MUJIMBU WADAMI

Tata aputukile kuviza mutwe. Kutwala muze misongo yatohwele, kaha mama asanyike minyau yizenga nakumumbata. Nguchili lika nakwanuka omu vanase vejile nakumumbata. Kangwejivile ngwami olu lukiko lwapwile lwola lwamakumishilo kumona tatako. Omu mwahichile makumbi atatu, tata afwile. Halwola kana ngwapwile kaha namyaka yakusemuka 6.

Hamyaka yayivulu ngalihanyinenga mulonga hakufwa chatata. Kakavulu ngwanukilenga omu vanase vejile nakumbata tata, kaha ngwalihulishilenga ngwami: ‘Mwomwo ika ngwemanyine kaha nakutala vyuma vyapwile nakusoloka? Mwomwo ika ngwahonenene kulingako vyuma vimwe?’ Shimbu jimwe ngwatalilenga vakulwane vaze vapwile nakuviza nakulihulisa ngwami, ‘Mwomwo ika vakiko vali nakuyoyela lika, oloze tata nafu?’ Kutwala muze mama angulwezele ngutufule vyapwile mumuchima wami. Hakuwana nawa nge twapwile tuVinjiho jaYehova, chikungulwilo chatukolezezele chikuma.

Vatu vamwe vashinganyeka ngwavo mutu eji kulishonanga haze vene mwafwisa nakuvulyamako, oloze kachapwile ngocho kuli yamiko. Ngwaputukile kulishona omu ngwapwile ngumukweze.

Chuma nangukafwa vakwetu vaze vafwisa visemi javo shina, “Vatela kulwezako mutu umwe vyuma vali nakushinganyeka. Mwomwo kulinga ngocho nachivakafwa vapwenga vakulikangula kumujimba.”

Chikupu vene, kutwama chakuzeneka tata hiukalu waunene chikuma uze kanda ngumonengaho lyehi mukuyoya chami. Chipwe ngocho, mukanda waKusoloka 21:4 weji kunguvendejekanga chikuma. Wamba ngwawo, kalinwomu Kalunga ‘ahunde masoji osena kumeso etu, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.’

MUJIMBU WADERRICK

Kakavulu ngweji kwanukanga omu twayilenga nakulova natata nakuya nawa nakuhema kujipili. Tata azangile chikuma jipili.

Tata avijilenga musongo wamuchima halwola lwalusuku. Nguli nakwanuka lwola lumwe ngwayile nakumumenekela muchipatela omu ngwapwile ngukanyike. Oloze kangwatachikijile kutohwa chamusongo wenyiko. Kahomu ngwapwile namyaka yakusemuka 9, tata afwile namusongo kana.

Omu afwile ngwalilile chikuma. Ngwevwilenga chitukulu kumuchima, ngocho kangwasakile kuhanjikisa numba mutuko. Ukalu kana wapwile waunene chikuma, kaha kangwasakile kulinga chuma numba chimweko. Vakwetu vakweze vamuchachi ngwapwilenga vanguzakamine, oloze kutwala muze valitwaminyinyine. Vatu vamuchachi  kana vahanjikilenga vyuma vyavivulu chikuma. Vamwe vambilenga ngwavo, “Elu lukiko lwola vatongwelelele iso kufwa,” veka ngwavo “Kalunga ikiye namusanyika,” vakwavo ngwavo, “Oholyapwa ngana ali mwilu.” Vishinganyeka kana kavyangusuulwishileko mwomwo kangwatachikijile vyuma yahanjika Mbimbiliya hakufwako.

Mukuhita chalwola, mama aputukile kulinangula Mbimbiliya naVinjiho jaYehova, kaha kutwala muze ami nayaya walunga twaputukile nayetu kulinangula. Twatachikijile jino vyuma vyeji kusolokanga kuli mutu nge nafu, nalushiko lwaKalunga lwakusanguka. (Yowano 5:28, 29) Mukanda waIsaya 41:10 wangukafwile chikuma, wamba ngwawo: “Kanda nawivwa womako, mwomwo nguli nayove. Kanda naulizakaminako, mwomwo nguKalunga kove, nangukujikijisa, nangukukafwa.” Kutachikiza ngwami Yehova ali nayami changuvendejekele chikuma, kaha noholili mazu kana achili nakunguvendejeka.

MUJIMBU WAJEANNIE

Omu ngwapwile namyaka yakusemuka 7, mama afwile namusongo wakasa. Likumbi kana mangana angukumine. Mama afwililile hembo, kaha nakaka walunga nou wapwevo vosena kuvapwile. Tuvosena chatushimine. Kuheta nachingoloshi vawahishile vyakulya, kaha twalile. Ngwevwile kwijiva nge kuyoya chami chili nakwalumuka chindende chindende.

Halwola kana namyaka yakavangijileho, ngwamwene ngwami ngwatela kumika mangana nguvendejeke songo yami wapwevo. Ngocho ngwalikanyishilenga kulila. Noholyapwa ngweji kulikanyisanga kulila numba tuhu ngunakwivwa chinyengo, oloze kulinga chuma kana chinahase kungunehela ukalu.

Omu mama afwile, Vinjiho jaYehova vamungalila yetu vatuzakamine chikuma. Numba tuhu twapwile tuvavahya muliuka kana, oloze vandumbwetu vatuzakamine chikuma kwijiva nge twatwaminemo myaka yayivulu. Vandumbwetu vatuwahishililenga vyakulya, kahechi chalingishile tata alihehwe.

Mukanda waSamu 25:16, 17 ukiko weji kungufwanga chikuma. Muka-kwimba jisamu alembelele Kalunga ngwenyi: “Ngutale ungwivwile uselewa mwomwo nguli uka wami kaha nawa kangweshi nangoloko. Luyando lunavulu mumuchima wami, ngusokole kukulyonyinga chami.” Chuma cheji kunguvendejekanga shina kutachikiza ngwami, nge ngunahombo, Kalunga mwangukafwa. Chikupu vene, Mbimbiliya yinangukafwe ngutwaleho lika kumika nakutalilila vyuma vyamwaza vatushika muMbimbiliya vyakutalisa kukusanguka. Ngunakutalilila kulwola luze nangukamona cheka mama wamukangule mupalachise hano hamavu.—WaPetulu 2, 3:13.

Kutala mulinakusaka kulinangula vyavivulu hamijimbu yamuMbimbiliya yakuvendejeka yavaze vali nakulishona tahi? Kaha tutululenu mboloshuwa yakwamba ngwavo “Nge Mutu Wazanga Nafu.” Yenu ha www.pr418.com, kaha talenu havanavuluka ngwavo MIKANDA >MIKANDA NAJIMBOLOSHUWA.