Kulizakamina cheji kwizanga kuli mutu kachi nge kunasoloka vyuma vimwe vize vinamukaluhwila. Kaha kuwongo kweji kufumanga maselusi aze eji kulingisanga mujimba wivwakane nge uli nakutambuka. Echi cheji kulingisanga muchima uputuke kuluta chikuma, kaha manyinga eji kuputukanga kutambuka washi nakulingisa mutu aputuke kuhwimasana, kaha mishisa nawa yeji kuputukanga kulikwikila. Shimbu kanda mutu atachikize vyuma navisoloka, mujimba weji kupwanga wakulizanga navyuma kana. Kachi nge vyuma wapwanga nakulizakamina vinakumu, kaha mujimba weji kuundanga nakupwa cheka ngana muze wapwa makumbi osena.

Kulizakamina cheji kulingisanga mutu ahase kulipika naukalu chipwe naponde yinamuwane. Wongo ukiko weji kulingisanga mutu ejive ngwenyi nalizakamina. Kulizakamina chamwaza nachilingisa mutu azachile washi havyuma vinasoloka. Kulizakamina chamwaza chinahase kumikafwa mutesemo vyuma munalitomena kulinga, vyakufwana nge kuhita vyeseko namusoneka kushikola, kumihwojola vamingise milimo chipwe kwazana mukuhema chakulitapa.

Chipwe ngocho, kulizakamina hatando yayisuku chinahase kuneha ukalu kumujimba, namuvishinganyeka naukalu weka. Vilinga vyenu natwamiso yenu navakwenu yinahase kwalumuka. Vatu vaze veji kulizakaminanga veji kuputukanga kunwa makanya, namaundu akupendesa, nakulya chikuma navilinga vyeka vyavipi. Kaha nawa veji kuhombanga chikuma, nakuzeya chipwe vene kushinganyeka kulijiha.

Numba tuhu vaze veji kulizakaminanga kaveshi kupwa naukalu woumweko, oloze kulizakamina cheji kunehanga misongo yayivulu chikuma, naukalu weka kumujimba wamutu.