Liuka lyaUnited Nations lili nakukolezeza vatu vapwenga vakulinunga mukaye kosena. Kaha nawa, lili nakufwila kulingisa vatu vosena vamonenga lisesa lyavatu kupwa lyalilemu nakukinga mavu etu. Mwomwo ika? Maher Nasser asonekele mumukanda waUN Chronicle ngwenyi: “Kwalumuka chajingonde, nauhwanga, naluyanjisa, navikokojola, navatu kuseza membo avo, namisongo vili nakusoloka mukaye kosena.”

Echi chinalingisa vatu vamwe vakundwize chikuma fulumende yakaye. Havatu kana hali nambozo Dante wamuItaly uze alinangwile chikuma mangana autu naAlbert Einstein uze alinangwile chikuma vyasayasi. Dante atachikijile ngwenyi kuunda kacheshi kwilila mukaye kaze vali nakuyula kuli vatwamina vamapolitikiko. Shikaho, azachishile mazu ahanjikile Yesu ngwenyi, “Weshowo wangana naulimbalaka uvene weji kunonganga.”—Luka 11:17.

Nakushimbula chiku kufuma halwola yakumine Jita yaKaye yamuchivali, yize nawa vazachishile tupata vangolo vavali hakuzunga, Albert Einstein asonekelele mukanda kuGeneral Assembly of the United Nations ngwenyi: “Liuka lyaUnited Nations lyatela kwanguhwa kuhakako jindongi jakukinga kaye mangana litunge fulumende yamukaye kosena.”

Kutala vatwamina vamapolitiki vaze navatunga eyi fulumende yangolo, vanahase chikupu kupwa nauhashi wakuzata kanawa, nakulihenda kuvilinga vyamaswekeza nakuyanjisa vatu tahi? Kutala navayulanga mwamupi nganomu vanayulunga vakwavo nyi? Evi vihula kana vinatwanukisa mazu ahanjikile Lord Acton wamuBritain uze alinangula vyakushikulu, ngwenyi: “Ngolo jakuyula jeji kwenyekanga vatu, kaha kupwa nangolo chikuma cheji kupihisanga vatu sulumunu.”

Chipwe ngocho, kulinunga hamwe chikiko chinahase kulingisa vatu valivwise kuwaha kuunda chamwenemwene nakulivwasana. Jino vyuma muka twatela kulinga mangana tulivwise kuwaha vyuma kana? Uno chikupu tunahase kulivwisa kuwaha vyuma kana tahi? Mbimbiliya yakumbulula ngwayo, tunahase vene chikupu. Pundu vene vyuma kana navikatesamo. Mujila muka? Fulumende yaKalunga yikiko nayikatesamo vyuma kana, keshi fulumende vayula kuli vaka-mapolitikiko. Fulumende yaKalunga nayikasolola ngolo jaKalunga jakuyula vyuma atenga. Mbimbiliya yavuluka fulumende yaKalunga ngwayo, “Wangana waKalunga.”—Luka 4:43.

Yesu Kulishitu apwile nakushinganyeka haWangana waKalunga hakuhanjika mazu atwama mukulomba chenyi ngwenyi: “Wangana wove wizenga. Mwaya muchima wove mulingiwe . . . nahamavu nawa.” (Mateu 6:9, 10) Chikupu vene, Wangana waKalunga naukalingisa mwaya muchima waKalunga mukalingiwe hano hamavu, keshi mwaya muchima wavatu vafwila kulinganyalisa vaveneko.

Wangana waKalunga vauvuluka nawa ngwavo, “Wangana wamelu.” (Mateu 5:3) Mwomwo ika? Mwomwo Wangana kana naukapwanga mwilu oloze chiyulo chawo nachikaheta nahano hamavu. Shinganyekenu omu mwalumbunukila mazu kana. Wangana kana kaweshi kukasakiwa kukaukundwiza najimbongo chipwe navikumbako. Chuma kana cheji kuvendejekanga vatu chikuma.

Lizu “wangana” lyasolola hatoma nge Wangana waKalunga wapwa hifulumende yamwenemwene. Wangana kana veji kuuyulanga kuli Yesu Kulishitu uze vatongola kuli Kalunga. Mbimbiliya yahanjika hali Yesu ngwayo:

• “Fulumende nayikapwanga hachifwiji chenyi . . . Fulumende yenyi nayikayanga lika nakutanda, kaha kuunda kacheshi kukakumako.”—Isaya 9:6, 7, King James Version.

•   “Vamuhanyine chiyulo, naulemu, nawangana mangana vatu veka naveka, navaka-mafuchi, navaka-malimi eka naeka vamuzachilenga. Chiyulo chenyi . . . kacheshi kukakumako.”—Ndanyele 7:14.

• “Wangana wakaye unapu jino Wangana waMwata wetu [Kalunga] naKulishitu yenyi.”—Kusoloka 11:15.

Kulomba chaYesu chize anangwile, nachikatesamo omu Wangana waKalunga naukalingisa mwaya muchima waKalunga mukalingiwe hano hamavu. MuWangana kana, vatu vosena navakalinangula mwakulamina kanawa mavu mangana akapwe cheka amwaza kuyoyelaho.

Chachinenenyi Wangana waKalunga naukanangula vatu vaze navakayula kuWangana kana. Vatu vosena navakavanangula vyuma vyamuyachi woumwe. MuWangana kana kamweshi kukapwa vikokojola navihandwako. Mukanda waIsaya 11:9 wamba ngwawo: “Kupili yami yajila Kaveshi kukenyekako chipwe kupihisako Mwomwo hamavu hosena nahakazala nachinyingi chakumutachikiza Yehova nge muze kalungalwiji azala nameya.”

Vatu mukaye kosena navakalinunga nakutwama mukuunda ngana muze linafwilanga liuka lyaUnited Nations. Mukanda wa Samu 37:11 ngwawo: “[Vatu] navakalivwisa kuwaha kuunda chamwenemwene.” Halwola kana, mazu akufwana nge “uhwanga,” “kwenyeka peho nameya,” “nauhutu,” “najita” katweshi kukawanuka chekako. Uno vyuma kana navikasoloka lwola muka? Lwola muka Wangana waKalunga naukaputuka kuyula hano hamavu? Uno naukafumisako ngachilihi vyuma kana? Kutokwa muka munahase kupwa nacho kuchiyulo chaWangana kana? Tushimutwilenu jino havihula kanevi.