VAZE VALIMBATA
1: Kushishika
OMWO CHALUMBUNUKILA
Vatu valimbata vatela kupwa vakushishika muulo wavo nakufwila kutwama hamwe shimbu yosena. Echi cheji kuvakafwanga vapwenga vakukingiwa. Mutu himutu muulo atela kufwelela ngwenyi muka-mahyenyi mwatwalaho lika kupwa wakushishika chamokomoko nakala ukalu navahitamo.
Vatu vamwe vaze valimbata, vanahase kulikanjikiza kutwama muulo mwomwo yakuvashinjila kuli vausoko wavo chipwe masepa javo. Oloze chuma chachilemu chatela kuvalingisa vatwame hamwe shina kavumbi nazangi yamuchano.
LUSHIMBI LWAMUMBIMBILIYA: “Lunga katela kuseza pwevo lyenyiko.”—Wavaka-Kolinde 1, 7:11.
“Kupwa vakushishika muulo wenu kachalumbununa nge kamweshi kulimbalakanga namuka-mahyenuko. Mwatela kulikonekelanga washi. Ukalu namumonanga namuka-mahyenu kawatela kumilingisa mujihe ulo wenuko.”—Micah.
OVYO CHAPWILA CHACHILEMU
Vatu vamwe vaze kavapwa vakushishika kuli vaka-mahyavoko, nge vanamono ukalu veji kwambanga ngwavo, ‘twalimbachile tuhu, oloze katwalitelako.’ Echi cheji kuvalingisanga vafwile kuwana jijila jakujihilamo ulo wavo.
“Vatu vavavulu veji kwingilanga muulo navishinganyeka vyakukafwila kujiha malo kachi nge kavaliteleleleko. Nge vatu navengila muulo navishinganyeka vyakufwila kukalilukulula, kaha kavapwa vakushishikako.”—Jean.
VYUMA MWATELA KULINGA
LIHULISENU ENU VAVENE
Nge munaputuka kulikokojwesa namuka-mahyenu . . .
-
Uno mweji kuliveyanga ngwenu mwomwo ika mwambachililile chipwe kusomboka kumutu kana tahi?
-
Kutala mweji kushinganyekanga muli namutu weka muulo tahi?
-
Uno shimbu jimwe mweji kuhanjikanga ngwenu “nangukuseza” chipwe “nanguya nakutonda mutu uze mwanguzanga tahi”?
Kachi nge munakumbulula kuchihula chimwe chipwe vyosena ngwenu eyo, kaha fwilenu chikuma kupwa vakushishika muulo wenu.
SHIMUTWILENU NAMUKA-MAHYENU
-
Uno tuchili nakutwalaho lika kupwa vakushishika muulo wetu tahi? Nge nduma, kaha mwomwo ika?
-
Vyuma muka twatela kulinga mangana tutwaleho lika kupwa vakushishika muulo wetu?
VYUMA NAVIMIKAFWA
-
Sonekelenu muka-mahyenu vyuma vize navisolola nge mwamuzanga
-
Sololenu nge mwapwa vakushishika kuli muka-mahyenu hakulamika mivwimbimbi yenyi kuchihela mweji kuzachilanga
-
Mwatela kutuminanga shinga muka-mahyenu nge ali kumilimo chipwe nge kamweshi hamweko
LUSHIMBI LWAMUMBIMBILIYA: “Chuma chize Kalunga nanungu hamwe mutu kanda achihandununako.”—Mateu 19:6.
