Vyuma Navitukafwa Tutwamenga muKuunda naVakwetu
Tengi yetu atulweza omwo tunahase kulivwisa kuwaha kutwama mukuunda navakwetu hembo, nakumilimo, chipwe namasepa jetu. Ivwenu vyuma vimwe anangula vize vinakafwe vatu vavavulu.
Konekelenunga Vakwenu
“[Likonekelenunga] navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo.”—WAVAKA-KOLOSE 3:13.
Tuvosena tweji kulimbenjanga. Tunahase kwivwisa vakwetu kupihya, chipwe vakiko kutwivwisa kupihya. Echi chikiko chatela kutulingisa tulikonekelenga navakwetu. Nge natukonekela mutu uze natwivwisa kupihya, kaha katweshi kumulamina kokoko. Kaha nawa katweshi ‘kumuhilwishila upi natulingi’ nakumwanukisanga tutenga twenyiko. (Wavaka-Loma 12:17) Nyi ngachilihi nge natulingi mwamupi chikuma, kaha chili nakutukaluhwila kuvulyamako? Twatela kushimutwila nenyi mukavumbi kwauka wetu. Chuma nachitulingisa tushimutwile nenyi shina kusaka kuneha kuunda, keshi kusaka kulisolola ngwetu yetu tunolokako.—Wavaka-Loma 12:18.
Pwenunga Vakulinyisa naKavumbi
“Linyisenunga nakumona vakwenu ngwenu vamihambakana enu.”—WAVAKA-FWILIPI 2:3.
Nge natupwanga vakulinyisa nakavumbi, kaha vatu navevwa kuwaha kupwa nayetu. Kaha nawa navatachikiza ngwavo, natuvasolwela likoji nakuvatetela, nakuhona kuvevwisa kupihya chakufuma kumuchima. Oloze nge natulimonanga ngwetu twapwa tuvavalemu kuhambakana vakwetu nakutakilika munayi muchima wetu, kaha natuneha vikokojola. Vatu navalihenda kuli yetu, ngocho katweshi kupwa namasepako. Numba nge natupwa navo, navapwa vavandende kaha.
Zangenunga Vatu Vosena
“Kalunga katala vatu kumesoko, oloze muli vaka-miyachi yosena, ou eji kumwivwanga woma nakulinganga vyuma vyakwoloka, veji kumwitavilanga kuli Kalunga.”—VILINGA 10:34, 35.
Tengi yetu kamona vatu vamwe ngwenyi vanahambakana vakwavo mwomwo yalifuchi lyavo, chipwe lilimi lyavo, chipwe chiyoyelo chavo chipwe chikova chavoko. “Kumutu umwe aloweleko miyachi yavatu yosena.” (Vilinga 17:26) Echi chili nakulumbununa nge, vatu vosena vapwa tanga yimwe. Nge natuvumbikanga vakwetu nakuvasolwela likoji, kaha navapwa vakuwahilila. Nayetu nawa natuwahilila nakwivwisa Tengi yetu kuwaha.
Pwenunga vaKuvova
“Vwalenu. . . kuvova.”—WAVAKA-KOLOSE 3:12.
Nge natupwa vakuvova, kaha vakwetu navapwa vakusuuluka. Kaha nawa navachiwana kupwa chachashi kutuhanjikisa nakutwolola mwomwo vanatachikiza ngwavo katweshi kupihililako. Kuvova chinahase kutulingisa tukumbulule vakwetu mujila yakuunda kachi nge vanapihilila nayetu. Mukanda waVishimo 15:1 wamba ngwawo: “Kukumbulula mujila yayivwovu cheji kupeulanga kulundundu, oloze mazu amapi eji kulingisanga mutu akwate matoto.”
Pwenunga muVaka-Kuhana Nakupwa naMuchima Wakusakwilila
“Kuhana cheji kunehanga kuwahilila chikuma kuhambakana kutambula.”—VILINGA 20:35.
Vatu vavavulu makumbi ano vakwechi muchima walifwi nakulizanga vavene. Oloze tunahase kupwa nakuwahilila chamwenemwene kachi nge natupwa tuvaka-kuhana. (Luka 6:38) Vaka-kuhana veji kupwanga vakuwahilila mwomwo vazanga vakwavo vatu kuhambakana kala vyuma. Kaha zangi kana yeji kuvalingisanga vapwenga namuchima wakusakwilila kachi nge vanavahaneko vyuma vimwe. (Wavaka-Kolose 3:15) Munahase kulihulisa ngwenu, ‘Uno mutu muka nangusaka kulikata nenyi? Uze apwa muka-lifwi nakuhona kupwa namuchima wakusakwilila tahi, nyi uze apwa muka-kuhana kaha nawa muka-kusakwilila?’ Shikaho, pwenunga nganomwo muli nakusaka vakwenu vapwenga.—Mateu 7:12.
Pamo Nauzanga Nawa
TONENU
Mwakupwila Vakuwahilila—Kukonekela
Nge mutu atwama namatoto nakoko, kaha keshi kupwa wakuwahilila nakulikangula mukuyoya chenyiko.
TONENU
MuKaye Muli Ukalu—Zamisenu Usepa naUsoko Wenu
Wanenu vyuma navimikafwa mukinge ulo wenu, nausepa wenu nakupwa nawa visemi vamwenemwene.
TONENU
Kulimona ulumbi—Sololenunga Zangi
Kusolola zangi chinahase kuhonesa muchima wakumona vakwetu ulumbi. Talenu jijila jino.
