“Shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena.”—WAVAKA-LOMA 5:12.

Kalunga atengele visemi jetu vakulivanga, Alama naEve, navishinganyeka vyakukupuka namijimba yakukupuka. Avahanyine nawa palachise hano hamavu, limbo lyamwaza lize vavuluka ngwavo milemba yaEtene. Avalwezele valyenganga mihako yakumitondo yosena yize yapwile mumilemba, kufumisaho kaha mutondo umwe. Oloze Alama naEve valile muhako wakuze kumutondo, ngocho valingile shili. (Kuputuka 2:15-17; 3:1-19) Omu valikangile, Kalunga avahangile mumilemba, kaha chiyoyelo chavo chaputukile kukaluhwa. Kutwala muze, vasemene vana kaha navakiko chiyoyelo chavakaluhwilile. Alama naEve navana vavo vashinakajiwile nakufwa. (Kuputuka 3:23; 5:5) Shikaho, tweji kuvizanga, nakushinakajiwa nakufwa, mwomwo twafuma kuli Alama naEve.

“Kaye kosena katwama mumavoko ayauze wakuhuka.”—WAYOWANO 1, 5:19.

Ou ‘muka-kuhuka’ vamuvuluka ngwavo Satana. Apwa kangelo uze alikangile kuli Kalunga. (Yowano 8:44; Kusoloka 12:9) Kutwala muze, navangelo veka valikangile kuli Kalunga nakukavangiza Satana. Ava vangelo vavavuluka ngwavo vandemone. Ava vashipilitu vakuhuka veji kuzachisanga ngolo javo mangana vahungumwise vatu valikange kuli Tengi. Veji kuhungumwisanga vatu vavavulu mangana valinge  vyuma vyavipi. (Samu 106:35-38; WaChimoteu 1, 4:1) Satana navandemone veji kwivwanga kuwaha kuyanjisa vatu.

“Vyeshovyo ali nakukuva mutu, vikiko vene mwakaha nawa.”—WAVAKA-NGALESHA 6:7.

Kakavulu tweji kuyandanga mwomwo yashili twaswana, nakuyoyela mukaye kaze vali nakuyula kuli Satana. Oloze shimbu jimwe, ukalu veji kumonanga vatu wapwa wakulikokela vavene. Mujila muka? Ukalu veji kumonanga weji kwizanga mwomwo yakulinga vyuma vyavipi chipwe mwomwo yakusakula vyuma vyakuhenga. Oloze nge vatu navalinga vyuma vyamwaza, kaha veji kupwanga nachiyoyelo chamwaza. Chakutalilaho, mutwe watanga uze apwa wakashishi, samalikita, kaha nawa azanga tanga yenyi, eji kupwanga nachiyoyelo chamwaza nakulingisa tanga yenyi kupwa yakuwahilila. Oloze lunga uze eji kwingilanga mukusekasana chawiji nakunwa chikuma wala, chipwe muvwa eji kulingisanga tanga yenyi yingile muuhutu. Shikaho, nachipwa chamwaza nge natwivwililanga kuli Tengi yetu. Asaka tulivwise kuwaha vyuma vyamwaza vyavivulu, kuhakilako vene ‘nakutwama mukuunda.’—Samu 119:165.

“Hamakumbi akukuminyina . . . , vatu navakapwa vaka-kulizanga vavene, vaka-kuzanga jimbongo, . . . vaka-kulikanga kuli visemi, . . . vaka-kuhona muchima wakulikanyisa vavene, vaka-ukenya, vaze kavazanga vyuma vyamwazako.”—WACHIMOTEU 2, 3:1-5.

Makumbi ano, vatu vavavulu vali navilinga vasoneka hali echi chisoneka. Vilinga kana vili nakusolola nge tuli nakuyoyela ‘mumakumbi akukuminyina’ akano kaye. Visoneka nawa vyahanjikilile chimweza ngwavyo hamakumbi akukuminyina nakukapwa jijita, nazala, namindenda yayinene namisongo. (Mateu 24:3, 7, 8; Luka 21:10, 11) Shikaho, vatu vali nakuyanda chikuma nakufwa mwomwo yavyuma kanevi.