Hakumbi hakumbi, vatu vavavulu chili nakuvakaluhwilanga kuwana vyuma vyakulikafwa navyo mukuyoya. Vyuma vyavipi vili nakusoloka muno mukaye nawa vili nakulingisa chiyoyelo chavatu chikaluhwe chikuma. Mwomwo ika?

• Kachi nge mungalila munasoloka ukalu, jindando javyakulya najizuvo jakufwetela vyeji kunyinanga chikuma.

• Ukalu weji kulingisanga vatu vahone kuwana milimo, chipwe kulingisa vaze navapwa hamilimo vatambule jimbongo jakuhona kutamo.

• Ukalu wakulijila weji kulingisanga vatu vahone jimbongo jakuvakafwa kusekasana, nakwenyeka jizuvo, chipwe vikumba vyeka nakuvalingisa vahutwe.

• Kachi nge namulamanga kanawa jimbongo jenu kaha chinahase kukamikafwa nge kunasoloka ukalu.

• Luheto kalweshi kuhasa kutukinga lwola lwosenako. Mwomwo vyuma vyakufwana nge jimbongo navikumba kavyelilako.

• Jimbongo kajeshi kuhasa kulanda kuwahilila nakulinunga mutangako.

Mbimbiliya yahanjika ngwayo: “Omu tuli navyakulya nauvwalo, natusuulukanga navyuma kanevi.”—WaChimoteu 1, 6:8.

Kusuuluka navyuma tuli navyo chalumbununa nawa kukehesako kufwila kupwa navyuma vize kavyapwa vyavilemu chikumako, nakusuuluka navyuma tuli navyo vize vyasakiwa mukuyoya. Kupwa namuchima kana nachitukafwa chikuma nge kunasoloka ukalu uze naulingisa vyuma vipihye mukuyoya chetu.

Hakusaka mupwenga vakusuuluka, mwatela kwalumunako vyuma mukuyoya chenu. Kachi nge namufwila chiyoyelo chauhando okunyi kamweshi najimbongo jakutamoko, nachimihaka muukalu.