VISEMI
8: Chakutalilaho
OMWO CHALUMBUNUKILA
Visemi veji kunangulanga vana vavo hakuvasolwela chakutalilaho chamwaza. Achishinganyekenu nge kuneza mutu, kaha ali nakungongomweza kuchikolo, oloze enu kamwazangile kuhanjika namutu kanako, hinamulweza mwanenu alweze mutu kana ngwenu: “Mulweze ngwove kangweshi hazuvoko,” echi nachilingisa mwanenu nawa ahone kuhanjikanga muchano.
“Visemi kavatela kufwelela ngwavo vana vavo navalinganga vyuma vyakwoloka, nge vakiko kavalinga vyuma kanako. Vana vapwa nge chuma chize chinahase kulama mazu aze natuhanjika navilinga vyetu vyosena. Kaha veji kutulwezanga nge vilinga vyetu vinalimbalaka navyuma tweji kuvanangulanga.”—David.
LUSHIMBI LWAMUMBIMBILIYA: “Ove weji kwambululanga ngwove “Kanda kwivako,” uno weji kwivanga tahi?”—Wavaka-Loma 2:21.
OVYO CHAPWILA CHACHILEMU
Vana veji kulinangulanga vyavivulu kuli visemi javo kuhambakana kuli kala mutu. Echi chinakulumbununa nge visemi vakiko vatela kutwaminyina vana vavo mujila yakwoloka. Ngocho mwatela kulinganga vyuma vize mweji kunangulanga vana venu.
“Shimbu jimwe tunahase kuhanjika hachuma chochimwe mapapa kakavulu nakushinganyeka ngwetu pamo mwanetu keshi nakwivwililako, oloze likumbi natukahona kulinga vyuma vize tweji kuhanjikanga ngwetu vyakwoloka, mwanetu nahase kutulweza hatoma vyuma kana. Ngocho vana veji kuhakanga mangana kuvyuma tweji kuhanjikanga nakulinga, chakuzeneka etu kutachikiza.”—Nicole.
LUSHIMBI LWAMUMBIMBILIYA: “Mangana akufuma mwilu . . . kaweshi kulyongako.”—WaYakova 3:17.
VYUMA MWATELA KULINGA
Likekesenu enu vavane. Kulihizumuna chamuyachi muka mwazanga? Uno mweji kumonanga ngachilihi muka-mahyenu navana venu? Uno masepa muka mwatwama navo? Kutala mweji kushinganyekelangako navakwenu tahi? Uno mwasaka vana venu vakapwe navilinga nge vize mwatwama navyo yenu tahi?
“Ami nalunga lyami twasaka vana vetu vakapwe navilinga ngana vyayetu.”—Christine.
Likonekelenunga nge munalimbenje. Vana venu vatachikiza ngwavo nayenu munahase kulimbenja. Shikaho, kachi nge namulikonekelanga kuli muka-mahyenu navana venu, kaha namuhana chakutalilaho chamwaza chakupwa namuchima wakulinyisa.
“Vana vetu veji kwivwanga kuwaha nge natwitavila vyuma tunalimbenje nakulikonekela havyuma kana. Nge katweshi kulinga ngochoko, kaha navakiko kaveshi kulikonekelanga havyuma vanalimbenjeko.”—Robin.
“Etu visemi tukwechi mulimo waunene wakunangula vana vetu. Ngocho, kuvasolwela chakutalilaho chamwaza nachivakafwa mwomwo veji kumonanga vilinga vyetu lwola lwosena. Kumonanga vilinga vyetu shimbu yosena, chili nge tunakunangula vana hakumbi hakumbi.”—Wendell.
Pamo Nauzanga Nawa
KAPOSHI KAKUTALILA
Vyuma Muka Navikafwa Mutu Apwenga Chisemi Wamwaza?
Munahase kulela ngachilihi vana venu vapwenga navilinga vyamwaza?
