Vatu vamwe vaze vatwama muulo veji kulisolwelanga zangi nahalwola navalikokojwesa. Mukanda waTen Lessons to Transform Your Marriage wahanjika kutalisa kuli vatu kana ngwawo: “Vatu vaze veji kulisolwelanga zangi muulo wavo veji kulihendanga kukulikokojwesa chikuma chize chinahase kuvalingisa vahone kukumisa ukalu wavo. Kaha veji kushimutwilanga nahaukalu weka unahase kuvawana. Veji kwivwililanga kuvyuma mwahanjika mukwavo mujila yakalemesa nakuwanako jila yimwe yize nayisuulwisa vosena.”

LUSHIMBI LWAMUMBIMBILIYA: “Zangi . . . kayeshi kufwila vyuma vyayo yiveneko.”—Wavaka-Kolinde 1, 13:4, 5.

“Kuvumbika puwami cheji kusololanga nge ngwamumona kupwa wamulemu chikuma, kaha nawa ngwafwila kulihenda kukulinga vyuma vize navimwivwisa kupihya chipwe kujiha ulo wetu.”—Micah.

Kachi nge vatu muulo navahona kulivumbika, kaha nachivalingisa vazachisenga mazu akasautu nakutokomenya hatutenga twamuka-mahyavo. Vaka-kuhehwojola vawana nge evi vyuma tunavuluka vikiko vyeji kulingisa vatu valilukulule washi.

“Kupwa nahanjikiso yakasautu nakusapula chaseya kuli muka-mahyenu chinahase kumwivwisa kumuchima kupihya nakumulingisa ahone kumifwelela, nakujiha ulo wenu.”—Brian.

LIHULISENU ENU VAVENE

Shinganyekenu jila munazachisa hakushimutwila namuka-mahyenu muchalumingo chamuundu. Kufumaho lihulisenu enu vavene ngwenu:

• ‘Mapapa kangahi ngunalumbilisa muka-mahyami, kaha nawa mapapa kangahi ngunamusakwilila muka-mahyami?’

• ‘Mujila muka ngweji kusololanga kavumbi kuli muka-mahyami?’

SHIMUTWILENU NAMUKA-MAHYENU

• Hanjikiso navilinga muka vize vyasolola nge mwavumbika muka-mahyenu?

• Hanjikiso navilinga muka vize navisolola nge kamwavumbika muka-mahyenuko?

VYUMA NAVIMIKAFWA

• Sonekenu jijila jitatu jize najisolola omu muli nakusaka muka-mahyenu amisolwelemo kavumbi. Lwezenu muka-mahyenu naikiye alinge mwomumwe. Lihanenu mapapilo munasonekaho nakuzachila havyuma nasoneka muka-mahyenu kutalisa kujijila jakumusolwelamo kavumbi.

• Sonekenu nawa vilinga vyamwaza atwama navyo muka-mahyenu. Kaha mulwezenu ngwenu mwazanga vilinga kana.

“Kuvumbika lunga lyami chalumbununa nge ngwatela kupwa navilinga vize navisolola nge ngwamumona kupwa wamulemu kaha nawa ngwasaka apwenga wakuwahilila. Vilinga vyamwaza, navyuma vimwe ngweji kumulingilanga vikiko vyeji kusololanga nge ngwamuvumbika.”—Megan.

Chuma chachinenenyi shina, muka-mahyenu ikiye atela kumona nge muli nakumuvumbika keshi yenuko.

LUSHIMBI LWAMUMBIMBILIYA: “Vwalenu muchima wakeke, nalikoji, nakulinyisa, nakuvova, nakutalilila chikoki.”—Wavaka-Kolose 3:12.