Omu Dami apwile namyaka yakusemuka 6, ise afwile namusongo wamutwe. Omu Derrick apwile namyaka yakusemuka 9, ise afwile namusongo wamuchima. Kaha nawa omu Jeannie apwile namyaka yakusemuka 7, naye afwile namusongo wakasa. *

Vosena vatatu vahichile muukalu wakufwisa vatu vazanga. Kutala nayenu mwahitaho lyehi muukalu kana tahi? Nge mukiko, kaha chihande chino nachimikafwa mumike muukalu kana. * Chakavanga tuchitalenu havyuma vimwe kutalisa kukulishona.

Vatu veji kulishonanga mujijila jakulisezaseza. Echi chili nakulumbununa nge jila namulishonenamo yinahase kulihandununa navakwenu. Mukanda vavuluka ngwavo Helping Teens Cope With Death wamba ngwawo, “kakwatwama jishimbi jize atela kukavangiza mutu nge ali nakulishonako.” Chuma chachilemu mwatela kulinga shina kuhona kulikanyisa kulila. Mwomwo ika? Mwomwo . . .

Kulikanyisa kulila chinahase kuneha ukalu. Jeannie ambile ngwenyi: “Ngwamwene ngwami ngwatela kumika mangana nguvendejeke songo yami wapwevo. Ngocho ngwalikanyishilenga kulila. Noholyapwa ngweji kulikanyisanga kulila numba tuhu ngunakwivwa chinyengo, oloze kulinga chuma kana chinahase kungunehela ukalu.”

Vatu vaze valinangula chikuma navakiko vetavila chuma kana. Mukanda waThe Grieving Teen wamba ngwawo: “Kulikanyisa kulila chapwa chachipi chikuma mwomwo chinahase kukanehela mutu ukalu kulutwe.” Kulikanyisa kulila chinahase nawa kulingisa mutu anwenga chikuma wala namaundu akupendesa mangana ngwenyi avulyameko ukalu kana.

Kulishona cheji kulingisanga mutu apwenga navishinganyeka vyakuhenga. Chakutalilaho, vatu vamwe veji kupihililanga namutu uze nafu hakushinganyeka ngwavo navachinyi. Veka nawa veji kuhananga Kalunga mulonga ngwavo kachi ketavisanga mutu kana afwengako. Vatu vavavulu veji kulihananga mulonga mwomwo yavyuma vimwe valingile chipwe vahanjikile kuli mutu uze nafu hakuwana nge kaveshi kuhasa kulikonekelako.

Chikupu vene, kulishona chapwa chachikalu kwivwishisa. Vyuma muka navimikafwa mangana mukeheseko kulishona?

Lwezenuko mutu weka ukalu wenu. Halwola kanelu munahase kushinganyeka ngwenu mwatela kupwa kaha ukawenu. Oloze nge namulwezako mutu umwe mutanga chipwe sepa lyenu vyuma munakushinganyeka, chinahase kumikafwa mulipike naukalu kanou.—Lushimbi lwamuMbimbiliya: Vishimo 18:24.

Vyuma munahase kusoneka. Sonekenu mujimbu wachisemi uze nafu. Chakutalilaho, sonekenu vyuma vize mweji kumwanukilangaho. Sonekenu vilinga vyamwaza vize apwilenga navyo. Vilinga muka namusaka kulondezeza mukuyoya chenu?

Shimbu jimwe munahase kulipika navishinganyeka vyakuhenga. Chakutalilaho, nge muli nakushinganyeka hamazu amapi aze mwambile chisemi chenu shimbu kanda afwenga, kaha mwatela kusoneka omu muli nakwivwa novyo vili nakumilingisa mwivwenga ngocho. Pamo munahase kusoneka ngwenu: “Nguli nakulihana mulonga mwomwo ngwalikokojwesele natata, kaha lichako tata afwile.”

Chikwavo nawa, kamwatela kulihana mulongako. Mukanda waThe Grieving Teen wamba ngwawo, “kamwatela kulihana mulonga havyuma mwahanjikile kumutu uze nafu mwomwo kamwejivile ngwenu mutu kana mwafwa, kaha kamweshi kukahasa kukalikonekelako. Tuvosena tweji kuhanjikanga nakulinga vyuma vimwe vize tweji kuliveyanga kulutwe. Shikaho katweshi kuhasa kuhonesa ukalu kanako.”—Lushimbi lwamuMbimbiliya: Yopa 10:1.

Lizakamenu. Pwenunga nalwola lwaluvulu lwakusavala, nakulinyuka mujimba, nakulya vyakulya vyamwaza. Kachi nge kamweshi nachipepa chavyakulyako, kaha munahase kulyangako tuvisakwola palanga nomu namukapwa nachipepa chavyakulya. Kamwatela kundupukila mukunwa wala chipwe kulya kaha tuvyakulya twausekesekeko mwomwo nachiminehela ukalu.

Lombenu kuli Kalunga. Mbimbiliya yamba ngwayo: “Mbila chiteli chove hali Yehova, kaha ikiye mwakuzamikisa.” (Samu 55:22) Kulomba kachapwa kaha hichuma chize mwatela kulinga mangana mwivwenga hwo kumuchimako. Chapwa hikushimutwila naKalunga uze eji “kutuvendejekanga muvyeseko vyetu vyosena.”—Wavaka-Kolinde 2, 1:3, 4.

Jila yimwe yize Kalunga eji kuzachisanga hakutuvendejeka shina kuhichila muMazu enyi Mbimbiliya. Kekesenu vyuma yanangula Mbimbiliya mangana mutachikize vyuma vyeji kusolokanga kumutu nge nafu nalutalililo lwakusanguka. *—Lushimbi lwamuMbimbiliya: Samu 94:19.