Chinyingi Chize Chatupandamisa Kuli Kalunga
Numba tuhu Tengi yetu atwama nangolo, oloze atwama nawa navilinga vyamwaza. Kaha asaka tumutachikize nakupandama kuli ikiye. (Yowano 17:3; WaYakova 4:8) Evi vikiko vyamulingisa atukafwe tumutachikize chikuma.
Tengi Yetu Atwama naLijina
“Vatu vatachikize ngwavo, ove ukwechi lijina lyove yove Yehova, yove kaha uka wove wapwa uWakulitulaho Chikuma hamavu hosena.”—SAMU 83:18.
Mbimbiliya yanangula ngwayo, Yehova ikiye kaha Kalunga wamuchano. Ikiye atengele melu namavu navyuma vyakuyoya vyosena. Ikiye kaha twatela kulemesa.—Kusoloka 4:11.
Yehova Apwa Kalunga waZangi
“Kalunga ikiye zangi.”—WAYOWANO 1, 4:8.
Yehova asolola vilinga vyenyi kuhichila muMbimbiliya namuvyuma atenga. Zangi yikiko yapwa yayilemu chikuma havilinga kana, mwomwo yikiko yeji kumulingisanga alinge vyuma vyosena nasake. Nge natutachikiza chikuma Yehova kaha natumuzanga chikuma.
Yehova Apwa Kalunga Muka-Kukonekela
“Ove wapwa uKalunga muka-kukonekela.”—NEHEMIYA 9:17.
Yehova atachikiza ngwenyi katwakupukako, ngocho eji kutukonekelanga. Nge natumulomba atukonekele milonga yetu, nakuzata nangolo mangana twechenga kulinga vyuma vyavipi, kaha mwatukonekela nakuhona kutuzangamisa hamilonga kana.—Samu 103:12, 13.
Yehova Asaka Tumulombenga
“Yehova atwama hakamwihi navosena vaze veji kumusanyikanga . . . Eji kwivwanga tuwelele twavo.”—SAMU 145:18, 19.
Yehova kasaka tumulemesenga hakukavangiza visemwa navijila chipwe kuzachisa tuponyako. Eji kwivwililanga kukulomba chetu ngana muze chisemi wazangi eji kwivwililanga vana venyi.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Yehova Ikiye Iya?
Uno apwa Kalunga wavaIsalele kaha tahi?
KUKUMBULULA VIHULA VYAKUPANDAMA KUMBIMBILIYA
Uno Kalunga Apwa Ngolo Tahi?
Mbimbiliya yahanjika ngwayo Kalunga atengele vyuma vyosena, kutala atuzakama tahi?
