MISONGO YAKUTEKELEKA CHIPWE UTONJI VYEJI KUNEHANGA UKALU KULI MUTU. Lunga umwe walijina lyaUlf uze atengukile ambile ngwenyi: “Ngwahombele chikuma. Kangwapwile nangolo chipwe kupwa nguwakumikako. . . . Ngwashinganyekele ngwami, ‘kwami ngu.’”

Vyuma ahichilemo Ulf vyasolola nge katwatwama chikuma nangolo hakulikangula chetuko. Chipwe ngocho, kuliko vyuma vimwe twatela kulinga mangana tukeheseko misongo. Ngachilihi nge misongo yinatutekeleka chikuma? Uno echi nachitulingisa tuhone kupwa vakuwahilila tahi? Nduma. Chatete, tukekesenu jindongi jimwe jize najitukafwa tupwenga vakulikangula.

PWENUNGA “VAKA-KULINGA VYUMA NAKWESEKELA.” (WaChimoteu 1, 3:2, 11) Kulya chikuma chipwe kunwa chikuma wala cheji kunehanga ukalu kumujimba nakwenyeka jimbongo jetu. “Kanda mulikata navaka-kunwa chikuma vinyo, chipwe navaka-kufwa hakulya nyamako. Mwomwo vaka-kupenda navaka-kufwa hakulya navakahutwa.”—Vishimo 23:20, 21.

KANDA KUPIHISA MIJIMBA YENUKO. Mukanda Wavaka-Kolinde 2, 7:1 wamba ngwawo: “Tulitomesenu kuvyuma vyosena vyakupihisa mujimba nashipilitu.” Vatu veji kupihisanga mijimba yavo nge navatafunya chipwe kunwa makanya, chipwe kunwa chikuma wala navyuma vyeka vyakupendesa. Chakutalilaho, mukanda waU.S. Centers for Disease Control and Prevention wamba ngwawo, kunwa makanya “cheji kunehanga misongo yayivulu nakulingisa mutu avize. Kaha nawa cheji kwenyekanga vihanda vyavivulu vyamujimba.”

KUYOYA CHENU NAMUJIMBA WENU VYAPWA VYAVILEMU. Mukanda waVilinga 17:28 wamba ngwawo: “Twayoya, tweji kutambukanga, kaha nawa twapwako mwomwo [yaKalunga].” Mazu kana atela kutukafwa tulihende kujiponde numba nge tuli kumilimo, chipwe nge tunakutambukisa minyau chipwe kusakula vyakulihizumuna navyo. Katwatela kulihizumuna navyuma vize vinahase kutunehela ukaluko.

HONESENUNGA VISHINGANYEKA VYAKUHENGA. Vishinganyeka vyenu vyeji kuzachilanga hamwe namijimba yenu. Ngocho kehesenuko kulizakamina,  namatoto, nakulihenda kulwiso navyuma vyeka vize vinahase kumilingisa mupwenga navishinganyeka vyavipi. Mukanda waSamu 37:8 wamba ngwawo: “Mbila utenu, seza matoto.” Kaha nawa mukanda waMateu 6:34 wamba ngwawo: “Kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina.”

SHINGANYEKENUNGA HAVYUMA VYAMWAZA. Mukanda waVishimo 14:30 wamba ngwawo: “Muchima wakuunda weji kunehanga kuyoya kumujimba.” Mbimbiliya yamba nawa ngwayo: “Muchima wakuhomba weji kukumisanga ngolo jamutu.” (Vishimo 17:22) Vaka-sayasi navakiko vetavila mazu kana. Ndotolo umwe wamulifuchi lyaScotland ambile ngwenyi: “Nge wapwa uwakuwahilila, kaha naukehesako kuvizaviza oloze nge wapwa uwakupihilila kaha muvizaviza chikuma.”

PWENUNGA VAKUMIKA. Shimbu jimwe nayetu tunahase kwingila mucheseko chakuhona kulikangula ngana mwaUlf twavulukanga hakavanga. Chipwe ngocho, tunahase kuwana jijila jakuyoyelamo kweseka naukalu wetu. Kulizakamina chikuma haukalu chinalingisa vamwe vatohwese ukalu wavo. Mukanda waVishimo 24:10 wamba ngwawo: “Kachi nge nauhomba halwola lwavihuli, kaha ngolo jove najikeha.”

Kukehesako kulizakamina cheji kulingisanga mutu evwengako kanawa. Vatu vamwe veji kwitavilanga ukalu kana hakuwana jijila jakuyoyelamo. Omu mukiko chapwile nakuli Ulf. Ambile ngwenyi, alombelenga nakushinganyeka chikuma hajishiko jamuMbimbiliya, echi chamukafwile “awane jijila jakuyoyelamo kweseka naukalu wenyi.” Chikupu vene, omu mukiko vetavila navatu vavavulu vaze vanahichi muvyeseko vyavinene. Ulf atachikijile nge atela kupwa namuchima wakufwila kukafwa vakwavo nakuvavendejeka hakuvambulila mujimbu wamuMbimbiliya.

Lunga walijina lyaSteve naikiye apwile muukalu waunene. Omu apwile namyaka yakusemuka 15, apwile muponde yize yamulingishile atenguke. Jino omu ahetele hamyaka 18, mavoko enyi aputukile cheka kuzata. Kahomu ayile kuyunivesiti, akandupukilile mukunwanga vyuma vyakupendesa, nakunwa chikuma wala nakulinga ujila. Kapwile nalutalililoko palanga nomu aputukile kulinangula Mbimbiliya yize yamukafwile aseze vilinga vyavipi. Ambile ngwenyi: “Numba tuhu ngwalivwilenga kupwa nguwamokomoko hatando yayisuku, oloze halwola kanelu ngwalimwene kupwa nguwamulemu. Ngunapu jino nguwakuwahilila, wakuunda nakusuuluka.”

Vyuma ahanjikile Steve naUlf vyatwanukisa mazu atwama hali Samu 19:7, 8 yize yamba ngwayo: “Jishimbi jaYehova japwa jakukupuka, jeji kuhananga ngolo. . . . Jindongi jakufuma kuli Yehova japwa jakwoloka, jeji kulingisanga muchima uwahilile, jishimbi jaYehova japwa jitoma, jeji kulingisanga meso amunyike.”