Mukanda waHope in the Age of Anxiety wahanjika ngwawo “LUTALILILO LWAPWA LWALULEMU MWOMWO LWEJI KUKAFWANGA MUTU KUPWA NAUSOKO WAMWAZA NAKALUNGA. Kaha nawa lweji kukafwanga mutu ahone kulizakamina nakulivwa nge apwa wamokomoko, nakuhona kwivwa woma.”

Lutalililo lwetu lwapendamina haMbimbiliya yize yeji kutukafwanga tulihende kukutalilila vyuma vyamakuli. Hali Samu 146:3 hatwama mazu akwamba ngwavo “Kanda namufwelela vilolo, chipwe muli mwanamutu uze keshi kuhasa kumilwilako.” Shikaho katwatela kufwelela mutu uze keshi kuhasa kutuyovolako, oloze twatela kufwelela Tengi yetu uze atwama nangolo jakutesamo jishiko jenyi. Uno vyuma muka atushika? Talenu havyuma vinakavangizaho.

KUHUKA NACHIKAKUMA; KAHA VAKA-KWOLOKA NAVAKATWAMANGA MUKUUNDA: “Kunasale kashimbu kakandende kaha, vaka-kuhuka kaveshi kupwako chekako . . . Oloze vavavwovu navakaheta mavu, Kaha navakalivwisa kuwaha kuunda chamwenemwene.” Omu mukiko wahanjika mukanda waSamu 37:10, 11. Kaha vesi 29 yamba ngwayo, ‘vaka-kwoloka . . . navakatwamanga hamavu haya myaka yosena.’

JIJITA NAJIKAKUMA: “Yehova . . . Mwakumisa jijita hamavu hosena. Mwahokwojola mata amanana nakuchika makunga. Mwocha matemba ajita nakakahya.”—Samu 46:8, 9.

MISONGO, NAKUYANDA, NAKUFWA KAVYESHI KUKAPWAKO CHEKAKO: “Mbalaka yaKalunga yili navatu hamwe . . . Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—Kusoloka 21:3, 4.

VATU NAVAKAPWA NAVYAKULYA VYAVIVULU: “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”—Samu 72:16.

NAKUKAPWA CHIYULO CHAKWOLOKA CHIZE NAVAKAYULA KUFULUMENDE YIMWE YAWANGANA WAKULISHITU: “[Yesu Kulishitu] vamuhanyine chiyulo, naulemu, nawangana mangana vatu veka naveka, navaka-mafuchi, navaka-malimi eka naeka vamuzachilenga. Chiyulo chenyi chapwa chiyulo chahaya myaka yosena chize kacheshi kukakumako, kaha wangana wenyi kaveshi kukaunongesako.”—Ndanyele 7:14.

Uno tunahase kufwelela ngachilihi jishiko kana? Omu Yesu apwile hano hamavu alingile vyuma vize vyasolwele nge atamo kupwa Mwangana uze vatongola. Okilenga vaveji, nakulisa vaze vapwile nazala, nakusangula vafu. Kunangula chenyi nawa chapwile chachilemu chikuma, mwomwo chapwile najindongi jize najikakafwa vatu vakatwame mukuunda nakulinunga haya myaka yosena. Yesu ahanjikile nahavyuma navikasoloka kulutwe, navinjikizo vize navikasolola nge kukuma chakano kaye chinapandama.

Yesu ahanjikile chimweza ngwenyi, hamakumbi akukuminyina kakweshi kukapwa kuunda namukingoko, oloze ahanjikile havinjikizo vize navikasoloka ‘kuchikukulwishi chakatwamino kamyaka yino’ vyakufwana nge, kulizungisa chamafuchi, nazala yakalombolombo, namisongo, namindenda yayinene. (Mateu 24:3, 7; Luka 21:10, 11; Kusoloka 6:3-8) Yesu ambile nawa ngwenyi: “Zangi yavatu vavavulu nayikahola mwomwo yakuvula chaupapwoki.”—Mateu 24:12.

Mazu kana alitombola namazu vasonekele kuli muka-kusoneka Mbimbiliya weka. Mazu kana atwama hali WaChimoteu 2, 3:1-5, akwamba ngwawo, “hamakumbi akukuminyina,” vatu navakalizanga vavene, nakuzanga jimbongo, nakuzanga viseke, nakulitukwojola, navakapwa vikenya. Vatu mujitanga kaveshi kukalivwasanako, kaha vana nawa, navakapwa vaka-kulikanga kuli visemi javo, vaka-kunangula vamakuli nawa navakalisala.

Vinjikizo kana vili nakusolola nge tuli nakuyoyela mumakumbi akukuminyina. Kaha vili nakusolola nawa nge Wangana waKalunga kalinwomu uputuke kuyula hano hamavu. Chipwe ngocho, Yesu apolofwetele nawa vyuma vyamwaza navikasoloka mumakumbi akukuminyina ngwenyi: “Kahou mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.

Ou mujimbu wamwaza weji kuhuhumunanga vaka-kuhuka nakuhana lutalililo kuli vaka-kwoloka, nakuvafwelelesa nge vyuma vyamwaza vize vatushika navikatesamo chikupu. Uno munakusaka kulinangula vyavivulu kutalisa kuvyuma vyamwaza vatushika tahi? Nge mukiko, kaha talenu lifwo lyamakumishilo lyamangazini yino.