Tulweze okwo wafuma nokwo wasemukilile.

Ngwasemukile mu 1966 kaha ngwakolelele mulifuchi lyaTaiwan. Visemi jami vapwilenga mukwitava chaTaoism naBuddhism. Twapwilenga nakulemesa vakulu, nakulifukula kutuponya, kaha katwatachikijile ngwetu Kalunga yikiye atengele vyuma vyosenako.

Mwomwo ika walinangwililile vyasayasi?

Omu ngwapwile ngukanyike, ngwazangile chikuma kupita tuwa natumeshi nakuvalama kanawa. Kaha ngwalinangwile vitumbo vyakuka tunyama, oloze kutwala muze ngwalinangwile vyomu mwana eji kutungikanga mujimo lyamutu. Ngwashinganyekele ngwami echi nachingukafwa kwijiva omu chapwa kuyoya.

Kunyima wafwelelele nge vyuma vyalijililile vivene. Mwomwo ika?

Milongeshi vakukuluka malambu vahayunivesiti vakiko vangunangwile vyuma kana, kaha ngwavitavilile.

Mwomwo ika waputukilile kulinangula Mbimbiliya?

Ngwafwilile kutachikiza vyuma vivali. Chatete, ngwatachikijile ngwami vatu veji kulemesanga tulunga vavavulu, oloze kangwejivile umwe ulihi apwile wamulemu kuhambakana vakwavo. Chamuchivali, ngwatachikijile ngwami Mbimbiliya wapwa mukanda waulemu, ngocho ngwasakile kulinangula vyuma yahanjika.

Omu ngwaputukile kulinangula vyakukaye mu 1992 muBelgium haCatholic University of Leuven, ngwayile kuchachi yaKatolika. Kaha ngwahulishile kapilishitu mangana angulongese Mbimbiliya, oloze akanyine.

Kaha iya akumbulwile vihula vyove?

Omu mwahichile myaka yivali, te nguchili lika muBelgium nakulinangula vyasayasi, ngwaliwanyine naRuth, Chinjiho chaYehova uze ahanjika lilimi lyaPolish. Alilongesele lilimi lyaChinese mangana anangule Mbimbiliya vaka-shikola vaze vazangile kulinangula vyaKalunga. Ngwalombelenga ngwami nguliwane namutu wakungukafwa, kaha ngwevwile kuwaha kuliwana nenyi.

Ruth angulwezele ngwenyi numba tuhu Mbimbiliya kayapwa mukanda wasayasiko, oloze yakundwiza sayasi. Chakutalilaho Ndavichi uze asonekele mazu amwe muMbimbiliya alombele ngwenyi: “Meso ove angumwene shimbu ngwapwile ngumuvisu. Vihanda vyami vyosena wavisonekele mumukanda wove, wasonekelemo namakumbi vyapwile nakulitunga shimbu kanda vyosena vipwengako.” (Samu 139:16) Numba tuhu Ndavichi apwile nakwimba mwaso, oloze mazu ahanjika apwile nakukundwiza sayasi. Shimbu kanda vilyo vyamujimba vitungike, oloze mijimbu yosena yakuutunga kuyatwama. Vyuma kana vyangulingishile ngufwelele ngwami Mbimbiliya yapwa Mazu aKalunga.  Ngwalinangwile nawa ngwami kwatwama Kalunga wamuchano umwe kaha Yehova. ¹

Ika yakulingishile ufwelele ngwove Kalunga ikiye atengile vyuma vyakuyoya?

Vaka-sayasi veji kufwila kusandasanda mangana vawane ovyo vyalingisa chuma kana chipwengako kuhambakana kuvifwelela kaha. Omu ngwalinangwile vyomu mwana eji kuputukanga kulitunga mujimo ngwamwene jino ngwami vyuma valingile vyakutenga. Ngana muze vamanjimela veji kutunganga chihanda hichihanda chaminyau nakuchisokeka muze chatela kupwa, namwana wamujimo mukiko eji kuputukanga kulitunga mujila yakulipwila.

Mwana mujimo eji kuputuka kulitunga omu mbuto yakusema yalunga napwevo yeji kuliwananga tahi?

Eyo. Nge eyi mbuto yinaliwane, yeji kuputuka kulipanga vihanda vyamujimba. Mukuhita chalwola yeji kulipanga vihanda vyavivulu. Kaha nawa maselusi amanene eji kuputuka kulitunga. ² Kweji kusemukanga maselusi amavulu akutunga mujimba akufwana nge amanyinga, nawa avifuwa, namishisa, namaselusi avihanda vyeka.

Liselusi hiliselusi lyatela kulitunga kanawa nakutwama hachihela haze lyatela kupwa. Hakavanga maselusi eji kupwanga hamwe, kutwala muze hinawalihandununa muvihanda vyavivulu. Kakweshi manjimela numba umwe mwahasa kushinganyeka kusoneka jindongi kanejiko. Oloze jindongi josena jakusolola omu mwana atela kulitunga mujimo jatwama mutumeya twamuliselusi hiliselusi vavuluka ngwavo DNA. Kushinganyeka havyuma kanevi, cheji kungulingisanga ngufwelele ngwami Kalunga ikeye atengele vyuma vyakuyoya.

Ika yakulingishile upwenga Chinjiho chaYehova?

Chuma changulingishile shina zangi. Yesu ambile ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowano 13:35) Zangi kana kayatwama nakahandununako, chipwe kumona vatu mweka namweka mwomwo yalifuchi vafuma, chipwe chisemwa, chipwe chikovako. Omu ngwaputukile kulikata naVinjiho jaYehova, hakiko jino ngwamwene zangi kaneyi yamuchano.