Vakweze vamwe vamalunga, vaze vatangila hashikola yimwe yamwaza yamuCanada vavavangijikilile ngwavo vanapiki mukwavo muka-shikola walunga. Hanyima yavyuma kana, Leonard Stern, asonekele mulipapilo lyamijimbu lyaOttawa Citizen ngwenyi: “Kupwa namangana chikuma, nakutanga mashikola amwaza nakupwa naluheto kacheshi kuhonesa vakweze vechenga kulinga vyuma vyavipiko.”

Stern ambile nawa ngwenyi: “Echi chinahase kulingisa vatu vashinganyeke ngwavo, visemi vatwama namulimo wakunangula vana vavo vatachikize vyuma vyakwoloka nevi vyakuhenga. Kuhanjika muchano visemi vavavulu vasaka vanavavo vatange chikuma nakupwa naluheto lwaluvulu.”

Chikupu vene, kutanga shikola chapwa chachilemu. Chipwe ngocho, numba nge mutu mwatanga chikuma, oloze kutanga chenyi kacheshi kumukafwa ahonese vishinganyeka vyavipiko. Kulihi tunahase kuwana kunangula chamwenemwene chize nachitukafwa tupwenga navilinga vyamwaza?

Mbimbiliya yapwa nge chitalilo. Omu tweji kulitalanga muchitalilo, tweji kumonanga haze twatela kuwahisa. (WaYakova 1:23-25) Oloze Mbimbiliya yeji kutukafwanga chikuma. Yeji kutukafwanga twalumuneko chiyoyelo chetu nakupwa navilinga vize vyeji kunehanga kuunda nakutulingisa tulinunge. Vilinga kana shina kukokweza, nakeke, nakutalilila chikoki, namuchima wakulikanyisa nazangi. Zangi vayivuluka nawa ngwavo, “yeji kununganga vatu hamwe mujila yakukupuka.” (Wavaka-Kolose 3:14) Mwomwo ika zangi yapwila yayilemu chikuma? Talenu omu yahanjika Mbimbiliya hazangi.

• “Zangi yeji kutalililanga chikoki kaha nawa yeji kutetelanga. Zangi kayevwa lwisoko. Kayeshi kulitukwojolako, kayeshi kulivwimbako, kayeshi kulinga mwakuhingamako, kayeshi kufwila vyuma vyayo yiveneko, kayeshi kukwata washi matotoko. Kayeshi kulama kokoko. Kayeshi kuwahilila navilinga vyakuhengako, oloze yeji kwivwilanga kuwaha muchano. Yeji kufwikanga vyuma vyosena, . . . nakukakachila muvyuma vyosena. Zangi kayakumako”—Wavaka-Kolinde 1, 13:4-8.

• “Zangi kayeshi kulinga vyuma vyavipi kumutuko.”—Wavaka-Loma 13:10.

• “Oloze chachinenenyi, pwenunga nazangi yayinene yakulizanga navakwenu, mwomwo zangi yeji kufwikanga jishili jajivulu.”​—WaPetulu 1, 4:8.

Mweji kwivwanga ngachilihi nge muli navatu vaze vamizanga? Uno mweji kulivwanga kupwa vakukingiwa chipwe vakulihehwa tahi? Mukiko, mwomwo mwatachikiza ngwenu kaveshi kulinga vyuma vize mwajinda.

Zangi nawa yeji kulingisanga vatu valisuule nakwalumunako chiyoyelo chavo, mangana vanganyalise vakwavo. Chakutalilaho, Omu George apwile  jino namuzukulu asakile kushikamanga nenyi chikuma. Oloze kwasolokele ukalu umwe. Isewenu yaGeorge kasakilenga mwanenyi vamuhate kuli kaka yenyiko mwomwo anwinenga makanya chikuma. Jino George Alingile ngachilihi? Numba tuhu, anwinenga makanya hamyaka 50, oloze echele mwomwo yakuzanga muzukulyenyi. Chikupu vene zangi yeji kulingisanga vatu valumuneko chiyoyelo chavo!

Tweji kulinangulanga vilinga vyazangi. Visemi veji kuzatanga mulimo waunene wakunangula vanavavo vapwenga nazangi. Veji kuzakamanga vanavavo nakuvakinga nakuvavendejeka nge vanalilemeka chipwe nge vanaviji. Visemi vamwaza veji kushimutwilanga navana vavo nakuvanangula. Kaha nawa, veji kuzangamisanga vana vavo nakuvanangula jindongi jakuvakafwa vatachikize vyuma vyakwoloka nevi vyakuhenga. Visemi kana veji kusololanga chakutalilaho chamwaza kaha veji kuvalondezezanga kuli vanavavo.

Chaluvinda, visemi vamwe veji kuhonanga kuzata kanawa mulimo wavo wakulela vana. Uno echi chinakulumbununa nge vanavavo kaveshi kukapwa navilinga vyamwazako tahi? Omu keshi mukikoko. Vatu vamwe kuhakilako vene navaze vanakolela mujitanga jize visemi javo kavasolwelenga chakutalilaho chamwazako, valumwine chiyoyelo chavo nakupwa jino vatu vamwenemwene muchitungilo. Nganomu natumona muchihande chinakavangizaho, vatu vamwe vaze vamwenenga kuvatu nge kaveshi kuhasa kwalumuna chiyoyelo chavoko, vanalumuka nakupwa hivatu vamwenemwene.