Kulinangula chize chazama haMbimbiliya chatwama nangolo jakwalumuna kuyoya chavatu. Tutalenu havyakutalilaho vyavatu vavali, Ricardo naAndres.

RICARDO: Omu ngwapwile namyaka yakusemuka 15, ngwazanyine mulizavu lyavihwanga. Masepa jami vanguhungumwishile chikuma. Ngocho, ngwafwililile jino kupwa munjele hamyaka 10. Numba tuhu, kushinganyeka kana chinahase kupwa chamokomoko, oloze vatu vaze vakashilenga munjele hamyaka yayivulu vavavumbikilenga chikuma mungalila yetu. Kaha ngwasakile chikuma kunguvumbika ngana mwavakiko.

Ngwalingilenga vyuma vyavipi vyakulisezaseza vyakufwana nge, kunwa maundu akupendesa, nakulinga ujila naulyanyi. Likumbi limwe, naufuku twaputukile kuliloza nalizavu lyeka lyavihwanga. Kaha ngwashinganyekele ngwami pamo navangujiha, oloze ngwachinyine chakuzeneka kungulemeka. Kufumaho, ngwaputukile kushinganyeka hachiyoyelo chami, navyuma ngwafwililile kulinga mukuyoya, kaha ngwashinganyekele kwalumunako chiyoyelo chami. Mujila muka? Kulihi ngunahase kuwana kukafwa?

Vausoko wami vamwe kavapwile vakuwahililako, mwomwo vapwilenga nakumona ukalu mukuyoya chavo. Oloze tanga yanatwami umwe yapwilenga yakuwahilila chikuma. Ngwatachikijile ngwami vatu mutanga kana vapwilenga navilinga vyamwaza, kaha nawa vayoyelenga kweseka najindongi jamuMbimbiliya. Ngunakwanuka lwola lumwe vangunangwile ngwavo, Kalunga lijina lyenyi ikiye Yehova. Nakushimbula chiku kufuma halwola twapwile nakuliloza, ngwalombele kuli Yehova nakumuvuluka lijina lyenyi mangana angukafwe. Likumbi lyakavangijileho ngwevwile mutu ali nakungongomweza kuchikolo, mutu kana apwile Chinjiho chaYehova, echi changukomwesele chikuma. Ou Chinjiho apwile jino muka-kungunangula Mbimbiliya.

Kufumaho, ngwapwile jino muukalu waunene. Masepa jami vaze ngwapwilenga navo mulizavu lyauhwanga vangutuminyinenga shinga nakungulweza nguyenga ngukashikame navo. Numba tuhu kachapwile chachashiko, oloze ngwakanyine. Mwomwo ngwafwililile lika kulinangula Mbimbiliya. Kaha ngwasuuluka chikuma hakuwana nge ngwakanyine. Chiyoyelo chami chalumukile, kaha ngwapwa jino nguwakuwahilila chikuma.

Ngunakwanuka omu likumbi limwe ngwalombele kuli Kalunga nakumulweza ngwami, hakavanga ngwafwililile kupwa munjele hamyaka 10 mangana vanguhane kavumbi. Ngocho ngwamulombele angwitavise kuzata mulimo washimbu yosena kafwe hamyaka 10, mangana ngukafwe vatu ngana muze vangukafwile nayami. Kalunga akumbulwile kulomba chami, mwomwo ngunazate jino mulimo washimbu yosena hamyaka 17. Kaha kangwayile Munjeleko.

Chaluvinda, masepa ngwalikachilenga navo vavakasa munjele hamyaka yayivulu, vamwe nawa vafwa lyehi. Kangwaliveyako hakushinganyeka hachiyoyelo chami chakunyima, kaha ngweji kusakwililanga chikuma vausoko wami vaze vapwa Vinjiho. Mwomwo vafwililile kuyoya kweseka najindongi jamuMbimbiliya. Shikaho, ngweji kuvahananga kavumbi chikuma kuhambakana kala mutu uze apwile mulizavu lyavihwanga. Chikumanyi ngweji kusakwililanga Kalunga hakungunangula jila yamwaza yakuyoyelamo.

 ANDRES: Ngwasemukilile nakukolela mungalila yakuhutwa. Mungalila kana mwalisalile vilinga vyakufwana nge kunwa maundu akupendesa, namakuli, nauhwanga naujila. Tata apwile muka-kunwa chikuma wala namaundu akupendesa. Kaha azungilenga lika namama nakulyamba mazu akasautu lwola lwosena.

Ngwaputukile kunwa wala namaundu akupendesa omu ngwapwile ngukanyike chikuma. Kaha ngwapwile nakutwamanga kumikwakwa nakwiva nakulanjisa vyuma vize ngwevilenga. Omu ngwakolele, tata alikachile chikuma nayami kaha angulongesele mwakuseunwina maundu akupendesa navyuma vyeka vize vakanyisa mulifuchi lyetu nakuvilanjisa mukusweka. Kaha ngwawanyinenga jimbongo jajivulu muwashiwashi. Likumbi limwe, tupokola vejile kuzuvo yami nakungukasa. Ngocho vangukashile hamyaka 5 mwomwo yakujiha mutu.

Likumbi limwe nachimene, vatusanyikile tuvosena tuyenga nakwivwilila kuvyuma navanangula Vinjiho jaYehova kutalisa kuMbimbiliya, nayami ngwayileko. Vyuma ngwalinangwile vyapwile vyamuchano. Vyuma ngwevwile vyangwivwishile kuwaha ngocho ngwaputukile kulinangula mbimbiliya naVinjiho jaYehova. Kavangunangwilenga havyuma vize navingufutwisa kumuchimako, oloze vangunangwilenga omu vyapwa vilinga vyaKalunga vyakulipwila.

Ngwashinganyekele jino ngwami, kangweshi kuhasa kwalumuna kuyoya chami chakuzeneka mutu wakungukafwako. Chikumanyi omu vanguyanjishilenga kuli vakwetu vafunge vaze kavasakile ngulinangule Mbimbiliyako. Ngocho ngwalombele Yehova anguhane ngolo namangana, kaha angukafwile. Chikupu vene, ngwomikile nakuputuka kulwezako vakwetu vafunge vyuma yahanjika Mbimbiliya.

Omu likumbi lyakungulovola munjele lyapandamine, ngwalizakaminyine chikuma hachiyoyelo chami mwomwo ngwasakile kutwamamo makumbi amavulu. Halikumbi lyakungulovola munjele twalisalishile navakwetu vafunge, kaha veka vambile ngwavo: “wendaho ove muka-kunangula wakanyike.”

Kachi nge kangwetavilile Kalunga angunanguleko, kachi chiyoyelo chami kachapwa nganomu chili makumbi anoko. Ngwasakwilila chikuma Kalunga hakutachikiza ngwami anguzanga kaha nawa kangumbilileko. a