Kukonekela chalumbununa kuvulyama vyuma nakupihisa mutu nakuhona kumulamina koko. Kaha nawa chalumbununa nge, katwatela kuliula vyuma vanatulingi vakwetu kwijiva nge nevi vanatupihisa vene vyauchi.

LUSHIMBI LWAMUMBIMBILIYA: “Itavilenunga lika tutenga twavakwenu, nakulikonekelanga navakwenu namuchima wakusuuluka numba tuhu mutu umwe ali nachuma chimwe chakumulingisa ayayavale hali mukwavo.”—Wavaka-Kolose 3:13.

“Nge mwazanga mutu, kaha kamwatela kutalanga havyuma alimbenjele kunyimako, oloze mwatela kutala omu anakuzata nangolo aseze vilinga vyenyi vyavipi.”—Aaron.

Kulaminanga koko muka-mahyenu chinahase kumilingisa muhone kulikangula mukuyoya chenu namuvishinganyeka, kahechi chinahase kujihisa ulo wenu.

“Likumbi limwe omu lunga lyami alingile vyuma vize vyangwivwishile kupihya, alikonekelele oloze chapwile chachikalu kuli yami kumukonekela. Kutwala muze ngwamukonekelele, oloze ngwaliveyele hakuhona kumukonekela washi. Mwomwo chanehele ukalu muulo wetu.”—Julia.

LIHULISENU ENU VAVENE

Likumbi mwakahanjika muka-mahyenu chipwe kulinga vyuma vize navikamivwisa kupihya, kalihulisenu ngwenu:

• ‘Kutala ngweji kukwatanga washi matoto tahi?’

• ‘Uno vyuma nalimbenje muka-mahyami vinakusakiwa ezenga alikonekele kuli yami, nyi pamo ngwatela kuviliula kaha tahi?’

SHIMUTWILENU NAMUKA-MAHYENU

• Uno tweji kulikonekelanga washi nge tunalikokojwesa tahi?

• Vyuma muka twatela kulinga mangana tulikonekelenga washi?

VYUMA NAVIMIKAFWA

• Nge vanamivwisa kupihya kuli muka-mahyenu kaha kamwatela kumumona nge akwechi muchima waupiko.

• Nge muka-mahyenu nalimbenje esekenu kumwivwishisa nakwanuka ngwenu “tuvosena tweji kuhukananga kakavulu.”—WaYakova 3:2.

“Chapwa chachashi kulikonekela nge tuvosena tunalimbenje, oloze chapwa chachikalu kukonekela nge umwe ikiye nalimbenje. Kwitavila lukonekelo chasakiwa mutu kupwa wakulinyisa.”—Kimberly.

LUSHIMBI LWAMUMBIMBILIYA: “Livwasane washiwashi namutu.”—Mateu 5:25.