Kalinwomu Wangana waKalunga uze wapwa fulumende yakaye, uze vahakako kuli Kalunga ulingise vatu vatwame mukuunda nakulinunga hano hamavu. Hali Samu 72:7 vatushika ngwavo: “Nakukapwa kuunda chamwenemwene.” Jino lwola muka Wangana waKalunga naukaputuka kuyula hano hamavu? Uno naukalinga ngachilihi ngocho? Kutokwa muka munahase kupwa nacho kuchiyulo chaWangana kana?

Mbimbiliya yapolofwetele vinjikizo vize navikasolola nge Wangana waKalunga kalinwomu wizenga. ‘Vinjikizo’ kana shina jijita, najizala jakalombolombo, namindenda nakuvula chaupapwoki.—Mateu 24:3, 7, 12; Luka 21:11; Kusoloka 6:2-8.

Mbimbiliya yapolofwetele nawa ngwayo: “Hamakumbi akukuminyina nahakapwa lwola lwalukalu. Mwomwo vatu navakapwa vaka-kulizanga vavene, vaka-kuzanga jimbongo, . . . vaka-kulikanga kuli visemi, vaka-kuhona kusakwilila, vaka-kuhona kushishika, vaze kavazanga vakwavoko, vaze kaveshi kwitavila vivwasanoko, vaka-kuvangila vakwavo, vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako, . . . vaka-kulivwimba, vaka-kuzanga viseke muchishishisa chakuzanga Kalunga.” (WaChimoteu 2, 3:1-4) Numba tuhu vatu vamwe vanapunga navilinga kanevi, olozenyi makumbi ano vilinga kana vinalisale chikuma.

Upolofweto tunashimutwila, waputukile kutesamo mu 1914. Vatu vamwe vaze valinangula vyakushikulu vahanjikile omu kaye kanalumuka kufuma vene mumwaka wa 1914. Chakutalilaho, Peter Munch wamuDenmark uze alinangula vyakushikulu, ambile ngwenyi: “Jita yapwile mumwaka wa 1914 yanehele kwalumuka chachinene chikuma mukuyoya chavatu. Kufuma vene mumwaka kana, vyuma vinapihilangako lika kaha kunapunga vijindo, navatu kuhona kupwa vakukingiwa kuvihela vyosena, naukalu weka nawa.”

Tuyokutuyoku nawa, numba tuhu vyuma kana vili nakusoloka makumbi ano, oloze kalinwomu kupwenga kuunda. Kaha vyuma kana vili nakusolola nawa nge Wangana waKalunga uze naukayula hamavu hosena unapandama chikuma. Yesu ahanjikile chinjikizo chamwaza chize chasolola nge tunakuyoyela mumakumbi akukuminyina, ngwenyi: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.

Ou mujimbu wamwaza ukiko wapwa chihande chachinene veji kwambululanga Vinjiho jaYehova. Shikaho mangazini yavo veji kuyivulukilanga ngwavo, Kaposhi Kakutalila Ali Nakuvilika Wangana waYehova. Kakavulu ou Kaposhi Kakutalila eji kuhanjikanga havyuma vyamwaza vize Wangana waKalunga naukalingila vatu navize naukalinga hano hamavu.

Kukumbulula chinazame havishina vino viwana:

1. Wangana kaveshi kukauyula kuli vaka-mapolitiki vali nakuyula kano kayeko.

2. Vatwamina vamapolitiki kaveshi kuketavila kuvayulako, ngocho navakazunga naWangana waKalunga.—Samu 2:2-9.

3. Wangana waKalunga naukanongesa mawangana osena amapolitiki aze afwila kuyula vatu. (Ndanyele 2:44; Kusoloka 19:17-21) Shikaho, kuzunga chamakumishilo vachivuluka ngwavo Alamangetone.—Kusoloka 16:14, 16.

4. Vatu vaze vafwila kuliluula kuWangana waKalunga navakayovoka hajita yaAlamangetone nakukatwama mukaye kakahya kakuunda. Ngocho, navakapwa lizavu lize vavuluka muMbimbiliya ngwavo, “liyongomena lyalinene.” Vatu kana navakavula kafwe jimiliyoni.—Kusoloka 7:9, 10, 13, 14.

Chuma chatete twatela kulinga mangana vatuyule kuWangana waKalunga shina, kulinangulanga. Yesu alombele kuli Kalunga ngwenyi: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.”—Yowano 17:3.

Vatu veji kupwanga vakutokwa chikuma hakutachikiza Kalunga kupwa mutu nahenyi. Tushimutwilenu havyuma vino vivali: Chatete, veji kufwelelanga chikuma Kalunga. Lufwelelo kana lwazama haunjiho wamwenemwene, nakulingisa vatu vatachikize chikupu ngwavo Wangana waKalunga kuwatwama kaha kalinwomu uputuke kuyula hano hamavu. (WavaHepeleu 11:1) Chamuchivali, vatu veji kuzanganga chikuma Kalunga navakwavo. Kuzanga Kalunga chikiko cheji kulingisanga vatu vamwononoke namichima yavo yosena. Kaha kuzanga vakwetu vatu cheji kutukafwanga kukavangiza mazu ahanjikile Yesu aze vavuluka ngwavo Lushimbi Lwalulemu, lwakwamba ngwavo: “Mweshomwo namusaka ngwenu vatu valinge kuli enu, nayenu nawa lingenu mwomumwe kuli vakiko.”—Luka 6:31.

Tengi yetu apwa ngana mwachisemi wazangi. Kaha asaka tulivwise kuwaha mukuyoya chetu. Asaka nawa tupwenga ‘nakuyoya chamwenemwene,’ chize vavuluka muMbimbiliya. (WaChimoteu 1, 6:19) Makumbi ano katwapwa ‘nakuyoya chamwenemweneko.’ Vatu vavavulu vali nakuyanda chikuma kaha chiyoyelo chavo chili muponde. Hakusaka mutachikize omu nachikapwa ‘kuyoya chamwenemwene,’ manenu tushimutwilenu havyuma vyamwaza vize Wangana waKalunga naukalingila vatu.