• Vaka-kole vanafwilanga kufumisako Mbimbiliya. Chakutalilaho, mukanda waAn Introduction to the Medieval Bible wahanjika ngwavo, kushikulu “mumafuchi muze mwapwile vaka-Kulishitu, vatu vavakanyishilenga kutanga Mbimbiliya chikumanyi mumalimi avo. Vatu vayitangilenga vavamwenenga kupwa vaka-kulikanga.” Kaha nawa vaze vapwile nakwalumunanga Mbimbiliya halwola kana vavavetelenga chipwe kuvajiha.

• Numba tuhu Mbimbiliya vayimanyinyine nakole, oloze vanayisonekanga nakuyipangila chikuma kuvatu kuhambakana mikanda yeka yamukaye. JiMbimbiliya jaTesetamende yayihya chipwe jamuundu jakuheta kafwe jimbiliyoni 5 vanajalumunanga, mumalimi akuzomboka 2,800 nakujipangila kuvatu vavavulu. Oloze mikanda yamangana autu, nayasayasi, nayeka yangana vanayipangilanga kuvatu vavandende, kaha nawa yinasekenga mukuhita chamakumbi.

• Mbimbiliya yinalingisa malimi amwe atwaleho lika kupwako nakuhona kunawa. Chakutalilaho, Mbimbiliya yachiGerman valumwine kuli Martin Luther, yakafwile chikuma vatu vatachikize kanawa lilimi lyavo. Mbimbiliya yakavanga yaKing James Version vayivuluka ngwavo “mukanda umwe uze unakafwe vatu mukuyoya kuhambakana mikanda yeka.”

• Mbimbiliya “yinakafwe vatu vamumafuchi aluheto, namuvisemwa namukwitava. Yinavahanenga nawa chinyingi muvyuma vyakufwana nge kufunjejeka, nakusoneka mikanda, najishimbi, namuvyuma vyeka vyangana.”—The Oxford Encyclopedia of the Books of the Bible.

Evi hivyuma vimwe vize vyalingisa Mbimbiliya yilihandunune namikanda yikwavo. Mwomwo ika Mbimbiliya yinavulila kuvatu kuhambakana mikanda yeka? Mwomwo ika vatu vamwe vanalisuwilanga kuvajihila haMbimbiliya? Mwomwo Mbimbiliya yatwama namazu amwenemwene akututunga kushipilitu nakutukafwa mukuyoya mangana tuzange Kalunga. Mbimbiliya nawa yeji kutukafwa tutachikize ovyo vyaneha kuyanda kuvatu. Yatulweza nawa nge navakafumisako ukalu nakuyanda chosena kuvatu.

Kutanga mashikola chapwa chachilemu. Lipapilo limwe lyamijimbu muCanada lyambile ngwalyo: “Numba nge mutu mwaya kumashikola ahelu nakupwa navitupa vyakwipangweji, oloze chinyingi kana kacheshi kumulingisa apwenga navilinga vyamwazako.” (Ottawa Citizen) Chilolo Edelman uze alinangula chikuma vyakutanga chavatu ambile ngwenyi, vatu vakutanga chikuma vamufulumende navaka-kusekasana veji kwonga nakulila vatu hamitwe, nakwiva vyuma, chize chinakulingisanga vatu vahone kuvafwelela.

Mbimbiliya yeji kunangula vatu chinyingi chamwenemwene navyuma vyakushipilitu. Yeji kutunangulanga “nawa omu chapwa kwoloka, nomu mwaya chiyulo, nakusungama, chipwe ngwetu jijila jamwaza josena.” (Vishimo 2:9) Chakutalilaho, Stephen mukweze walunga wamyaka yakusemuka 23, vamukashile munjele mulifuchi lyaPoland, kaha aputukile kulinangula Mbimbiliya muze vene munjele. Omu atachikijile kulema chavyuma alinangwile ambile ngwenyi, “Ngunamono jino omu chalema ‘kuvumbika visemi.’ Ngunalinangula nawa mwakuhonesela matoto nautenu.”—Wavaka-Efwesu 4:31; 6:2.

Mazu akafwile Stephen shina aze atwama hali Vishimo 19:11 akwamba ngwavo: “Kunangakana chamutu cheji kuunjisanga matoto enyi, kaha chinawahe kuli ikiye kuliula vaka-kuzombwojoka jishimbi.” Makumbi ano nge vanamusangumuna eji kuundanga muchima nakuzachisa jindongi jamuMbimbiliya. Ambile nawa ngwenyi, “Mbimbiliya wapwa mukanda wamwaza wakukafwa vatu mukuyoya.”

Chakutalilaho chikwavo shina chaMaria uze apwa Chinjiho chaYehova. Likumbi limwe vamutukanyine kuli pwevo umwe uze ajinda miyachi yavakwavo. Chuma kana chatelele kukatula vikokojola. Muchishishisa chakulinga sambanjinga Maria aholele kulu nakuliyila. Uze pwevo amutukanyine evwile kupihya kaha ayile nakuhulisa Vinjiho ovyo vapwila namuchima wamwaza. Omu mwahichile kakweji valiwanyine cheka naMaria  kaha amumenekele nakulikonekela. Amulwezele ngwenyi muchima wenyi wakutalilila chikoki wasolwele nge kwitava chenyi chamuchano. Kufumaho uze pwevo navatanga jenyi 5 vaputukile kulinangula Mbimbiliya naVinjiho jaYehova.

Yesu ambile ngwenyi, milimo yakwoloka yeji kujimbulanga omu apwa mangana amwenemwene. (Luka 7:35) Echi chasolola nge jindongi jamuMbimbiliya jeji kukafwanga vatu, ‘nakuhana mangana kumutu wakuzeneka chinyingi,’ ‘nakulingisa muchima uwahilile,’ ‘nakulingisa meso amunyike’ nakumona vyuma vyamwaza.—Samu 19:7, 8.

Nge kunepuka musongo wachihita vandotolo veji kufwila kuwana ovyo vyanehanga musongo kana. Omu mukiko twatela kulinga hakusaka twivwishise ovyo vyaneha “ukalu” kuvatu. Mbimbiliya yatulweza kanawa omu ukalu waputukile.

Mukanda waKuputuka watulweza nge kuyanda chavatu chaputukile omu vatu vatete valikangile kuli Kalunga. Vasakwile valiyulenga vavene muchishishisa chakuvayula kuli Samatanga yavo. (Kuputuka 3:1-7) Kufuma vene haze, vatu vanafwilanga kuliyula vavene. Vyuma muka vinafumumo? Vatu jino vali nakuyanda, kaveshi vakulihehwako, kaveshi vakuwahililako, oloze lwola lwosena vali nakumona ukalu naluyanjisa, nakufwa zala yakushipilitu. (Muka-kwambulula 8:9) Mbimbiliya yahanjika ngwayo: “Mutu katwama nangolo jakulitwaminyina iveneko.” (Yelemiya 10:23) Oloze twawahilila hakutachikiza ngwetu kalinwaha vafumiseko vatu vaze vatwama namuchima wakuliyula vavene.

Mbimbiliya yatufwelelesa ngwayo Kalunga kalinwaha afumiseko vatu vavilinga vyavipi mangana vaze vononoka jindongi jenyi vatwame mukuwahilila. Vatu vakuhuka “navakamona ukalu havilinga vyavo vyavipi.” (Vishimo 1:30, 31) Oloze vavavwovu “navakalivwisa kuwaha kuunda chamwenemwene.”—Samu 37:11.

Kalunga mwakazachisa ‘Wangana wenyi’ nakutesamo vyuma vyosena ajinyine hakutenga mavu. (Luka 4:43) Wangana kana naukayula kaye kosena nakusuulwisa vatu. Yesu asolwele hatoma nge Wangana kana naukayula hamavu hosena omu alombele ngwenyi: “Wangana wove wizenga. Mwaya muchima wove mulingiwe . . . hamavu.”—Mateu 6:10.

Enga, vatu vaze navakapwa muchiyulo chaWangana waKalunga navakapwa navilinga vyamwaza, hakulondezeza Kalunga uze apwa Tengi yavo. Vilinga vyavipi, nalwiso, nauhutu, nakulitala havikova, najijita vyosena navikakuma. Nakukapwa fulumende yimwe kaha mukaye kosena, kaha vatu navakakavangizanga jishimbi jojimwe.—Kusoloka 11:15.

Hakusaka tukapwe mulifuchi kana, twatela kulinangula vyuma asaka Kalunga. Hali WaChimoteu 1, 2:3, 4 vatulweza ngwavo:  “[Kalunga] ajina ngwenyi vatu vosena vavalwile, ngwenyi, vapwenga nachinyingi chakwoloka chakutachikiza muchano.” Muchano kana shina wakuvuluka vyuma yanangula Mbimbiliya. Vyuma kana shina jishimbi najindongi jize vatela kukavangiza vaze navakapwa muchiyulo chaWangana kana, jakufwana nge jize vahanjika muChihande chaYesu Kulishitu chahaPili. (Mateu, kapetulu 5-7) Hakutanga tupetulu kanava vatatu, mwatela kushinganyeka omu nachikapwa kuyoya halwola luze vatu vosena navakakavangiza mazu aYesu.

Uno twatela kulikomokela hakuwana nge Mbimbiliya yatanda chikuma kuvatu tahi? Nduma, mwomwo yatwama najishimbi jajilemu jakufuma kuli Kalunga. Kuvula chaMbimbiliya, chasolola nge Kalunga asaka vatu vakumalimi nakumiyachi yosena vamutachikize mangana vakalivwise kuwaha vyuma vize naukaneha Wangana wenyi.—Vilinga 10:34, 35.