Vyuma Navitukafwa Tusuuluke naVyuma Tuli Navyo
Tuvosena twasaka kupwa vakuwahilila nakusuuluka navyuma tuli navyo, numba tuvajike, chipwe tuli muulo chipwe tuvanyike chipwe tuvakulwane. Mukiko naTengi yetu asaka tupwenganga. Ngocho, atuhana jindongi jamwaza jize najitukafwa.
Zatenunga Nangolo
“Akilikitenga, azatenga milimo yamwaza namavoko enyi, mangana apwenga navyuma vyakuhanako uze nakalikiza.”—WAVAKA-EFWESU 4:28.
Tengi yetu atukolezeza tumonenga kuzata milimo kupwa chamwaza. Mwomwo ika? Mutu uze eji kuzatanga nangolo, eji kupwanga wakuwahilila mwomwo eji kuwananga vyuma vyakulikafwa navyo natanga yenyi. Nahase nawa kukafwa mutu uze nakalikiza. Kaha navamuzanga nawa kuli mukulwane wenyi wamilimo. Shikaho muka-kuzata wamwenemwene chinahase kupwa chachikalu kumufumisa hamilimo. Visoneka vyavuluka fweto eji kutambulanga muka-kukilikita ngwavyo, “wana wakufuma kuli Kalunga.”—Muka-kwambulula 3:13.
Pwenunga vaKashishi
“Tunafwelela ngwetu tuli nachivezu chamwaza omu tuli nakusaka ngwetu tupwenga vakashishi muvyuma vyosena.”—WAVAHEPELEU 13:18.
Nge natupwa vakashishi kaha katweshi kulimona kupwa tuvamokomokoko. Natuunda muchima nakusavala namuchima umwe. Vakwetu nawa navatufwelela nakutuvumbika. Oloze vatu vaze kavapwa vakashishiko kavamona vyuma kanevi tunavulukako. Kaha nawa chivezu chavo chinahase kuvahana milonga nakutwama muchiwomawoma hakushinganyeka ngwavo likumbi limwe navakavakwata.
Kanda Kumona Jimbongo Kupwa Jajilemu Chikuma Mukuyoya Chenuko
“Kutwama chenu chipwenga chakuzeneka kuzanga jimbongo, oku munasuuluka navyuma muli navyo.”—WAVAHEPELEU 13:5.
Twasakiwa kupwa najimbongo jakulanda vyakulya navyuma vyeka. Chipwe ngocho, “kuzanga jimbongo” cheji kunehanga ponde. Chinahase kulingisa mutu ahake kaha muchima kukutondatonda jimbongo jajivulu. Ngocho chinahase kuhaka ulo wenyi muponde nakuhona kupwa nalwola lwakushikama navana venyi nakumulingisa nawa avize. (WaChimoteu 1, 6:9, 10) Kaha nawa kuzanga jimbongo chinahase kulingisa mutu ahone kupwa wakashishi. Lunga umwe wamangana ambile ngwenyi: “Mutu wakushishika navakamukisula mwamunene, oloze ou mwawana luheto muwashiwashi keshi kukasambako.”—Vishimo 28:20.
Sakulenu Kulinangula Chamwenemwene
“Lamanga mangana amwenemwene nauhashi wakushinganyeka.”—VISHIMO 3:21.
Kulinangula chamwenemwene cheji kutukafwanga tupwenga tuvatu vamwenemwene, nakupwa visemi vamwaza. Oloze katweshi kuhasa kupwa navyuma vyosena nakupwa vakuwahilila nge natupendamina kaha hakunangula chakukayeko. Hakusaka vyuma vyosena natulinganga mukuyoya vifukile, twatela nawa kwitavila kutunangula kuli Kalunga. Visoneka vyahanjika hali mutu uze eji kwivwililanga kuli Kalunga ngwavyo: “Vyosena mwalinganga navifukilanga.”—Samu 1:1-3.
Pamo Nauzanga Nawa
KAPOSHI KAKUTALILA
Vyuma Mwatela Kulinga Hakusaka Mulivwise Kuwaha Kuzata naNgolo
Talenu omu Mbimbiliya yinahase kumikafwa mupwenga vakuwahilila nakusuuluka hakuzata milimo yenu.
TONENU
Uno Mweji Kulivulishilanga Vyakulinga Tahi?
Vatu vavavulu veji kuchiwananga kupwa chachikalu kuwana lwola lwakuzata milimo yavo namilimo yeka yahembo. Vyuma muka vinakuneha ukalu kana? Vyuma muka twatela kulinga mangana tukeheseko ukalu kana?
TONENU
Mwakupwila Vakuwahilila—Kusuuluka naMuchima Wakuhana
Vatu vavavulu vashinganyeka ngwavo vanahase kufukila nakupwa vakuwahilila nge navapwa navikumba naluheto lwaluvulu. Uno jimbongo naluheto vinahase kuneha kuwahilila chakwilila tahi? Kutala omu mukiko tahi?
VYAYETU
Lomba Vakutambukile
Shimutwilenu chihula chimwe chamuMbimbiliya chipwe kulinangula vyavivulu hali Vinjiho jaYehova.
