“Omu vaka-kuhuka navasoka nge mwila, omu vaka-kulinga mwamupi navafukila, vali nakulinga ngocho mangana vavanongese haya myaka yosena.”—SAMU 92:7.

Ngana muze twalinangulanga muchihande chinafumuho, vilinga vyavipi vili nakuvulilako lika. Katwatela kulikomokela hachuma kanako, mwomwo Mbimbiliya yahanjikilile chimweza hali WaChimoteu 2, 3:1-5 ngwayo, “hamakumbi akukuminyina,” vatu navakapwa navilinga vyavipi chikuma. Uno makumbi akukuminyina apwa makumbi muka? Apwa makumbi akukunyina akano kaye kavatu vaze kavononoka Kalungako. Kalinwomu Kalunga afumiseko vatu vaze veji kukananga kwecha vilinga vyavo vyavipi. Oloze vatu vaze veji kwononokanga Kalunga, navakapwangako lika. Mbimbiliya ngwayo: “Vaka-kwoloka navakaheta mavu, kaha navakatwamangaho haya myaka yosena.”—Samu 37:29.

“Kalunga uze eji kuhananga kuunda mwakachika Satana.”—WAVAKA-LOMA 16:20.

Omu navakafumisako vatu vakuhuka vosena, kuhakilako naSatana navandemone, hamavu hosena  nahakapwa jino kuunda. Tengi yetu atushika ngwenyi: “Naumwe wauchi [mwakamivwisa] woma.”—Mika 4:4.

“Mbalaka yaKalunga yili navatu hamwe . . . Mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.”—KUSOLOKA 21:3, 4.

Kuyanda nakuviza navikakuma mwomwo Kalunga mwakawahisa vyuma vize enyeka Satana naAlama naEve nakukatulingisa tukapwe vakukupuka. Shikaho “[nakufwa] kacheshi kukapwako chekako.” Vatu vaze vazanga Tengi nakumwononoka navakayoyanga haya myaka yosena. Uno navakatwamanga kumwe kulihi?

“Pambo nalifuchi lyaumu navikalisamba, kaha likundu nalikawahilila nakutemwina jitemo jasalafwone.”—ISAYA 35:1.

Omu Kalunga mwakanongesa vaka-kuhuka, hano hamavu nahakapwa hamwaza. Nahakapwa misenge namilemba yamwaza, kaha nawa vyakulya navikalisala. (Samu 72:16) Meya amutulungalwiji, namuvijiva namutulwiji nawakapwa amwaza, kaha namukapwa nawa vyuma vyakuyoya vyavivulu. Vatu kaveshi kukanuka cheka ngwavo ano mavu vawenyekelengako. Vatu navakatunga jizuvo javo nakutwamangamo. Kakweshi kukapwa mutu mwakahona zuvo chipwe vyakulya chipwe kupwa wakuhutwako.—Isaya 65:21, 22.

“Nakukapwa kusanguka.”—VILINGA 24:15.

Kutala muli nakusaka kukamona cheka vatu mwazanga vaze vafwa tahi? Kalunga wangolo josena mwakavasangula mangana vakayoye muPalachise hano hamavu. Muvosena namukalitachikiza. Achishinganyekenu hakuwaha namukevwa muvosena. Mwomwo ika twatela kufwelela ngwetu vyuma kana navikasoloka chikupu? Mbimbiliya yavuluka vakulwane navanyike vaze vasangwile nakuvalingisa valinunge cheka najitanga javo? Kaha kakavulu vatu vavavulu vamwenenga omu Yesu asangwilenga vafu.—Luka 8:49-56; Yowano 11:11-14, 38-44.