KUTALA MWAPWA VAKUWAHILILA TAHI? Nge mukiko, kaha vyuma muka vyamilingisa muwahilile? Tanga yenu tahi, nyi milimo yenu, chipwe vyuma mwafwelela mukwitava chenu tahi? Pamo munakutalilila vyuma vimwe vyamwaza vize vinahase kumilingisa muwahilile vyakufwana nge kukumisa shikola, kwingila milimo yambwende chipwe kulanda minyau yayihya.

Vatu vavavulu veji kupwanga vakuwahilila nge vanatesamo vyuma vimwe chipwe nge vanalande chuma vasaka. Uno kuwahilila kana cheji kwililanga tahi? Kakavulu, kuwahilila kana kachashimbulako.

Kuwahilila chatela kusuulwisa mutu lwola lwosena nakumulingisa alifwelele ivene nakutwalaho lika kulivwisa kuwaha kuyoya.

Kaha nawa kuwahilila kachatwama noho chakuminako, chipwe kupwa chuma chize atela kufwila mutu mulwola lwalundendeko, oloze chatela kutwalaho lika mukuyoya chenyi chosena. Nge mutu mwamba ngwenyi: “Nangukawahilila omu . . . ” chili nge anakulikanyisa ivene kupwa mutu wakuwahilila.

Chakutalilaho, kuwahilila tunahase kuchifwanyisa kukulikangula chamujimba. Vyuma muka twatela kulinga numba tulikangule kumujimba? Twatela kusakula kulya chamwaza, nakulinyukanyuka mujimba. Chochimwe nawa, nge natusakulanga kanawa vyakulinga mukuyoya chetu hakukavangizanga jindongi jamwaza, kaha natupwa vakuwahilila.

Jindongi muka chipwe vyuma muka vyeji kulingisanga mutu apwenga wakuwahilila? Vyuma vimwe vyapwa vyavilemu chikuma kuhambakana vikwavo. Vyuma kana shina:

• KUSUULUKA NAMUCHIMA WAKUHANA

• KULIKANGULA KUMUJIMBA NAKUMIKA

• ZANGI

• KUKONEKELA

• MWALUMBUNUKILA KUYOYA

• LUTALILILO

Mbimbiliya yamba ngwayo: “Vawahilila vaze vazeneka chuma chakuvahanyina mulonga.” (Samu 119:1) Tushimutwilenu jino chihande kana.