“Vatuzakamine Chikuma”
LYASATELI, haApril 25, 2015, kwapwile mundenda waunene chikuma mulifuchi lyaNepal lize lyatwama najipili chikuma kunote yaIndia. Mundenda kana wahetele namunganda yaKathmandu yize yatwama kumulauko jikilomita kafwe 80. Mundenda kana wajihile vatu vakuzomboka 8,500, kaha lifuchi kana likiko vawana nge lyapwile navatu vavavulu chikuma vaze vafwile kumundenda hamafuchi osena aze eji kupwanga namindenda. Mundenda kana wenyekele membo amavulu. Mulifuchi lyaNepal mwatwama Vinjiho jaYehova vavavulu vakuheta ku 2,200, kaha vavavulu vatwaminenga kuze kwasolokelele ukalu kana. Oloze chaluvinda Chinjiho umwe navana venyi vavali vafwile.
Chinjiho umwe walijina lyaMichelle ambile ngwenyi: “Mundenda kana waputukile omu vikungulwilo vyavivulu vyamungalila yize vyapwile nakukunguluka. Oloze nge vatu vavavulu vapwile kujizuvo javo omu mundenda kana waputukile, kachi vapwile muponde yayinene.” Mwomwo ika vaze vapwile nakukunguluka vayovokelele? Mwomwo jiZuvo jaWangana vajitungile mujila yakulipwila.
“TUNAMONO JINO NGANYO”
Makumbi ano, jiZuvo jaWangana jajivulu muNepal vali nakujitunga mujila yize nayilingisa vahone kujenyeka kumindenda. Man Bahadur uze eji kuzatanga mulimo wakutunga jiZuvo jaWangana ambile ngwenyi: “Kakavulu vatu vanatuhulisanga ovyo tweji kutungilanga mujila kana numba tuhu tuli nakutunga jiZuvo jaWangana jize kajatohwa chikumako. Oloze tunamono jino nganyo.” Omu wakumine mundenda, vakulwane vaze vatala mulimo wakutunga waVinjiho mulifuchi lyaNepal vetavishile kutwama mujiZuvo jaWangana. Chamokomoko nachimbalanganyi chize chapwileko, Vinjiho jaYehova navakwavo muvatungila vapwile vakukingiwa.
Vinjiho jaYehova navakwavo muchitungilo vapwile nakutwama mujiZuvo jaWangana
Nakushimbula chiku, vakulwane vaka-Kulishitu vaputukile kutondatonda vandumbwetu vaze kavamweneko. Chinjiho umwe walijina lyaBabita ambile ngwenyi: “Vakulwane vazakamine chikuma chikungulwilo kuhambakana kulizakama vavene. Vatuzakamine chikuma.” Lichako omu walingile mundenda unakumu, vandumbwetu vatatu vaze vatala mulimo waVinjiho jaYehova muNepal, natulama vakujinguluka, vaputukile kutambukila vikungulwilo nakukafwa vakulwane vaze vapwile muukalu kanou.
Gary Breaux uze afumine kuchikota chaVinjiho jaYehova, atambukilile vatu vaze vapwile muukalu wamundenda
Omu mwahichile makumbi 6 kufuma haze kwapwile mundenda, Gary Breaux uze afumine kuchikota chaVinjiho jaYehova muUnited States, ejile mulifuchi lyaNepal namuka-mahyenyi Ruby. Reuben uze atwama mukomiti tunavuluka lyehi ambile ngwenyi: “Mwomwo yachimbalanganyi chize chapwile munganda yaKathmandu, katwashinganyekele ngwetu Ndumbu Breaux mwezako.” Oloze afwilile kwiza, kaha ejile. Vinjiho jaYehova mulifuchi kana vamusakwililile chikuma hakwiza.”
‘TUNAPU VAKULINUNGA CHIKUMA KUHAMBAKANA KUNYIMA’
Silas uze azachila hamutango waVinjiho jaYehova mulifuchi lyaNepal, ambile ngwenyi: “Omu vawahishile jishinga jetu jakumilimo, vatu vaputukile kutuma jishinga ufuku namusana. Vandumbwetu mukaye kosena valizakaminyine chikuma hali etu. Numba tuhu vamwe vahanjikilenga malimi aze katwapwile nakwivwako, oloze twamwene ngwetu vapwile namuchima wazangi kaha nawa vafwilile kutukafwa.”
Vinjiho jaYehova vamuEurope vaze vatala hakulikangula chavatu vakafwile vatu vapwile muukalu kanou
Kahomu mwahichile makumbi amavulu, Vinjiho jaYehova vamulifuchi kana vanehele vyakulya hajiZuvo jaWangana mangana vapangile vaze vapwile muukalu. Kaha nawa vatungile Komiti yaKupululula Vatu muLuvinda, yize yaputukile kupangila vatu vyakulikafwa navyo kuputuka vene muBangladesh, naIndia, naJapan. Omu mwahichile makumbi amandende, lizavu lyaVinjiho jaYehova vamuEurope vaze vatala hakulikangula chavatu vejile nakutwama haZuvo yaWangana mangana vokenga vatu. Kavapwile kaha nakuka vatu vaze valipozomwene jimbanduko, oloze navaze vene vahombele chikuma.
Pwevo umwe walijina lyaUttara ambile ngwenyi: “Mundenda kana wapwile waunene chikuma kaha nawa wakwivwisa woma. Oloze kutwala muze twalinungile jino natanga yetu yakushipilitu kuhambakana kunyima.” Chikupu vene, mundenda kana kawalingishile vatu vahone kuzanga Yehova navakwavoko. Oloze wazamishile chikuma zangi kana.