PWEVO umwe walijina lyaAnna, * ambile ngwenyi: “Nge ngunahombo, ngweji kuhonanga kupwa nangolo jakulinga kala vyuma chipwe vene vize ngwazanga chikuma. Chuma ngweji kutondanga kulinga shina kusavala kaha. Kakavulu ngweji kwivwanga nge vakwetu kavanguzangako, nguwamokomoko kaha nawa kwijiva nge ngwapwa nguchiteli kuvakwetu.”

Pwevo umwe walijina lyaJulia ambile ngwenyi: “Ngwashinganyekelenga kulijiha. Kangwasakile kufwako, oloze ngwevwilenga kaha kupihya. Ngwatwama namuchima wakuzakama, oloze nge ngunahombo kangwahasa kusolola muchima kanako.”

Anna naJulia vaputukile kupwa naukalu wakuhomba omu vapwile vakweze. Numba tuhu shimbu jimwe vakwavo vakweze veji kuhombanga, oloze Anna naJulia vahombelenga hatando yayisuku. Anna ambile ngwenyi: “Chinafwane nge unakakachila muwina wausuku chikuma muze muli milima, muze kaweshi kuhasa kufumako. Mulivwa nge unazaluka kaha nawa kwijiva nge keshi yoveko.”

Vyuma vahichilemo vaAnna naJulia kavyeshi vyaungejiko. Liuka lyaWorld Health Organization (WHO) lyawana nge, vakweze vaze vali nakuwana naukalu wakuhomba vali nakuvula chikuma kaha nawa kuhomba chikiko “chinakuneha misongo nautonji kuli vanyike navakweze vamalunga navava vamapwevo vamyaka yakusemuka 10 nakuheta ku 19.”

 Kuvakweze kuhomba cheji kuputukanga naukalu wakufwana nge kuhona kusavala, nakuhona chipepa chavyakulya, nakuhokama chipwe kutohwa. Kaha nawa kunahase kupwa ukalu weka wakufwana nge kulivwa nge vamokomoko, nakupwa nakanengauli nakupihilila. Ukalu ukwavo vanahase kupwa nawo shina kufwila kulihandula kuvakwavo, kuhona kushinganyeka kanawa chipwe kuvulyajama vyuma, nakupwa navishinganyeka chipwe vilinga vyakusaka kulijiha, naukalu weka uze vahona kuwana vaka-vipatela. Nge vandotolo vaze vatala hamisongo yakuwongo vanamono ngwavo mutu ali naukalu wakuhomba, kaha kakavulu veji kutalanga haukalu uze nautwalaho lika havyalumingo vyavivulu uze unahase kuhonesa mutu kulinga vyuma vyamukuyoya.

Kweseka namujimbu waliuka lyaWHO wavuluka ngwawo, “kwatwama vyuma vyavivulu vize vyeji kulingisanga mutu ahombe. Ukalu kana unahase kwiza mwomwo yaluyanjisa, nakushinganyeka chikuma, navyuma vyeka vyakumujimba.” Vyuma kana vinahase kupwa:

Vyuma vyakumujimba. Ngana muze chapwile kuli Julia, kuhomba cheji kwizanga nawa kuhichila mujitanga kulumbununga nge vyuma vimwe vinahase kulingisa wongo uhone kuzata kanawa. Vyuma vikwavo vinahase kuneha ukalu kana shina, musongo wamuchima, nakwalumuka chavyuma vimwe vavuluka ngwavo mahormones, nakunwanga chikuma maundu akupendesa chize chinahase kuneha ukalu wakuhomba chipwe kulingisa mutu ahombe halwola lwalusuku. *

Kulizakamina. Numba tuhu shimbu jimwe kulizakamina chapwa chakutamo, oloze kulizakaminanga chikuma chinahase kuneha ponde kumujimba, namuvishinganyeka nakulingisa ukalu kana ukapwe nakuli vana vavo. Shikaho vatu vamba ngwavo, vyuma vyeji kunehanga kuhomba kavaviwana kanawako kaha nawa kuhomba cheji kwizanga mwomwo yavyuma vyavivulu ngana muze twavulukanga hakavanga.

 Vyuma vyeji kunehanga kulizakamina vinahase kulingisa mutu ahombe. Vyuma kana vinahase kupwa, kulilukulula chipwe kulihandununa chavisemi, nakufwisa mutu twazanga, naluyanjisa chipwe kupika vatu, nakupwa muponde yayinene, namisongo, chipwe utonji uze naulingisa mutu kuhona kulinangula kanawa chikumanyi nge mwalivwa ngwenyi kavamuzangako. Shimbu jimwe visemi veji kuhombanga mwomwo yakushinganyeka nge vana vavo vatela kufwila kuya kumashikola ahelu. Vyuma vikwavo vinahase kuneha kuhomba shina luyanjisa, kuhona kutachikiza vyuma vyakulutwe, kulikokojwesa navisemi vaze vali naukalu wakuhomba navyuma vyeka vyavipi vanahase kulinga visemi kuli vana vavo. Kachi nge mukweze ali naukalu wakuhomba, kaha vyuma muka vinahase kumukafwa alipike naukalu kana?

Kuhomba chimwe vanahase kuchikehesako navitumbo chipwe hakushimutwilanga navatu vaze valinangula chikuma vyaukalu wakuwongo. * Yesu Kulishitu ambile ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha.” (Mako 2:17) Musongo nawa unahase kukusela ukalu kuwongo chipwe kumujimba. Kwalumuka chachiyoyelo nachikiko chinahase kuneha ukalu mwomwo mujimba nawongo vyeji kuzachilanga hamwe.

Kachi nge muli naukalu wakuhomba, kaha mwatela kulingako vyuma vimwe vize navimikafwa mulame kanawa mujimba navishinganyeka vyenu. Chakutalilaho, mwatela kulyanga vyakulya vize navimikafwa kumujimba wenu, nakusavalanga jola jajivulu, nakunyukanga mujimba wenu shimbu yosena. Kulinyukanga mujimba cheji kukehesanga kupihilila washi, nakumilingisa mupwenga najingolo, nakulivwisanga kuwaha kusavala. Nge chinahase, esekenu kuwana vyuma vinahase kumilingisa muhombe nakwijiva vyuma munahase kulinga mangana mukeheseko ukalu kana. Shimutwilenu haukalu kana namutu uze mwafwelela chikuma. Kuzachila hamwe navaka-tanga yenu namasepa jenu chinahase  kumikafwa mulipike naukalu wakuhomba nakukehesako vyuma vize vinahase kuneha ukalu kana. Sonekenu vyuma munakushinganyeka mumukanda wenu, echi chikiko chakafwile Julia uze twavulukanga hakavanga. Chuma chachilemu shina kuhakanga vyuma vyakushipilitu kulutwe. Echi chinahase kwalumuna kuyoya chenu. Yesu Kulishitu ambile ngwenyi: “Vawahilila vaze vejiva ngwavo vasaka vyuma vyakushipilitu.”—Mateu 5:3.

Anna naJulia vetavilile mazu kanawa ahanjikile Yesu. Anna ambile ngwenyi: “Kwazananga muvyuma vyakuShipilitu chinangulingisa ngukafwe vakwetu muchishishisa chakushinganyeka kaha haukalu wami. Kulinga chuma kana kachapwa chachashiko, oloze chinangukafwe ngupwenga nguwakuwahilila.” Kutanganga Mbimbiliya nakulomba vinakafwe Julia nakumuvendejeka chikuma. Ambile cheka ngwenyi: “Kulwezanga Kalunga vyuma vyosena vili mumuchima wami cheji kunguunjisanga. Kaha nawa Mbimbiliya yinangukafwe ngumone ngwami ngwapwa nguwamulemu chikuma kuli Kalunga kaha nawa anguzakama. Kutanganga Mbimbiliya chinangukafwe ngupwenga nalutalililo lwavyuma vyakulutwe.”

Yehova Kalunga, uze atutenga atachikiza kanawa jila vatulelelelemo, navyuma tunahichimo mukuyoya chetu, navyuma twaswana kuli visemi jetu ngocho vinahase kwalumuna kuyoya chetu. Shikaho Yehova nahase kutukafwa nakutuvendejeka kuhichila muli vatu vaze veji kutwivwishisanga nakututetela. Kaha nawa lwola luli nakwiza omu Kalunga mwakafumisako misongo yosena nakukapwa namijimba yakulikangula. Mukanda waIsaya 33:24 wamba ngwawo: “Kamweshi kukapwa mutu mwakamba ngwenyi: ‘Nguli nakukola.’”

Mbimbiliya yatufwelelesa ngwayo, Kalunga “mwakahunda masoji osena kumeso [etu], kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” (Kusoloka 21:4) Lutalililo kana omu lwawaha enu vayaya! Kachi nge muli nakusaka kulinangula vyavivulu havyuma ajina Kalunga kutalisa kuvatu namavu, tunamilombo muyenga ha jw.org. Hakeyala kana namuwanaho Mbimbiliya yamwaza yahaInternet navihande vyavivulu, kuhakilako vene nachihande chakuhomba.