VATU VAPWA VAKULIPWILA MUJIJILA JAKULISEZASEZA, VEJI KUSONEKANGA, NAKUKWITA ULOMBO, NAKUTUNGA VYUMA, NAKUSHINGANYEKANGA HAVIHULA VYAVILEMU VYAMUKUYOYA: Mwomwo ika kwapwila melu namavu? Kuyoya chetu chaputukile ngachilihi? Mwomwo ika tweji kuyoyelanga? Vyuma muka twatalilila?

Vatu vamwe veji kwivwanga sonyi kuhulisa vihula kana, mwomwo vashinganyeka ngwavo vyapwa vyavikalu kuli vakiko. Veka vashinganyeka ngwavo vihula kana kavyatwama nanganyoko mwomwo kuyoya chalijililile chivene. William Provine uze alinangula chikuma mijimbu yakushikulu navyuma vyakuyoya ambile ngwenyi: “Kakwatwama tulungako, nevi tweji kuyoyelanga vene vyauchi, kaha nawa kakwatwama najindongi jahanjika hakuyoya, nakuyoya vene kachatwama naulumbunwisoko.”

Vatu vamwe kavetavila kunangula kanechiko. Veji kumonanga omu vyalonga vyuma vyamumelu nahamavu nomu vyasoloka kanawa, kaha nawa vyeji kutambukanga nakukavangiza kanawa jishimbi javyo. Veji kulikomokelanga hakumona vyuma vyakutenga. Kaha vatu kana veji kutunganga vyuma hakulondezeza vyuma kanevi. Hakumbi hakumbi veji kumonanga vyuma vize vatenga mujila yakukomwesa, kaha nawa vyeji kusololanga nge vavitenga kumutu wamangana chikuma keshi nge vyapwa vyakulijila kahako.

Vishinganyeka kana vinalingisa vatu vaze vafwelela ngwavo vyuma vyalijililile vivene vaputuke kufwila kutachikiza vyuma vyavivulu kutalisa kuchihande kanechi. Talenu havyakutalilaho vivali vinakavangizaho.

ALEXEI MARNOV NDOTOLO WAMISHISA YAKUWONGO. Ambile ngwenyi: “Hamashikola aze ngwatangililile vanangwilenga ngwavo Kalunga katwamako kaha nawa ngwavo kuyoya chalijililile chivene, ngocho vamwenenga mutu uze afwelele Kalunga kupwa wakusalila chikuma.” Oloze kuheta mu 1990, aputukile kukana kunangula kanechi.

Ambile nawa ngwenyi: “Ngunafwilanga chikuma kutachikiza kanawa omu vyuma vimwe vyazata kuhakilako vene nawongo wamutu. Jila weji kuzachilangamo wongo wamutu yapwa yayikalu chikuma kutachikiza kuvatu. Uno wongo vautengele ukafwe mutu kupwa nachinyingi nauhashi wakulinangula kufumaho kaha himwafwa tahi? Omu keshi mukikoko. Kaha ngwaputukile jino kushinganyeka nakulihulisa ngwami: ‘Mwomwo ika twapwilako? Mwomwo ika tweji kuyoyelanga?’ Hanyima yakushinganyeka yavihula kana, ngwakukulwile jino ngwami, kwatwama Tengi.”

Kufwila kutachikiza ovyo tweji kuyoyelanga chalingishile Alexei aputuke kulinangula Mbimbiliya. Kutwala muze napuwenyi uze apwa Ndotolo uze akanyinenga ngwenyi Kalunga katwamako, aputukile jino kulinangula Mbimbiliya mangana amone numba nge vyuma apwile nakulinangula lunga lyenyi vyapwile vyamuchano nyi chiku. Oholyapwa jino vosena vafwelela Kalunga nakutachikiza vyuma ajina kukalingila vatu kweseka namuze yalumbununa Mbimbiliya.

HUABI YIN NDOTOLO UZE ALINANGULA VYAKUZUMA CHALIKUMBI. HUABI YIN, alinangwile vyasayasi hamyaka yayivulu nakuhehwojola hakuzuma chalikumbi. Achishinganyekenu hatuvyuma twatundende [electrons naions] tuze twatunga kuzuma chamusana.

HUABI ambile ngwenyi: “Etu vaka-sayasi, tweji kulinangulanga vyuma vyakukomwesa vize vyatwama mwilu nahano hamavu kaha nawa tweji kuwananga nge vyuma kana vyazata mukulonga nakukavangiza jishimbi javyo. Kaha ngwalihulishile ngwami; ‘Uno eji jishimbi iya ajihakileko?’ Kachi nge kakahya kasakiwa kukazachisa kanawa numba kahone kwenyeka vyuma, kaha iya ahakileko jishimbi jakutwaminyina likumbi mangana kupwenga kuzuma chakutamo? Kutwala muze ngwambile jino ngwami: Mazu atete aze atwama muMbimbiliya apwa akwoloka. Aze amba ngwawo: ‘Hakuputuka Kalunga atangile melu namavu.’”—Kuputuka 1:1.

Kuhanjika muchano, sayasi yinalingisa vatu vaputuke kuhulisa vihula vyakufwana nge, uno maselusi awongo azata ngachilihi? Uno likumbi lyeji kunehanga ngachilihi kuzuma nakumunyika? Oloze Alexei naHuabi vawanyine nge Mbimbiliya yakumbulula vihula vyavilemu vyakufwana nge “mwomwo ika” melu namavu vyapwilako? Mwomwo ika melu namavu veji kuvitwaminyinanga kujishimbi? Kaha mwomwo ika twapwilako?

Mbimbiliya yahanjika kutalisa kumavu ngwayo: “[Kalunga] kawatengele chawanako, oloze awatengele ngwenyi hatwamenga vatu.” (Isaya 45:18) Chapundu vene, Kalunga ajina kulinga vyuma vyamwaza hano hamavu, vyuma ajina Kalunga vanavivuluka muchihande chinakavangizaho chize chinahanjika halutalililo lwetu lwakulutwe.