyeka mutu nakuvakafwanga nawa valumuneko vilinga vyavo.”

Vaka-kuhehwojola vahaYunivesiti yaHarvard muUnited States vawanyine vyuma vyakafwilenga vaveji vatushinakaji nomu nawa kumwesa kukanwa chavaka-kuvalama chavakafwilenga. Vaka-kuhehwojola vambile ngwavo vaka-kulama vaveji vaze vasolwelenga “muchima wachisambo, nawakuzakama, nawakutetela” vakafwilenga vaveji vasuuluke nakwivwako kanawa. Oloze vaka-kulama vaveji vaze kavasolwelenga muchima kanako, valingishilenga vaveji valivwe nge kavavazakamako.

 Kumwesa kukanwa chinahase kumikafwa nayenu vavene. Vaka-kuhehwojola vawana ngwavo, kumwesa kukanwa cheji kukafwanga mutu apwenga wakumika, wakuwahilila, nakukehesako kulizakamina. Oloze kuhona kumwesa kukanwa chinahase kunehela mutu ukalu.

Magdalena uze twavulukanga hakavanga apwile Chinjiho chaYehova. Omu kwapwile Jita yaKaye yamuchivali, ikiye navausoko wenyi vavali vavahakile muchilombo chakulamina vafunge chamuRavensbrück mulifuchi lyaGermany mwomwo vakanyine kwitavila jishimbi javaka-Nazi. Ambile ngwenyi: “Lwola lumwe vaka-kulama vafunge vatukanyishilenga kuhanjika navakwetu vafunge, oloze kavahashilenga kutuhombesako. Omu ngwamwenenga mama nayayami navamwesa kukanwa ngwawahilililenga chikuma kahechi changukafwilenga ngutwaleho lika kupwa wakumika.”

Shimbu jimwe munahase kulizakamina havyuma vyamukuyoya nakumilingisa muhone kumwesa kukanwa. Ngocho mwatela kutachikiza ngwenu vishinganyeka vikiko vyeji kumilingisanga mwivwenga ngocho. (Vishimo 15:15; Wavaka-Fwilipi 4:8, 9) Numba tuhu chapwa chachikalu, oloze kushinganyekanga havyuma vyamwaza chinahase kumikafwa chikuma mulitwamine kulizakamina. * Kutanganga Mbimbiliya nakulomba chinakafwe vatu vavavulu vahonese ukalu kana. (Mateu 5:3; Wavaka-Fwilipi 4:6, 7) Kaha nawa lizu ‘kuwahilila’ ‘nakuwaha’ najivulukiso jeka jasoloka mapapa kakavulu muMbimbiliya. Munahase kutanganga lifwo limwe chipwe avali muMbimbiliya hakumbi hakumbi. Nge namulinga ngocho, kaha nayenu munahase kuputuka kumwesa kukanwa.

Kamwatela kuvandaminanga vakwenu vamwese kukanwa numba nayenu mumweseko. Fwilenunga kumwesa kukanwa mangana mwivwisenga vakwenu kuwaha kumuchima. Chikupu vene, kumwesa kukanwa chapwa chamwaza mwomwo chinahase kumikafwa hamwe kaha navakwenu navamitala.